Luki Sɛbɛ 23
23
A JEEJU A PƖLATƖ NII-SƆW
(Mat 27.1-2,11-14, Mar 15.1-5, Jã 18.28-38)
1A bala ba jaa na kpaarɩ̃ taa irʼã taw a *Jeeju cenʼɩ̃ a *Pɩlatɩ nii-sɔw, 2na ba nyɔw ɩ̃ dɔɔlɔ ʋ a ƴɛrɩ̃sɩ yele:
“Sɩ nyɛ na a daba na ʋ sãwna a nɩbɛ jur, yele ba a ba taa yara a lãpo kʋrɔ a jaman-kpɛ̃ɛ wa. Ʋ mɩ yele na a ʋlɔ tɔr jaa ɩ̃ ɩ a *Kirisi, a lɛ yelʼã a jamana.”
3A Pɩlatɩ soor ʋ na:
“Fʋ̃ʋ ɩ a Jufisɩ jamana?”
A Jeeju yel ʋ:
“A lɛ fʋ na yel ʋ.” 4A be jie, a Pɩlatɩ yelʼã a Naaŋmɩn *baar-lo-nɩ-bɛrɛ nɩ a nɩbɛ:
“Maa nyɛ cɛfʋ jie fɩ̃ɩ a daba na jie wa.” 5Ɩ̃-cɛ ba jaarʼã ɩ̃ yele:
“Ʋ tɔrɔ na a nɩbɛ ƴɔnɔ a ba dama a tẽw nɩ a ʋ jaanfʋ ʋ na jaana ba. A Galile ʋ nyɔw, ɩ̃ wa yi nɩ a Jude wɩɛr ʋ jaa pʋɔ, ɩ̃ a ƴɛ̃ƴɛrɩ̃ ʋ ta na a ka.”
6A lɛ a Pɩlatɩ na wõ a ala, ʋ soorʼã a ala ɩ a Galile a daba na yi. 7Ɩ̃ a mɩnɛ ba na man ʋ áa Jeeju yi na a wɩɛr ʋlɔ a jamana *Ɛrɔdɩ na ꞌwuoro, ʋ ɩ na a ba cenʼɩ̃ ʋ a ʋ sɛ̃, a-na-ɩ a Ɛrɔdɩ mɩ dãa na be be a Jerujalɛm a ʋna daarʼãa.
A JEEJU A Ɛrɔdɩ NII-SƆW
8A mɩnɛ a *Ɛrɔdɩ na nyɛ a *Jeeju, nʋ̃ɔ ƴala ʋ na a-na-ɩ a korĩ-cɛ jaa ʋ dãa na wõ a ʋ ƴɛrɩ̃ ɩ̃ bʋɔrɔ ʋ nyɛ ʋ. Ʋ mɩ dãa na bʋɔrɔ ʋ nyɛ ʋ ʋ maal nɔ-kofʋ tʋn. 9Ʋ soorʼã a Jeeju yel-yayaw, ɩ̃-cɛ ꞌwaa haa nʋɔr cɔw ʋ wa. 10Ɩ̃ a *baar-lo-nɩ-bɛrɛ nɩ a *ƴɛr-kpɛn-bɔɔnbɔ ɩraa na a be dɔɔlɔ a Jeeju a ƴɛrɩ̃sɩ nɩ kpɛ̃w. 11A Ɛrɔdɩ nɩ a ʋ sɔdaalsɩ maal ʋ na kpana, ɩ̃ la la ʋ, ɩ̃ pãa de kpar-vɩlaa lɔb yarɩ̃ ʋ, ɩ̃ a Ɛrɔdɩ ɩ a ba lɛ lɩɛbɩ̃ ʋ cenʼɩ̃ a *Pɩlatɩ sɛ̃. 12A Ɛrɔdɩ nɩ a Pɩlatɩ dãa na ɩ taa sama-deme a korĩ-cɛ, ɩ̃ a ʋna bibir ba lɩɛbʼã ɩ badɛɛ.
