Dolabololo 10
10
'A Salomo 'ai dolabololo-dolabololo
1Nena-ne 'a Salomo 'ai dolabololo-dolabololo:
Ngowa'a nau'u ga'a 'ai 'akala soro'unu, unanga gena-ge 'o si'a'a ma ḇaḇa 'ai biono gau'u,
mada'a ngowa'a nau'u ga'a 'o emono wo-waro, unanga gena-ge 'o sikangela ma ngina 'ami 'akala re sinyingara.
2Harata ga'a sanga sababu sihaga ngowa'a, gena-ge ma faeda cua,
mada'a 'ahu loasa re banari, gena-ge 'i sisalamata ngowa'a toma sengene.
3Ma JOU 'o sieanga ua ngowa'a loasa re banari 'aḏi sawini;
mada'a Unanga 'o dola'aku ngowa'a kajahatana manga mau.
4Ngowa'a ga'a lese ḏubuso 'i si'a'a unanga ngowa'a ma dinga'unu ua,
mada'a ngowa'a ga'a lese kare 'i si'a'a unanga ngowa'a rema-enanga.
5Ngowa'a nau'u ga'a 'o lomu guḏa ma hasili toma 'orasa ngogoro, unanga gena-ge rai 'akala ma la-la;
mada'a ngowa'a nau'u ga'a pa'i 'o otu ḇato toma gutu'u ma 'orasa, unanga gena-ge 'o sipula'a mara'a 'ai diri masiretene.
6Barakati 'age toma ngowa'a loasa re banari manga sae'e ma re'u,
mada'a ngowa'a kajahatana manga madanga 'i gogono rancana ma jira.
7'Elingi ngowa'a loasa re banari, ngowa'a 'aḏi sanga barakati,
mada'a ngowa'a kajahatana manga lomanga, ngowa'a ya sidaioranga caiti.
8ngowa'a 'akala soro'unu 'aḏi gi-gisene duga re domolo,
mada'a ngowa'a haga manga demo, ḏuanga i'a 'i sijiri manga diri.
9Ngowa'a ga'a manga de'oso re ḏegoro 'i boloto, manga 'ahu ma ḏo-ḏagi 'i salamata,
mada'a ngowa'a ga'a manga 'ahu 'i seko-seko, ananga gena-ge ḏuanga i'a 'aḏi sanga waro.
10Ngowa-ngowa'a ga'a 'aḏi siḇisa la'o, ḏuanga i'a 'aḏi sisusa ngowa'a,
mada'a ngowa'a haga manga demo, ḏuanga i'a 'i sijiri manga diri.
11Ngowa'a loasa re banari manga demo-demo gena-ge 'ahu ma cimi,
mada'a ngowa'a kajahatana manga demo-demo 'i gogono kajahatana.
12Ma'u emono 'i sibaolo ma'u tolabe,
mada'a dadalara 'i singi-ngiranga sala mo-moini.#Yak. 5:20; 1Pet. 4:8
13Ngowa'a remanga wo-waro ga'a ya sinyanyasele, ananga 'aḏi kanau reo 'akala soro'unu,
mada'a bu-butulu 'i sigolago ḏua di'a ngowa'a ga'a manga 'akala cua, ananga gena-ge manga ḏuḏunu.#Dol. 26:3
14Ngowa'a ga'a 'akala soro'unu 'aḏi gogono wo-waro,
mada'a ngowa'a haga manga madanga 'i sijira manga 'ahu ma ḏo-ḏagi.
15Ngowa'a rema-enanga manga harata 'i saolo ananga ma tero limau ma gegelo ga'a 'i te'e.
mada'a bodito di'a ngowa'a ma dinga'unu ua manga 'ahu.
16Ngowa'a loasa re banari manga ngogele 'ahu ga'a bara'utungu,
mada'a ngowa'a kajahatana manga ngogele gena-ge ḏosa ma repe.
17Ngowa-ngowa'a ga'a 'aḏi totoho do-doto'o, 'aḏi sigasa toma 'ahu ga'a bara'utungu,
mada'a ngowa'a ga'a 'aḏi dawongo ḇangata ua, ananga 'aḏi iranga ngo'omo.
18Ngowa-ngowa'a ga'a 'aḏi gogono emono, ananga gena-ge manga 'uḏu ma betu'u pa'i sa-sakala ḇato;
Ngowa'a ga'a tukanga fitana, ananga gena-ge ngowa'a ga'a 'aḏi emono wo-waro.
19Kanau repe woḏi, tantu ḏua rema demo palisi'i,
mada'a ngowa'a ga'a nga'unu 'a jaga 'ai 'uḏu ma betu'u, unanga gena-ge 'ai 'akala ma la-la.
20Ngowa'a loasa re banari manga yai'i ma tero sa'olo 'o salaka madutu,
mada'a ngowa'a kajahatana manga fikirana ma faeda pa'i ceka'a ua ḇato.
21Ngowa'a loasa re banari manga 'uḏu ma betu'u 'i sibarakati ngowa'a repe,
mada'a ngowa'a haga 'aḏi sengene sababu kamanga 'akala la-la ua.
22Ma JOU 'ai barakati 'i sidadi ngowa'a rema-enanga,
munara ma kangela 'i sidogo harata yoḏu'u.
23Ngowa'a ga'a 'aḏi emono wo-waro, 'aḏi nyanyaḏi madiga'a 'ori i'a ma jira,
mada'a ngowa'a pahe remanga wo-waro di'a 'ahu, 'aḏi nyafusu 'akala soro'unu.
24Ngowa'a kajahatana 'aḏi sanga 'oru ga'a ananga ya mojongo;
mada'a ngowa'a loasa re banari manga nyafusu, ḏuanga i'a ya sanga.
25Wakutu rato ri wa'ala, ngowa'a kajahatana 'aḏi iranga;
mada'a ngowa'a loasa re banari 'aḏi dadi te'e kasingado-ngadolo i'a.
26Ma tero cuka 'i si'a'a ngiḏi lalara re loworo 'i siloji'i la'o,
so'o gena-ge ḏi'i ngowa'a pamalasa di'a ngowa'a ga'a ya'u soma'a.
27Silamo'o re mojongo Ma JOU, enanga gena-ge 'i sidogo 'umuru kiḏanga,
mada'a ngowa'a kajahatana, 'aḏi siḇoko'o manga 'umuru.#Dol. 13:9; 20:20
28Ngowa'a loasa re banari manga ngo-nganono 'i sigasa roanga,
mada'a ngowa'a kajahatana manga ngo-nganono 'i dadi parasaja.
29Ma JOU 'ai ngo'omo 'i saolo ngowa'a ga'a de'oso re ḏegoro kama rapua ua,
mada'a enanga gena-ge 'i dadi bahala di'a ngowa'a ga'a 'aḏi 'a'a kajahatana.
30Ngowa'a loasa re banari 'aḏi ḏegoro kasingado-ngadolo i'a tamanga daeraha,
mada'a ngowa'a kajahatana ḏuanga i'a 'aḏi ḏegoro ti'ara yoḏu'u tamanga daeraha.
31Ngowa'a loasa re banari manga madanga 'i kanau 'akala soro'unu,
mada'a ngowa'a manga yai'i 'i sa-salanga ḏuanga i'a sanga tola'a.
32Ngowa'a loasa re banari manga madanga 'i sisanangi 'akala re sinyingara,
mada'a ngowa'a kajahatana manga yai'i 'i pa'i sa-sakala ḇato.
اکنون انتخاب شده:
Dolabololo 10: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)