Dolabololo 24
24
1Kaleḏa awa ngowa'a ma jira,
re ma'u ḏagilomu awa ra ananga gena-ge,
2sababu ananga manga 'akala re sinyingara ma dara pa'i 'i si'a'a 'ulungu ma jira
re manga madanga pa'i 'i kanau manga rancana ma jira.
3Pake 'akala soro'unu di'a simomi'i wala,
pake wo-waro di'a 'ahu la wala gena-ge 'i dadi te'e,
4re no pake wo-waro lai ngido di'a siromanga kamara ma dara
reo 'ori i'a rana ga'a ma ijana hali re 'i rousu.
5Ngowa'a 'akala soro'unu lebe kuasa reo ngowa'a te'e,
re ḏi'i ngowa'a pahe remanga wo-waro lebe te'e reo ngowa'a ga'a lese lamo'o re te'e.
6Sababu pa'i reo rancana ngana nyengara ma'u parangi,
re no sanga bara'utungu sababu tukanga ngongaje laḏi repe.
7'Akala soro'unu kau'u woḏi di'a ngowa'a haga;
ananga 'aḏi welanga madanga yoḏu'u toma ngalana lamo'o.
8Ngowa'a ga'a manga rancana 'i cira taunu,
ananga ḏuanga i'a ngowa'a ya'u si'aro'o tukanga sihaga.
9Ngowa'a haga manga fikirana pa'i 'i sisapolo ḏosa,
re ngowa'a ga'a 'aḏi situ-tuhu 'akala soro'unu, ngowa'a ya'u nyanyaḏi ua.
10Na'o 'ani 'akala re sinyingara 'i rapo'o toma 'orasa kangela,
'ani de-de'e pa'i taḇe ino ḇato.
11Sibebasa ananga ga'a sanga gasa di'a sisengene,
re sisalamata ngowa'a ga'a jau i'a toma ngi'i sanga tola'a ga'a 'aḏi nga'unu tagi riwara.
12Na'o ngana no kanau: <<Mode'e, ngomi waro ua mangale hali gena-ge!>>
Mada'a Unanga ga'a 'O tai'i 'akala re sinyingara 'A waro mo-moini.
Unanga ga'a 'o jaga manusia manga 'ahu 'A oḏi'i mo-moini,
re Unanga 'A balasa mete'e manusia manga ga'a.
13'Ari ngowa'a nau'u no oromo madu, sababu gena-ge 'i rousu;
re madu ga'a 'i 'uisi toma enanga ma ngi'i ino basono lai mami.
14No balasu waro 'akala soro'unu 'i rousu di'a 'ani 'ahu;
Na'o na sanga gena-ge tantu ḏua 'ani 'ahu toma biono i'a rousu re la
re 'ani ngo-nganono gena-ge 'i iranga ua. #Dol. 23:18
15Tailako awa ngowa'a loasa re banari manga wala ma tero ngowa'a kajahatana,
re sijira awa manga wala;
16sababu na'o ngowa'a loasa re banari 'aḏi eta'a soi tumudingi,
ananga dadunu 'aḏi momi'i moju, mada'a ngowa'a kajahatana 'aḏi eta'a toma bodito re 'aḏi momi'i yoḏu'u.
17Awa no maroanga na'o 'ani lawana 'aḏi eta'a toma bodito,
awa 'ani 'akala re sinyingara 'i sanangi na'o ananga 'aḏi pele'e,
18la Ma JOU 'a oḏi'i awa 'ani ga'a re 'O sanangi ua,
ḏua Unanga 'o macelolo 'Ai duruta toma ngowa'a gena-ge.
19Ruta awa sababu ngowa'a ma jira,
'ani 'akala re sinyingara 'i go-goḏi awa toma ngowa'a kajahatana.
20Sababu ngowa'a ma jira manga ngo-nganono 'i cua toma biono i'a,
ngowa'a kajahatana ma tero poci ga'a ḏua 'i sengene.
21Hei 'ari ngowa'a nau'u, no mojongo re silamo'o Ma JOU re ma 'olana;
no lawana awa ananga gena-ge.
22Sababu ananga nyengara 'aḏi si'a'a ngana no sanga bahala toma 'orasa masiwaro ua ma dara,
re ngowa'a 'aḏi waro ua bahala ga'a ananga 'aḏi singe-ngeta'a.
Demo-demo 'istiari muḏuo i'a moju
23Nena-ne ḏi'i ngowa'a 'akala soro'unu manga dolabololo-dolabololo:
Rousu ua, na'o no pa'ala kaci moi wakutu no sijuruhakimi.
24Na'o juruhakimi 'o kanau toma ngowa'a kajahatana: <<Ngana no sala ua>>,
ngowa'a ḏuanga i'a 'aḏi sisasi hakimi re bangsa-bangsa ḏi'i 'aḏi do-doana ngana.
25Mada'a ananga ga'a pula'a ḏuga re domolo ḏuanga i'a 'aḏi monere,
re ananga ḏuanga i'a 'aḏi sanga ngogele ma repe.
26Ngowa'a ga'a 'aḏi kanau go-gogono ua
gena-ge ḏagilomu la.
27'A'a si 'ani guḏa re na so'ana, Siḏodahe mo-moini si, kara no molo'ara,
28Awa no dadi sakisi tani ḏagilomu na'o ma sababu cua,
re awa no sihaga unanga rani madanga.
29So'o gena awa: <<Ma tero sa'olo ananga 'aḏi 'a'a ngoi, so'o gena ḏi'i ngoi to 'a'a ananga.
Ngoi to balasa ra ananga mete'e manga ga'a.>> #Dol. 20:22; Rom. 12:19
30Ngoi to tola'a i'a ngowa'a pamalasa manga guḏa
re ngowa'a ga'a 'akala ma cua, ananga gena-ge manga guḏa 'anggur.
31Oḏi'i, dodowo'o re rurubu ri konyo tamanga tana'a mo-moini,
re hisa maḏi mai ri ruba.
32Wakutu ngoi to oḏi'i re totoho hali gena-ge,
ngoi to tatamo re sanga enanga gena-ge sa'olo do-doto'o.
33<<Otu ceka'a ua moju, kakadungu ceka'a ua moju,
masaba'aḏu ceka'a ua moju di'a masibatongo otu,>>#Dol. 6:10
34ḏua 'ahu ma dinga'unu ua 'i sapolo ma tero sa'olo ngowa'a ra-rabasa,
re 'ahu ma ngadolo ua 'i sapolo ma tero ngowa'a ga'a gasa sanapanga. #Dol. 6:11
اکنون انتخاب شده:
Dolabololo 24: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)