Dolabololo 15
15
1Sa-sangoro ma mereoso, enanga gena-ge 'i siiranga manga ḏuruta,
mada'a demo-demo ma bai'i, enanga gena-ge 'i sibere manga ngaunu.
2Ngowa'a 'akala soro'unu manga yai'i 'i sisapolo wo-waro,
mada'a ngowa'a ga'a 'aḏi emono wo-waro, manga demo-demo pa'i siwaiti manga haga ḇato.
3Ma JOU 'o oḏi'i toma le'a ḇato,
Unanga gena-ge 'o totoho ngowa'a la-la re ngowa'a ma jira.
4Yai'i ma ḇuru, enanga gena-ge ma tero sa'olo ate ga'a pula'a 'ahu,
mada'a yai'i ma ruci, enanga gena-ge 'i sijira manga 'akala re sinyingara.
5Ngowa'a haga 'aḏi 'isene ua ma ḇaḇa 'ai do-doto'o,
mada'a ngowa-ngowa'a ga'a 'aḏi dawongo ḇangata, ananga gena-ge 'akala soro'unu.
6Toma ngowa'a loasa re banari manga wala rema harata repe,
mada'a ngowa'a kajahatana manga hasili 'i sigasa toma jira.
7Ngowa'a 'akala soro'unu manga 'uḏu 'i doto'o wo-waro,
mada'a ngowa'a ga'a 'aḏi emono wo-waro, ananga manga 'akala re sinyingara 'i boloto ua.
8Ma JOU 'o sipa-pake ua ngowa'a kajahatana manga jou-jou,
mada'a Unanga 'o dawongo nyiata toma ngowa'a ga'a manga 'ahu 'i boloto.
9Ngowa'a kajahatana manga de'oso re ḏegoro, Ma JOU ya'u sipa-pake ua,
mada'a Unanga 'o dadalara ngowa'a ga'a makutale 'ahu banari.
10Ngowa-ngowa'a ga'a 'aḏi sieanga ngo'omo boloto, ananga gena-ge 'aḏi sanga hukumana ma te'e i'a,
re ngowa'a ga'a dawongo ua ḇangata, ḏuanga i'a 'aḏi sengene.
11Ma JOU 'o waro ngo'omo toma ngowa'a senge-sengene manga ngi'i,
ma la-lamo'o i'a ḏi'i Unanga gena-ge 'o waro manusia manga 'akala re sinyingara ma dara.
12Ngowa'a ga'a 'aḏi situ-tuhu 'akala soro'unu 'aḏi oḏu'u sanga ḇangata,
unanga oḏu'u 'o tagi toma ngowa'a 'akala soro'unu.
13'Akala re sinyingara ma roanga 'i si'a'a biono sa-sanangi,
mada'a 'akala re sinyingara ma susa 'i sirapo'o 'akala re sinyingara.
14Ngowa'a remanga wo-waro ga'a ya sinyanyasele, ananga manga 'akala re sinyingara 'i disa 'akala pahe,
mada'a ngowa'a ga'a 'aḏi emono wo-waro, ananga manga madanga 'i koya reo haga.
15Ngowa'a ga'a manga 'akala re sinyingara 'i kangela, ma wangere ma giḏanga i'a 'aḏi basono susa tau-taunu,
mada'a ngowa'a ga'a manga 'akala re sinyingara 'i maroanga, ma wangere ma giḏanga i'a 'aḏi basono roanga tau-taunu.
16Lebe rousu, harata pa'i ceka'a ua ḇato, mada'a 'aḏi silamo'o re mojongo Ma JOU,
reo harata repe mada'a 'akala re sinyingara 'i ogoro ua.
17Jobilaha 'age uge suḏe moi ga'a simete'e reo dadalara,
reo nyao'o sapi, mada'a gena-ge 'i sidodahe rema emono.
18Ngowa'a ga'a ruta caiti, ananga gena-ge 'aḏi sibaolo ma'u go'oro,
mada'a ngowa'a ga'a 'akala ḇanyo, ananga gena-ge 'aḏi sitogumu ma'u sataru.
19Ngowa'a ga'a pamalasa manga ngo'omo ma tero sa'olo hisa dodowo'o,
mada'a ngowa'a ga'a manga 'ahu 'i boloto, ananga gena-ge manga ngo'omo 'i rata.
20Ngowa'a nau'u ga'a 'akala soro'unu, 'aḏi sisanangi manga ḇaḇa 'ai 'akala re sinyingara,
mada'a ngowa'a ga'a 'aḏi emono wo-waro, 'aḏi sipa-pake ua manga ngina.
21Haga 'i sisanangi ngowa'a ga'a manga 'akala cua,
mada'a ngowa'a pahe remanga wo-waro di'a 'ahu, ananga gena-ge manga 'ahu ma ngo'omo 'i boloto.
22Rancana 'i dadi ua na'o duga re domolo 'i cua,
mada'a enanga 'i dadi na'o 'age ngowa'a repe ga'a 'aḏi pula'a duga re domolo rema enanga.
23Matengo i'a 'o sanangi madutu sababu 'o pula'a sa-sangoro,
re rousu masala na'o 'ai demo-demo pasi-pasi enanga ma 'orasa!
24Ngowa'a 'akala soro'unu manga ngo'omo 'i sigasa toma 'ahu ga'a kiḏanga,
la ananga gena-ge 'aḏi malalo'o toma ngo'omo ga'a sigasa 'uci da'u tala toma ngowa'a senge-sengene manga dungia.
25Ngowa'a momole manga wala, Ma JOU 'a parego,
mada'a ngowa'a balo 'ami tana'a ma bati, Unanga 'a silage ua.
26Ma JOU 'o emono ngowa'a kajahatana manga rancana,
mada'a demo-demo ma la-la enanga gena-ge 'ofi-'ofi ra Unanga 'ai momina.
27Ngowa-ngowa'a ga'a 'aḏi disa 'ori i'a rana reo 'akala re sinyingara ma jira,
sikaco 'ai ngitu re ngale masiretene,
mada'a ngowa ga'a emono pipisi sepa, ḏuanga i'a 'aḏi 'ahu lai kiḏanga.
28Ngowa'a loasa re banari 'aḏi mafikiri siḏa wakutu mau 'aḏi sangoro,
mada'a ngowa'a kajahatana manga madanga pa'i 'i singadolo demo ma jira ḇato.
29Ma JOU 'o pu'i 'Ai ngau'u na'o ngowa'a kajahatana 'aḏi manyiata,
mada'a Unanga 'o 'isene ngowa'a loasa re banari manga nyiata.
30Na'o biono 'i seri'i, gena-ge 'i si'a'a ngowa'a lelegu manga 'akala re sinyingara 'i roanga,
re habari ma la-la 'i si'a'a ngowa'a lelegu 'aḏi basono rousu.
31Ngowa-ngowa'a ga'a 'aḏi 'isene ḇangata ga'a sipula'a 'ahu,
ananga gena-ge 'aḏi dadi ngowa'a 'akala soro'unu.
32Ngowa-ngowa'a ga'a 'aḏi dawongo do-doto'o ua, ananga gena-ge 'aḏi siupa'a manga 'ahu masiretene,
mada'a ngowa'a ga'a dawongo ḇangata, ananga gena-ge sanga 'akala ma la-la.
33Silamo'o re mojongo Ma JOU, gena-ge ḏuanga i'a 'i doto'o ngana di'a dadi 'akala soro'unu,
re ngowa'a ga'a maholo tamanga 'akala re sinyingara, ḏuanga i'a ngowa'a ya'u silamo'o.
اکنون انتخاب شده:
Dolabololo 15: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)