YOHANES 6
6
Yesus nupakang u taumata l᷊ima hiwu su kataunge
(Mat. 14:13-21; Mrk. 6:30-44; Luk. 9:10-17)
1Pirang katempo bou e'e I Yesus natamai sarang simbuka ngu rano Galilea, ko isigho l᷊ai rano Tiberias. 2Su sasongonge pai se'e, maul᷊i taumata nutumuhu si Sie, watu'u i sire seng mbuae nakawua kaul᷊iu ko makal᷊aherang ko nikoa-E su hal᷊i u mupakaul᷊e ngu manga taumata masaki. 3I Yesus natarai sumaka sarang wul᷊ure, wuhue nukumangiang rasi se'e dingang u manga tumatuhu-E. 4Tempo e'e seng masandighi L᷊ou ngu Paskah ngu Yahudi 5Su tempo I Yesus katuhunge tamai-mai susindihang-E, I Sie nakawua taumata maul᷊i-ul᷊i nutumuhu sarang koa I Sie. Kute I Sie nangul᷊i si Filipus, “Su apa kite makarea pul᷊uangeng kang tadeau kaul᷊i taumata i'i makakang?” 6I (Yesus seng matitong apa ko sarung koateng-E, katewe I Sie nangul᷊i kere'e watu'u I Sie mo manuka si Filipus.)
7I Filipus nusumimbahi, “Boroti harga ngu dua hasu doi sal᷊aka#6:7: doi sal᷊aka: Doi sal᷊aka simbau ko wawaehi silou su singkatau mul᷊ahal᷊i: (putuhung Mat. 20:2) sarung ta makataung su manga taumata i'i, maning singkatau kitang makarea pusingkodo.”
8I Andreas singkatau tumatuhu I Yesus wal᷊inge, ko ana u singkatau ngi Simon Petrus nangul᷊i, 9“Su si'i pia ana koese dingang u boroti l᷊ima mbau dingang u kina dua mbua. Kateho apa mangal᷊enge e'e su taumata kere i'i kaul᷊i e?”
10I Yesus nangul᷊i, “Roite apang taumata e'e pakangiang,” Su tampa e'e napene u onasi, inau manga taumata e'e kumangiang su onasi – kaul᷊i patehang pia ko manga l᷊ima hiwu sukataunge koese. 11Bou e'e I Yesus nangal᷊a boroti e'e, wuhue nutarimakase su Mawu Ruata. Bou e'e I Sie nupahia u boroti e'e su taumata maul᷊i. Bou e'e I Sie namahia u kina e'e, dang i sire nukumang sarang nasahe-sahe. 12Suapang kaul᷊ie nukumang sarang nal᷊aeri, I Yesus nangul᷊i su manga tumatuhu-E, “Komol᷊iko l᷊umbeungu kang e'e; kumbahang sarang pia ko mangholo.” 13Bou e'e i sire nangomol᷊i l᷊umbeinge mborong mapul᷊o dua su bawewekang napene bou l᷊ima mbau ko nikangu taumata ko maul᷊i e'e.
14Suapang taumata maul᷊i e nakawua kal᷊aherang ko nikoa I Yesus, i sire nangul᷊i, “Mang tingari i'i nabi#6:14: Nabi: Putuhung 1:21.ko l᷊uharapeng sumongo su dunia!” 15Yesus matitong i sire sumongo mamaksa-Ngi Sie pakakoa ratu ngi sire. Watu'u e'e I Sie tamai nutingkaghea nakoa sarang wul᷊ure.
