NAANAA 18

Nibɔnɔ suna Ibrahĩ kĩnaa

1Dikiri bò à sù Ibrahĩa Mamare gbiri línɔ sarɛ. Ibrahĩ vutɛna a bizakuta kpɛ́lɛlɛa fãnantɛ̃. 2Kũ à wɛ́ sɛ̀ musu, à gbɛ̃nɔn aakɔ̃ è zɛna. Kũ à ń é lɛ, akũ à fùtɛ kpɛ́lɛlɛa kũ bàao à gɛ̀ɛ à dàńlɛ à wùtɛ a nɛ̀sɛlɛ kutɛna 3à pì: Dikiri, tó ma n pɔnna lè, ǹsun gɛ̃ makũ n zɔ̀blerilaro. 4Mani suárɛ kũ ío à gbá pípi à kámma bo lí gbáru la. 5Lákũ a bɔtɛ ma bɛ kpa nà, mani suárɛ kũ pɔ́bleo fíti de à gbãna le gbasa à da zɛ́n. Akũ ò pì: Tɔ̀, ǹ kɛ lákũ n ò nà. 6Akũ à gɛ̀ɛ Sara kĩnaa kutan à pì: Ǹ flawa dã zaka lɛ́ aakɔ̃ ǹ burodi kɛ likalika. 7Akũ à bàa lɛ̀ à gɛ̃̀ a zùnɔ tɛ́ à zùnɛ bɔ̀rɔ mana kũ̀ à kpà a zĩkɛriia, akũ zĩkɛrii pìi gɛ̀ɛ à kɛ̀kɛ likalika. 8Akũ Ibrahĩ vĩfãani kũ vĩ'ipuo kũ zù kũ ò kɛ̀kɛɛ pìioo sɛ̀ à gɛ̀ɛ à dìtɛńnɛ. Gɔrɔ kũ òtɛn pɔ́ ble, api zɛ ń sarɛ lí gbáru gwe.

9Akũ ò a là ò pì: N nanɔ Sara kú mámɛɛ? À pì: À kú kutan gwe. 10Akũ Dikiri pì: Mani ɛra mà su n kĩnaa ziki mandara'i, n nanɔ Sara ni nɛ́ i gɔ̃gbɛ̃ ũ. Sara kú a kpɛ kuta kpɛ́lɛlɛa àtɛn ma. 11Ibrahĩ kũ Sarao zĩ kũ̀, Sara dì nɔgbɛ̃nɔ pɔ́ kɛ doro. Akũ Sara yáa dɔ̀ à pì a swɛ̃̀ɛ gũn: 12Ma zĩ kũ̀, akũ ma dikiri zĩ kũ̀ dɔ. Mani pɔnna yã pì dɔ̃ dɔ yá? 13Akũ Dikiri Ibrahĩ là à pì: À kɛ̀ dera Sara yáa dɔ̀ɔ? À pì akũ kũ a zĩ kũ̀ áni fɔ̃ à nɛ́ i dɔ yá? 14Yãke dìgɔ̃ zĩ'ũmɛnɛro. Ziki mandara'i tó a gɔrɔ kà, mani su n kĩnaa, gbasa Sara nɛ́ i gɔ̃gbɛ̃ ũ. 15Akũ Sara ledi kpà à pì ádi yáa dɔro, zaakũ vĩna a kũ̀. Akũ Dikiri pì: É'e! N yáa dɔ̀.

Ibrahĩ aduakɛna Sɔdɔmunɛ

16Kũ gbɛ̃ pìnɔ fùtɛ, Ibrahĩ gɛ̀ɛ à zɛńnɛ, akũ ò Sɔdɔmu kpa gwà. 17Akũ Dikiri pì: Mani yã kũ má ye mà kɛ utɛ Ibrahĩnɛro. 18A burinɔ nigɔ̃ zɔ̃kɔ̃ onigɔ̃ gbãna vĩ. Andunia buri sĩnda pínki ni arubarika le a gãimɛ. 19Zaakũ ma a sɛ̀, de à o a nɛ́nɔnɛ kũ a burinɔ a gbɛra ògɔ̃ ma yã kũna ò yã mana zɛ́de kɛ, de mà yã kũ ma a lɛ́ sɛ̀nɛ kɛnɛ. 20Akũ Dikiri ɛ̀ra à pì: Yã kũ òtɛn o Sɔdɔmu kũ Gɔmɔrao musu dasi, ń durunna gɛ̃̀ ɔla. 21Mani gɛ́ gwe sà mà gwa, tó yã kũ òtɛn kɛ vãni lákũ ma mà nà. Tó ò de lɛ sɔ̃ro, mani dɔ̃.

