ମାର୍କ 3
3
ସିର୍ଲାତିତିବାଇ' ରେମବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାତିଉ 12:9–14; ଲୁକ 6:6–11)
1ମାରି ମୁସିଂ ଜିସୁଲା ପାର୍ତନା ଡିଂଅଁବକ୍ ଉଇଗା' । ସା' ଆତା ମୁଇନ୍ଡା ସିର୍ଲାତିତିବାଇ' ଡୁକୁଗା' । 2ସା' ଜିସୁଲା ଆତୁନ୍ ସିର୍ଲାତିତିଲା ବିସ୍ରାମ୍ଦିନ୍ବକ୍ ବାନି ଡେମ୍ତ କି ଆରାକ୍ ଡ'ସେକ୍ ଆ'ଇରସୁଗ ପାରୁସିଦଲ୍ନା ରେମଲେ ଆତା ଡୁକୁଗା' । ମାସା'ଡ'ନା ବଲ୍ ଡେମ'ନା ବିସ୍ରାମ୍ଦିନ୍ନା ନିୟମ୍ ମାଇ ଆମାନ୍ତା ଡ' ସୁଁସୁ ଗଂତୁନେଇ' ଡ'ସେକ୍ ମା'ଏ ଏତ୍କୁଗା' । 3ସା' ଜିସୁଲା ଆତୁନ୍ ସିର୍ଲାତିତିଲା “ନ ଆକେ ଲ, ମନ୍ଜା ତନା” ଡ'ସେକ୍ ସୁନ' ।
4ତିର୍ଗି' ଜିସୁଲା ଆତା ଡୁକୁନୁଂ ରେମଲେବକ୍ ଅ'ଗଁସ୍ଲା'ଗା', “ବିସ୍ରାମ୍ଦିନ୍ବକ୍ ଇମ୍ବ'ନ୍ କାମ୍ ଡେମ'ନା ବଲ୍ ଡ'ସେକ୍ ମାପ୍ରୁନା ନିୟମ୍ବକ୍ ଲେକ୍ଲ'ତା? ବଲ୍କାମ୍ ଡେମ୍ ଡ'ସେକ୍ କି ଅଲିରାକ୍କାମ୍ ଡେମ୍ ଡ'ସେକ୍? ମୁଇନ୍ଡାନା ଜିବନ୍ ବ'ରଲ'ନା ବଲ୍ କି ଅଗୁୟ'ନା ବଲ୍?” ଡ'ସେକ୍ ଅ'ଗଁସ୍ଲା'ଗା'ସା' ମା'ଏ ଗୁଲାଇର ଜୁ'ଜା' ଡେଂଉଇଗା' ।
5ଆସିର୍ଲା ତିତିଲା ଜୁଲ'ସେକ୍ ରେମଲେନ୍ ଜିବନ୍ବକ୍ ଇ'କିସା ଲିବିସୁପ୍ ଆଡୁତା ଡ' ଜିସୁଲା ଆମା'ଏ ଗିସେକ୍ସେକ୍ ଗୁରୁଂ ଜୁଲ' । ଜୁଲ'ସେକ୍ ଜିସୁଲା ଆତୁନ୍ ସିର୍ଲାତିତିଲା “ନ ତୁଂତି” ଡ'ସେକ୍ ସୁନ' । ସା' ମାଇ ତୁଂତିଲ'ସା' ମାଇନା ତିତି ବଲ୍ ଡେଂଗା' । 6ଗୁତୁନ୍ ଜୁଲ'ସେକ୍ ପାରୁସିଦଲ୍ନା ରେମଲେ ପାର୍ତନା ଡିଂଅଁକୁରୁଂ ସେଟ୍ଟ' ବାଇରି ତୁର୍ଗା' । ତୁର୍ସେକ୍ ଏରଦିୟ ଦଲ୍ନା ରେମଲେବୁରଂ ମିସ୍ସେ'ଗା ଆଜିସୁଲା ମି ଡେମ'ସେକ୍ ଅଗୁୟ'ନା ଡେନ୍ତା ଡ'ସେକ୍ ଅଇଁୟ' ।
ଆଜିସୁଲା ତେଂଗି' ଅବୁଦି ରେମଲେ ଉଇଡେନ୍
