ᒨᓯᓯ ᐂᑉᐸᖏᑦ 30
30
ᑐᓂᕐᕈᓯᕐᕕᒃ ᐃᑯᐊᓚᑦᓯᓂᕐᒧᑦ ᐃᓯᕐᓗᐊᕐᓂᑎᑦᓯᕕᒃ
ᒨᓯᓯ ᐂᑉᐸᖏᑦ 37:25-28
1“ᑐᓂᕐᕈᓯᕐᕕᖕᒥᒃ ᓴᓇᔪᒃᓴᐅᕗᑎᑦ ᐃᓯᕐᓗᐊᕐᓂᑎᑦᓯᕕᒃᓴᒥᒃ ᕿᔪᖕᒥᒃ ᓯᑎᔪᔭᒥᒃ ᐊᑎᖃᕐᑐᒥᒃ ᐊᑬᓯᐊᒥᒃ, ᐃᓯᕐᓗᐊᕐᓂᑎᑦᓯᓂᕐᒥᒃ ᐃᑯᐊᓚᑦᓯᕕᒃᓴᐅᖁᓪᓗᒍ. 2ᓯᒃᑭᑕᓪᓗᐊᖑᔪᒃᓴᐅᕗᖅ, ᑕᕿᓂᖃᕐᓗᓂ ᐃᑎᒐᖕᓂᒃ ᐊᑕᐅᓯᕐᓂᒃ ᐊᕝᕙᕐᒥᒡᓗ ᓯᓕᖕᓂᖃᕐᓗᓂᓗ ᑍᒫᑦᓮᓐᓇᖅ, ᐳᕐᑐᓂᖃᕐᑐᒃᓴᐅᕗᖅ ᐃᑎᒐᖕᓂᒃ ᐱᖓᓱᓂᒃ, ᑎᕆᖅᑯᖏᓪᓗ ᓯᑕᒪᑦ ᐊᑐᓂᑦ ᓇᒡᔪᓐᖑᐊᕐᑕᖃᕐᑐᒃᓴᐅᕗᑦ ᓴᓂᕋᖏᓐᓂ ᐊᑕᑦᓴᐅᑎᒋᔪᓂᒃ ᐃᓕᓯᒪᖏᑦᑐᓂᒃ. 3ᖄᖓᒍᑦ ᓯᓚᑉᐱᐊᕋᒃᓴᕆᕙᑦ ᓯᓚᑎᓕᒫᖓ ᒎᓗᓪᓚᕆᖕᒥᒃ ᐊᓯᐊᓂᒃ ᐃᓚᓯᒪᖏᑦᑐᒥᒃ, ᖄᖓᓗ ᓴᓂᕋᖏᓪᓗ ᓯᓇᕐᔪᓕᐅᕐᓗᒋᒃ ᒎᓗᒥᒃ. 4ᓯᓇᕐᔪᐊᑕᓗ ᐊᑖᒍᑦ ᒪᕐᕉᖕᓂᒃ ᒎᓘᖕᓂᒃ ᓄᕐᓗᓕᐅᕐᑐᒃᓴᐅᕗᑎᑦ ᐊᑭᕋᕐᕕᒃᓵᖕᓂᒃ ᐃᒡᓗᐊᓂᓗ ᒪᕐᕉᖕᓂᒃᑕᐅᖅ ᒎᓘᖕᓂᒃ ᓄᕐᓗᓕᐅᕐᒥᓗᒍ ᐊᑭᕋᐅᑎᒋᔭᐅᔪᓄᑦ ᕿᔪᑯᑖᖕᓄᑦ ᑲᐅᒻᒥᕕᒃᓵᖕᓂᒃ ᐊᑭᕋᕐᕕᒃᓴᐅᖁᓪᓗᒋᑦ. 5ᕿᔪᑯᑖᒡᓗ ᐊᑭᕋᐅᑎᒃᓴᖏᑦ ᓴᓇᔭᒃᓴᕆᕙᑎᑦ ᕿᔪᖕᒥᑦ ᓯᑎᔪᔭᒥᑦ ᐊᑬᓯᐊᒥᒃ ᐊᑎᓕᖕᒥᑦ ᓯᓚᑉᐱᐊᕐᓗᒋᓪᓗ ᒎᓗᒥᒃ. 6ᑐᓂᕐᕈᓯᕐᕕᒡᓗ ᑖᓐᓇ ᐃᓂᖃᕐᑎᑕᒃᓴᕆᕙᑦ ᑖᓗᑕᐅᑉ ᓂᕕᖓᔫᑉ ᓯᓚᑖᓂ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᐃᓂᒋᔭᖓᑕ ᓯᕗᕌᓂ, ᑕᕝᕙᓂ ᐃᓕᖕᓄᑦ ᕾᓗᖓ ᑲᑎᓂᐊᕋᒃᑭᑦ. 