ମାର୍କ 2
2
ଗୁଇ'ସାର୍ତିଲ' ଗୁଇ'ସାର୍ସୁଂଅଁ'କୁନୁଂବାଇ' ସିରେମ୍ବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାତିଉ 9:1–8; ଲୁକ 5:17–26)
1ଆ'ଇଦିନ୍ ତିର୍ଗି' ଜିସୁଲେ କପର୍ନାଉମ୍ ଉଂଗମ୍ବକ୍ ମାରି ସା'ଗା' । ସା' ଜିସୁଲା ଆତା ମୁଇ ଡିଂଅଁବକ୍ ଡୁତା ଡ'ସେକ୍ ଗୁଲାଇ କୁନ୍ଡାନ୍ ରେମଲେ ଅଂଅଁ' । 2ଅଂଅଁ'ସେକ୍ ଅବୁଦିର ମାଇନ୍ବକ୍ ସା'ଗା'ସା' ଡିଂଅଁବକ୍ ବର୍ତି ରେମଲେ ଡୁକୁ । ଡାନ୍ଡର୍ ବାରେସା ତୁନୁଲାଡାକ୍ ଉଇଗା'ସା' ତାନ୍ତୁଆର୍ ଆରାକ୍ ଡେଂକୁ । ଜିସୁଲା ଆଗୁଲାଇର ମାପ୍ରୁନା ତୁମ' ଅମାଗ' । 3ଆଇ'ତୁନ୍ବେଲା ଗୁଇ'ସାର୍ତିଲ' ଗୁଇ'ସାର୍ସୁଂଅଁ'କୁନୁଂବାଇ' ଆମୁଇନ୍ଡାରେମ ଡଲିବକ୍ ସାର୍ଲକ୍ ଡୁନ' ରିଂଅଁ'କୁନୁଂ ରେମଲେବୁରଂ ଆ'ଇରସୁଗସା ସା'ଗା' । 4ସା' ଗୁତୁନ୍ ଡିଂଅଁବକ୍ ଅବୁଦିର ଡୁକୁସା' ଆମାଇ ଜିସୁନ୍ ଉନ୍ତୁ' ଇନ୍ଡ୍ରିଂ ଆଗଂତା । ସା' ଗୁତୁନ୍ ଡିଂଅଁନ୍ ଗି'ଡାଂପୁଲେଇଁବକ୍ ସାର୍ଲକ୍ ଡାଇ'ସେକ୍ ଜିସୁଲା ଲେଇ'କୁନୁଂକନ୍ଡେକ୍ ଗି'ଡାଂପୁଲେଇଁ ଗାଁସାଡ'ସେକ୍ ଆତୁନ୍ ଗୁଇ'ସାର୍ତିଲ' ଗୁଇ'ସାର୍ସୁଂଅଁ'କୁନୁଂବାଇ' ସି ରେମବକ୍ ବିନେସାକ୍ବୁରଂ ବାଗ୍ବକ୍କୁରୁଂ ଅ'ଜର' । 5ସା' ଆତୁନ୍ ଗୁଇ'ସାର୍ତିଲ' ଗୁଇ'ସାର୍ସୁଂଅଁ'କୁନୁଂବାଇ' ସିଲା ମିଏସା ବାନି ଡେମ୍ତ ଡ'ସେକ୍ ସାର୍ଲକ୍ ବିସ୍ବାସ୍ ଡେମ'କୁନୁଂ ଜିସୁଲା ଜୁଲ' । ଜୁଲ'ସେକ୍ ଜିସୁଲା ଆତୁନ୍ ଗୁଇ'ସାର୍ତିଲ' ଗୁଇ'ସାର୍ସୁଂଅଁ'କୁନୁଂବାଇ' ସିଲା ସୁନ' “ଅ ମେ', ନନ୍ ପାପ୍କାମ୍ ଗୁଲାଇ ନିଂ କେମା ଡେମ'ନିଂ” ଡ'ସେକ୍ ସୁନ' ।