7ଜିସୁଲା ମାରି ମାଇନା ସିସ୍ୟଲେ ଉନ୍ତ୍କୁରୁଂ ସମ୍ଦର୍କିନ୍ଡାକ୍ ପାଲି ଉଇଗା' । ସା' ଆମା'ଏ ତେଂଗି'ତେଂଗି' ଗାଲିଲି ଜିଲା, ଜିଉଦା ଜିଲା, 8ଜିରୁସାଲମ୍ ମୁନା'ଉଂଗମ୍, ଏଦମ୍ଦେସ୍, ଜର୍ଦନ୍ କିନ୍ଡାକ୍ ଇନ୍ଡ୍ରିନା ସର୍ ମୁନା'ଉଂଗମ୍ ମାରି ସିଦନ୍ ମୁନା'ଉଂଗମ୍ନା ଅବୁଦି ରେମଲେସା ଉଇଗା' । ଜିସୁଲା ଡେମ'କୁନୁଂ ଗୁଲାଇ ବଲ୍କାମ୍ ସୁଲୁଂସୁଲୁଂ ଦେସ୍ବକ୍ସା ଉନୁଂଗା'ସା' ଗୁଲାଇ କୁନ୍ଡାନ୍ ରେମଲେ ଅବୁଦିର ମାଇନ୍ବକ୍ ସା'ଗା' ।
9-10 #
ମାର୍କ 4:1; ଲୁକ 5:1–3 ସା' ଜିସୁଲା ଅବୁଦି ସିରେମ୍ବକ୍ ବଲ୍ ଡେମ' । ଗୁତୁନ୍ ଅଂଅଁ'ସେ'ଗା ଅବୁଦି ରେମଲେ ମାଇନ୍ବକ୍ ସାକ୍ସେକ୍ ଆମାଇ ଆଲାମ୍ତିଂ ଡ'ସେକ୍ ଅ'ତୁଂସାଂ ଅ'ପେଲାଇକୁ । ସା' ଜିସୁଲା ଆସିସ୍ୟଲେ ସୁନ' “ମୁଇ ଡାଉବାଇ' ଡଂଗା ଆକେ ରିଂ । ମାସା'ଡ'ନା ଆନିଂ ରେମଲେ ଆତୁଂସାଂ ଆପେଲାଏଇ', ନିଂ ଡଂଗାବକ୍ ଲେଇ'ସେକ୍ ମା'ଏବୁରଂ ଅଇଁତିଂ” ଡ'ସେକ୍ ସୁନ' । 11ମାରି ଅଲିରାକ୍ବାଇ' ବୁତ୍ ସବ'କୁନୁଂ ରେମଲେସା ଆଜିସୁ ଜୁଲ'ନା ବୁତୁଂସେକ୍ ମାଇନା ସୁମଂବକ୍ ଲଗ୍ଡାଇ'ସେକ୍ ନ ମାପ୍ରୁନା ଉଁ'ଉଁ ଡ'ସେକ୍ ଡକ୍ତି'ତା କିରକ୍ସେକ୍ ସୁନ'କୁ । 12ସା' ମାଇ ଆମା'ଏ ସୁନ' “ନିଂ ଜା ଡ'ସେକ୍ ପେ ଆଜାଏସା ଆସୁନ'” ଡ'ସେକ୍ ସୁନ' ।
ଜିସୁଲା ବାରଲକ୍ ସିସ୍ୟଲେବକ୍ ସିରେଡେନ୍
(ମାତିଉ 10:1–4; ଲୁକ 6:12–16)
13ତିର୍ଗି' ଜିସୁଲା ମୁଇ କୁନ୍ଡା ବାଗ୍ବକ୍ ଡାଇ'ଗା' । ଡାଇ'ସେକ୍ ଆଜାଆଜା ମାଇବୁରଂ ଡୁକୁପୁଲେଇ ମୁନ୍ଡେଂଗା' ଆମା'ଏ ୱାୟ' । ସା' ମା'ଏ ଜିସୁନ୍ବକ୍ ସା'ଗା' । 14ସା' ଜିସୁଲା ଆଇ'ତୁନ୍ ରେମଲେ ଇସାଉ ନିଂବୁରଂଉ ଡୁକୁଲେଇ' ଡ' ବାରଲକ୍ବକ୍ ସିରେଲ'ସେକ୍ ଆମା'ଏ ପେରିତ ଡ'ସେକ୍ ଅ'ଇମିଲ' । ମାରି ମାପ୍ରୁନା ବଲ୍କବର୍ ସୁଁସୁପୁଲେଇ ବେନ୍ଟାଇତିଂ ଡ'ସେକ୍ ଆମା'ଏ ସିରେଲ' । 15ମାରି ବୁତ୍ ସବ'କୁନୁଂ ରେମଲେବକ୍ସା ବଲ୍ ଡିନ୍ଡେମ୍ପୁଲେଇ ଆମା'ଏ ବପୁ ବେଡ' । 16ଜିସୁଲା ସିରେଲ'କୁନୁଂ ବାରଲକ୍ନା ଇମି ମା ଡ'ନା, ସିମନ୍ଲା–ଆମାଇ ଜିସୁଲା ପିତର୍ ଡ'ସେକ୍ ଅ'ଇମିଲ' । 