7ᐅᓪᓛᑕᒫᑦ ᐂᕉᓂ ᓇᓂᕈᐊᓂᒃ ᐊᑐᐃᓐᓇᕈᕐᑎᑦᓯᒋᐊᕐᑐᓕᕈᓂ, ᐃᓯᕐᓗᐊᕐᓂᑎᑕᒃᓴᒥᒃ ᑎᐱᑦᓯᐊᕆᒃᑐᒥᒃ ᐃᑯᐊᓪᓔᔪᒃᓴᐅᕗᖅ ᑐᓂᕐᕈᓯᕐᕕᐅᑉ ᖄᖓᓂ. 8ᑍᒫᑦᓮᓐᓇᕐᑕᐅᖅ ᐅᓐᓄᒃᑯᑦ ᓇᓂᕈᐊᑦ ᐃᑯᐊᓪᓚᒋᐊᕐᑐᓕᕈᓂᒋᑦ, ᐃᓯᕐᓗᐊᕐᓂᑎᑕᒃᓮᑦ ᐃᑯᐊᓪᓚᒐᒃᓴᕆᕔᑦ, ᑕᒪᓐᓇᓗ ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕐᓂᖅ ᑲᔪᓯᑎᑕᐅᔪᒃᓴᐅᕗᖅ ᐊᑕᓂᐅᑉ ᓵᖓᓂ ᑭᖑᕚᕇᖑᕙᖕᓂᐊᕐᑐᓕᒫᓄᑦ. 9ᐃᓯᕐᓗᐊᕐᓂᑎᑕᒃᓴᒥᒃ ᐱᖁᔭᐅᓯᒪᖏᑦᑐᒥᒃ ᑕᕝᕙᓂ ᑐᓂᕐᕈᓯᕐᕕᖕᒥ ᐃᑯᐊᓪᓔᔪᒃᓴᐅᓐᖏᓚᓯ ᐃᑦᔪᕐᓁᓕᑎᓯᒪᖏᑦᑐᓂᒃ, ᑐᓂᕐᕈᑎᒃᓴᒥᒡᓘᓐᓃᑦ ᐆᒪᔪᒥᒃ ᐃᑯᐊᓚᑎᑕᒃᓴᒥᒃ, ᑐᓂᕐᕈᑎᒃᓴᓂᒡᓘᓐᓃᑦ ᓂᐊᖂᔭᓂᒃ, ᑕᕝᕗᖓᓗ ᑯᕕᓯᔪᒃᓴᐅᓐᖏᓚᓯ ᐸᐅᕐᖎᑦ ᐃᑦᑎᖓᓂᒃ. 10ᐊᕐᕌᒍᑕᒫᓪᓗ ᐂᕉᓂ ᑐᓂᕐᕈᓯᕐᑐᒃᓴᐅᕗᖅ ᑐᓂᕐᕈᓯᕐᕕᐅᑉ ᓴᓗᒻᒪᕐᓴᕐᑕᐅᑦᔪᑎᒃᓴᖓᓂᒃ ᑐᒃᓯᐊᕐᓂᒃᑯᑦ ᑐᓂᕐᕈᓯᕐᕕᐅᑉ ᓇᒃᔪᓐᖑᐊᖏᑦ ᐊᐅᒥᑎᕐᓗᒋᑦ ᐆᒪᔫᑉ ᐊᔪᕐᓃᑦ ᐱᑦᔪᑎᒋᓪᓗᒋᑦ ᑐᓂᕐᕈᑕᐅᔫᑉ ᐊᐅᖓᓄᑦ ᐊᕐᕌᒍᒥ ᐊᑕᐅᓯᐊᖃᑦᑕᕐᓗᓂ ᐊᕐᕌᒍᑕᒫᑦ ᑕᒪᓐᓇ ᑲᔪᓯᑎᑕᐅᔪᒃᓴᐅᕗᖅ ᑍᒪᓐᖓᑦ ᑭᖑᕚᕆᔪᒫᕐᑕᓯ ᑎᑭᓪᓗᒋᑦ, ᑖᓐᓇ ᑐᓂᕐᕈᓯᕐᕕᒃ ᐃᑦᔪᕐᓁᒻᒪᕆᒃᑐᒃᓴᐅᖕᒪᑦ ᐊᑕᓂᕐᒧᑦ ᑐᓂᔭᐅᓯᒪᓗᓂ.”
