Mark 7
7
1Naŋ ira Pharise me gogorag ma suria, tara tuan vatvatogo, me mule ma ti a Jerusalem. 2Wa neira me ilo ti o tuan tiŋqoro anana we ganagana o sinaga mun o panei purepurei, was gate savsavula, wa neira me golgol apena. 3O manigiu ira Pharise ŋaŋ, wa ira ta Judea nol, ta tete savsavula galomtag tete ganagana, we kokor goro naliŋara tupura me gaganag tapare ma; 4wa alo we kel ma nan o sare wolwol ta tete sugsug, neira gate ganagana; wa o gene ŋaŋ we sea we qoqo neira me taur usurag ma si a kokor mora, o liŋe vasvasug o lasa ŋaŋ nane, wa o wumeto ŋaŋ, wa o tano pei ŋaŋ o bras, wa o tanoepa ŋaŋ. 5Naŋ alo ine ira Pharise tara vatvatogo me varusia wa si, Ape sava ira tiŋqoro anama gate mulemule tataga naliŋara tupunina me gaganag tapare ma, nava neira we ganagana o sinaga wa mun o panei gate savsavula? 6Pa ni me valuira ti vet wa si, We wia ras i Isaia me gaganag o liŋe prophet apen ikamiu ira sokoi goro kamiu, tama me rave si,
O sul iloke we log mava inau mun naŋusura,
Nava natoqara we toga aras ran nan nau.
7Pa neira we momogo matila inau,
We vatvatogo ape vavae vatraŋ mora tanun was nor o lea vatogoa.
8Kamiu we toavtag o lea vatraŋ amon God, wa we taur goro o liŋai amor o tanun me gaganag tapare ma, o liŋe vasvasug o wumeto ŋaŋ wa o lasa ŋaŋ nane; wa kamiu we ge mulaŋ o gene ŋaŋ we sea we sasarita ape ike ŋaŋ we qoqo.
9Naŋ ni me vet muneira wa, Kamiu we gevtag mantag o lea vatraŋ mon God, si kamiu a matagisgis goro naliŋamiu iloke me gaganag tapare ma. 10Apen i Moses me vava mona si, Ka nom mava i tamama tana ravevema; wa, Isei qe vava tatas i tamana si ravevena ni tagea mun o matea apena. 11Panava ikamiu we vava wa, Si o tanun ta vava mun i tamana si ravevena si, Korban (wa si o sogov) o gene ilone amenau me piriŋ laiko ti nia; 12kamiu gate ukegia mulaŋ sin ge o sava mun i tamana si ravevena. 13Wa we ge vanameag o vavae mon God mun naliŋamiu ilone kamiu me taur tapare ma, wa we la tapare at; wa kamiu we ge mulaŋ we sasarita ape ike ŋaŋ we qoqo.
14Naŋ ni me suware ma suria o sul nol, ti vava muneira wa, Tur tiŋqoro nol inau ma, wa tur lolomaran. 15Itagai ran we toga a varea nan o tanun, wa te mule pata ilo lolona, wa te qara mana lai si a ge lepa ineia. Nava o gene ŋaŋ we rowolue nania, o ine ŋaŋ nane we ge o tanun sin lepa. 16Isei naqorona apena sin roŋotag, ni roŋotag nia. 17Naŋ ni me kalo pata veta ilele ima nan o sul, wa ira tiŋqoro anana we varusia ape vavae tenegag iloke. 18Naŋ ti vava muneira wa, Sa si kamiu mulaŋ o qure tamaike? wa kamiu gate nonom vaglala si o savasava talo vareai ma qe mule pata lai ilo tanun gate mana si a ge lepa ineia? 19O manigiu si gate mule pata lai ilo lolona, nava ilo toqana, wa te rowolue at ilo wora; ti ge wenewene o gene ganagana ŋaŋ. 20Naŋ ti vava si, O gene we rowolue at nan o tanun, o ine nane we ge lepa o tanun. 21Ape nan alo lolona, nan o tine toqe tanun ŋaŋ te rowolue at o nonomia malkeke ŋaŋ, o val sale pakapaka ŋaŋ, o vus nawono, 22o palpal, o ararike, o matev wasmata, o matai malkeke, o vava nawono, o nom rekereke, o liŋe qaqae. 23O malagene ŋaŋ iloke we rowolue nol nan alo lolona, wa we ge lepa o tanun.
24Naŋ ni me tavaraka nan o vatine me sirig sage ilo tiŋgoro vanua a Tur wa a Sidon. Wa ni me kalo pata ilele ima, wa gate maros si sei a gilala apena; pa ni gate liŋarag lai tea. 25Pa gate maul, o tuara tavine me roŋotag ape ineia, o vui gagavu we ge natuna o malamala, wa ni me niŋa we rowo taqa ape raŋona. 26Pa o tavine ilone o ta Grik, o qeteg vanua ta Surophenikia; wa ni me paere munia ni vure savrag o vui we tatas nan i natuna. 27Nava i Jesus me vet munia wa, Ukeg ira reremera si neira toqo amoa; ape gate wia we la o sinaga nagara reremera wa we savrag mun gara kurut. 28Pa ni me valuia we vava munia wa, Tagai wa, Lord; ape o kurut ŋaŋ alalaŋe tano ganagana we gana o vain sinaga gara reremera. 29Naŋ ti vava munia wa, Ape vavae iloke ka mule at; o vui we tatas ilone me rowolue veta nan natuma. 30Wa o tavine me toa kel ilo imana, wa me ilo suar i natuna we risa alo tanoepana, wa o vui we tatas ilone me rowolue veta.
31Naŋ ni me rowolue mulaŋ nan o tiŋgoro vanua a Tur wa a Sidon, wa me niŋa siwo i pan qilo ta Galilea, we mule raveaglue o tiŋgoro vanua Dekapolis. 32Wa neira we lav ma suria o qorowono o poŋa, wa we paere munia sin taŋovia mun napanena. 33Naŋ ni me lav asaua nan o sul ilo pupuel, ti gis napisuna ilo qorona; wa ti anus, ti taŋo vano ape garameana nia: 34ti ate laŋ kalo ivunana, ti masorsor, ti vava munia si, Ephphatha, wa si, Ka waka. 35Wa gaplot non o tano roŋroŋotag ŋaŋ me waka raka; wa nagagarameana me tatavaul, wa ni me vava laqa. 36Naŋ ni me gatogoro maremare nan neira wa sororo munsei; panava alo ni we gatogoro gagarakae ineira, neira me sororo aneane nan amoa apena. 37Wa neira me mamakei aneane raka sage, we vet si, Ni me gagapalag mantag o gene ŋaŋ; wa ni we ge ira qorowono si a roŋotag, wa ira luto si a vava.
انتخاب شده:
Mark 7: MOTA
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament was published by the British and Foreign Bible Society in 1931.