6ସା' ଆତା ଜିଉଦିରେମଲେନା ନିୟମ୍ ଅମାକ୍ରେମେ ଏନ୍ତୁକ୍ର ଲେଇ'କୁଗା' । ସା' ଜିସୁଲା ଡେମ'କୁନୁଂ ଜୁଲ'ସେକ୍ ମା'ଏନ୍ ଜିବନ୍ବକ୍ ଏତ୍ଗା' 7“ମାସା' ମାଇ ଡି'କେନ୍ବାଇ' ସୁନ'ତା? ମାସା' ମାଇ ମାପ୍ରୁସୁଗ ଅଇଁୟ'ତା? ରେମଲେନା ପାପ୍ ଗୁଲାଇ ମାପ୍ରୁଉ କେମା ଡିନ୍ଡେମ୍ ଗଂତା । ମାଇ ମାପ୍ରୁସା' ଇ?” ଡ'ସେକ୍ ମା'ଏ ଏତ୍ଗା' ।
8ମା'ଏ ଏତ୍କୁନୁଂ ଜିସୁଲା ସେଟ୍ଟ' ମାଗ'ସେକ୍ ଆମା'ଏ ସୁନ' “ପେ ମାସା' ଡି'କେନ୍ବାଇ' ଗୁଲାଇ ଏତ୍ଗୁତୁପେ? 9ମାରି ନିଂ ମି ସୁନ'ନା ଅବୁଦି ଅଲୁ? ଆମାଇ ନନ୍ ପାପ୍ ନିଂ କେମା ଡେମ'ନିଂ ଡ'ସେକ୍ ସୁନ'ନା ଅଲୁ କି ନ ତକ୍ଡାକ୍ସେକ୍ ନନ୍ ବିନେସାକ୍ ଜୁଗ' ଉରିଂ ଡ'ସେକ୍ ସୁନ'ନା ଅଲୁ? 10ମାପ୍ରୁ ବେନ୍ଟାୟ'ସା' ସା'କୁନୁଂ ଆରେମନା ଉଁ'ଉଁ, କେନ୍ ଦର୍ତନିବକ୍ ଗୁଲାଇରନା ପାପ୍ କେମା ଡିନ୍ଡେମ୍ପୁଲେଇ ଅଦିକାର୍ ଡୁତା ଡ'ସେକ୍ ଆ'ନା ପେ ଜୁଲ'କୁଲା ।” ଜିସୁଲା ଆମା'ଏ ଡି'କେନ୍ ସୁନ'ସେକ୍ ଆଡିରି'କୁନୁଂଆଁ ସୁନ' 11“ନ ତକ୍ଡା'ଗ୍ସେ'ଗା ନନ୍ ବିନେସାକ୍ ଜୁଗ' ଡିଂଅଁବକ୍ ଇ'ଡା ଡ'ସେକ୍ ନିଂ ଆନ ସୁନ'ତିଂ” ଡ'ସେକ୍ ସୁନ' । 12ସା' ମା'ଏ ଗୁଲାଇର ଜୁଲ'କୁନୁଂବକ୍ଉ ଗୁତୁନ୍ ଗୁଇ'ସାର୍ତିଲ' ଗୁଇ'ସାର୍ସୁଂଅଁ'କୁନୁଂବାଇ' ସିଲା ବଲ୍ ଡେଂସେକ୍ ତଗ୍ଡା'ଗା' । ତକ୍ଡାକ୍ସେକ୍ ମାଇନା ବିନେସାକ୍ ଜୁଗ'ସେକ୍ ଗୁତୁନ୍ ଡିଂଅଁକୁରୁଂ ସେଟ୍ଟ' ବାଇରି ତୁର୍ଗା' । ତୁର୍ଗା'ସା' ଗୁତୁନ୍ ଜୁଲ'କୁନୁଂଏଁ ଗୁଲାଇର କାବାକାବା ଡେଂଉଇସେ'ଗା “ଇନ୍ଡଇ'ଏସା ଡି'କେନ୍ବାଇ' ଜୁଲ' ଆଡୁତୁନେଇ” ଡ'ସେକ୍ ଆମାପ୍ରୁ ସୁନ୍ଡ୍ରବାଲୁକ୍ସେକ୍ ସୁନ' ।
ଜିସୁଲା ଆଲେବିଲା ୱାୟ'ତା ।
(ମାତିଉ 9:9–13; ଲୁକ 5:27–32)
