ᒨᓯᓯ ᐂᑉᐸᖏᑦ 31
31
ᓴᓇᓐᖑᐊᕐᑏᑦ ᐊᑕᓂᐅᑉ ᑐᐱᖁᑎᖓᑕ ᓇᔪᕐᑕᖓᓂ
ᒨᓯᓯ ᐂᑉᐸᖏᑦ 35:30-35; 36:1
1ᐊᑕᓂᖅ ᐅᖃᕐᐳᖅ ᒨᓯᓯᒧᑦ, 2“ᓂᕈᐊᕐᓯᒪᕗᖓ ᐊᑎᖓ ᑍᓪᓗᒍ ᐱᔭᓕᐅᓪᒥᒃ, ᐅᕆᐅᑉ ᐃᕐᓂᖓᓂᒃ ᕼᐊᕐᓗ ᐃᕐᖑᑕᖓᓂᒃ, ᔫᑕᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ, 3ᐃᓗᒻᒥᕐᑎᑉᐸᕋᓗ ᐊᓂᕐᓂᓐᓂᒃ, ᖃᐅᔨᒪᓂᕐᒥᒃ ᑐᓂᓯᕕᒋᓯᒪᕙᕋ, ᓴᓇᔪᓐᓇᕐᓂᕐᒥᒡᓗ, ᐱᓇᓱᐊᕈᓐᓇᕐᓂᕐᒥᒡᓗ ᖃᓄᐃᑦᑐᑐᐃᓐᓇᕐᓂᒃ ᓴᓇᓐᖑᐊᕈᓐᓇᕐᓂᕐᒥᒃ, 4ᐃᓱᒪᒃᓴᕐᓯᐅᑦᓯᐊᕈᓐᓇᕐᓂᕐᒥᒃ ᐋᖅᑭᒃᓱᐃᑦᓯᐊᕈᓐᓇᕐᓂᕐᒥᒡᓗ ᓴᓇᓂᐊᕐᑕᒥᓂᒃ, ᒎᓗᒥᒡᓗ ᐱᓇᓱᐊᕈᓐᓇᕐᓂᕐᒥᒃ, ᓯᐅᓪᕕᕆᒥᒡᓗ, ᑲᓐᓄᔭᒥᒡᓗ, 5ᐅᔭᕋᖕᓂᒃ ᓇᑲᑎᕆᔪᓐᓇᕐᓂᕐᒥᒃ ᐃᕕᕐᑎᑎᐅᕅᔪᓐᓇᕐᓂᕐᒥᒡᓗ; ᕿᔪᖕᓂᒃ ᓴᓇᓐᖑᐊᕈᓐᓇᕐᓂᕐᒥᒃ; ᖃᓄᐃᑦᑐᑐᐃᓐᓇᑦᓯᐊᓂᒡᓗ ᓴᓇᔪᓐᓇᕐᓂᕐᒥᒃ. 6ᐊᒻᒪᑦᑕᐅᖅ ᓂᕈᐊᕐᓯᒪᒋᕙᕋ ᐅᕼᐅᓕᐊᑉ ᐊᕼᐃᓴᒪᑭᐅᑉ ᐃᕐᓂᖓ, ᑖᓂᐅᑉ ᑭᖑᕚᖏᓐᓂᑦ ᐱᓯᒪᔪᖅ, ᐃᑲᔪᕐᑎᒃᓴᐅᖁᓪᓗᒍ ᑖᑦᓱᒧᖓ ᐱᓇᓱᐊᖃᑕᐅᖁᓪᓗᒍᓗ. ᐊᓯᖏᑦᑕᐅᖅ ᐊᖑᑎᑦ ᑐᓂᓯᕕᒋᓯᒪᕙᒃᑲ ᐱᔪᓐᓇᑦᓯᐊᕐᓂᕐᓂᒃ, ᓴᓇᔪᓐᓇᖁᓪᓗᒋᑦ ᐃᓕᖕᓄᑦ ᐱᖁᔨᑦᔪᑎᒋᓯᒪᔭᓐᓂᒃ. 7ᒪᑯᓂᖓ ᑐᐱᕐᒥᒃ ᑲᑎᒪᕕᖕᒥᒃ, ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᒃᓴᖓᓂᒃ ᒪᑐᒃᓴᖓᓂᒡᓗ, ᑐᐱᐅᓪᓗ ᐃᓗᐊᓃᑦᑐᒃᓴᓕᒫᑦ ᓱᓇᑐᐃᓐᓇᒃᓴᓕᒫᖏᑦ, 