A JEEJU BA NA ƳƆ̃W A KŨU ƳƐRƖ̃
(Mat 27.15-26, Mar 15.6-15, Jã 18.39—19.16)
13A *Pɩlatɩ kpaarɩ̃ na a *baar-lo-nɩ-bɛrɛ nɩ a tẽw nɩ-bɛrɛ nɩ a nɩbɛ jaa, 14ɩ̃ yel ba:
“Nyɩ wa nɩ na a daba na a ɩ̃ sɛ̃ ɩ̃ yel á ʋ sãwna na a nɩbɛ jur. Ɩ̃ nyɩ́ nyɛ, ɩ̃ ꞌlo na a ʋ ben a nyɩ nii-sɔw, ɩ̃ maa nyɛ cɛfʋ jie fɩ̃ɩ a daba na jie a ala nyɩ na dɔɔlɔ a ʋ juu wa. 15A *Ɛrɔdɩ ma mɩ nyɛ cɛfʋ jie a ʋ sɛ̃ wa. Ala-ɩ̃-sɔ ʋ lɛ tɩɩr ʋ kʋ sɩ. Nyɩ́ nyɛ, a daba na ma maal bom kãw a sɛw a ba na kú ʋ wa. 16Ala-ɩ̃-sɔ ɩ̃ na ɩ na a ba fɔb ʋ nɩ kpaara, ɩ̃ cɛ ʋ bar.”
[ 17A *Pakɩ fɛtɩ daar, a Pɩlatɩ sɛw na ʋ ma yuo kasu sʋbɔ bõ-ƴen bar kʋ ba.]
18Ɩ̃-cɛ a ba jaa fɛw nyɔw na ɩ̃ lãa wuure yele:
“Kú a daba na bar! Ɩ̃ yuo a Barabasɩ kʋ sɩ!” 19(Damfʋ kãw dãa na ta be a tẽw pʋɔ a Barabasɩ kú nɩrɛ a ba nyɔw ʋ pɔw a kasu pʋɔ.)
20A mɩnɛ a Pɩlatɩ na bʋɔrɔ ʋ bar a *Jeeju, ʋ lɛ bɔ̃w na bʋɔl a nɩbɛ ƴɛrʼɩ̃. 21Ɩ̃-cɛ ba wuure na yele nɩ:
“Kpa ʋ yaal! Kpa ʋ yaal a nɩ-kʋ-daa juu!” 22A Pɩlatɩ lɛ bɔ̃w na soor ba a ɩ gbɛɛ ata:
“Fãa buor ʋ maal? Maa nyɛ cɛfʋ jie fɩ̃ɩ a ʋ jie na ƴɔnɔ ʋ a kũu ƴɛrɩ̃ wa. Ala-ɩ̃-sɔ ɩ̃ na ɩ na a ba fɔb ʋ nɩ a kpaara ɩ̃ cɛ ʋ bar.”
23Ɩ̃-cɛ ba jaarʼã ɩ̃ nyɩrɩ̃ wuure nɩ kpɛ̃w yele a ba kpa ʋ yaal a nɩ-kʋ-daa juu, ɩ̃ a ba wuurfʋ tʋɔ a Pɩlatɩ 24ʋ sɔw bar sɔr a na maal a mɩnɛ ba na sʋɔrɔ ʋ. 25Ʋ yuo na a daba ʋlɔ ba na dãa sʋɔrɔ bar, na ɩ a ʋlɔ na dãa dam a tẽw kú nɩ a nɩrɛ a ba nyɔw ʋ ƴɔ̃w a kasu pʋɔ, ɩ̃ bar a Jeeju ƴɔ̃w a ba nurɩ̃ a ba na maal ʋ a ala ba na bʋɔrɔ.
A JEEJU BA NA KPA YAAL A NƖ-KƲ-DAA JUU
(Mat 27.32-44, Mar 15.21-32, Jã 19.17-27)
26A mɩnɛ ba na cere nɩ a *Jeeju, ba tuorʼɩ̃ na a Sɩɩrɛn-tẽw nɩrɛ kãw na dɩ Sɩmɔ̃, ʋ yi a puo pʋɔ ɩ̃ waara, a sɔdaalsɩ fɛr ʋ ƴɔ̃w ʋ tuo a nɩ-kʋ-daa tuure nɩ a Jeeju.