13ଜିସୁଲା ସମ୍ଦର୍କିନ୍ଡାକ୍ ପାଲି ମାର୍ ମୁସ ଉଇଗା' । ଉଇଗା'ସା' ଅବୁଦିର ମାଇନ୍ବକ୍ ସା'ଗା'ସା' ଆମା'ଏ ମାପ୍ରୁନା ତୁମ' ଅମାଗ' । 14ମାଇ ଉଇବେଲା ଆଲ୍ପିନା ଉଁ'ଉଁ ଲେବିଲା ଆତା ସିସ୍ତୁ ଲୁଲୁ'ନା ଡିଂଅଁବକ୍ ଲେଇ'କୁନୁଂ ଜୁଲ' । ଜୁଲ'ସେକ୍ ଜିସୁଲା ଆମାଇ “ନିଂବୁରଂ ଲ” ଡ'ସେକ୍ ୱାୟ'ସା' ମାଇ ତକ୍ଡାକ୍ସେକ୍ ଆଜିସୁଲା ତେଂଗି' ଉଇଗା' ।
15ସା' ତିର୍ଗି' ଜିସୁଲା ଲେବିନା ଡିଂଅଁବକ୍ ସୁସୁମ୍ପୁଲେଇ ଲେଇ'କୁ । ଆଇ'ତୁନ୍ବେଲା ଆତା ସିସ୍ତୁ ଲୁଲୁ'ରେମ୍ ମାରି ପାପ୍ବାଇ' ରେମଲେସା ଅବୁଦିର ମାଇବୁରଂ ମାରି ମାଇନା ସିସ୍ୟଲେବୁରଂ ତିରେ ସୁସୁମ୍ ଡେଂକୁ । ମାସା'ଡ'ନା ଜିସୁଲା ଆମ୍ବ' ଉଇନାସା ମାଇନା ତେଂଗି'ତେଂଗି' ଡୁ'ତୁନ୍ବାଇ' ରେମଲେ ଅବୁଦିର ସା'କୁ । 16ସା' ଜିସୁଲା ସିସ୍ତୁ ଲୁଲୁ'ରେମ୍ ମାରି ଅଲିରାକ୍ବାଇ' କାମ୍ ଡେମ'କୁନୁଂ ରେମଲେବୁରଂ ଲେଇ'ସେକ୍ ସୁସୁମ୍ ଡେଂକୁନୁଂ ପାରୁସି ଦଲ୍ବକ୍ ଡୁକୁନୁଂ ଜିଉଦିରେମଲେନା ନିୟମ୍ ଅମାକ୍ରେମେ ଜୁଲ' । ମା'ଏ ଜୁଲ'ସେକ୍ ଆଜିସୁନା ସିସ୍ୟଲେ ସୁନ', “ଜିସୁଲା ସିସ୍ତୁ ଲୁଲୁ'ରେମ୍ ମାରି ପାପ୍କାମ୍ ଡେମ'କୁନୁଂ ରେମଲେବୁରଂ ଲେଇ'ସେକ୍ ମାସା' ତିରେ ସୁସୁମ୍ ଡେନ୍ତା?” ଡ'ସେକ୍ ସୁନ' ।
17ସା' ଜିସୁଲା ଗୁତୁନ୍ ଅଂଅଁ'ସେକ୍ ଆମା'ଏ ସୁନ' “ସି ବାଂକୁନୁଂ ରେମ୍ବକ୍ଉ ଡାକ୍ଟର୍ ଦର୍କାର୍, ବଲ୍ଡୁକୁନୁଂ ରେମପୁଲେଇ ଦର୍କାର୍ ଆରାକ୍ । ଜା ନିଂ ଅବୁଦି ବଲ୍ରେମ୍ ଡ'ସେକ୍ ଏତ୍ଗୁତା ମାଇପୁଲେଇ ନିଂ ସାକ୍ ଆଡୁତିଂ । ମାତର୍ ଜା ନିଂ ଅବୁଦି ପାପ୍ବାଇ' ଡ'ସେକ୍ ଏତ୍ଗୁତା ମାଇପୁଲେଇଉ ନିଂ ସା'ଗୁତିଂ” ଡ'ସେକ୍ ସୁନ' ।
ଆଂଡାକ୍ସ ଆମାପ୍ରୁ ପାର୍ତନା ଡିନ୍ଡେମ୍ନା
(ମାତିଉ 9:14–17; ଲୁକ 5:33–39)