22Kũ ń gbɛ̃nɔn pla pìnɔ dà zɛ́n òtɛn gɛ́ Sɔdɔmu, akũ Dikiri gɔ̃̀ kũ Ibrahĩo gwe. 23Akũ Ibrahĩ nài à pì: Ĩni gbɛ̃ mananɔ wara lɛɛlɛ kũ gbɛ̃ vãninɔn yá? 24Tó gbɛ̃ mananɔn kú wɛ̃tɛ pìi gũn ò kà gbɛ̃nɔn bupla akuri, ĩni ń waran yá? Ĩni sùru kɛ kũ wɛ̃tɛ pìio gbɛ̃ mana gbɛ̃nɔn bupla akurii pìnɔ yãiroo? 25Ǹ sùru kɛ! Ǹsun kɛ lɛro. Ǹsun gbɛ̃ mananɔ dɛdɛ lɛɛlɛ kũ gbɛ̃ vãninɔro, zaakũ ò dokɔ̃nɔro. Ǹ sùru kɛ! Ǹsun kɛ lɛro. Mɔkɔ̃n kũ ń de andunia pínki yãkpatɛkɛri ũ, ĩni yã kɛ a zɛ́aroo? 26Akũ Dikiri pì: Tó ma gbɛ̃ mananɔ è Sɔdɔmu gbɛ̃nɔn bupla akuri, mani sùru kɛ kũ wɛ̃tɛ pìio ń yãi. 27Akũ Ibrahĩ ɛ̀ra à pì dɔ: Makũ kũ má de bùsutiti kũ túbuo ũ, ǹ gaafara kɛmɛnɛ mà yã onnɛ, Dikiri. 28Tó gbɛ̃nɔn sɔɔro kĩ̀a gbɛ̃nɔn bupla akurii pìi gũn, gbɛ̃nɔn sɔɔro pìnɔ yãi ĩni wɛ̃tɛ pì kakatɛ yá? Akũ Dikiri pì: Tó ma gbɛ̃ mananɔ è gbɛ̃nɔn bupla awɛɛsɔɔro, mani wɛ̃tɛ pì kakatɛro. 29Akũ Ibrahĩ kpɛ́ àtɛn yã onɛ à pì: Tó gbɛ̃ mananɔ kà bupla sɔ̃ bi? Akũ Dikiri pì: Mani yãke kɛro gbɛ̃nɔn bupla pìnɔ yãi. 30Akũ à pì: Dikiri, n yã nna! Ǹsun pɔ fɛ̃ro, má ye mà yã o dɔ. Tó gbɛ̃ mananɔ kà baraakuri sɔ̃ bi? À wèa à pì: Tó ma gbɛ̃ mananɔ è ò kà gbɛ̃nɔn baraakuri, mani yãke kɛro. 31Akũ à pì: Ǹ gaafara kɛmɛnɛ dɔ Dikiri, mà yã onnɛ. Tó gbɛ̃ mananɔ kà gbɛ̃nɔn baro sɔ̃ bi? À wèa à pì: Mani wɛ̃tɛ pì kakatɛro gbɛ̃nɔn baro pìnɔ yãi. 32Akũ à pì: Dikiri, ǹsun pɔ fɛ̃ro, yã díkĩna baasi mani yã o doro. Tó gbɛ̃ mananɔ kà gbɛ̃nɔn kuri sɔ̃ bi? À wèa à pì: Mani wɛ̃tɛ pì kakatɛro gbɛ̃nɔn kurii pìnɔ yãi. 33Kũ Dikiri yã ò Ibrahĩnɛ à làka, à gɛ̃̀ zɛ́la, akũ Ibrahĩ ɛ̀ra à tà bɛ.

انتخاب شده:

NAANAA 18: BB2005

های‌لایت

به اشتراک گذاشتن

کپی

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید

در مورد Bisã Bible 2005 اطلاعات بیشتر کسب کنید

NAANAA 18

آیات محبوب کتاب مقدس از
NAANAA 18

كتاب‌مقدس:

Busa

ترجمه: Bisã Bible 2005 - BB2005

NAANAA 18

NAANAA 18

آیات محبوب کتاب مقدس از NAANAA 18

كتاب‌مقدس:

Busa

ترجمه: Bisã Bible 2005 - BB2005

NAANAA 18

آیات محبوب کتاب مقدس از
NAANAA 18