ᑖᒃᓰᔭᕈᑏᑦ ᐊᑕᓂᐅᑉ ᓇᔪᕐᑕᖓᓄᑦ ᑐᐱᕐᒧᑦ
11ᐊᑕᓂᖅ ᐅᖃᕐᐳᖅ ᒨᓯᓯᒧᑦ, 12“ᐃᓴᕆᐊᓕᒥᐅᑦ ᐃᓄᖏᑦ ᓈᓴᓕᕈᕕᒋᑦ, ᐃᓄᐃᑦ ᐊᑐᓂᑦ ᐃᓘᓐᓇᑎᒃ ᐊᑭᓖᔪᒃᓴᐅᕗᑦ ᐊᑕᓂᕐᒧᑦ ᐃᓅᓯᑎᒃ ᐱᑦᔪᑎᒋᓗᒋᑦ, ᖃᓄᐃᓕᓇᕐᑐᒧᑦ ᑎᑭᑕᐅᖁᓇᒋᑦ ᓈᓴᕐᑕᐅᓕᕐᑎᓪᓗᒋᑦ. 13#ᒨᓯᓯ ᐂᑉᐸᖏᑦ 38:25,26; ᒫᑎᐅᓯ 17:24.ᐊᑐᓂᑦ ᑕᕝᕙ ᓈᓴᕐᑕᐅᔪᑦ ᐃᒤᑦᑐᓂᒃ ᑐᓂᓯᔪᒃᓴᐅᕗᑦ: ᑮᓇᐅᔭᓂᒃ ᐅᖁᒤᓐᓂᕐᓯᐅᑎᓪᓚᕆᖕᒧᑦ ᐊᑐᕐᑕᐅᒐᔪᒃᑐᒧᑦ ᐆᒃᑐᕋᕐᑕᐅᓯᒪᔪᓂᒃ ᒪᓕᒡᓗᑎᒃ. ᑕᒪᒃᑯᐊ ᑕᕝᕙ ᐃᓅᑉ ᐊᑐᓂᑦ ᑐᓂᔭᕆᐊᖃᕐᐰᑦ ᐊᑕᓂᕐᒧᑦ. 14ᓈᓴᕐᑕᐅᔪᑦ ᐊᑐᓂᑦ, 20ᓂᒃ ᐊᕐᕌᒍᓕᖕᓂᑦ ᐱᒋᐊᕐᓗᑎᒃ ᐅᖓᑖᓄᑦ, ᑐᓂᓯᔪᒃᓴᐅᕗᑦ ᐊᑕᓂᕐᒧᑦ. 15ᐊᒃᓱᐃᑦᑐᑦ ᐅᓄᕐᓂᕐᓴᓂᒃ ᑐᓂᓯᔭᕆᐊᖃᕐᓂᐊᓐᖏᓚᑦ, ᐊᒃᓱᔪᓪᓗ ᐅᓄᖏᓐᓂᕐᓴᓂᒃ ᑐᓂᓯᔭᕆᐊᖃᕐᓂᐊᕐᒥᓇᑎᒃ, ᐊᑭᓕᐅᑕᐅᔭᕆᐊᖃᕐᑐᓂᒃ ᐃᓅᓯᕐᒥᖕᓄᑦ ᐊᑕᓂᕐᒧᑦ ᐊᑭᓖᓕᕈᑎᒃ. 