17ଜେବଦିନା ଉଁ'ଉଁପା ଜାକୁବ୍ଲା ମାରି ମାଇନା ବୁୟାଂ ଜଅନ୍ଲା–ଆମାଇପା ବିନେରିଗସ୍ ଡ'ନା କି'ତୁଂ ଲୁଂଲୁଂଡାକ୍ନା ଉଁ'ଉଁପା ଡ'ସେକ୍ ଜିସୁଲା ଅ'ଇମିଲ' । 18ଆନ୍ଦ୍ରିୟଲା, ପିଲିପ୍ଲା, ବାର୍ତଲମିଲା, ମାତିଉଲା, ତମାଲା, ଆଲ୍ପିନା ଉଁ'ଉଁ ଜାକୁବ୍ଲା, ତଦିୟଲା, ଉତ୍ଜଗି ଡ'ସେକ୍ ଅ'ଇମିଲ'କୁନୁଂ ସିମନ୍ଲା 19ମାରି ଆଜିସୁଲା ଦାଇରେମ୍ନା ତିତିବକ୍ ଅସୁୟ' ବେଡ'କୁନୁଂଆଁ ଇସ୍କରିୟତ୍ ଜିଉଦାଲା ।
ଆଜିସୁଲା ସଇତାନ୍ ସବ'ତା ଡ'ସେକ୍ ସୁଁସୁଡେନ୍
(ମାତିଉ 12:22–32; ଲୁକ 11:14–23; 12:10)
20ତିର୍ଗି' ଜିସୁଲା ମାଇ ବାସାକୁନୁଂ ଡିଂଅଁବକ୍ ଉଇଗା' । ଆତାସା ଅବୁଦି ରେମଲେ ରୁନ୍ଗା'ସା' ଜିସୁଲା ମାରି ମାଇନା ସିସ୍ୟଲେ ମାଏସା ସୁସୁମ୍ପୁଲେଇସା ଆଗଂତା । 21ଗୁତୁନ୍ ଅଂଅଁ'ସେକ୍ ଜିସୁନ୍ ଡିଂଅଁନ୍ରେମ୍ ଜିସୁଲା ବାୟାକ୍ ଉଇଗା' କି ମିଲେଇ ଡ'ସେ'ଗା ୱାଇ ସା'ଗା' ।
22 #
ମାତିଉ 9:34; 10:25 ଜିରୁସାଲମ୍ ମୁନା'ଉଂଗମ୍କୁରୁଂ ସା'କୁନୁଂ ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ ଆଜିସୁଲା ବାଆଲ୍ଜିବୁଲ୍ ଡ'ସେକ୍ ମୁଇ ବୁତ୍ ସବ'ତା । ଡୁ'ତୁନ୍ସା' ମାଇ ଗୁତୁନ୍ ବୁତ୍ଲେନ୍ ମୁନା'ରେମ୍ନା ବପୁବୁରଂ ଆବୁତ୍ଲେ ଞୁୟଁ ଗଂଗୁତା ଡ'ସେକ୍ ସୁନ' ।
23ସା' ଜିସୁଲା ଆମା'ଏ ଉନ୍ତୁ' ୱାୟ'ସେକ୍ ଉ'ସୁରାମ୍ସୁଗ ସୁନ' “ସଇତାନ୍ ଆସଇତାନ୍ ମି ଞୁୟଁ ଗଂତା? 24ମାରି ମୁଇ ରାଜିନା ରେମଲେ ପାଲ୍ପାଲ୍ ଡେଂସେକ୍ ମା'ଏ ମା'ଏଉ ରିମ'ନା ମା'ଏନା ରାଜି ବୁଡ୍ଉଇତା । 25ଡୁ'ତୁନ୍ଉ ଡିଂଅଁନ୍ ଡିଂଅଁନ୍ରେମ୍ଉ ରିମ'ସେକ୍ ପାଲ୍ପାଲ୍ ଡେଂଉଇତା ଡ'ନା ମା'ଏ ଡୁକୁ ଆଗଂତା । 26ଡି'କେନା ସଇତାନ୍ଲେ ମା'ଏ ମା'ଏଉ ରିମ'ସେକ୍ ପାଲ୍ପାଲ୍ ଡେଂଉଇତା ଡ'ନା ଆମା'ଏ ବପୁ ଆବାମ୍ତା ମାରି ମା'ଏ ନାସ୍ ଉଇତା । 27ଅବୁଦି ବପୁବାଇ' ମୁଇନ୍ଡାନା ଡିଂଅଁବକ୍ ମୁଇନ୍ଡା ରେମ ଗାଇସେକ୍ ଦନ୍ସମ୍ପତି ଗୁଲାଇ ଡୁଂଗା'ଲ' ଅ'ତୁର୍ତିଂ ଡ'ନା ଆତୁନ୍ ବପୁବାଇ' ରେମ ସିଁସେଇଁନୁକ୍ ତୁଲ'ରେଡ' ବୁଂଅଁ'ନାଉ ଅ'ତୁର୍ ଗଂତା । 