I Yesus nurumal᷊eng su wawo u ake
(Mat. 14:22-23; Mrk. 6:45-52)
16Suapang seng kal᷊ahuwi nge manga tumatuhu I Yesus tanae sarang rano. 17Bou e'e i sire nusumake sakaeng l᷊imiu rano e'e makoa sarang Kapernaum. L᷊ou seng masunaughi kateho I Yesus mang tarie nasongo sarang koa i sire. 18Tintal᷊a e'e rano seng manita muwawuntal᷊i ual᷊ingu kasikili anging. 19Seng kasakaenge patehang l᷊ima arako nungu kilo sumetere karaunge i sire nakawua I Yesus kasandighe sakaeng karal᷊enge su wawou ake. I sire mangkete nataku kahingang. 20Arawe I Yesus nangul᷊i si sire, “Ariwe kataku, Ia i'i!” 21Wuhue i sire nupasakeng I Sie su l᷊al᷊ungu sakaeng dingang u l᷊iaghi i sire, dang su tempo e'e l᷊ai sakaeng i sire nawuna u tampa ko karol᷊ongang i sire.
Manga taumata nundea si Yesus
22Ndai nal᷊ou taumata maul᷊i ko natintang su simbukangu rano, wuhue natitong himoneu horo kitang pia sakaeng singgisa su se'e. I sire matitong manga Tumatuhu I Yesus seng nuwua su sakaeng e'e, arawe I Yesus ta nutumuhu. 23Bou e'e sakaeng piranggisa bou soa ngu Tiberias nasongo dang namal᷊ango su sindihangu tampa u taumata maul᷊i e'e nukumang boroti samuringu Mawu mbuae nuputarimakase. 24Su tempo taumata maul᷊i e'e nakawua himoneu maneng I Yesus dingang u l᷊ai manga tumatuhu-E seng tarie'e su se'e, i sire l᷊ai nusumake sumanga sakaeng e'e dingang natamai nakoa sarang Kapernaum mundea si Yesus.
Yesus, Boroti ko nangonggo puwawiahi
25Suapang i sire manga taumata e'e nusuma si Yesus su simbukang u rano, i sire dingang u nukina si Sie, “Tuang Guru kangereng I Tuang nuratingu i'i?”
26I Yesus nusumimbahi, “Tingari, i kumu kapundeae si Sia wal᷊ingewe i kumu seng nakahingang mangal᷊engu ko makal᷊aherang ko Daku nikoa, kateho ual᷊ingu i kumu mbuae nukumang sarang nal᷊aeri. 27Kumbahang muhal᷊i guna ngu mundea kang ko masue dang maral᷊ai. Puhal᷊ie guna ngu mundea kang ko ta buhu dang ko mangonggo u puwawiahi kahingang dingang u kakal. Kang e'e sarung inggile u Ahusu Taumata si kumu, watu'u I Sie seng nihengke u Mawu Ruata Yamang.”
28Bou e'e i sire nukina si Sie, “Apa hinonge koateng kami tadeau mukoa kao u Mawu Ruata?”
29I Yesus nusumimbahi, “Ko i kao u Mawu Ruata bou i kumu; pangimangte si Sie ko niroi u Mawu Ruata.”
30“Boko kere e,” angkung i sire, “Apa karal᷊ahe e ko ikaonggo I Tuang tadeau i kami makawua dang mangimang si Tuang? Apa ko koateng I Tuang? 31#Kel. 16:4, 15; Mzm. 78:24I upung i kami#6:31: I kami: arako i kite.nukumang manna su tana ko l᷊inggi, kere kawawohe su l᷊al᷊ung u Buki Susi, ‘I Sie nunggile u kang boroti i sire bou sorga.’ ”
32Bou e'e I Yesus nangul᷊i si sire, pangimangte, “Wal᷊inge i Musa, kateho Yamang-Ku ko nunggile si kumu#6:32: Wal᷊inge i Musa … si kumu: arako apang ko nionggo i Musa si kumu wal᷊inge. boroti e'e ko tingari bou sorga. 33Watu'u boroti ko nionggo u Mawu Ruata e'e ko I Sie ko seng l᷊imintu bou sorga dang nangonggo u puwawiahi u taumata su dunia.”
34I sire nangul᷊i, “Tuang” Onggoko sintinia si kami boroti e'e.
