Lukasi 11
11
Yesu anguvadahitsa vadahitswa vake kusuka
Matayo 6:9-13; 7:7-11
1Siku yimwe Yesu avaga hono ha wiyeka ansuka. Hoavaga kusinda kusuka, mudahitswa vake yumwe akamulonjelaje, “Mutwa tudahitse kusuka kota hila Yohana mubatitsi fyo avadahitse vadahitswa vake.” 2Yesu akavalonjelaje, “Ho mukuva munsuka mulongaje hino,
‘Dada vetu yo uli kilanga,
Litawa lyako lihesimilwe na kuva lya wiyeka,
Wuntsajila wako wutse.
3Utupele chilyo chetu cha chila siku.
4Utuhulumile ndongwa tsetu ntsibi,
kota hila na hetwe fyo tunguvahulumila wo vatukosye.
Lekaje kutusindika mu majetso.’ ”
5Kaha Yesu akavalonjelaje vadahitswa vake, “Nani yoali hagati henyu yoana muyage, nayo yula muyage akatsaje hachilo na gati mu nyumba yake, na kumulonjela kuta, ‘Muyangu, ung'opetse mabumunda gadatu ngukuhomba, 6kwasawuli mung'olotsangu atsitse kuhuma kulujendo, na heni tsilihela chilyo cha kumupela!’ 7Kaha yula yoali mu nyumba amujibule kutijila, ‘Uleche kung'oda! Mwanga maje lwitsi, heni na vanangu tuvasise. Sifuluche ndamuche ngupele mabumunda.’ 8Ntsinguvalonjela nachene kuta, na yivaje munu uyo siakulamuka amupele igo mabumunda uyo muyage, lechelelo kwasawuli ya hila fyo angumusuka lwahihyo, akulamuka amupele chinu chochive choan'gana kwasawuli siagotswe kumusuka. 9Ihyo ntsinguvalonjela kuta, musuche na henye mupelwa, musache na henye mukupata, muhodese na henye mukudindulilwa. 10Kwasawuli munu yoyuve yo ansuka apelwaga, na munu yoyuve yo ansaka apataga, na chila yo anhodetsa adindulilwaga. 11Mbe, kuna dada vachi, mwanage amusuche somba, akumupela ntsoka badili ya somba? 12Awu manyi asuche likang'a akumupela dondi? 13Manyi henye yo muli vanu vabi mufitsele kuvapela vana venyu finu finofu. Lechelelo Dada venyu va kilanga akulutila ndalahela kuvapela Muhe va Mulungu vala veka wovangumusuka.”
Yesu na Belitsebuli
Matayo 12:22-30; Maliko 3:20-27
14Siku yimwe Yesu ho avaga angulihetsa lisoka luhuma mwa munu yo avaga anlemwa kulonga. Duve lila lisoka ho lyavaga kumuhuma, munu yula yo avaga anlemwa kulonga akantsaje kulonga. Vanu veka vakapomokaje. 15Lechelelo vanu vamwe vakalongaje, “Angujivinga misoka kwa wuvetso wa Belitsebuli, yula muvina va misoka jeka.” 16Vanu vamwe vakamujelaje Yesu, vakaganaje avaditile ndajilo tsa kuhuma kilanga kwa Mulungu. 17Lechelelo kwasawuli Yesu akatselaje mahotso gawo akavalonjelaje, “Chila wuntsajila manyi wusumwane wene kwa wene wukugwa, hihyo na vanu va kaye yimwe manyi vikale kwa kutelana vene kwa vene, vanu iwo vakutagalila. 18Manyi wuntsajila wa Lihoka wusumane wene kwa wene, wuntsajila wake wukwima chinyandawuli? Ntsinguvalonjela hino kwasawuli henye munlonga kuta heni ntsingujihumya misoka kwa wuvetso wa Belitsebuli. 19Lelo manyi heni ntsingujihumyamisoka kwa wuvetso wa Belitsebuli, vatantsi venyu nawo vahumyaga kwa wuvetso wa nani? Kwasawuli iyo iwo wo vakuvahiga. 20Lechelelo manyi yive heni ntsingujihumya misoka kwa wuvetso wa Mulungu, mutsele kuta wuntsajila wa Mulungu mwanga wufisile.