16ᑕᒪᒃᑯᐊ ᑐᓂᕐᕈᑎᐅᔪᑦ ᑮᓇᐅᔭᑦ ᐃᓅᓯᑎᒃ ᐱᓪᓗᒋᑦ ᐃᓴᕆᐊᓕᒥᐅᑦ ᐃᓄᖏᓐᓂᑦ ᑲᑎᕐᓱᕐᑕᒃᓴᕆᕙᑎᑦ ᐊᑭᓕᐅᑎᒋᓗᒋᓪᓗ ᑐᐱᐅᑉ ᓇᔪᒐᕐᒪ ᐱᓇᓱᐊᕐᑕᐅᑦᔪᑎᒃᓴᖓᓄᑦ; ᑕᒪᓐᓇᓗ ᑖᒃᓰᔭᕈᑎᐅᔪᖅ ᐃᓅᓯᖏᓐᓄᑦ ᐊᑭᓕᐅᑎᒃᓴᐅᓂᐊᕐᐳᖅ ᐊᑕᓂᐅᑉ ᓵᖓᓂ, ᐃᓅᓯᖏᓐᓂᒡᓗ ᓴᐳᑦᔨᓯᒪᑦᔪᑎᒃᓴᓐᓄᑦ ᐃᖅᑲᐅᒪᑦᔪᑎᒃᓴᕆᓂᐊᕐᐸᕋ.”
ᐴᒍᑕᖅ ᑲᓐᓄᔭᖅ
17ᐊᑕᓂᖅ ᒨᓯᓯᒧᑦ ᐅᖃᕐᐳᖅ, 18#ᒨᓯᓯ ᐂᑉᐸᖏᑦ 38:8.“ᐴᒍᑕᕐᒥᒃ ᑲᓐᓄᔭᒥᒃ ᓴᓇᔪᒃᓴᐅᕗᑎᑦ ᑲᓐᓄᔭᒥᒡᓗ ᐊᓪᓕᕋᖃᕐᓗᒍ, ᐅᐊᓴᕐᕕᒃᓴᐅᖁᓪᓗᒍ, ᐃᓂᖃᕐᑎᑕᒃᓴᕆᕙᓪᓗ ᑐᐱᐅᑉ ᑲᑎᒪᕕᐅᑉ ᑐᓂᕐᕈᓯᕐᕕᐅᓪᓗ ᐊᑯᓐᓂᖓᓂ, ᐃᒥᕐᒥᒡᓗ ᐃᒻᒥᕐᓗᒍ. 19ᐂᕉᓂᒃᑯᑦ ᐃᕐᓂᕇᑦ ᐅᐊᓴᖃᑦᑕᖁᓪᓗᒋᑦ ᐊᒡᒐᖕᒥᖕᓂᒃ ᐃᑎᒐᖕᒥᖕᓂᒡᓗ ᑕᕝᕙᓂ. 20ᐃᑎᓚᐅᖏᓐᓂᕐᒥᖕᓂ ᑐᐱᕐᒧᑦ ᑲᑎᒪᕕᖕᒧᑦ, ᐅᕝᕙᓗ ᑐᓂᕐᕈᓯᕐᕕᖕᒧᐊᓚᐅᖏᓐᓂᕐᒥᖕᓂ ᑐᓂᕐᕈᓯᕆᐊᕐᑐᕐᓂᐊᕐᓗᑎᒃ ᓂᕿᒃᓴᓂᒃ, ᐃᑯᐊᓚᑦᓯᓂᒃᑯᓪᓗ ᑐᓂᕐᕈᓯᕆᐊᕐᑐᕐᓂᐊᕈᑎᒃ ᐊᑕᓂᕐᒧᑦ, ᐅᐊᓴᕐᑐᒃᓴᐅᕗᑦ ᐃᒥᕐᒧᑦ, ᑐᖁᖁᓇᒋᑦ. 21ᐊᒡᒐᖕᒥᖕᓂᒃ ᐅᐊᓴᕐᑐᒃᓴᐅᕗᑦ ᐃᑎᒐᖕᒥᖕᓂᒡᓗ, ᑐᖁᖁᓇᒋᑦ. ᑕᒪᓐᓇᓗ ᐱᖁᔭᖅ ᑍᒫᓐᖓᑦ ᐊᑐᕐᑕᐅᔪᒃᓴᐅᕗᖅ ᑖᒃᑯᓇᓐᖓᑦ ᑭᖑᕚᖏᓐᓂᓗ ᐃᓱᖃᖏᑦᑐᒧᑦ.”