8ᓵᒃᓴᒥᒃ ᓱᓇᑐᐃᓐᓇᒃᓴᖏᓐᓂᒡᓗ, ᓇᓂᕈᐊᑦ ᓇᐸᕕᒃᓴᖏᑦ ᒎᓗᓪᓚᕇᑦ ᐃᓚᓯᒪᖏᑦᑐᑦ ᓱᓇᑐᐃᓐᓇᒃᓴᓕᒫᖏᓪᓗ, ᑐᓂᕐᕈᓯᕐᕕᒃᓴᖅ ᐃᓯᕐᓗᐊᕐᓂᑎᑦᓯᕕᒃᓴᕐᓗ, 9ᑐᓂᕐᕈᓯᕐᕕᒃᓴᕐᓗ ᑐᓂᕐᕈᑎᒃᓴᓄᑦ ᐃᑯᐊᓚᑎᑕᒃᓴᓄᑦ ᓱᓇᑐᐃᓐᓇᒃᓴᖏᓪᓗ, ᐅᐊᓴᕐᕕᒃᓴᕐᓗ ᐴᒍᑕᖅ ᐊᓪᓕᕋᒃᓴᖓᓗ, 10ᑕᑯᒥᓇᕐᑐᓪᓗ ᓴᓇᔭᐅᑦᓯᐊᕐᓯᒪᔪᑦ ᐊᓄᕌᒃᓮᑦ, ᐃᑦᔪᕐᓁᑦᑐᑦ ᐊᓐᓄᕌᒃᓴᑦ ᐂᕉᓂᒧᑦ ᑐᓂᕐᕈᓯᕐᑎᑦᓯᔨᒧᑦ ᐃᕐᓂᖏᑕᓗ ᐊᓐᓄᕌᒃᓴᖏᑦ, ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐱᓇᓱᐊᕐᓗᑎᒃ ᐊᑐᒐᒃᓴᖏᑦ, 11ᒥᖑᐊᕐᓯᒍᑎᒃᓴᕐᓗ ᐅᕐᓱᖅ, ᑎᐱᑦᓯᐊᕆᒃᑐᖅ ᐃᓯᕐᓗᐊᕐᓂᑎᑦᓯᒍᑎᒃᓴᖅ ᐃᑦᔪᕐᓁᑦᑐᕕᖕᒥ ᐊᑐᕐᑕᐅᔪᒃᓴᖅ. ᑕᒪᒃᑯᐊᓕᒫᑦ ᓴᓇᔭᐅᔪᓐᓇᖁᓪᓗᒋᑦ, ᐃᓕᖕᓄᑦ ᐱᖁᔨᑦᔪᑎᒋᓯᒪᔭᕋ ᒪᓕᑦᓯᐊᕐᓗᒍ ᓴᓇᔪᒃᓴᐅᕗᑦ ᑖᒃᑯᓄᖓ.”
ᓴᐸᑎ ᑕᕾᕐᓯᕐᕕᒃᓴᐅᕗᖅ
12ᐊᑕᓂᐅᑉ ᒨᓯᓯ ᐅᖃᐅᑎᕚ, 13ᐃᓴᕆᐊᓕᒥᐅᑦ ᐃᓄᖏᓐᓄᑦ ᐅᖃᖁᓪᓗᒍ, “ᓴᐸᑎ ᐃᒃᐱᒋᑦᓯᐊᕐᓯᐅᒃ, ᑖᓐᓇ ᐅᓪᓗᕆᒐᒃᑯ ᑕᕾᕐᓯᕐᕕᒐ, ᑖᓐᓇ ᓇᓗᓁᒃᑯᑕᐅᖕᒪᑦ ᐅᕙᓐᓄᑦ ᐃᓕᑦᓯᓐᓄᓪᓗ, ᑭᖑᕚᑦᓯᓐᓂᓪᓗ ᑍᒪᓐᖓᑦ ᑲᒪᒋᔭᐅᑦᓯᐊᕐᑐᒃᓴᐅᒋᕗᖅ, ᖃᐅᔨᓕᖁᓪᓗᓯ ᐅᕙᖓ, ᐊᑕᓂᐅᔪᖓ, ᐃᑦᔪᕐᓁᑎᑦᓯᒐᒪ ᐃᓕᑦᓯᓐᓂᒃ. 14ᓴᐸᑎ ᐃᒃᐱᒋᑦᓯᐊᒐᒃᓴᕆᕙᓯ, ᑖᓐᓇ ᐅᓪᓗᖅ ᐃᑦᔪᕐᓁᑦᑑᖕᒪᑦ ᐃᓕᑦᓯᓐᓄᑦ; ᓇᓪᓕᐊᑦ ᑖᑦᓱᒥᖓ ᐅᓪᓗᒥᒃ ᐃᒃᐱᒍᓱᖏᑦᑐᖅ, ᑕᕝᕙᓂᓗ ᐅᓪᓗᒥ ᐱᓇᓱᐊᕐᑐᖅ ᑖᓐᓇ ᑐᖁᑕᐅᔪᒃᓴᐅᕗᖅ. 