Mberaand 3
3
Nanaƭar ne no kiin oxe
1No muumeen ke o Yaal oxe Roog a sak’ina fop, da ndef na koƥ ale, fangool fee moƴ’u o ƴiƴ teen. A laamta o tew oxe yee:
«Ndax no ndigil Roog kaa lay ee nu moɗkee xa tim axe no taxar ke na ƭing ale fop?»#Mbñ 12:9; 20:2
2O tew oxe a doonaan ee:
«Kaa i moɗaa xa tim axe no taxar ke ndefna na ƭing ale 3bo ta yoqaa xa tim axe no ndaxar ne refna ndeer a ƭing ale. Roog kaa lay ee: ‹Ba nu moɗin, too ba nu nduqin, a koom aluu nu mbi’uuna rek, xan nu nqon.› »
4Maaga, fangool fee a laya o tew oxe yee:
«Coo! Nu nqonkee tus. 5Roog kaa and ee mbanuu nu moɗuuna, xan a kid nuun a mbetoox, nu mbod fa Roog, and paax fo paaxeer!»
6O tew oxe a ga’a yee xa tim axe no ndaxar ne kaa mos bo too a yaawnoox, ne’atiim da mbaag o cooxit yiif. A dalfooxa o woq na xa tim axe, a moɗ, soo a ci o kor oxe ten reeƭna paam um ta moɗ itam. 7Den ɗik fop a kid den a ndalfooxa o mbetoox, da nga ee o ƥor a yoqu. A taƥranda a naf ndun soo a singoor a den.
8Yaa yilmaan fee a yenaa, a nana o ñuxur ole no Yaal oxe Roog fee widoogna kam a ƭing ale. O koor oxe fo o tew oxe a ndalfooxa o ƭas kam taxar ke na ƭing ale ndax o Yaal oxe Roog ga’kee a den. 9Maaga, o Yaal oxe Roog a xoya o koor oxe, a layin ee:
«Ndi mam refo?»
10O koor oxe a doonaan ee:
«Kaam nan o ñuxur of kam a ƭing ale rek, um diid soo dalfoox o ɗas yaam o ƥor yoqum.»
11O Yaal oxe Roog a laamtaan ee:
«An andnoorong ee o ƥor yoqo yee? Ndax kaa o moɗ o rim ole no ndaxar ne xañit’oonga?»
12O koor oxe a doonaan ee:
«O tew oxene ɓisiidoona me mi cooxaxam o rim ole no ndaxar ne, mi yoo um moɗ.»
13Maaga, o Yaal oxe Roog a laamta o tew oxe yee:
«Xar taxu o fi keene?»
O tew oxe a doonaan ee:
«Fangool fee mat naxaxam bo um moɗ o rim ole no ndaxar ne.»#2Kor 11:3; 1Tim 2:14
14O Yaal oxe Roog a laya fangool fee yee:
«Feek keene fi’o, salooxee a ndeer cegel ke fo a ndeer muumeen-a-koƥ ke fop. O fud of o bugko ñaaƴtaa, soo yeraa fo ut ole no ñoow o ñis of fop.#3:14 Fangool fee andoona yee ten moƴ’u ƴiƴ no muumeen ke fop xan a refat oxe moƴna hees cinj ye ta naxna o kiin oxe.
15Xam ɓek njofooraƭar#3:15 njofooraƭar Roog a fi’a maafir ndeer xa ƥiy axe Aadama fa fangool fee, ten taxu ta tektitel eetu «we mbaqaqoorna». Kaa koy, meene Roog a cooxta ndegit eetaand ne itam no ndaan no tew oxe na maafkaa o ƈiƴ oxe. Neene, o Muumucil oxe regteena a rimte no tew o ne’e Mari, too reefandaand no koor. Ɗeeti itam Mace 1:18, 23; Lik 1:30-35; Gal 4:4. ndeer of fo o tew oxe,
ndeer we mbaqaqoorna na wo fo we mbaqaqoorna no ten.
Xan oxe faqaqoorna no ten a gef xoox of bo tee rip,
soo wo o gaañin no faaɗ.»#Mbñ 12:17
16A geleerooxa, a lay o tew oxe yee:
«Xam ɓaat o ƭomel gaaj of. Boo o ƥiy a sutooraa na wo, o ɗomel boo mat o xon, too yaqankee o ƴufanaa o kor of yaam a yuxum, too ten na kelfa’kang.»
17A laya a Aadama yee:
«Feek kaa o nan o ñuxur no teef, moɗ o rim ole no ndaxar ne xañit’oonga, lanq ke a salooxe yaam wo. No ñaal ke no ñoow o ñis of fop, ŋos-ŋos tigi na taxkaa o jeg ñaamel.#Heb 6:8 18Xan lanq ke a saxik kiƈ fo qooc, o ñaamataa daaƭ le na koƥ ale. 19Boo yaa o nomtooxkaa no lanq ke hat’oona, ñiitoox foop no rak of na taxkaa o jeg ñaamel. No lanq ke hato, too teen o nomtooxkaa#3:19 Coono ke a ndokiida kam adna fee cinj nanaƭar ne no kiin oxe. Neene, pakaad ke fop a ngara fo a cir ake fo calel ƭomu ke fo o halakax fo fa nqon itam. Ɗeeti Rom 6:23..»
20O koor oxe a ne’a o teem Awa#3:20 Awa Gon le kaa suttel no ɗelem hebre olaa tekitna «o ñoow ole»., ee yaam ten refu ya no wiin we fop. 21O Yaal oxe Roog a dalfooxa o fi’an a Aadama fa Awa tikoorik ƭool#3:21 tikoorik ƭool A pi aleene kaa laltaa yirmande fee Roog farna fo baabakaad we, ndaa kaa ref o anddiloor olaa na laltaa ne Roog a bugna rokanit a in ndoki ne no cofel ole. Ɗeeti Mace 22:12; Mbñ 19:7-8., a rokin a den. 22O Yaal oxe Roog a laya yee:
«Ndiiki koy, o kiin oxe a nandata nen o leng na in, took o and paax fo paaxeer. Yaaga boog, fat i nqañtin ta duq ndaxar ne no ñoow ole, yaam ndik ta moɗ xa tim axe ten, soo a ñoowaa boo kili.»#Mbñ 22:14 23O Yaal oxe Roog a raxta a den na ƭing alaa Edeen, ndax da nqooxik lanq ke da ngatna. 24A cinj ye ta raxna o koor oxe, a sipa pindel yeeyetax no batand naa na ƭing alaa Edeen, da saq laƥ kaa na kaƥaa, a yetooxaa a ƭat ale jofna no ndaxar ne no ñoow ole.
اکنون انتخاب شده:
Mberaand 3: SRR23
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Copyright © 2015-2023 by Eglise luthérienne du Sénégal