Mateo 16
16
Inbaga Na Pharisees Tan Sadducees I Milagron Mengipaneknek
(Mark 8:11-13; Luke 12:54-56)
1Gwariy echom a Pharisees tan Sadducees a kimowan cha kad-an Jesus. Piyan chen pechasen, isonga inbaga ren mengibiybiy na milagron mengipaneknek i si Afo Chiyos nowan i engito-no did si-katho. 2Nem insongbat Jesus i “No emangkelnek i akow, nakigwan jo i ‘Maohow nem megwa-gwa tep depang i iyaykayang.’ 3Tan no dadabi ngo, nakigwan jo i ‘On-oran emo niman tep depang i iyaykayang tan engolpot.’ Amta yon mengegwat na nasini-neng jod iyaykayang say amtaen jo ngo di no on-oran ono enchi, nem eg jo amten mengegwat na sinjal a nainbiybiy Afo Chiyos maypangkep na emangkepasamak niman a timpo. 4Si-kayon too niman, ngaaw kayo tan eg jo in-ono-onong i kapateg jod Afo Chiyos. Nainpili-pilit jon maybiybiyan kayo na milagro. Nem nagwariy maybiybiy cha si-kayo, malaksid na sinjal bengat a inges toy epasamak cha Jonah a profita nonta bayag da.” Idi iyakcheng a kigwan Jesus iwan, bintihan to wa ira.
In-inges Jesus I Toro-toro Na Pharisees Tan Sadducees Cha Para Debag Na Tinapay
(Mark 8:14-21)
5Idi bima-sil ma ires Jesus cha piig niwa baybay, iyamtaan na disipolos to i diningding chen mengitahin na tinapay a sikdop cha. 6Kigwan men Jesus cha si-kara i “Tanchaani yoy para debag na Pharisees tan Sadducees.”
7Idi inki-ngelan iren ma disipolos to man, iyantabtabal iren kigwan cha i “Kigwan to emo man tep nagwariy intahin tayon tinapay.”
8Amten Jesus i chiyan tabtabala, isonga kigwan to i “Ara! Enka-jas i pamati jo! Niyana jowan tabtabaliy kanagwara na tinapay? 9Eg jo pay laeng nin egwathan? Diningding jo aya ira ma dimen tinapay a inpahan kod ma dimen dibon too? Piyen basket i injanan jo na ebay-anan? 10Et sema pithon tinapay a inpahan kod ma epat a dibon too, piya ngon basket i injanan jo na ebay-anan? 11Isonga, niyana eg jo pay laeng nin egwathan i nat tinapay i piyan kon a-seden nonta engkay? Sema kigwan ko, tanchaani yoy para debag na Pharisees tan Sadducees.” 12Et igwathan ma iren ma disipolos i sema kigwan Jesus a tanchaanan cha, nat para debag na tinapay, no diket sema toro-toro iren ma Pharisees tan Sadducees.
Sema Kigwan Peter Maypangkep No Siyes Jesus
(Mark 8:27-30; Luke 9:18-21)
13Idi mimothok ires Jesus cha sahop na Caesarea Philippi, inbagaan toy disipolos to i “Nengoy nakigwan na too maypangkep no siyaak a Anak na Too?”
14Insongbat na disipolos to i “Nakigwan na echom i si-kam si John a Naemonjag. Nakigwan ngo na echom i si-kam si Elijah. Nakigwan ngo pay na echom i si-kam si Jeremiah ono sa-kin profita nonta bayag da.”
15Kigwan Jesus i “Nem no si-kayo ngo, ngoy nakigwan jo maypangkep no siyaak?”
16Insongbat Simon Peter i “Si-kam i Criston Anak Afo Chiyos a sibibiyag.”
17Et kigwan men Jesus i “Magesat ka, Simon a anak Jonah, tep nat tooy engipaamten man cha si-kam, no diket si Awak a gwared dangit. 18Isonga, konen kod si-kam i si-kam mes Peter a say banag to, batho. Seja batho, sema pengemagan ko na simbaan kon emiin a naematid si-kak, tan say panakabalin na pathiy, nat mebedin a a-gwahen to ira. #16:18 panakabalin na pathiy Sema kosto-koston esel cha Greek a sola-solat, sejay: sema pasbol a sakepan na Hades na kawad-an na iyangketiy. Say pasbol, arig na panakabalin. 19I-kan koy karebengan mo say inges mo ma mengegchi na tolbek a mandohat na pantorayan Afo Chiyos. Angken nengoy iparit mod ja dobong, iparit ngon Afo Chiyos a gwared dangit. Tan angken nengoy itolok mod ja dobong, itolok ngon Afo Chiyos a gwared dangit.” 20Et binidin ma iren Jesus i eg cha polos igwanggwanggwang cha angken siyen too i si-kathoy Cristo.
Sema Pilmiron Inpangowan Jesus Maypangkep Na Ketiy To
(Mark 8:31-33; Luke 9:22)
21Manipod nontan inpaamten Jesus ired disipolos to i mepesamak alid si-kathon kigwan to i “Mesepol a onkowanak cha Jerusalem. Sema iren iyangkaama, aafo na papari, tan mamaistoro na dinteg chiwan, pedigathen chaak a pasiya, et pebono raak, nem no maykatdon akow, manpawilak.”
22Et si Peter, ingwakdin to wes Jesus et inseg-ang ton kigwan to i “Afo, sapay koma nat ipalobos Afo Chiyos i kigwan mo! Nat mebedin a mepesamak ira man cha si-kam!”
23Nem singab Jesus si Peter et kigwan to i “Betihi moak, Satanas! Mowan taktahaak cha mesepol a a-magen ko. Tep seta mowan nemnema, nat setan i piyan Afo Chiyos, no diket sema piyan na too.”
Sema Panbiyag Na Toon Ekika-chom Cha Jesus
(Mark 8:34; 9:1; Luke 9:23-27)
24Kigwan men Jesus cha disipolos to i “No gwariy toon piyan ton mekika-chom cha si-kak, mesepol a ibiyang toy biyag to tan sakbathen toy koros to say may-odop cha si-kak. 25Tep sema toon menepi na biyag to, ma-tiw cha si-katho, nem sema toon metiy kagol na pamati thod si-kak, may-i-kanan na biyag a nagwariy pengingkaan to. 26Nengoy kongkonaen na too no kokowaen ton emiin i kongkoned ja dobong iy ma-tiw i biyag to tan mechosa na ingked ingka? Nagwara! Tep nagwariy mebedin a isa-dat na tood biyag to. 27Tep si-kak a Anak na Too, onkowanak alin may-odop i anghilis kod si-kak, tan mesi-neng cha si-kak i chayaw Awak. No seman alin timpo, mengi-kanak na sa-ki tan sa-ki na kongkonen maybasar cha imag to. 28Sejay a konen kod si-kayo, podnon gwariy echom a kainakgwat chiyay a nat metiy nin ira tan metaen chaak a Anak na Too no ichogik alin mantoray.”
اکنون انتخاب شده:
Mateo 16: KAR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 Wycliffe Bible Translators, Inc. All rights reserved.