Dolabololo 25
25
'A Salomo 'ai Dolabololo ga'a 'a Hizkia 'ai pagawe-pagawe ya lomu
1Nena-ne ḏi'i 'a Salomo 'ai dolabololo-dolabololo ga'a 'a Hizkia, 'olana Yehuda 'ai pagawe-pagawe ya lomu.
2Ma Jou'ongu Madutu 'ai mulia gena-ge sigo-gogono 'oru rimoi i'a,
mada'a 'ola-'olana manga mulia gena-ge disa waro 'ori i'a rimoi i'a.
3Ma tero diwanga ma gau'u re ngoloto ma ngido,
so'o gena ḏi'i 'ola-'olana manga 'akala re sinyingara ga'a wa tuga yoḏu'u.
4Siiranga salaka ma faja,
ḏua enanga ma rousu 'i supu di'a tukanga guraci.
5Sikiḏanga ngowa'a tukanga pula'a duga re domolo ra ma 'olana 'ai biono,
dadi 'ai ḏe-ḏegoro 'i ogoro sababu 'ai loasa re banari.
6Awa no momole ra ma 'olana 'ai biono,
bolo ni made-de'oso toma ngowa'a la-lamo'o manga ngi'i.
7Sababu lebe rousu totoma ma 'olana 'o kanau, <<Ino, no tegoro sebanga ra ngoi,>>
reo ma 'olana ni sipula'a mara'a toma ngowa'a la-lamo'o manga biono.#Luk. 14:7-10
'Oru ga'a ngana na oḏi'i
8awa jau-jau no gasa hali gena-ge toma juruhakimi. #Mat. 5:25-26
Sababu ma ḏo-ḏogumu tala 'oru ga'a nyengara na 'a'a,
na'o 'ani sakisi ro sipula'a mara'a ngana?
9No ma'u 'aturu ḇato tani ḏagilomu mangale hali gena-ge,
mada'a awa na sijarita toma ngowa'a lelegu,
10la awa ngowa'a ga'a 'aḏi 'isene ngana, ḏuanga i'a 'aḏi sipula'a mara'a ngana,
re 'ani lomanga ga'a 'i camari, gena-ge 'i siiranga yoḏu'u.
11Demo ga'a 'i sikanau pasi-pasi enanga ma 'orasa,
gena ge ma tero sa'olo 'apel guraci ma sowo'o sigare toma sawo'o salaka.
12Ngowa'a 'akala soro'unu manga ḇangata gena-ge ma tero 'ali-'ali guraci bolo guraci madutu
di'a ngau'u ga'a 'i 'isene.
13Ma tero ḇanyo malata toma 'orasa 'utu'u, so'o gena-ge ḏi'i falalomu ga'a 'aḏi setia toma ngowa'a ga'a ya'u 'utusu.
Ngowa'a gena-ge 'aḏi sisanangi manga tua-tuanga manga 'akala re sinyingara
14Jaji-jaji ga'a 'i si'a'a ua,
ma tero kakamo re karawiana ga'a 'i sisapolo besa'a ua.
15No pake 'akala ḇanyo, nyengara no singali ngowa'a la-lamo'o matengo 'ai 'akala re sinyingara,
re demo ma la-la nyengara 'i sirapo'o obongo. #25:15 ma ngale so'o ne: demo ma la-la nyengara 'i siwejere mo-moini ga'a ma'u lawana.
16Na'o no sanga madu, no oromo singadolo wunusu ḇato,
awa singadolo no oromo pai'i woḏi singadolo na singunanga
17Awa no sapolo tau-taunu tani wala sebanga,
la unanga 'o emono ngana awa, re 'o bo-bosono ngana.
18Ngowa'a ga'a 'aḏi pula'a sakisi sa-sakala mangale ḏagilomu,
gena-ge ma tero bu-butulu bolo samaranga bolo coimi ma doto lai cuḏumu.
19Ngaku ngowa'a ga'a 'aḏi tukanga sihaga toma 'orasa kangela
gena-ge ma tero ngiḏi ga'a ri poti bolo rou ga'a 'i cug̱a.
20Manyanyi, nyanyi roanga di'a ngowa'a ga'a duka re balisa
ma tero wo ma wa-watolo toma 'orasa 'alo-'alo,
ma tero siajala cuka toma nyaboto.
21Na'o 'ani lawana 'aḏi sawini, no pula'a roti di'a ananga ya oromo,
re na'o ananga manga camala dudungu, no pula'a ḇanyo di'a ananga ya ka'e.
22Duhu so'o gena-ge ma tero no sipula'a mara'a ananga. #25:22 Ma ngale: gena-ge 'i sipula'a mara'a ra ananga.
re Ma JOU ḏua 'a balasa mo-moini ra ngana. #Rom. 12:20
23Karawiana kore mie, tantu ḏua 'i sisapolo besa'a,
kanau ga'a go-gogono si'a'a biono 'i dadi ruta.
24Lebe rousu, no tegoro toma lotenge ma ḇuḇuku,
reo no tegoro marimoi rani were'a ga'a nyanyaḏi ma'u go'oro.#Dol. 21:9
25'Isene habari ma la-la toma giḏanga,
ma tero ka'e ḇanyo malata, wakutu camala dudungu.
26Ngowa'a loasa re banari 'aḏi ta'aloko toma ngowa'a kajahatana
ma tero ḇanyo ma la'o ga'a faja bolo sumu 'i faja.
27Rousu ua oromo madu lamo'o woḏi,
so'o gena ḏi'i rousu ua na'o kanau sihie-hie pai'i woḏi.
28Ngowa'a ga'a nga'unu ua jaga manga diri
ma tero limau ga'a ma gegelo ri ruba.
اکنون انتخاب شده:
Dolabololo 25: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)