Mark 6
6
1Naŋ ni me rowolue nan o vatine me niŋa naturvanuana; wa ira tiŋqoro anana we tatataga ineia. 2Wa o qoŋ mapsag me wesu, wa ni me qeteg vatvatogo alo ima siwo tuwale; wa we qoqo we roŋotag mamakei, we vet wa, O ike ŋaŋ mun i gene iloke ma avea? wa o sava o lolomaran me la veta ma munia, ape o vasasa ŋaŋ mulaŋ tamaike we ge mun napanena? 3Gate iloke i karpenter, natun i Meri, wa ira tasina i James wa i Joses wa i Juda wa i Simon? wa ira tutuana gate toga iake amenina? Wa neira me tutuag ape neia. 4Nava i Jesus me vet muneira wa si, Tete nom mataketake o prophet, nava alo tur vanuana, wa amaira sogona, wa alo tur imana. 5Wa ni gate ge lai o vasasa si ta tuwale aia, nava ni me taŋov o tapai we mageregere mun napanena, wa me ge esura. 6Wa ni me mamakei ape nor o nom qerqeret. Wa ni me taletale alo vutre vanua ŋaŋ we vatvatogo.
7Naŋ ni we log ma suria ira numei nirua, wa we qeteg suware neira at pul ruarua, wa ni me la muneira o mana goro o vui gagavu ŋaŋ. 8Wa ni me gatogorora si nipea la o sava ape matesala, nava o qat tigo ta tuwale; nipea o taŋa, wa nipea o bread, wa nipea o som ape rotig; 9nava si a rot goro o malekai mun o vinkau, wa si nipea saru o siopa sarusaru nirua. 10Naŋ ti vet muneira wa, Alo si kam qe kalo pata ilo ima avea, tur togatoga aia kamiu gai rowolue nan o vatine. 11Wa irasei ŋaŋ qe tete lav vasgot kamiu avea, wa tete roŋotag kamiu, alo kam we rowolue nan aia tur neneŋag savrag o wuwue tano alalaŋe raŋomiu mun vaglala mun neira. We nun nau we vava mun kamiu si te mataketake mun Sodom wa Gomora alo qoŋ veveg nan mun o vanua ilone. 12Naŋ neira me rowolue we toretore si o tanun ŋaŋ a nomleas. 13Wa neira me vure lue o vui we tatas ŋaŋ we qoqo, wa me nonon ira mageregere we qoqo mun o lig oliv, wa me ge esura.
14Naŋ i Herod i maranaga me roŋotag mona, ape nasasana me gao veta ti alo maea, wa ni me vava si, I John i Vasugroŋo me tavaraka veta nanra mate, wa o manigiu o ine o vasasa ŋaŋ we mana alo ineia. 15Nan o tuaniu wa si, I Elia nake; wa o tuaniu si, O prophet nake, si tama isei nanra prophet ŋaŋ. 16Nava i Herod me roŋotag mona, we vet wa si, I John iloke, nau me sal mot naqatuna ti; ni me tavaraka veta nanra mate. 17Apen i Herod iloke me suware veta me taur varaget i John, wa me rotia alo ima rotrot, o manigiu i Herodias rasoan i Philip i tasina, ape ni me lagia ti. 18Apen i John me vava mun i Herod si, Gate tira ape lea si ka lav rasoan i tasima. 19Wa i Herodias me loloanua apena, wa we maros we ge mateia, nava gate lai. 20Apen i Herod me momogo i John, we gilala si neia o tanun taniniga wa we roŋo, wa ni me matagisgis goroa; wa ape ni me tiŋqoroa ni me gagapalag vagaqoqo apena, wa me tiŋtiŋqoro malakalaka ineia.
21Pa o qoŋ we wia me wesu i Herod me ge o ganagana ape ni me wota ti alolona munra liwoa ŋaŋ amaia, tara liwoa goro tar, tara moai ŋaŋ ta Galilea. 22Wa natun i Herodias iloke o tavine me mule pata ma me lakalaka, wa we taŋo mun i Herod tarasei we risa tuwale amaia; wa i maranaga ilone me vet mun o malamala wa, Ka paere munau ape gene tea ko ta maros lai, wa na te la at muniko. 23Wa ni me vava vagogonag munia si, O gene tea ko ta paere lai munau apena, na te la at muniko, ta niŋa ape nok o tavala marana. 24Naŋ iro gene me rowo pata, me vet mun ravevena wa, Si na paere o sava? Naŋ neia wa si, Naqatun i John i Vasugroŋo. 25Wa gaplot ni me kalo pata togtogoa sur i maranaga, me paere mona, we vet wa, Nau we maros si ka la rigrig ma alo tapera naqatun i John i Vasugroŋo. 26Naŋ nalolon i maranaga me wono ran apena; pa o manigiu o vavae ni me log vagogonag ti, wa o manigiu iragai we risa tuwale amaia, ni gate maros we gevtagia. 27Pa i maranaga me vatraŋ gaplot o soldier at, me vareg si a lav naqatuna ma. 28Wa i gene me mule at me sal mot naqatuna alo ima rotrot, wa me lav naqatuna ma alo tapera, wa me ukeg mun o malamala; wa o malamala me ukeg mun ravevena. 29Naŋ ira tiŋqoro ŋaŋ anana me roŋotag mora, me mule at, wa we taur kalo natamatena, wa me saloa alo qaraŋ tamate.