21“Munu munya ludali munya fitovelo fyake fyeka ho ankwamila nyumba yake, finu fyake fyeka fivaga hihilaga kota fyo an'gana. 22Lechelelo manyi atse munu munya ludali na kumusuma, akumusukula fitovelo fyake fyeka fyo angihuvila na kutegula finu fila fyeka na kutsigavasa. 23Munu yoyuve yo sinambe ihantse na heni alitebe na heni, na munu yoyuve yo sinambe akong'ase hamwe na heni uyo antagalitsa.
Kuwuya kwa misoka
Matayo 12:43-45
24“Lisoka manyi livingwe luhuma mugati mwa munu, likalaga hono ho hagaya malenga na kusaka hono ha kwesela. Lechelelo manyi lileche kuhawona lilonjelaga hino, ‘Ngupiluchila mu nyumba yangu yo ngikalaga.’ 25Nalyo holikuva lifisile na kuyifika nyumba yila yifyajilwe na kupambwa finofu. 26Ihyo libitaga kujitola misoka jinji saba mibi kulutila lyene, najo jinjilaga na kwikala mugati mwa munu, na muwudugo hali ya munu uyo yivaga ntsibi kulutila yila ya hamutalo.”
Wuwuya wunofu kuhuma kwa Mulungu
27Yesu hoavaga anlonga ndongwa itso, mudala yumwe yoali hala ha vanu wolofu akalongaje fikami kuta, “Aditilwe wuwuya na Mulungu mudala yo akuletsile na kukong'etsa!” 28Nayo Yesu akamujibulaje, “Vaditilwe wuwuya ndalahela na Mulungu vala wo vanhulikitsa ndongwa tsa Mulungu na kudita hila fyoyin'ganika.”
Chilelo cho ching'ana ndajilo
Matayo 12:38-42
29Vanu wolofu fyo vavaga vankongetseka, Yesu akavalonjelaje, “Chilelo chino chibi, chochinsaka ndajilo sichikupelwa ndajilo yoyive, ila ndajilo ya Yona. 30Kota hila Yona fyo aveye ndajilo kwa vanu va muji gwa Ninavi, ho hihyo Mwana va Munu fyo akuva ndajilo kwa chilelo chino. 31Mutsajila mudala kuhuma ku inyi ya Seba akwima muwuhigo hamwe na vanu va chilelo chino, nayo akuvahiga kuta vadisile wubi, kwasawuli mwene ajentsile luhuma kutali atse ahulikitse ntselo tsa muntsajila Selemani, na hano hana muvina kulutila Selemani. 32Siku ya wuhigo vanu va muji gwa Ninavi vakwima na hamwe na vanu va chilelo chino na kuvahiga, kwasawuli vene vamupituchilye Mulungu ho vavaga kuhulika mbikulo ya Yona. Na hano hana muvina kulutila Yona!”
Lusolola lwa Muvili
Matayo 5:15; 6:22-23
33Yesu akalongaje kuta, “Kuduhu munu yo asaga lusolola na kuluvika kifungu awu mugati mulidebe. Lechelelo yivikwaga hilaga ili yivang'alichile wovankwinjila mu nyumba vavetse kuwona. 34Miho gako go lusolola lwa muvili gwako. Manyi miho gako gave mumi, muvili gwako gweka gukwangatsilwa, lechelelo manyi miho gako gave mabofu, muvili gwako gweka gukuva na jitsa. 35Ihyo wiyangalile, mwangatsa goguli mugati mwako guleche kuva jitsa. 36Manyi muvili gwako gweka guna mwangatsa, na haduhu hono hohave hanya jitsa, duve ukuva na mwangatsa kota hila lusolola fyo lung'alikaga.”
