NAANAA 16
16
Hazara kũ a nɛ́ Sumailao
1Abramu nanɔ Sarai dí nɛ́ iro. À nɔgbɛ̃ zĩkɛri vĩ Misila gbɛ̃ ũ kũ òdi pinɛ Hazara. 2Akũ Sarai pì Abramunɛ: Lákũ Dikiri ma kɛ para ũ nà, ǹ wútɛ kũ ma zĩkɛriio. Ma sì kũ mani nɛ́nɔ le a gãi. Akũ Abramu Sarai yã mà. 3Abramu wɛ̃̀ kuri kɛna Kanaanɔ bùsun gbɛran Sarai a zĩkɛri Hazara kpàa nɔ ũ. 4Abramu wùtɛ kãao, akũ à nɔ̀ɔ sì. Kũ à è á nɔ̀sinaa, à dɔkɛ̀ kũ a dikiriio. 5Akũ Sarai pì Abramunɛ: Taari kũ ò kɛ̀mɛnɛ gɔ̃̀ n yã ũmɛ. Ma a zĩkɛrii kpàmma. Kũ à è á nɔ̀sina, akũ àdigɔ̃ dɔkɛ kũmao. Mɔkɔ̃n kũ makũo, Dikiri mɛ́ ani yã gɔ̃gɔ̃wɛrɛ. 6Akũ Abramu wèa à pì: N zĩkɛri kun n pɔ́ ũmɛ. Ǹ kɛnɛ lákũ ń yei nà. Kũ Sarai wari dɔ̀a, akũ à bàa lɛ̀nɛ.
7Dikiri Malaika a è ísɛ̃bokia gbárannan, ísɛ̃boki pì kú Suru zɛ́ sarɛmɛ. 8Akũ à a là à pì: Sarai zĩkɛri Hazara, n bo mámɛɛ? Ntɛn gɛ́ mámɛɛ? Akũ à wèa à pì: Matɛn bàa lɛ́ ma dikiri Sarainɛmɛ. 9Akũ Dikiri Malaikaa pìnɛ: Ǹ ɛra ǹ tá n dikirii pì kĩnaa ǹgɔ̃ mì natɛnɛ.
10Mani n buri kara ògɔ̃ dasi,
oni fɔ̃ ò ń lɛ́ dɔ̃ro.
11Ń nɔ̀sina, ĩni nɛ́ i gɔ̃gbɛ̃ ũ,
ĩni tɔ́ kpánɛ Sumaila,
zaakũ Dikiri n yã mà n wɛ́tãmma gũn.
12Anigɔ̃ de lán zaakisɛ̃ntɛ bà,
ani ibɛrɛ sɛ́ kũ gbɛ̃ sĩnda pínkio,
gbɛ̃ sĩnda pínki ni ibɛrɛ sɛ́ kãao se.
Anigɔ̃ kú kɔ̃ yãn kũ a gbɛ̃nɔro.
13Akũ Hazara pì: Ma wɛ́ sì Luda kũ àdi ma elɛ. Akũ à tɔ́ kpà Dikiri kũ à yã ònɛɛnɛ Ludakũadima'e. 14A yã mɛ́ à tò ò tɔ́ kpà lɔ̀gɔɔ pìinɛ Ludabɛ̃nɛkũadima'e lɔ̀gɔɔ. À kú Kadɛsi kũ Bɛrɛdio daguramɛ.
15Hazara nɛ́gɔ̃gbɛ̃ ì kũ Abramuo, akũ Abramu tɔ́ kpànɛ Sumaila. 16Gɔrɔ kũ Hazara Sumaila ì, Abramu wɛ̃̀ basiikɔ̃ awɛɛsuddomɛ.
انتخاب شده:
NAANAA 16: BB2005
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bisã Bible © SIM International, 2005.