NAANAA 17
17
Tɔ̃̀zɔ̃yã
1Kũ Abramu kà wɛ̃̀ basɔɔro donsari, Dikiri bò à sùa à pì: Luda Gbãnasĩndapinkiden ma ũ. Ǹ táa o kũmao ǹgɔ̃ kun taari sari. 2Ma bàka kunna kũnwo nigɔ̃ gɛ́, mani n buri karannɛ manamana. 3Abramu wùtɛ a gbɛrɛa Luda arɛ, akũ Luda pìnɛ: 4Lákũ ma bàka kú kũnwo nà, ĩni gɔ̃ buri dasinɔ dizi ũ. 5Onigɔ̃ pinnɛ Abramu doro, sé Ibrahĩ, zaakũ mani n kɛ buri dasinɔ dizi ũ. 6Mani tó n buri kɛ dasi, burinɔ kũ kínanɔ ni bo n kĩnaa. 7Ma bàka nigɔ̃ kú kũnwo kũ n burinɔ ari gɔrɔ sĩnda pínki. Manigɔ̃ de n Luda ũ kũ n burinɔ n gbɛra. 8Mani Kanaanɔ bùsu kũ ń kú a gũn nibɔ ũ kpámma pínki kũ n burinɔ n gbɛra, de ògɔ̃ vĩ gɔrɔ sĩnda pínki, manigɔ̃ de ń Luda ũ.
9Luda ɛ̀ra à pì Ibrahĩnɛ: Mɔkɔ̃n kũ n burinɔ, àgɔ̃ ma bàka kunna kãáo yã kũna ari á buria. 10Ma bàka kuna kãáo yã kũ ánigɔ̃ kũnan dí, mɔkɔ̃n kũ n burinɔ. Séde á gɔ̃gbɛ̃ sĩnda pínki tɔ̃̀ zɔ̃. 11À tɔ̃̀ zɔ̃ ma bàka kunna kãáo sèeda ũ. 12Séde n buri nɛ́gɔ̃gbɛ̃nɔ tɔ̃̀ zɔ̃ ń gɔrɔ sɔraakɔ̃de zĩ ari ń buria, nɛ́ kũ ò ń í n bɛanɔ kũ zĩkɛri kũ ò ń lú buri pãndenɔanɔ ń pínki. 13Ò a ì n bɛan yá kesɔ̃ ò a lù zĩkɛri ũn yá, sé à tɔ̃̀ zɔ̃. Abire nigɔ̃ de ma bàka kunna kãáo gɔrɔ sĩnda pínki sèeda ũ á mɛ̀ɛa. 14Oni gyɔfɔrɔde bo a gbɛ̃nɔ tɛ́, zaakũ gbɛ̃ kũ adi tɔ̃̀ zɔ̃ro yã kũ ma dìtɛárɛ kũnaro.
15Akũ Luda ɛ̀ra à pì Ibrahĩnɛ: Ǹsun pi n nanɔnɛ Sarai doro, ǹgɔ̃ pinɛ Sara sà. 16Mani arubarika dan mà tó à nɛ́ i gɔ̃gbɛ̃ ũ, ani gɔ̃ burinɔ dai ũ, bùsu kínanɔ ni bo a kĩnaa. 17Akũ Ibrahĩ wùtɛ a nɛ̀sɛlɛ kutɛna Luda arɛ à yáa dɔ̀ à pì a nɛ̀sɛɛ gũn: Gbɛ̃ kũ à kà wɛ̃̀ basɔɔro ni nɛ́ i yá? Lákũ Sara kà wɛ̃̀ basiikɔ̃ akuri nà, ani nɛ́ i yá? 18Akũ à ɛ̀ra à pì Ludanɛ: Ǹ sùru kɛ ǹ Sumaila gwa. 19Luda pì: Yãpura n nanɔ Sara ni nɛ́ i gɔ̃gbɛ̃ ũ, ĩni tɔ́ kpánɛ Isaaku. Ma bàka nigɔ̃ kú kãao kũ a burinɔ ari gɔrɔ sĩnda pínki. 20Sumaila yã musu, ma n yã mà. Mani arubarika dan, ani nɛ́ i à kara manamana. Ani nɛ́gɔ̃gbɛ̃nɔ i gbɛ̃nɔn kuri awɛɛpla, oni gɔ̃ kínanɔ ũ, a buri ni kɛ dasi. 21Bee kũ abireo ma bàka kunna kũnwo ni gɔ̃ Isaakuamɛ. Ziki mandara'i Sara ni a i. 22Kũ Luda yã ò Ibrahĩnɛ à làka, akũ à a tò à tà musu.
23Akũ Ibrahĩ a nɛ́ Sumaila sɛ̀ kũ a bɛ gɔ̃gbɛ̃ kũ ò ń í a bɛanɔ kũ zĩkɛri kũ ò ń lúnɔ ń pínki, akũ à tɔ̃̀ɔ zɔ̃̀ńnɛ gɔrɔ birea gɔ̃̀nɔ lákũ Luda ònɛ nà. 24Ibrahĩ kà wɛ̃̀ basɔɔro donsari, gbasa à tɔ̃̀ɔ zɔ̃̀, 25a nɛ́ Sumaila sɔ̃ wɛ̃̀ kuri awɛɛ'aakɔ̃. 26Gɔrɔ dokɔ̃nɔ pì zĩ Ibrahĩ tɔ̃̀ɔ zɔ̃̀ kũ a nɛ́ Sumailao 27kũ a bɛ gɔ̃gbɛ̃ kũ ò ń í a bɛanɔ kũ zĩkɛri kũ ò ń lú buri pãndeanɔ ń pínki. Ò tɔ̃̀ɔ zɔ̃̀ gɔrɔ dokɔ̃nɔ zĩmɛ.
انتخاب شده:
NAANAA 17: BB2005
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bisã Bible © SIM International, 2005.