Yesu anguvang'anulila Mafwalisayo na vadahitsi va malajitso ga Musa
Matayo 23:1-36; Maliko 12:38-40
37Yesu hoavaga kusinda kulonga ihyo, Mufwalisayo yumwe akamulibulitsaje Yesu chilyo ku nyumba yake, akabitaje akikalisaje na kulya chilyo. 38Lechelelo Mufwalisayo yula akapomokaje ho avaga kuwona Yesu ankulya bila kukalava. 39Mutwa akamulonjelaje, “Henye Mafwalisayo muhofugaga chikombe na bakuli mwivala, lechelelo mugati mumemile wuhatufu na wubi. 40Henye mulivapuva! Mbe, Mulungu yo avadisile kivala kaha si yoyuyo yo avadisile na mugati? 41Ihyo mutawule kwa vagayu finu fila finofu fyo munafyo mugati mwenyu kwa numbula ntselu, na henye mukudichilwa kumufugamila Mulungu. 42Lechelelo mukudutsa henye Mafwalisayo, kwasawuli simunguvaditila vanu ndongwa nofu na kumugana Mulungu. Lechelelo mungumutawulila lifungu limwe hata mu mafungu ga finu fidodo kota ndugwa na mboga tsa mahamba na filyo. Mun'ganika kuvaditila vanu vanji finofu na kumugana Mulungu hamwe na kutawula lifungu limwe mu mafungu kumi. 43Mukudutsa henye Mafwalisayo, kwasawuli mun'gana kwikalila figoda fya kutalo mu nyumba tsa kitang'anila Vayawudi, na kusamuswa na vanu mwivala na mu nyumba tsa kitang'anila Vayahudi. 44Mukudutsa henye Mafwalisayo, kwasawuli muveye kota makabuli gosinambe gawoneche, na vanu vajenda mwilanga bila kutsela.” 45Mudahitsi yumwe va madahitso ga Musa akamujibulaje Yesu, “Mudahitsi ho unlonga ndongwa tsino tsa Mafwalisayo ungutukumulanga na hetwe.” 46Yesu akamulonjelaje, “Mukudutsa henye vadahitsi va malajitso ga Musa, kwasawuli munguvatwika vanu mitsigo misito jovanlemwa kwitwika, na henye munlemwa kwinula na kuvatangilitsa nambe kwa chala chimwe. 47Mukudutsa henye, kwasawuli mun'tsenjela makabuli ga valoli va Mulungu wo vafweye kwa kukopolwa na vadada venyu. 48Hoihyo mun'woneka kuta muli likuga limwe na vadada venyu. Kwasawuli vene vavakopwe valoli va Mulungu, na henye mungugatsenjela makabuli gawo, munkakamalila kutajika kwawo, kuno sinambe mufwate malajitso go valontsile. 49Lelo kwasawuli ya lulongwa luno, Mulungu kwa ntselo tsake akalontsile hino, ‘Lave nguvatumila valoli va Mulungu na vatumi, nawo vakukopolwa vamwinga na vamwe vakuvakoda.’ 50Ihyo chilelo chino chikuhigwa kwasawuli ya kukopolwa kwa valoli va Mulungu, yo vakopolilwe luhuma kuwubwa kwa inyi. 51Luhuma kukopolwa kwa Habeli mbaka kwa Tsakaliya va Mulungu yo vamukopwe hoavaga hagati ha hono kutawulila nambiko tsa Mulungu na Nyumba ya Mulungu. Enaa. Ntsinguvalonjela nachene kuta chilelo chino chikuhigwa kwasawuli ya ndongwa itso tseka. 52Mukudutsa henye vadahitsi va malajitso ga Musa, kwasawuli muvalemitse vanu kumutsela Mulungu. Henye vene simwamutselite Mulungu na vala yo vaganije kumutsela Mulungu muvalemitse.” 53Yesu ho avaga anwuka hala, Mafwalisayo hamwe na vadahitsi va malajitso ga Musa, vakantsaje kumuvipitsa na kumuhunganga kwa kumuwutsa mbutso ntsolofu, 54ili vapate kumudaditsa kukolela mu ndongwa tsake, ili vamuhije.
اکنون انتخاب شده:
Lukasi 11: SBV
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Sagala Language @The Word for The World International and Sagala Language translation. All rights reserved.