Mberaand 4
4
Kayin fa Abel
1Aadama a yoona fa Awa fee o teem, ta rok o fud, a ñoot a Kayin, soo a lay ee: «Sakaam o kiin no ndimle no Yaal oxe.» 2A dakooxa o rok o fud, soo a ñoot a Abel fee o ndeɓ Kayin.
Abel a refa o kaynaak cegel, Kayin a ref o qooxoox. 3Cinj a saxad ale, Kayin a ɓoxotiida o Yaal oxe sadax no ke xooxe um a watna. 4Abel itam a faɗoortiida o Yaal oxe taaw ke moƴna o neer na ked ake ten. O Yaal oxe a jaɓa a Abel fo sadax um. 5Kaa koy, o Yaal oxe a xuuna a Kayin fa sadax um.#4:4-5 Taa mbaambir kam Nqaariit nqas ne i nga’a yee Roog a laamta sadax fee no fo’oy le ndax o paabakaad oxe a waag o matiid me ten. Sadax fa leng kut fee deyna refu fa nqon fee no Muumucil oxe «rimteena no tew oxe». A waage o ɗeet na Heb 9:22, 28; 11:4. Ye Kayin a ga’na keene, a dalfooxa o fuux, a tagid um a hiɓoox. 6O Yaal oxe a laya a Kayin ee:
«Xar taxu o fuux, a tagid of a hiɓoox neeke bo? 7O fosooxangaa paax, a tagid of a let, ndaa o fosooxangaa paaxeer koy, bakaad fee xey no don-maax of a ɓeedang, kaa rek, ba o ci’in o gom!»
8Kayin a laya a Abel fee o ndeɓ um ee: «Aca i ndet no qol!» Ye da ndefna no qol ole, Kayin a songa a Abel fee o ndeɓ um soo a warin.#Mace 23:35; Lik 11:51; 1Saŋ 3:12
9O Yaal oxe a laamta a Kayin ee:
«Taa Abel fee o ndeɓ of?»
A doonaan ee:
«Kaam and! Kaam ref o kaynaak no ndeɓ es?»
10Maaga, o Yaal oxe a laya yee:
«Xar fi’o? O wuuq ole no fo’oy le no ndeɓ of a jaaƥatilooxiida boo me mi.#Heb 12:24 11Ndiiki koy, salooxee took lanq ke ƥuusna fo’oy le no ndeɓ of ɓaxoona. 12O xooxangaa, lanq ke cooxkirang ke da mbarna o mbat. Xan o ñaaƴaa joqooyooxaa took lanq ke.»
13Kayin a doona o Yaal oxe yee:
«A qaw ale gadnaxamoona kaa meɗ lool na mi. 14Xaye woxey raxaxam lanq kene, xam ret maa goƭoonga, joqooyooxaa no lanq ke, soo oxuu xetna fa mi a waraam.»
15O Yaal oxe a layaan ee:
«Oxuu warna a Kayin, xam rabdinoox took um boo a caf ɓetaa ƭaq.»
Cinj kaaga, o Yaal oxe a fi’a o anddiloor took Kayin, ndax oxuu xetna fo ten warkiran. 16Kayin a inoora mbaambir no Yaal oxe, soo a genik no lanq kaa Nood ngaritna no batand naa Edeen.
Xa taan axe Kayin
17 Kayin a yoona fo o teem. O tew oxe a roka o fud, a ñoot o ƥiy o ngoor a ne’in Henok. Kayin a sinja teeru, soo a ne’tin a Henok fee o ƥeem. 18Henok rimu a Irad, Irad a rim a Mehuya’el, Mehuya’el a rim a Metusayel, Metusayel a rim a Lemek.
19Lemek a gilga rew ɗik, o eetaand oxe Aada a ne’e, o ƭikandeer oxe a ne’el Sila. 20Aada rimu a Yabal fee refna o taan no molaan we na ngayaa xa siir. 21Oxe reefna took Yabal refu Yubal fee o taan no fop we na nqilimbaa fo we na liitaa. 22Sila rimu a Tubal-Kayin fee xawoogna xanjar fo celem. A jeg’a o cigeen o ne’e Naama.
23Lemek a laya rew we ten ee:
«Aada fa Sila nan-gilooxyo o ñuxur es,
nuun rew we Lemek, ndungyo nof nuun na fa lay es.
Kaam war o koor yaam ngaañ es,
war o fes yaam uut es.
24A bar ale Kayin a fi’na a ware o rabdinoox a caf ɓetaa ƭaq,
soo Lemek a caf qarɓeen ɓetuu ƭik fo a caf ɓetaa ƭaq.»#Mace 18:22
25Aadama a dakooxa o yoon fo o teem, o tew oxe a rok o fud, a ñoot o ƥiy o ngoor, soo a ne’in Set, a lay ee:
«Yaam Roog a ci’axam o ƥiy o lakas ta rondand a Abel fee Kayin a warna.»
26Set itam a rima o ƥiy o ngoor, soo a ne’in Enos. No kaa xotitna maaga, gon le no Yaal oxe a reefu a ƴufginooreel.
اکنون انتخاب شده:
Mberaand 4: SRR23
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Copyright © 2015-2023 by Eglise luthérienne du Sénégal