35I Yesus nangul᷊i si sire, “Ko Ia boroti ko makaonggo puwawiahi. Taumata ko sumongo sarang koa-Ku seng ta sau mahutung sarang kal᷊iwuenge. Dang taumata ko mangimang si Sia seng ta marou sarang kal᷊iwuenge.
36Arawe musul᷊ung u kere ko seng Daku nihabari si kumu, maneng i kumu seng mbua nakawua si Sia, i kumu mang ta mangimang. 37Kaul᷊i taumata ko nisarakang I Yamang si Sia sarung su mongo sarang koa-Ku. Ia tamanolaki I sai ko sarung sumongo sarang koa-Ku. 38Watu'u Ia nul᷊umintu bou sorga, wal᷊ingewe tadeau mukoa kao-Ku sisane, kateho ko kao I Sie ko nundoi u Ia. 39Dang ko i'i e'e kao I Sie ko nundoi u Ia: tadeau bou kaul᷊iu taumata ko seng nionggo si Sia, takoae ko sarang simbau mailang; kateho tadeau Ia mupuwangung i sire su L᷊ou Kiamati. 40Mang tingari ko i'i kao Yamang-Ku: tadeau kaul᷊iu apang ko nakawua Ahusi e'e dingang mangimang si Sie pia puwawiahi kahingang dang kakal, dang sau Daku i puwiahi su L᷊ou Kiamati.”
41Manga taumata ngu Yahudi nanita nukarubu si Yesus, watu'u I Sie nangul᷊i, “Ia boroti ko nul᷊umintu bou sorga.” 42I Sire nangul᷊i, “I Sie i'i wal᷊ingewe I Yesus, ana i Yusuf? I kami matitong i mama papa-Nge! Kirapawe I Sie botonge nangul᷊i I Sie nul᷊umintu bou sorga?”
43Bou e'e I Yesus nangul᷊i si sire, “Kumbahang mukarubu. 44Takoa manga sarang singkatau ko makasongo sarang koa-Ku, boko I Yamang ko nundoi u Ia, ta mumbawa si sie sarang koa-Ku; dang i sai ko sumongo, sarung Daku i puwangung su L᷊ou Kiamat. 45#Yes. 54:13Su l᷊al᷊ung u Buki u manga nabi pia mawawohe kiri'i: ‘Kaul᷊iu taumata sarung tintironang u Mawu Ruata.’ Inau apang taumata ko mundaringihi si Yamang dang mangundung bou I Sie, sumongo sarang koa-Ku. 46Mangal᷊enge e'e wal᷊ingewe ko seng pia taumata mbuae nakawua si Yamang. Kitang I Sie ko nusumongo bou Mawu Ruata, seng nakawua si Yamang.
47Katitongte: taumata ko mangimang, pia puwawiahi kahingang dang kakal. 48Ia i boroti ko mangonggo u puwawiahi. 49Iupung i kumu nukumang manna su tana ko linggi dang i sire mang l᷊ai nate. 50Kateho su boroti ko bou sorga wal᷊ingewe kere'e; taumata ko kumang boroti e'e seng ta sarung mate. 51Ia i boroti ko nul᷊umintu bou sorga–boroti ko mangonggo u puwawiahi. Taumata ko kumang boroti e'e i sie sarung muwiahi sarang kal᷊iwuenge. Boroti ko Daku ionggo guna ngu puwawiahu taumata su dunia e'e ko ghisi-Ku.”
52Manga taumata ngu Yahudi ko nakaringihi e'e nurarendehi i sire l᷊au i sire, “Kirapa su taumata i'i I Sie mangonggo u ghising-E tadeau pakikang si kite?” angkungi sire.
