JHN - BUU 14
14
Yeso Nyen he Nkon hi ri A ti
1Yeso ka la miri ndu wan ri,<<Ran no sron mbi time ran yosron ri Izhi nga bi ri yosron ri me ngawen. 2Itra wa kigbu ri ko ti won nga me hi bubu milan bubu ri ti ri yi ran ran he ngamba ran me ri ran la yi ran. 3Ngha kugon riwa me hi meri milan bubu ti ri yi me bru ye me ri ye vu yi hi ri ngawon, ritu bi ri he ri bubu riwa me he. 4Bi to nkon riwa a hu hi ri bubu riwa me hi.>>
5Toma ka la Yeso ri,<<Bachi, ki ran to bubu riwa wu hi ran, ko ki ti se kiri to nkon hi ri bubu wan?>>
6Yeso ka nyɨme ri wa ri,<<Ame me he nkon nga kpunji nga ame nye me de vɨri, injo ran hi ri A ti won ran tse a hu ri me. 7Yeso ka tre ri wa ri, zizan riwa bi to wen,<< Bi to A ti won ngawen nga zizan ban kusi bi to-u nga bi ri ya-u.>>
8Imba Filibu ka tre wu ri,<<Bachi ikya riwa ki wa ri wu wawu a he ri no tsro ta A ti.>>
9Yeso ka nyɨme ri,<<Sisenmu riwa ki he iwa yi wawu mbi ama wu ran to wen ran a wu Filibu? Inji riwa a to wen a to A ti, ritu ngye ko wu tre ri me,<Tsro ta A ti>? 10A wu Filibu wu ran Yosron ri bi he ri me a he ri A ti nga A ti ngawen he ri me ran? Yeso ka tre ri miri ndu wan ri,<<I tre riwa me tre ri yi-a a ran zhu ri me nye ran A ti riwa a he ri me wawu nye ti ndu wan.>> 11Yosron ri me riwa me tre ri me he ri A ti nga A ti he ri me ka a ran he ngamba ran kpayɨme ri kyawa riwa me ti wa. 12Me la yi kpunji tre wawa wa yosron ri me wa ti kya riwa me ti wa, wa ti kyawa wa rigra ngawen ritu me hi ri A ti. 13Ko ngye riwa bi miyen rimi nde won me no yi ritu no nde Izhi no fe gbre hu ri vren wan. 14Ko ngye ri wa bi miyen rimi nde won me no yi.
Ika tre dzi ri Yuu Tsitsri
15Ka bi nyɨme wen, bi hu tre won. 16Me miyen A ti nga ari no-u nji ri dzon ri nganga riwa ari he ri wu hi ri kre vi. 17Nji ri dzon a he Yuu riwa ari ŋran kpunji ritu Izhi ri mgbumblume ran ri to kpaa ran ritu a ran to-u ran ama bi yi bi to-u ritu a he ri yi nga ran he rimi mbi
18Ka me hi bi ran he nkankshi mbi ran; me bru ye ri yi. 19Ri vi tsawen mgbumglume ran to wen ngaran ama biyi bi to wen nga ritu me nawo biyi ngawen bi nawo. 20Ka ivi-a ye bi to ri me he ri A ti nga biyi bi he ri me bibi riwa ame me he ri yi.
21<<Wawa wa kpa tre won wari ti ndu ri wu wawa nye wa he wawa wa nyɨme wen. Ame ngawen me nyɨme wa nga me ri ŋɨran nga won ri wa.
22Yahuda ama a ran Iskariyoti ran a tre ri,<<Bachi ari he se ko wu ŋiran ngawen ri ta nga a ran mgbumgblume ran?>>
23Yeso ka nyɨme ri wu ri,<<Wawa wa nyɨme wen wa hu tsro won. A ti won ri nyɨme wa nga A ti won nga ame ki ye ri wa kiri son ri wa. 24Wawa wa ran wo tsro won ran nga tsro riwa bi wo a ran he wa mo ran ama a zhu ri A ti riwa a tiwen ndu.
25<<Me la yi rinyi ka me he ri yi ri. 26Inji ri dzon Iyu Tsitsri riwa A ti ri tru ye rimi nde won ari tsro yi ko ngye nga ran no yi taka wawu kya riwa me la yi.
27<<Me ka yi don ri sisron Isisron nye me no yi a ran bibi riwa mgbumgblu me wa no yi nye me no yi ran. Ra ti tika ran nga ran ti sisiri ran. 28Bi wo wen me layi ri,<Me kayi ri don ama me bru ri ye ri yi.>Ka bi nyɨme wen bi ti kinklan sron ritu me hi ri A ti ritu wawu han wen. 29Me la yi rinyi ko no ye zhu, ritu ka a ye bi ka kpanyɨme. 30Me ran tre ri yi bran ngaran ritu nji ri kpanchi ri mgbumgblume ri ye. Aran he ri gbengbren ritu wan ran, 31ama mgbumgblume ri to ri me nyɨme A ti ritu wan nye me ti kongye bibi riwa a tre me ti.
<<Wulunde ki ka bubu nyi don.
اکنون انتخاب شده:
JHN - BUU 14: BUU
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The word for the World International and The word for the World Nigeria