ᓇᐹᕐᑑᑉ ᐅᕐᓱᖓ ᒥᖑᐊᕈᑎᒃᓴᖅ
22 #
ᒨᓯᓯ ᐂᑉᐸᖏᑦ 37:29. ᐊᑕᓂᖅ ᐅᖃᕐᐳᖅ ᒨᓯᓯᒧᑦ, 23“ᑎᐱᑦᓯᐊᕆᒃᓴᐅᑎᓂᒃ ᒪᒪᕐᓂᕐᐹᓂᒃ ᐱᔪᒃᓴᐅᕗᑎᑦ; ᐅᖁᒤᓐᓂᖃᕐᑐᓂᒃ 6ᑭᓗᒍᕌᒻᓂᒃ ᐃᒥᕐᒥᒃ ᒨᕐᒥᒃ, ᐱᖓᓱᓂᒃ ᑭᓗᒍᕌᒻᓂᒃ ᐅᖁᒤᓐᓂᖃᕐᑐᓂᒃ ᒪᒪᕐᑐᓂᒃ ᓯᓇᒪᓐᓂᒃ, ᐱᖓᓱᓂᒃ ᑭᓗᒍᕌᒻᓂᒃ ᐅᖁᒤᓐᓂᖃᕐᑐᓂᒃ ᒪᒪᕐᑐᓂᒃ ᑬᓂᓐᓂᒃ, 24ᐊᒻᒪᓗ 6ᓂᒃ ᑭᓗᒍᕌᒻᓂᒃ ᐅᖁᒤᓐᓂᖃᕐᑐᓂᒃ ᑬᑦᓯᐊᓂᒃ ᑕᒪᒃᑯᐊᓗ ᐅᖁᒤᓐᓂᕐᓂᐊᕐᑕᒃᓴᕆᕙᓯ ᐅᖁᒤᓐᓂᕐᓯᐅᑎᓪᓚᕆᖕᒧᑦ ᐊᑐᕐᑕᐅᒐᔪᒃᑐᒧᑦ ᐆᒃᑐᕋᕐᑕᐅᓯᒪᔪᓂᒃ ᒪᓕᒡᓗᓯ. ᐃᓚᖃᕐᒥᓗᑎᒃ ᓇᐹᕐᑑᑉ ᐅᕐᓱᖏᓐᓂᒃ 4ᓖᑕᓂᒃ. 25ᑕᒪᒃᑯᐊᓗ ᑕᕝᕙ ᑲᑎᓪᓗᒋᑦ ᐃᑦᔪᕐᓁᑎᑕᐅᓯᒪᓗᑎᒃ ᒥᖑᐊᕈᑎᒃᓴᐅᔪᒃᓴᐅᕗᑦ, ᑲᑎᓯᒪᓗᑎᒃ ᑎᐱᑦᓯᐊᕆᒃᓴᐅᑎᑎᑐᑦ; ᒥᖑᐊᕈᑎᒃᓴᐅᔪᒃᓴᐅᕗᑦ ᐃᑦᔪᕐᓁᑦᑑᓗᑎᒃ. 26ᑕᒪᑐᒧᖓᓗ ᒥᖑᐊᕐᑕᒃᓴᕆᕙᑦ ᑐᐱᖅ ᑲᑎᒪᕕᐅᔪᖅ, ᐊᖏᖃᑎᒌᒍᑎᐅᓪᓗ ᐃᒃᓯᕐᕕᖁᑎᖓ ᒥᖑᐊᖃᓯᐅᑎᓗᒍ, 27ᓵᓗ ᓱᓇᓕᒫᖏᓪᓗ, ᓇᓂᕈᐊᖃᕐᕖᓪᓗ ᓱᓇᓕᒫᖏᓪᓗ, ᑐᓂᕐᕈᓯᕐᕕᒡᓗ ᐃᑯᐊᓚᔭᒃᓴᓕᒫᓪᓗ, 28ᑐᓂᕐᕈᓯᕐᕕᒡᓗ ᐃᑯᐊᓚᑕᒃᓴᓂᒃ ᑐᓂᕐᕈᓯᕐᕕᒃ ᓱᓇᑐᐃᓐᓇᓕᒫᖏᓪᓗ, ᐅᐊᓴᕐᕕᒡᓗ ᐊᓪᓕᕋᖓᓗ. 