53Wuhue I Yesus nangul᷊i si sire, “Pangimangte; boko i kumu ta kumang bou ghisi-Ngu Ahusu Taumata dang ta manginung dahang-E, i kumu ta sarung tinga-tingari muwiahi. 54Taumata ko kumang bou ghisi-Ku dang manginung daha-Ku kute si Sie pia puwawiahi kahingang dang kakal dang Ia sarung mupuwangung sie su L᷊ou Kiamat. 55Watu'u ghisi-Ku ko tingari kang, dang daha-Ku e'e ko tingari inung. 56Taumata ko kumang bou ghisi-Ku dang manginung daha-Ku, i sie sarung tatapi masimbau dingang-Ku, dang Ia dingange. 57Yamang ko wiahi e'e nundoi u Ia dang Ia l᷊ai muwiahi bou Yamang. Kere l᷊ai taumata ko kumang ghisi-Ku sarung muwiahi bou Ia. 58I'i ko boroti nul᷊umintu bou sorga; wal᷊inge kere boroti ko seng nikangi iupung i kumu. Watu'u bou kumang boroti e'e, i sire mang l᷊ai nate. Arawe taumata ko kumang boroti i'i sarung muwiahi sarang kal᷊iwuenge.”
59Kaul᷊iu e'e niul᷊i I Yesus su tempo I Sie kapanintironge su l᷊al᷊ungu wal᷊e pukakal᷊iomanengang su Kapernaum.
Manga didato ko mangonggo u puwawiahi kahingang dang kakal
60Suapang seng nakaringihi apang didato-Ngi Yesus e'e, maul᷊i su tal᷊oara i sire manga tumatuhu-E nangul᷊i, “Tatintiro i'i tumaniu mabuha. I sai ko botonge makatarima e'e!”
61I Yesus si sane seng matitong u manga tumatuhu-E kapukarubue hal᷊i e'e. Kute I Sie nangul᷊i, “Apa i kumu nupundang ual᷊ingu manga didato e'e? 62Kirapa kakakoa e boko i kumu sarung makawua Ahusu Taumata sau mahengke sarang tampa-E ko horo? 63Ko makapuwiahi taumata e'e ko Roh u Mawu Ruata. Katatoghasi taumata takoae mangal᷊enge. Manga didato ko Daku i puridato si kumu i'i e'e ko didatongu Roh u Mawu Ruata dang manga didato ko munggil᷊e u puwawiahi. 64Kateho mang pia l᷊ai su tal᷊oara i kumu ko ta mangimang.” (I Yesus seng matitong borong bou titae i sai-sai ko mandi mangimang si Sie, dingang u i sai ko sarung musingking si Sie). 65Bou e'e I Yesus sau nangul᷊i, “E'e sabapie Ia muhabari si kumu himoneu takoae manga sarang singkatau makasongo sarang koa-Ku boko i sie ta ipakawalangi Yamang.”
66Nanita bou orasi e'e maul᷊i tumatuhu-E nanintang I Sie, dang seng mandiri sau tumuhu si Sie. 67Bou e'e I Yesus nukina su manga tumatuhu-E mapul᷊o dua, “Apa i kumu l᷊ai mo manintang u Ia?”
68 #
Mat. 16:16; Mrk. 8:29; Luk. 9:20 I Simon Petrus nangul᷊i si Sie, “Mawu sarang ko i sai tamaing i kami? Didato ngu Mawu mangonggo u puwawiahi kahingang dingang u kakal. 69I kami seng mangimang dang mangaking himoneu I Kau Mawu ko raroi susi bou Mawu Ruata.”
70I Yesus nusumimbahi, “Wal᷊ingewe Ia seng namile si kumu mapul᷊o dua i'i? Kateho singkatau bou tal᷊oara ngi kumu e'e ko setang!” 71Pandung I Yesus ko i Yudas ana i Simon Iskariot. Watu u maneng i Yudas singkatau bou i sire mapul᷊o dua tumatuhu I Yesus, i sie sarung musingking si Yesus.
اکنون انتخاب شده:
YOHANES 6: LAISXN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2014 Indonesian Bible Society (Lembaga Alkitab Indonesia)