28ନିଂ ଆପେ ସତଇସା ସୁନ'ତିଂ, ରେମଲେ ଡେମ'କୁନୁଂ ପାପ୍କାମ୍ ଗୁଲାଇ ମାପ୍ରୁ କେମା ଡେମ୍ତ । ମାରି ରେମଲେ ମାପ୍ରୁନା ଇମିବକ୍ ଆ'ଇ ଅଲିରାକ୍ବାଇ' ସୁନ'ନାସା ଗୁତୁନ୍ ଗୁଲାଇ ମାଇ କେମା ଡେମ୍ତ । 29#ଲୁକ 12:10ମାତର୍ ପବିତ୍ର ଆତ୍ମାନା ବାଗ୍ବକ୍ ଜାଏସା ମୁଇନ୍ଡା ମାମା ଅଲିରାକ୍ବାଇ' ମୁଇ ତୁମ'ସା ସୁନ'ନା ଆମାଇ ମାଇ ସୁନ'କୁନୁଂ ପାପ୍ ମାପ୍ରୁ ଇନ୍ଡଇ'ଏସା କେମା ଆଡେମ୍ତ । ମାଇ ଇସାଉପୁଲେଇ ଡନ୍ଡ୍ ବାମ୍ତା” ଡ'ସେକ୍ ସୁନ' ।
30ଆଜିସୁଲା ଅଲିରାକ୍ବାଇ' ବୁତ୍ ସବ'ତା ଡ'ସେକ୍ ମା'ଏ ସୁନ'କୁଗା'ସା'ଉ ଜିସୁଲା ଆମା'ଏ ଡି'କେନ୍ ସୁନ' ।
ଜିସୁଲା ନିଂନା ରେମଲେ ଜା ଡ'ସେକ୍ ଅମାକ୍ଡେନ୍
(ମାତିଉ 12:46–50; ଲୁକ 8:19–21)
31ତିର୍ଗି' ଜିସୁନା ୟଂ ମାରି ବୁୟାଂଏଁ ଆତା ସା'ଗା' । ସାକ୍ସେକ୍ ମା'ଏ ବାଇରି ତଂସେକ୍ ଆଜିସୁଲା ବାଇରି ୱାୟ' ଇନ୍ଡ୍ରିଂପୁଲେଇ ଆମୁଇନ୍ଡା ବେନ୍ଟାୟ' । 32ଆଇ'ତୁନ୍ବେଲା ଅବୁଦି ରେମଲେ ଆଜିସୁଲା ଗୁରୁଂ ଡେଂସେକ୍ ଲିଲେଇ' ଆର୍କୁ । ସା' ମୁଇନ୍ଡା ଆଜିସୁଲା ସୁନ' “ପେଇଁଜଂ, ପେନ୍ ବୁୟାଂଏଁ ପେନ୍ ତୁନାଲେ ଆନ ୱାଇ ସାକ୍ସେକ୍ ବାଇରି ତଂଗୁତା” ଡ'ସେକ୍ ସୁନ' ।
33ଗୁତୁନ୍ ଅଂଅଁ'ସେକ୍ ଜିସୁଲା “ଜା ନିଂନା ୟଂ ମାରି ଜା ନିଂନା ବୁୟାଂଏଁ ଡ'ସେକ୍ ନ ମାକ୍ତୁନ ଇ?” ଡ'ସେକ୍ ସୁନ' ।
34ତିର୍ଗି' ଜିସୁଲା ଆମାଇ ଗୁରୁଂଡେଂସେକ୍ ଲେଇ'କୁନୁଂ ଆଗୁଲାଇର ଅସୁୟ'ସେକ୍ ସୁନ' “ଜୁ, କେନାଉ ନିଂନା ୟଂ ମାରି ନିଂନା ବୁୟାଂଏଁ । 35ଜା ମାପ୍ରୁନା ତୁମ' ଅଂଅଁ'ସେକ୍ ମାଇନା ମୁନ୍ସୁଗ କାମ୍ ଡେମ'ତା ମାଇଉ ନିଂନା ବୁୟାଂ, ମାଇଉ ନିଂନା ତୁନା ମାରି ମାଇଉ ନିଂନା ୟଂ” ଡ'ସେକ୍ ସୁନ' ।
اکنون انتخاب شده:
ମାର୍କ 3: BFW
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
CC BY-NC-ND 4.0