29ᑕᒪᒃᑯᐊ ᑍᒫᒃ ᐃᑦᔪᕐᓁᑎᑕᒃᓴᕆᕙᑎᑦ, ᑕᕝᕙ ᐃᑦᔪᕐᓁᓐᓂᕐᐸᐅᓕᓂᐊᕐᐳᑦ; ᓱᓇᑐᐃᓐᓇᑦᓯᐊᕐᓗ ᑕᕝᕗᖓ ᐊᒃᑑᑎᔪᖅ ᐃᑦᔪᕐᓁᓕᑎᑕᐅᓂᐊᕐᐳᖅ. 30ᑕᕝᕙ ᐂᕉᓂ ᐃᕐᓂᖏᓪᓗ ᑕᒪᑐᒧᖓ ᒥᖑᐊᕐᑕᕐᓴᕆᕙᑎᑦ, ᑎᓕᓗᒋᓪᓗ ᑐᓂᕐᕈᓯᕐᑎᑦᓯᔨᐅᓕᖁᓪᓗᒋᑦ ᑕᒪᑐᒨᓇ ᐅᕙᓐᓂᒃ ᐱᔨᑦᓯᕈᓐᓇᖁᓪᓗᒋᑦ. 31ᐃᓴᕆᐊᓕᒥᐅᓪᓗ ᐃᓄᖏᓐᓄᑦ ᐅᖃᕐᑐᒃᓴᐅᕗᑎᑦ, ‘ᑕᒪᓐᓇ ᒥᖑᐊᕐᓯᒍᑎᒃᓴᐅᕗᖅ ᐃᑦᔪᕐᓁᑦᑑᓗᓂ ᐊᑐᕐᑕᐅᕙᖕᓂᐊᕐᐳᖅ ᐅᕙᓐᓄᑦ ᐱᔨᑦᓯᕐᑐᒃᓴᓄᑦ ᑍᒫᓐᖓᑦ ᑭᖑᕚᕇᖑᔪᒫᕐᑐᓂ ᑲᔪᓯᑎᑕᐅᔪᒃᓴᐅᕗᖅ. 32ᒥᖑᐊᕐᓯᒍᑎᒃᓴᐅᓂᐊᓐᖏᓚᕐᓕ ᐃᓄᑐᐃᓐᓇᕐᓄᑦ, ᑍᒫᑦᓮᓐᓇᕐᓗ ᑲᑎᓯᒪᔪᓂᒃ ᐋᖅᑭᒃᓯᔪᒃᓴᐅᓐᖏᓚᑎᑦ; ᐃᑦᔪᕐᓁᑦᑑᖕᒪᑦ, ᐃᕝᕕᓪᓗ ᐃᑦᔪᕐᓁᑎᑕᒃᓴᕆᕙᑦ. 33ᓇᓪᓕᐊᑦ ᑍᒤᑦᑑᑉ ᐊᑦᔨᖓᓂᒃ ᑲᑎᑦᓯᓗᓂ ᓴᓇᓇᓱᒃᑐᖃᕐᐸᑦ ᐅᕝᕙᓗ ᓇᓪᓕᐊᓐᓄᑐᐃᓐᓇᖅ ᑐᓂᕐᕈᓯᕐᑎᑦᓯᔨᐅᖏᑦᑐᓄᑦ ᒥᖑᐊᕐᓯᒍᑕᐅᒃᐸᑦ ᑖᓐᓇ ᐃᓄᖁᑎᓐᓄᑦ ᐃᓚᒋᔭᐅᔪᓐᓃᕐᑐᒃᓴᐅᕗᖅ.’”
