Dolabololo 13
13
1Ngowa'a nau'u ga'a 'akala soro'unu ḏuanga i'a 'aḏi 'isene ma ḇaḇa 'ai do-doto'o,
mada'a ngowa'a ga'a 'aḏi situ-tuhu 'akala soro'unu, 'aḏi 'isene ua ngowa'a ya'u ḇangata.
2Ngowa la-la manga demo 'i si'a'a ananga 'aḏi 'utungu,
mada'a ngowa-ngowa'a ga'a tukanga sihaga, ananga pa'i 'aḏi nyafusu sijira ngowa'a lelegu.
3Ngowa-ngowa'a ga'a 'aḏi jaga manga madanga, ananga gena-ge 'aḏi palihara manga 'ahu,
mada'a ngowa'a ga'a 'aḏi nga'unu ua jaga 'ai demo re ganau, ananga gena-ge 'aḏi siwejere manga diri masiretene.
4Ngowa'a pamalasa manga 'akala re sinyingara 'i romanga reo nyafusu mada'a 'i parasaja,
mada'a 'akala ngowa'a cufala 'aḏi sanga pai-pai'i.
5Ngowa'a loasa re banari 'aḏi emono demo sa-sakala,
mada'a ngowa'a kajahatana 'aḏi sipula'a mara'a re sijira manga diri masiretene.
6'Ahu loasa re banari 'i saolo ngowa-ngowa'a ga'a de'oso re ḏegoro kamanga rapu ua,
mada'a 'ahu kajahatana 'i sibodito ngowa'a baraḏosa.
7Rema ngowa'a ga'a 'aḏi matuhu ngowa'a rema-enanga, mada'a ananga kamanga 'oru rimoi i'a mai cua;
re ḏi'i ngowa'a ga'a 'aḏi matuhu ngowa'a ma dinga'unu ua, mada'a manga harata lai repe.
8Ngowa'a rema-enanga 'o sisupu 'ai pipisi di'a sisaolo 'ai 'ahu,
mada'a ngowa'a ma dinga'unu ua 'o 'isene ua na'o ngowa'a 'u sinati-nati.
9Ngowa'a loasa re banari manga 'ahu, ma tero ciḏoto tarangi madutu,
mada'a ngowa'a kajahatana manga 'ahu ma tero poci 'i sengene.
10Ngowa'a ga'a momole pa'i sibaolo ma'u go'oro ḇato,
mada'a ananga ga'a 'aḏi 'isene duga re domolo, sanga 'akala soro'unu.
11Harata ga'a 'aḏi sanga caiti, enanga 'i moini caiti ḏi'i,
mada'a ngowa-ngowa'a ga'a 'aḏi lomu harata ceka'a ua-ceka'a ua, ḏuanga i'a 'aḏi dadi ngowa'a rema-enanga.
12Ngo-nganono ga'a 'i sanga nyangu 'i si'a'a 'akala kangela,
mada'a nyafusu ga'a ngowa'a ya sanga ma tero sa'olo ate ga'a pula'a 'ahu.
13Ngowa'a 'aḏi sipa-pake ua Ma JOU 'ai do-doto'o, ananga gena-ge 'aḏi sanga hukumu,
mada'a ngowa-ngowa'a ga'a 'aḏi mete'e Ma JOU 'ai do-doto'o, ananga gena-ge ḏuanga i'a 'aḏi sanga ngogele.
14Ngowa'a 'akala soro'unu manga do-doto'o gena-ge 'ahu ma cimi,
singadolo 'aḏi sanga silalo'o toma 'ori i'a ma jira.
15Ngowa'a remanga 'akala ma la-la, ngowa'a ya'u silamo'o,
mada'a ngowa'a ga'a 'aḏi nyanyaḏi masoloto, ananga manga ngo'omo 'i siwejere manga diri.
16Ngowa'a pahe 'aḏi 'ahu mete'e manga wo-waro,
mada'a ngowa'a ga'a 'aḏi emono wo-waro 'aḏi nyanyaḏi sijumu manga haga.
17So-soma'a ga'a ngowa'a kajahatana, ananga pa'i 'aḏi sigasa ngowa'a toma bodito,
mada'a so-soma'a ga'a 'aḏi setia, ananga 'aḏi sigasa dame.
18Ngowa'a ga'a 'aḏi 'isene do-doto'o ua, ananga 'aḏi dadi ngowa'a ma dinga'unu ua re 'aḏi sanga je-jengere.
mada'a ngowa'a ga'a 'aḏi dawongo ḇangata, ngowa'a ya'u silamo'o.
19'Akala re sinyingara 'i sanangi masala na'o nyafusu gena-ge 'i dadi.
mada'a ngowa'a ga'a 'aḏi emono wo-waro, ananga 'aḏi mawiḏa ua toma kajahatana.
20Ananga ga'a 'aḏi maḏagilomu toma ngowa'a 'akala soro'unu, ananga gena-ge 'o dadi 'akala soro'unu,
mada'a ananga ga'a 'aḏi maḏagilomu reo ngowa'a ga'a 'aḏi emono wo-waro, ananga 'aḏi sanga bodito.
21Ngowa'a baraḏosa bodito ya'u kunu'i tau-taunu,
mada'a ngowa'a loasa re banari ḏuanga i'a 'aḏi sanga 'ahu ma sanangi.
22Ngowa'a la-la siwarisi 'ori i'a ma la-la toma ngowa'a re danongo.
mada'a ngowa'a baraḏosa manga harata 'i sidodahe di'a ngowa'a loasa re banari.
23Tana'a ga'a ngowa'a ya pajeko nyangu, enanga gena-ge ma hasili repe di'a ngowa'a ma dinga'unu ua,
mada'a ma hasili gena-ge 'i iranga sababu ngowa'a 'adili ua.
24Ngowa-ngowa'a ga'a 'aḏi pake didiki ua, ananga gena-ge 'aḏi dadalara ua manga ngowa 'olo.
mada'a ngowa'a ga'a 'aḏi dadalara manga ngowa 'olo, ananga gena-ge 'aḏi pake didiki pasi-pasi enanga ma 'orasa.
25Ngowa'a loasa re banari 'aḏi oromo singadolo wunusu,
mada'a ngowa'a kajahatana manga po'olo 'i burutu'i tau-taunu.
اکنون انتخاب شده:
Dolabololo 13: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)