Mark 8
8
1Naŋ alo qoŋ ŋaŋ ilone, o sul we qoqo aneane me vug tuwale mulaŋ, wa itagai amaira si a ganagana, i Jesus me log ma suria ira tiŋqoro anana, we vet muneira wa, 2Nalolok we magarosa goro o sul; ape neira me toga o qoŋ nitol veta amenau, wa itagai amaira si neira a gana; 3pa si na qe ukeg savragira qale maliŋsala ilo imara, neira te malewa a matesala, ape o tuanira o salaras. 4Naŋ ira tiŋqoro anana me valui goroa si, Isei te vaŋan toqo lai ira gene ŋaŋ iloke mun o sinaga iake alo vanua vanameag? 5Pa ni me varusira wa, Nivisa o bread amen kamiu? Naŋ neira wa si, Lavearua. 6Naŋ ni me vareg mun o sul si a pute siwo vawo tano; wa ni me taur o bread lavearua ilone, wa me wievavae paso, ni me tuqe wora, wa me tiratirag munra tiŋqoro anana si neira a sogo mora; wa neira me sogo mun o sul. 7Wa o nati iga amaira o tapai; wa ni me wievavae, me vet si a sogo mulaŋ iloke ŋaŋ. 8Naŋ neira me gana wa me toqo; wa neira me sau kalo o garate sinaga me tuqe ti, o gete lavearua. 9Pa iragai ŋaŋ me ganagana tama tar vagavat; wa ni qara ukeg savragira. 10Wa gaplot ni me vega kalo vawo aka tara tiŋqoro anana, me niŋa a tag ta Dalmanutha.
11Naŋ ira Pharise me rowolue ma, we qeteg varsikesike amaia, we sike amaia o vaglala ma vunana, we gale iloa. 12Pa ni me masorsor alo lolona, ti vet wa, O taraŋiu iloke we sikesike mulaŋ o vaglala apesa? We nun nau we vava mun kamiu wa, Tete la ran o vaglala mun o taraŋiu iloke. 13Wa ni me toavtagira, me vega kel mulaŋ vawo aka ilone, me levegao tavala qilo.
14Pa neira me loloqoŋ we la gar o sinaga, wa itagai amaira alo aka, nava o bread tuwale wora. 15Naŋ ni me vareg raka muneira, ti vet wa, Tur matag goro, tur ilo goro kamiu nan o leven nora Pharise, wa nan o leven non i Herod. 16Pa neira me varsikesike raka vires neira wa si, Ape sinaga tagai amen nina. 17Naŋ i Jesus we lolomaran veta apena, ti vet mun neira wa, Apesava kamiu we varsikesike ape sinaga tagai amen kamiu? kamiu gate gilala tiqa, wa gate nonom vaglala? wa natoqamiu qale wasvat? 18O matai amen kamiu, wa kamiu gate iloilo? wa o qoroi amen kamiu, wa kamiu gate roŋroŋotag? wa kamiu gate lolomaran kel? 19Alo na me tuqe wora o bread tavelima munra tar vagatavelima, kam me sau kalo o gete nivisa we uravag o garate sinaga me tuqe ti? Naŋ neira we vet munia wa si, Saŋavul tuwale o numei nirua. 20Wa alo me tuqe wora o bread lavearua munra tar vagavat, kamiu me sau kalo o gete nivisa we uravag o garate sinaga me tuqe ti? Naŋ neira we vet munia si, Lavearua. 21Naŋ neia muneira wa, Apesava kamiu gate nom vaglala tiqa apena?
22Naŋ ni we niŋa Bethsaida; wa neira we lav ma suria o matapei, wa we tiasia sin taŋo vano ape neia. 23Naŋ ni me taur goro napanen i matapei, me rave luea nan o vutre vanua; naŋ ti anus ivune matana, ti map napanena ivunana, ti varusia si, Ko we ilo o sava tea? 24Pa ni me ate kalo, we vet si, Na we ilo mok o tanun ŋaŋ; ape nau we sagaragira tama o tantangae ŋaŋ, we mule kelkel. 25Naŋ alo ine ni me map mulaŋ napanena ivune matana, wa we ge sin sagarag qalo, wa me wia kel munia, wa ni me iloilo vatawasai val gene ŋaŋ. 26Naŋ ni me vatraŋ savragia ilo imana, ti vet wa, Nipea mule pata ilo vutre vanua, wa nipea vava munsei alo vutre vanua.
27Naŋ i Jesus tara tiŋqoro anana me rowolue at ilo vutre vanua ŋaŋ a Kaisareia Philipi; wa a matesala ni me varus raka ira tiŋqoro anana, we vet muneira wa, O tanun ŋaŋ we vava ape nau si isei? 28Naŋ neira me valui goroa wa, I John i Vasugroŋo, pa o tuaniu si, I Elia, wa o tuaniu mulaŋ si, Isei nanra prophet. 29Naŋ ti varusira wa, Pa kamiu we vava si inau isei? Wa i Peter we valui goroa ti vet wa, Iniko i Christ. 30Wa ni me ŋorov gorora, nan neira wa gaganag munsei ape neia.
31Naŋ ni me qeteg vatvatogo neira, si amon i Nat tanun sin roŋovivtig vagaqoqo; wa si ra tamtamatua ŋaŋ tara oloolo liwoa tara vatvatogo te gevtagia; wa si te ge mateia, wa si me paso o qoŋ nitol ni te tavaraka kel. 32Wa ni me wawaŋ lue we gaganag o vavae ilone. Naŋ i Peter me lav sea ineia, we me qeteg ŋorov goroa apena. 33Pa ni me kilau, wa we sagarag ira tiŋqoro anana, we ŋorov goro mona i Peter, ti vet wa, Toa kel, gai, ape kulak, Satan; ape ko gate nonom ape gene ŋaŋ anon God, nava nor o tanun. 34Naŋ ni me log tuwale ma suria o sul, wa ira tiŋqoro anana, wa me vet muneira wa, Isei qe maros we mule ape kulak, ni leasag kelua, wa ni taur kalo non o wolowolo, qara tataga inau. 35O manigiu si sei ta maros we vaesu naatana, ni te ge tagea; nava si sei ta ge tagea naatana, o manigiu inau wa o lea we wia, ni te vaesua apena. 36Ape o sava we wia te rowolue mun o tanun apena, sin qe taur raka mona o marama nol, pa si naatana qe rowo qet nania? 37Si o tanun te ukeg lai o sava sin wol kel naatana nia? 38Ape si sei qe apekiria ape nau wa ape mok o vavae ŋaŋ alo taraŋiu iloke o manpakapaka wa we ganganor, i Nat tanun mulaŋ te apekiria ape neia, alo ni te kel ma aŋaisa alo leŋasin i Tamana, wa ira angel we roŋo amaia.
انتخاب شده:
Mark 8: MOTA
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
New Testament was published by the British and Foreign Bible Society in 1931.