ᐃᓯᕐᓗᐊᕐᓂᑎᑦᓯᑦᔪᑎᒃᓴᖅ
34ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᑎᐱᑦᓯᐊᕆᒃᓴᐅᑎᓂᒃ ᒪᒪᕐᑐᓂᒃ ᐱᓗᑎᑦ ᒪᑯᓂᖓ ᓯᑕᒃᑎᓂᒃ, ᐅᓁᑲᓂᒡᓗ, ᑲᐅᓪᐸᓅᒻᓂᒡᓗ, ᒪᒪᕐᑐᓂᒡᓗ ᑎᐱᑦᓯᐊᕆᒃᓴᐅᑎᓂᒃ ᕗᕅᖕᑭᓐᓯᓐᓯᒥᒃ ᐃᓚᓯᒪᖏᑦᑐᒥᒃ ᐃᓚᖃᕐᑎᓪᓗᒍ ᑕᒪᒃᑯᐊ ᐊᑐᓂᑦ ᑍᒤᓪᓗᐊᕐᑎᓪᓗᒋᑦ ᐊᖏᓂᖏᑦ ᐱᔪᒃᓴᐅᕗᑎᑦ. 35ᑕᒪᒃᑯᐊ ᐊᑐᕐᓗᒋᑦ ᐃᓯᕐᓗᐊᕐᓂᒍᑎᒃᓴᓕᐅᕐᑐᒃᓴᐅᕗᑎᑦ, ᑲᑎᓯᒪᓗᒋᑦ ᑎᐱᑦᓯᐊᕆᒃᓴᐅᑎᑎᑐᑦ. ᑕᕆᐅᓕᕐᓗᒋᓪᓗ ᓴᓗᒪᑦᓯᐊᖏᓐᓇᖁᓪᓗᒋᑦ ᐃᑦᔪᕐᓁᖁᓪᓗᒋᓪᓗ. 36ᐃᓚᖏᑦ ᑲᑦᔪᒡᓗᒋᑦ ᓯᖃᓪᓕᔭᒃᓴᕆᕙᑎᑦ ᓯᖃᓕᑦᓯᐊᕐᓗᒋᑦ ᐳᔪᕋᕐᑎᑐᑦ, ᑐᐱᕐᒧᐊᕈᑎᔭᒃᓴᕆᕙᑦ ᓇᔪᒐᓐᓄᑦ, ᑲᓐᖓᕐᓲᑎᒋᔭᒃᓴᕆᕙᓪᓗ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᓯᕗᕌᓄᑦ. ᑕᒪᑐᒪᓗ ᐃᓯᕐᓗᐊᕐᓂᑎᑕᒃᓴᐅᑉ ᐃᑦᔪᕐᓁᑦᑐᒻᒪᕆᐅᓂᖓ ᐃᒃᐱᒋᔭᒃᓴᕆᕙᑦ. 37ᐃᓯᕐᓗᐊᕐᓂᑎᑕᒃᓴᒥᒡᓗ ᑍᒤᑦᑐᑎᑐᑦ ᓴᓇᓯᒪᒐᓚᒃᑐᒥᒃ ᓇᖕᒥᓂᖅ ᐊᑐᒐᒃᓴᕐᓂᒃ ᓴᓇᔪᒃᓴᐅᓐᖏᓚᑎᑦ, ᑍᒤᑦᑑᑉ ᐃᓯᕐᓗᐊᕐᓂᑎᑕᒃᓴᐅᑉ ᐃᑦᔪᕐᓁᓐᓂᖓ ᑲᒪᒋᔭᐅᑦᓯᐊᕐᑐᒃᓴᐅᖕᒪᑦ ᐊᑕᓂᕐᒧᑦ ᑐᓂᔭᐅᓯᒪᓗᓂ. 38ᓇᓪᓕᐊᓐᓂᒃ ᑍᒤᑦᑐᒥᒃ ᓴᓇᔪᖃᕐᐸᑦ ᑎᐱᑦᓯᐊᕆᒃᓴᐅᑎᓕᐊᕆᒐᓱᐊᕐᓗᒍ, ᑖᓐᓇ ᑍᒤᓕᐅᕐᑐᖅ ᐃᓄᖁᑎᓐᓄᑦ ᐃᓚᒋᔭᐅᔪᓐᓁᕐᑐᒃᓴᐅᕗᖅ.”
اکنون انتخاب شده:
ᒨᓯᓯ ᐂᑉᐸᖏᑦ 30: EAIB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eastern Arctic Inuktitut Bible © Canadian Bible Society, 2012, 2021-2023.