15#ᒨᓯᓯ ᐂᑉᐸᖏᑦ 20:8-11; 23:12; 34:21; 35:2; ᒨᓯᓯ ᐱᖓᔪᖏᑦ 23:3; ᒨᓯᓯ ᑕᓪᓕᒪᖏᑦ 5:12-14.ᐅᓪᓗᓂᒃ ᐱᖓᓲᔪᕐᑐᓂᒃ ᐱᓇᓱᐊᕐᑐᒃᓴᐅᕗᓯ, ᐅᓪᓗᓪᓕ 7ᖓᓐᓂ ᓴᐸᑎ ᓇᓪᓕᐅᑎᕗᖅ ᓱᓇᓕᒫᓂᑦ ᑕᕾᕐᓯᕐᕕᒃᓴᖅ, ᐃᑦᔪᕐᓁᑦᑐᖅ ᐊᑕᓂᕐᒧᑦ; ᓇᓪᓕᐊᑦ ᑕᕝᕙᓂ ᐅᓪᓗᒥ ᐱᓇᓱᐊᕐᑐᖅ ᑖᓐᓇ ᑐᖁᑕᐅᔪᒃᓴᐅᕗᖅ. 16ᑍᒤᒻᒪᑦ ᐃᓴᕆᐊᓕᒥᐅᑦ ᐃᓄᖏᑦ ᐅᓪᓗᒥᒃ ᓴᐸᑎᒥᒃ ᑲᒪᑦᓯᐊᕐᑐᒃᓴᐅᕗᑦ, ᑭᖑᕚᕇᖑᔪᓕᒫᓪᓗ ᑲᒪᑦᓯᐊᕐᑐᒃᓴᐅᕗᑦ ᓴᐸᑎᒥᒃ, ᓇᓗᓁᒃᑯᑕᐅᖁᓪᓗᒍ ᐊᖏᖃᑎᒌᖕᓂᕐᒧᑦ. 17#ᒨᓯᓯ ᐂᑉᐸᖏᑦ 20:11.ᑖᓐᓇ ᓇᓗᓁᒃᑯᑕᐅᓂᐊᕐᒪᑦ ᐃᓱᖃᖏᑦᑐᒧᑦ ᐅᕙᓐᓄᑦ ᐃᓴᕆᐊᓕᒥᐅᓪᓗ ᐃᓄᖏᓐᓄᑦ, ᐅᕙᖓ ᐊᑕᓂᐅᔪᖓ, ᕿᓚᖕᒥᒃ ᓄᓇᒥᒡᓗ ᓴᓇᓚᐅᕋᒪ ᐅᓪᓗᓂᒃ ᐱᖓᓲᔪᕐᑐᓂᒃ, ᐅᓪᓗᓪᓕ 7ᖓᓐᓂ ᓴᓇᔭᓕᒫᓐᓂᑦ ᓄᖅᑲᓚᐅᕐᐳᖓ, ᑭᖑᓂᖓᒍᓪᓗ ᑕᕾᑦᓯᐊᓚᐅᕐᐳᖓ.”
18ᒎᑎᓗ ᒨᓯᓯᒧᑦ ᐅᖃᓪᓚᒌᕋᒥ ᖃᖅᑲᐅᑉ ᓮᓁᑉ ᖄᖓᓂᑦ, ᒨᓯᓯ ᑐᓂᕚ ᐅᔭᕌᖕᓂᒃ ᒪᕐᕉᖕᓂᒃ ᐱᖁᔭᓂᒃ ᑎᑎᕋᕐᕕᒋᓯᒪᔫᖕᓂᒃ ᒎᑎᐅᑉ ᓇᖕᒥᓂᖅ ᑎᑎᕋᕐᕕᒋᓯᒪᔭᖏᖕᓂᒃ.
اکنون انتخاب شده:
ᒨᓯᓯ ᐂᑉᐸᖏᑦ 31: EAIB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Eastern Arctic Inuktitut Bible © Canadian Bible Society, 2012, 2021-2023.