18ଜଅନ୍ନା ସିସ୍ୟଲେ ମାରି ପାରୁସିଦଲ୍ନା ରେମଲେ ଇନ୍ଡଇ' ଇନ୍ଡଇ' ଆଂଡାକ୍ସ ଆମାପ୍ରୁ ପାର୍ତନା ଡେମ'କୁ । ସା' ଆ'ଇରସୁଗ ଜିସୁନ୍ବକ୍ ସାକ୍ସେକ୍ ସୁନ' “ଜଅନ୍ନା ସିସ୍ୟଲେ ମାରି ପାରୁସିଦଲ୍ନା ରେମଲେନ୍ ସିସ୍ୟଲେସା ଆଂଡାକ୍ସ ଆମାପ୍ରୁ ପାର୍ତନା ଡେମ'ତା । ମାତର୍ ନନା ସିସ୍ୟଲେ ମାସା' ଆଂଡାକ୍ସ ଆମାପ୍ରୁ ପାର୍ତନା ଆଡେମ୍ତ?” ଡ'ସେକ୍ ଅ'ଗଁସ୍ଲା'ଗା' ।
19ସା' ଜିସୁଲା ସୁନ' “ଇ'ପର୍ ୱାଇବୁଇ'ବକ୍ କିଲମ୍ରେମ୍ ସାକ୍ନା ଗୁତୁନ୍ ଆର୍ଜୁନ୍ରେମ୍ବୁରଂ ଗୁଲାଇର ସାର୍ଦା ଡେଂସେକ୍ ଡୁତାସା' ଜାଏସା ଆଂଡାଗ୍ ଆଡୁତା । ଗୁଲାଇର ସୁମ'ଇଡ'ସେକ୍ ସାର୍ଦା ଡେଂସେକ୍ ଡୁତା । 20ମାତର୍ ଆ'ଇବେଲା ଆତୁନ୍ ଇଂଗେରା ମାଇନା ଦାଇରେମ୍ ସାକ୍ସେକ୍ କଲେ ରିଂଅଁ' ଡୁଂତା । ଆଇ'ତୁନ୍ବେଲା ମାଇନା ରେମଲେ ସିନ୍ତାଲ'ରୁନ୍ତାଲ'ସେକ୍ ମସୁନୁମ୍ ମଇନି' ଆଂଡାଗ୍ ଡୁତା ।
21ଇନ୍ଡଇ'ଏସା ଜାଏସା ତିମେ ଇମ୍ପ' ଇ'କି ଗାର'ସେକ୍ ବାୟୁର୍ ଇମ୍ପ' ଗାର୍କୁନୁଂବକ୍ ମିସାୟ'ସେକ୍ ଆସ'କୁତ । ମାସା'ଡ'ନା ସ'କୁଲ'ନା ତମ୍ଡାକ୍ବେଲା ତିମେ ଇମ୍ପ' ମାକିମ୍ସାକ୍ ଉଇତା ମାରି ବାୟୁର୍ ଇମ୍ପ' ଅଦିକ୍ ଅଦିକ୍ ଗାର୍ ଉଇତା । 22ମାରି ରେମଲେ ତିମେ ଅଂଗୁର୍ଡାଗ୍ ଇସାବୁରଂ ଅ'ରଇଁୟ'କୁନୁଂ ବାୟୁର୍ ତୁମ୍ବାବକ୍ ସୁର' ଆବୁଂତ । ସୁର'ନା ଗୁତୁନ୍ ତୁମ୍ବା ଲୁବୁଂସେକ୍ କାନାକ୍ଉଇତା । ମାରି ଅଂଗୁର୍ଡାଗ୍ସା ଡୁଂଅଁ'ଉଇତା । ଡୁ'ତୁନ୍ସା' ତିମେ ଅଂଗୁର୍ଡାଗ୍ ତିମେବାଇ' ଇସାବୁରଂ ଅ'ରଇଁୟ'କୁନୁଂ ତୁମ୍ବାବକ୍ଉ ବୁଂବୁଂ ଡୁତା” ଡ'ସେକ୍ ସୁନ' ।
ବିସ୍ରାମ୍ଦିନ୍ ମାପୁଲେଇ ଡ'ସେକ୍ ଜିସୁଲା ଅମାକ୍ଡେନ୍
(ମାତିଉ 12:1–8; ଲୁକ 6:1–5)