27A tẽw nɩbɛ yayaw mɩ dãa na tuure ʋ, lãa nɩ a pɔɔbɔ na kono waala nɩ ƴɔnɔ ʋ. 28Ɩ̃-cɛ a Jeeju ŋmelɩ̃ na yel ba:
“Jerujalɛm pɔɔbɔ, nyɩ taa kono a maa ɩnɛ wa! Nyɩ́ ɛ̃ɛ kono a nyɩ mɩ̃ɛ ɩnɛ nɩ a nyɩ bibiir ɩnɛ! 29A-na-ɩ a daar na ta na, ba na yelʼã áa nʋmɔ a pɔɔbɔ bala na ab, nɩ a bala na ma dɔw a bie wa, ɩ̃ mɩ nʋmɔ a bala na ma dãa ƴen a bie wa. 30A be ba na nyɔw ɩ̃ yele a tã-bɛrɛ: ‘Nyɩ́ lo pɔw sɩ!’ ɩ̃ mɩ yele a tã-bil: ‘Nyɩ́ piw sɩ!’ 31A-na-ɩ a ala ɩ ba maalʼã a da-ɓaar a nɔhɔ̃, mɩnɛ a na be nɩ a da-kõw?”
32Ba mɩ taw na nɩbɛ ayi na ɩ nɩ-bebe cenʼɩ̃ a ba na lãa kú ba nɩ a Jeeju. 33A mɩnɛ ba na ta a jie ʋlɔ ba na bʋɔlɔ a “Juŋman jie,” ba kpa na a Jeeju yaal a nɩ-kʋ-daa juu a be, ɩ̃ mɩ kpa a nɩ-bebe ayi bala, a bõ-ƴen be a ʋ dʋrɩ̃ loor, ɩ̃ a kãw be a ʋ gʋbaa loor. 34Ɩ̃-cɛ a Jeeju yelʼã:
“Ɩ̃ Sãa, de bar kʋ ba, a-na-ɩ baa bɔ̃w a ala ba na maala wa.” Ɩ̃ ba de na gbãbie lɔb po nɩ a ʋ cẽcene. 35A nɩbɛ ɩraa na a be ɩ̃ ꞌwuoro ʋ. A Jufisɩ nɩ-bɛrɛ kpɛrɛ ʋ na yele:
“Ʋ faa na a nɩbɛ. A ala ɩ ʋ ɩ na a *Kirisi, a ʋlɔ a Naaŋmɩn na vɛl ir, ú mɩ faa a ʋ mɩ̃ɛ!”
36A sɔdaalsɩ mɩ laara ʋ na, ɩ̃ taw ta ture ʋ dã-ɓiirũu yele nɩ:
37“A ala ɩ fʋ̃ʋ ɩ a Jufisɩ jamana, lɩɛb faa a fʋ mɩ̃ɛ!”
38Ba mɩ dãa na sɛb a ƴɛr-bie na yaal a ʋ ju-sɔ̃w: “A naa ɩ̃ ɩ a Jufisɩ jamana.”
39A nɩ-bebe bala ba na kpa yaal bõ-ƴen tʋrɔ ʋ na yele nɩ:
“Aa ɩ a Kirisi fʋ ɩ wa? Lɩɛb faa a fʋ mɩ̃ɛ ɩ̃ mɩ faa sɩ!” 40Ɩ̃-cɛ a kãw ʋlɔ gala ʋ na yele nɩ:
“Faa jɔrɔ Naaŋmɩn wa mɩɩ? A-na-ɩ a fʋ̃ʋ, fʋ mɩ be na a ʋna kpãafʋ naa pʋɔ. 41A ala ɩ a sɩ jie ʋ, a kpãafʋ ʋlɔ torʼã, a-na-ɩ sɩ pɔw na a ala na sɛw nɩ a sɩ maal-bie, ɩ̃-cɛ a ʋlɔ, ꞌwaa sãw bom kãw pʋɔ fɩ̃ɩ wa.” 42Ɩ̃ ʋ lɛ yelʼã:
“Jeeju, tɩɛr bɔ̃w nɩ ma a lɛ fʋ nɔɔ waara nɩ a fʋ fãw.” 43A Jeeju yel ʋ:
“Yel-mɩ̃ɛ ɩ̃ yele fʋ, a dɩnaa naan, fʋ na lãa na be nɩ ma a Naaŋmɩn ji-vɩlaa pʋɔ.”