30Naŋ ira sala we gogorag ma sur i Jesus, wa we gaganag kel munia o gene nol, o savasava ŋaŋ neira me gagapalag, wa o savasava neira me vatvatogo apena. 31Naŋ ni me vet muneira wa, Pa ikamiu, tur mule asau ma ilo masao vanua vanameag, wa tur mapmapsag galtag kamiu. O manigiu si o sul we mulemule ma wa we totoa kel we qoqo, wa neira gate toga mamasa ilo si a ganagana. 32Wa neira me toa vano ilo masao vanua vanameag vawo aka we asau. 33Pa o sul ŋaŋ me ilora we toa, wa we qoqo me gilala si ineia; wa neira we valago tuwale ilo vatine nan val laqlaqe vanua ŋaŋ mun o raŋoi, wa me valago sal neira, wa me vug tuwale suria. 34Naŋ i Jesus me rowo kalo, we ilo o sul liwoa wa we lolomagarosa ineira, ape neira tama o sheep o altag goro tagai; wa ni me qeteg vatvatogo vagaqoqo neira. 35Wa o masao qoŋ me qoqo veta, wa ira tiŋqoro anana we mule ma suria we vava munia wa si, O vatike o vanua vanameag, wa o masao qoŋ me qoqo veta; 36si ka ukegira, si neira a mule siwo ilo utag ŋaŋ wa ilo vutre vanua ŋaŋ we toga wawaliog, wa si a tuvag o sinaga nagara; o manigiu itagai amaira si neira a gana. 37Pa ni me valui gorora we vet wa si, Ikamiu wa, tur la muneira si a gana. Naŋ neira we vava munia wa, Pa si kamam a mule momam wa we tuvag o sinaga mun o pene melnol vagarua, wa we la muneira si a gana? 38Pa ni me varusira wa si, Nivisa o bread amen kamiu? Tur mule at, tur ilo momiu. Naŋ me lolomaran paso mora apena, we vet si, Tavelima, wa o iga nirua. 39Naŋ ni me vareg muneira si neira a pute nol siwo, o vavtigiu o vavtigiu, alo valis we qaro. 40Wa neira me pute mora siwo, o garatigiu o garatigiu, melmelnol wa saŋsaŋavul tavelima. 41Naŋ ni me taur o bread ilone tavelima, wa o iga nirua, ti ate laŋ kalo ivunana, ti wievavae; wa ni me tuqe wora o bread wa me tirag munra tiŋqoro anana, si neira a sogo muneira; wa ni me tirag wora mulaŋ o iga nirua ilone muneira nol. 42Wa neira me ganagana nol, wa me toqo qet. 43Wa neira me sau kalo o garate sinaga me tuqe ti, o gete saŋavul tuwale o numei nirua we ura, wa o iga mulaŋ. 44Pa iragai me gana mora o bread tama tar vaga tavelima, o rereata.
45Naŋ rigrig ni me vasosov ira tiŋqoro anana si a vega vawo aka, wa a levegao moaia tavala qilo i Bethsaida, wa ineia te ukeg mona o sul. 46Wa me vava vatulag paso muneira, ni me toa kalo ivune tauwe sin tataro. 47Naŋ me ravrav, wa o aka alo tine qilo veta, pa ineia magesena alo tano. 48Wa ni me ilo ragai we vivtigira alo we suasua; ape o laŋ we sawu taniniga gorora. Naŋ tama alo masao mamamata o vavatiu talo qoŋ ni we susurut ma sur neira, we so naraŋona avune pei; wa ni me maros we mule sal neira. 49Wa neira me iloa we mulemule avune pei, wa me nonom si o roŋo, wa we awoawo raka. 50Ape neira nol me iloa, wa natoqara we matikotiko apena. Pa rigrig ni me vava muneira, ti vet muneira si, Tur sov naapemiu, inau ran, turpea gogogolo. 51Naŋ ni me vega kalo surira vawo aka, wa o laŋ me sawu mot; wa namalara me rowo aneane raka sage apena, wa neira we mamakei. 52Ape neira gate lolomaran tea ape bread ŋaŋ; o manigiu natoqara me wasvat.
53Naŋ me levegao siwo paso, neira me niŋa ilo vanua Genesaret, wa me tul o vat. 54Wa neira me rowo kalo nan o aka, wa rigrig o sul we gilala si neia, 55wa we valago tal a tag ta vanua ilone nol, we qeteg sasa raka ira gopae ŋaŋ alo tano epara ilo masaoi neira we roŋotag si ineia aia. 56Wa ni ta mule pata ivea, si o vutre vanua ŋaŋ, si a tag tavea, pa neira te mapmap ira mageregere alo sarewolwol ŋaŋ, wa we tiasia si neira a taŋo lai vano si ape non o golgolo siopa; wa irasei ŋaŋ te taŋo lai vano ape neia te esu ti apena.
انتخاب شده:
Mark 6: MOTA
هایلایت
به اشتراک گذاشتن
کپی

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament was published by the British and Foreign Bible Society in 1931.