23ବିସ୍ରାମ୍ଦିନ୍ବକ୍ ଜିସୁଲା ବୁରଂରି'ତା ଉଇଡେଂକୁ । ମାରି ମାଇନା ସିସ୍ୟଲେସା ମାଇବୁରଂ ଉଇରେମ୍ ଗମ୍ ରୁଇବାଡ'ସେକ୍ ପୁସ୍ରିଡ' ପୁସ୍ରିଡ' ସୁସୁମ୍ ମୁଲାୟ'। 24ସା' ପାରୁସି ରେମଲେ ଜୁଲ'ସେକ୍ ଆଜିସୁଲା ସୁନ' “ଜୁ, ବିସ୍ରାମ୍ଦିନ୍ବକ୍ ଆଡେମ' ଡ'ସେକ୍ ସୁନ'କୁନୁଂ ନନା ସିସ୍ୟଲେ ମାସା' ଡେମ'ତା?” ଡ'ସେକ୍ ସୁନ' ।
25ସା' ଜିସୁଲା ଆମା'ଏ ସୁନ' “ଦାଉଦ୍ଲା ମାରି ମାଇନା ବାଇଲ'ଗେ କୁଡୁକୁନୁଂବେଲା ମା ଡେମ' ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ପେ ପଡ୍ ଆଡୁତୁପେ ଇ? 26ଅବିୟାତର୍ ଡ'ସେକ୍ ମୁନା'ପୁଜାରି ଡୁକୁନୁଂବେଲା ଦାଉଦ୍ଲା ମାପ୍ରୁନା ଡିଂଅଁବକ୍ ଗାଇସେକ୍ ମାପ୍ରୁନା ସାର୍ମ'କନ୍ଡେକ୍ ବୁଂଅଁ'କୁନୁଂ ପବିତ୍ରବାଇ' ରୁଟି ଜୁଗ'ସେକ୍ ସୁମ' । ମାରି ଜୁଗ'ସେକ୍ ଆମାଇନା ବାଇଲ'ଗେସା ସୁସୁମ୍ପୁଲେଇ ବେଡ'ସା' ମା'ଏସା ସୁମ' । ଗୁତୁନ୍ ମାପ୍ରୁନା ସାର୍ମ'କୁରୁଂ ବୁଂଅଁ'କୁନୁଂ ରୁଟି ମୁନା'ପୁଜାରିଉ ସୁମ୍ତ । ପାଲ୍ରେମ ଜାଏସା ସୁସୁମ୍ନା ନିୟମ୍ ଆରାକ୍ ଡ'ସେକ୍ ସୁନ' ।”
27ମାରି ଜିସୁଲା ଆମା'ଏ ସୁନ' “ରେମଲେନା ବଲ୍ପୁଲେଇଉ ବିସ୍ରାମ୍ଦିନ୍ ଅ'ରଇଁୟ'ତା । ବିସ୍ରାମ୍ଦିନ୍ନା ବଲ୍ପୁଲେଇ ଡ'ସେକ୍ ଆରେମଲେ ଅ'ରଇଁୟ' ଆଡୁତା । 28ସା' ବିସ୍ରାମ୍ଦିନ୍ବକ୍ ମାମା ଡିନ୍ଡେମ୍ ଡୁତା ଡ'ସେକ୍ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁନା ଅଦିକାର୍ ଡୁତାସା' ମାଇ ବିସ୍ରାମ୍ଦିନ୍ନାସା ପ୍ରବୁ” ଡ'ସେକ୍ ମାଇ ସୁନ' ।
اکنون انتخاب شده:
ମାର୍କ 2: BFW
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
CC BY-NC-ND 4.0