A JEEJU KŨU
(Mat 27.45-56, Mar 15.33-41, Jã 19.28-30)
44A mɔtɔ̃w dãa na pɩɛlɛ a ju-sɔ̃w, ɩ̃ a ʋ cãa bɔr, a wɩɛr liw a lɛ a gbɛb pɔw a tẽw ʋ jaa lɛɛ wa ta nɩ a mɔtɔ̃w gɔrfʋ daar. 45A cẽcen kpɛ̃ɛ ʋlɔ na yaal a be a Naaŋmɩn puor-yir kpɛ̃ɛ pʋɔ ɓerʼã ayi, 46ɩ̃ a *Jeeju wuurʼɩ̃ kpɛ̃w yel:
“Ɩ̃ Sãa, ɩ̃ de na a ɩ̃ sɩɛ bar ƴɔ̃w a fʋ nuumɩ.” A mɩnɛ ʋ na yel a lɛ baar, ʋ ŋmaa na a vʋʋrʋ̃.
47A sɔdal-nɩ-kpɛ̃ɛ nyɛ na a ala na ta ɩ̃ kpiire a Naaŋmɩn yele:
“Sɩrɛ jaa ʋ, a daba na ɩ na nɩ-toraa.” 48A nɩbɛ ba jaa na dãa kaal taa wa a ꞌwuorfʋ jie, nyɛ na a ala na ta a nyɩrɩ̃ tɔ ba, a ba lɩɛb waala kule nɩ. 49A Jeeju badɛɛ ba jaa lãa nɩ a pɔɔbɔ bala na dãa tu ʋ a Galile wa ta nɩ a be, ɩraa na nɩdaa ɩ̃ ꞌwuoro a ala na tara.
A JEEJU ŨUFƲ
(Mat 27.57-61, Mar 15.42-47, Jã 19.38-42)
50-51Daba kãw dãa na be be na dɩ Jojɛfʋ. Ʋ yi na a Arimate na ɩ a Jufisɩ tẽw. Ʋ ɩ na pʋ-pɩlaa sʋbɔ nɩ nɩ-toraa, ɩ̃ dãa jɛ cɛlɛ a Naaŋmɩn fãw waa. Ʋ mɩ dãa na be a *ƴɛr-guor-nɩ-bɛrɛ pʋɔ, ɩ̃-cɛ ꞌwaa dãa sɔw a ala a ʋ ƴɛr-guor-tɔ deme na vɛl ir maal wa. 52A daba ʋlɔ cenʼã a *Pɩlatɩ sɛ̃ na sʋɔr á ʋ kʋ ʋ a kũu. 53A ala ɩ̃ baar, ʋ yaw na a kũu suu nɩ ɩ̃ de cẽcen pɩlaa vilĩ pɔw ʋ, ɩ̃ ũu ʋ a yaa kãw pʋɔ ba na dãa kpu kubir pan juu, ɩ̃ a yaa ʋlɔ pʋɔ baa dãa ũu nɩrɛ be sɛr wa. 54A dãa na ɩ a *bibi-ciiraa gbɛɛrɩ̃fʋ bibir, ɩ̃ a bibi-ciiraa tara na a ʋ nyɔwfʋ jie.
55A pɔɔbɔ bala na dãa pɔw a *Jeeju a Galile wa ta nɩ a be, tu na a Jojɛfʋ. Ba ꞌwuorʼã a yaa ɩ̃ mɩ nyɛ a mɩnɛ ba na gaal a kũu a be. 56A ala ɩ̃ baar, ba lɩɛbʼã kulʼɩ̃ gbɛɛrɩ̃ a mɔ-nyuu nɩ a kã-nyu-vɩlaa a kũu jɛfʋ ɩnɛ.
Ɩ̃ a bibi-ciiraa dayen, ba pɩɛnʼã a mɩnɛ a na yel a *Naaŋmɩn ƴɛr-kpɛn pʋɔ.
انتخاب شده:
Luki Sɛbɛ 23: BNT93
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Le Nouveau Testament en langue birifor © Alliance Biblique au Burkina Faso, 1993.