Dolabololo 26
26
1Ma tero besa'a toma 'orasa ngogoro lamo'o, re salju toma 'orasa 'utu'u,
so'o gena ḏi'i ngowa'a ga'a 'aḏi emono wo-waro, 'aḏi patasa ua ngowa'a ya'u silamo'o.
2Ma tero namo 'i soloro re 'i malai-lairi toma diwanga,
so'o gena ḏi'i kutuki, ga'a ma sababu cua, 'i nga'unu ua toma ngowa'a kamanga sala ua.
3Ja-ja'olo di'a jarana, sigare camala ma gumi toma kaladai,
re bubutulu di'a ngowa'a ga'a 'aḏi emono wo-waro manga ḏuḏunu.#Dol. 10:13
4Sangoro awa ngowa'a ga'a 'aḏi emono wo-waro mete'e ananga manga haga,
la awa ngana no dadi ma tero ngowa'a gena-ge ḏi'i.
5So-sano toma ngowa'a ga'a 'aḏi emono wo-waro ino, balasu no sangoro mete'e ananga manga haga,
la awa ananga 'aḏi ta'ajiri ananga 'akala soro'unu.
6Ngowa'a ga'a 'aḏi 'utusu ngowa'a ga'a 'aḏi emono wo-waro di'a siḏingoto habari,
ma tero 'aḏi sirapo'o manga rou masiretene re 'aḏi sigasa bodito tamanga diri.
7Dolabololo toma ngowa'a ga'a 'aḏi emono wo-waro manga madanga,
ma tero ngowa'a ḇolo manga rou ga'a ma faeda cua.
8Silamo'o ngowa'a ga'a 'aḏi emono wo-waro,
ma tero piri'u maḏi namo-namoto toma peta-peta ma dara.
9Dolabololo toma ngowa'a ga'a 'aḏi emono wo-waro manga madanga,
ma tero jiono ga'a topo'o toma ngowa'a 'etolo manga giama.
10Ngowa-ngowa'a ga'a 'aḏi simunara ngowa'a ga'a 'aḏi emono wo-waro bolo ngowa'a ga'a tola'a i'a,
ma tero tukanga coimi ga'a sibodito ngowa'a repe.
11Ma tero nunu'u dadunu ya nyamele ma ngunanga,
so'o gena ḏi'i, ngowa'a ga'a 'aḏi emono wo-waro ga'a 'aḏi dadunu ya sijumu manga haga.
12Ngowa'a ga'a 'aḏi emono wo-waro, manga ngo-nganono lai repe,
reo ngowa'a ga'a 'aḏi mahie manga diri mangale manga 'akala soro'unu.
13Ngowa'a pamalasa 'aḏi kanau: <<Rema singa toma ḏuḏunu!
Rema singa toma ngo'omo ma golona!>>#26:13 Sababu ngowa'a pamalasa 'aḏi nyanyaḏi tegoro tamanga wala ma dara.
14Ma tero ngalana 'i kololo toma enanga ma hensele,
so'o gena ḏi'i ngowa'a pamalasa pa'i tamanga dederu ma re'u.
15Ngowa'a pamalasa pa'i 'aḏi sigare manga giama toma suḏe ḇato;
mada'a ananga 'aḏi lamahana woḏi di'a 'aḏi sitowo tamanga madanga masiretene. #Dol. 19:24
16Ngowa'a pamalasa 'aḏi ta'ajiri manga diri lebe 'akala soro'unu
reo ngowa'a nga tumudingi ga'a manga sa-sangoro reo 'akala soro'unu.
17Ngowa'a ga'a 'aḏi mete'e capuru ngowa'a manga hali,
ma tero ngowa'a ga'a 'aḏi cako'o nunu'u bangana ma ngau'u.
18Ma tero ngowa'a pona 'aḏi sitabu
coimi madoto u'u, re coimi ga'a sisengene,
19so'o gena-ge ḏi'i ngowa'a ga'a 'aḏi sihaga manga ḏagilomu,
re 'aḏi kanau: <<Ngoi pa'i seḏu'u ḇato!>>
20Na'o ate ri moini, ma u'u 'i sengene;
Na'o ngowa'a tukanga fitana raḏi cua, ma'u lawana ḏi'i mai ri iranga.
21Ma tero ate re konu'u 'i si'a'a u'u ma lejanga tau-taunu;
so'o gena-ge ngowa'a ga'a ma'u lawana 'aḏi si'a'a ma'u go'oro ganapu lamo'o.
22Ngowa'a tukanga fitana, ananga manga demo ma tero sa'olo ngo-ngoromo ga'a lai sa'i
ga'a ngowa'a 'aḏi nyafusu ya nyamolo.#Dol. 16:28; 18:8
23Ma tero sa'olo giu'u tana'a 'i sisorumu reo salaka,
so'o gena-ge ḏi'i ngowa'a ga'a manga demo 'i mami, mada'a manga 'akala re sinyingara 'i cira.
24Ngowa'a tukanga bo-bosono manga demo lai mami,
mada'a tamanga 'akala re sinyingara ma dara 'i romanga reo sa-sakala.
25Kalaha ananga 'aḏi sijumu manga la, no ngaku awa si,
sababu tamanga 'akala re sinyingara ma dara 'i romanga reo bo-bosono.
26Kalaha manga bo-bosono ya sao reo sa-sakala,
ḏuanga i'a manga kajahatana ngowa'a mo-moini ya waro.
27Ananga ga'a 'aḏi paiti tana'a ma duso'o, ananga ḏuanga i'a 'aḏi eta'a toma dara,
re ananga ga'a 'aḏi lulu maḏi, ḏuanga i'a maḏi gena-ge 'i lulu ḏibo nga'unu ananga masiretene.
28Ngowa'a ga'a 'aḏi sa-sakala, ananga 'aḏi emono manga ngowa-ngowa'a,
re demo ma mami 'i sigasa toma jira.
اکنون انتخاب شده:
Dolabololo 26: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)