Mateo 14
14
Sema Ingkathiy John A Naemonjag
(Mark 6:14-29; Luke 9:7-9)
1Nontan a timpo, si Herod a naiyantoray na Galilee, inki-ngelan toy maypangkep na nainpasi-pasing Jesus, 2et kigwan to ired ofisiyalis to i “Si-katho emos John a Naemonjag a iyanpawil. Isonga, gwariy panakabalin ton mengemag iren ma milagro.”
3Kigwan Herod iwan tep inpa-da thos John a Naemonjag a inpabalod to et inpakalebos to. Inpasing Herod iwan tep inimbaliy tos Herodias a sigod a imbaliy na ahi ton si Philip. 4Tep kigwan John cha Herod i “Iyayparit cha dinteg tayo i imbaliyen moy imbaliy na ahim.” 5Isonga, piyan Herod a pebonos John, nem entahot toy tothoo tep nainbilang chen profita.
6Nonta mimothok i akow na birthday Herod, sema marikit a anak Herodias, iyansaded sangoanan na emiin a ainbitar. Kinas Herod i sada tho, 7isonga inkari thon engisafata i i-kan tod si-kathoy angken nengon inbaga tho.
8Isonga, inbagaan ma na marikit si ineto no nengoy konen to, et kigwan to ngod Herod i inbilin na ineton kigwan to i “I-kan mod si-kak i toktok John a Naemonjag a iyay-ejan cha pingkan.”
9Iya-ngos si Herod nonta inki-ngelan to man, nem kebaing ngo pay a eg mengemag na inkari tho tep insafata thod sangoanan na bisita tho. Isonga, inbilin to i metongpal iwa inbaga na marikit, 10et inpadengso thoy toktok John cha kalebosan. 11Et in-ejan cha ma toktok chiwa pingkan a inkowan ched ma marikit et in-awat tod ineto. 12Sema iren disipolos John a Naemonjag, kimowan ali chen ida riy angel John et inbeka ra. Et kimowan ma ired kad-an Jesus et ingwanggwang chiy epasamak.
Pikan Jesus I Esolok A Dimen Dibon Too
(Mark 6:30-44; Luke 9:10-17; John 6:1-14)
13Idi inki-ngelan Jesus iwa epasamak, imekal chiwan a iyanbangken kimowan cha iyaydasin a dogad say agos to. Nem idi chingel na chakel a too i imekal si Jesus, bimetik ired siyo-siyodad cha, et tined ches Jesus a iyan-aha-ahad ira. 14Idi mimothok si Jesus a imepas chiwa bangka, mita thoy chakel a too et kiyaasian to ira et inpamapteng to ira ma mansekit.
15Idi ara-chem, kimowan iriy disipolos tod kad-an ton kigwan cha i “Ara-chem ma, et ija kiyed iyaydasin a dogad. Ito-nom ira ja tood iyay-esop a siyo-siyodad say menongkal ira na kakanen cha.”
16Kigwan Jesus i “Angken eg ira onkowan. I-kani yo ira na kakanen cha.”
17Et kigwan cha wa i “Nem ija bengat i dimen tinapay tan chegwen paideng.”
18Et kigwan Jesus i “Ala jo did jay.” 19Inbilin to i ontokkong ira ma tood do-bet. Et ida tho wa ma dimen tinapay tan chegwen paideng, et tiyangkak toy dangit a iyansalamat cha Afo Chiyos. Et piyetpet-ing to ma tinapay, et in-i-kan to ired ma disipolos to say iap-ap ched too. 20Engan iren emiin et iyapsel ira. Et kiyoskos iren ma disipolos iriy ebay-anan, et pino thoy sawal na chegwen basket. 21Say kabibidang na engan, chanchanin dimen dibon daleki, nem eg iyaybilang i bibii tan aanak a engan.
Iyan-ahad Si Jesus Cha Tapow Na Chanom
(Mark 6:45-52; John 6:15-21)
22Idi iyakcheng ma, inpankeb-ong men Jesus iriy disipolos tod bangka say medebas ired piig niwa baybay iy maramen inpabtik to ngo ira ma chakel a too. 23Idi inpabtik to wa ira, eniyed chiwa chontog a sa-sa-ki tho say mankararag. Nonta edagwi, gwara pay laeng si Jesus chiwa chontog a sa-sa-ki tho 24iy say sema bangken iyandoganan iren ma disipolos to, imaragwi wed kilig niwa baybay. Mapkes i sepdat na chalojon cha bangka tep iyaykontray chahem cha si-kara.
25Idi chanchanin kagwis, man-aahad si Jesus cha tapow na chanom et sibi tho ira ma disipolos to. 26Idi mita iren ma disipolos ton man-aahad cha tapow na chanom, timahot iren pasiyen kigwan cha i “Aninit!” Et kimeljaw ira kagol na tahot cha.
27Nem kigwan Jesus a chakos cha si-kara i “Pekedsang joy nemnem jo! Si-kak iyay. Enog i tahot.”
28Et kigwan men Peter i “Afo, no podnon si-kam ithan, ta-gway moak a onkowan ded tan a man-ekad cha tapow na chanom.”
29Kigwan Jesus i “Gomali.”
Et imepas si Peter chiwa bangken iyan-ahad cha tapow na chanom, et kimowan cha kad-an Jesus. 30Nem idi diyeknen Peter i pekes na chahem, timahot. Et idi inchogi tho wen melned, kimeljaw a kigwan to i “Afo, tolongi moak!”
31Et inka-gwat Jesus a chakos i diwa tho, et piyetpetan tos Peter a kigwan to i “Niyana enka-jas i pamatim? Niyana iyanchegwa-chegwa ka?” 32Idi iyankeb-ong ma ired ma bangka, simalcheng miy chahem. 33Et sema iren iyandogan cha bangka, chijaw ches Jesus a kigwan cha i “Agpayson si-kam i Anak Afo Chiyos.”
Inpamapteng Jesus Iriy Mansekit Cha Gennesaret
(Mark 6:53-56)
34Idi bima-sil ma ires Jesus cha piig niwa baybay a sibi riy sahop na Gennesaret, 35piyeschian na tothood man, isonga inchamag ched intiron sahop, et intolod chen emiin i mansekit cha kad-an to. 36Et naekiadok ired Jesus i itolok to ira ma mansekit a mengapkap na angken kilig na baro tho. Et emiin a engapkap niwa baron Jesus, mimapteng ma ira.
اکنون انتخاب شده:
Mateo 14: KAR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 Wycliffe Bible Translators, Inc. All rights reserved.