Lukasi 10
10
Yesu anguvatuma sabini na vavili
1Hoavaga kusinda ndongwa itso, Mutwa akavahagulaje vanu vanji sabini na vavili, akavatumaje vavili vavili kwa chila chijiji na muji na chila hono ho aganaga kubita hambele. 2Yesu akavalonjelaje, “Fya kubeta fyolofu, lechelelo vabetaji vadodo. Ho ihyo mumusuche Mutwa va mbeta, ili avasindiche vabetaji mu mugunda gwake. 3Lelo mubitaje kuno mutselaje kuta ntsinguvatuma kota vana ng'olo hagati ha ngwami. 4Mulekaje kutegula magobole, awu myenda, awu filatu fya kubadila, na mulekaje kumusamusa munu yoyuve mung'asi. 5Manyi mwinjile mu nyumba yoyive, mwantsaje kulonga hino, ‘Wusichimafu wuve mu nyumba yino.’ 6Manyi have na munu yo anguwugana wusichimafu, wusichimafu wenu wukuva hamwe na mwene, lechelelo manyi alihaduhu wusichimafu wenyu wukuvapiluchila henye. 7Mwikalaje mu nyumba yiyo na kulya na kung'wa fila fyo vakuvapela, kwasawuli munu yo ankola katsi an'ganika mahombo gake. Mulekaje kuhama kuhuma nyumba yimwe na kubita mu nyumba yinji. 8Manyi mufiche mu muji goguve, na vanu vanguvalibulitsa, mulyaje chovanguvapela. 9Muvaponetsaje vatamwa yovali uko, na kuvalonjela vanu kuta, ‘Wuntsajila wa Mulungu wulihabehi.’ 10Lechelelo manyi mwinjile mung'asi yoyive, manyi valeme kuvalibutsa muwuche, na ho mukuva munlutila mung'asi tsawo mulongaje, 11‘Nambe mingundi ja muji gwenyu jojinanahye mu magulu getu, tunguvakung'unila henye. Lechelelo mutselaje kuta Wuntsajila wa Mulungu wuli habehi.’ 12Ntsinguvalonjela nachene kuta ha siku ya wuhigo, vanu va muji ugo vakuva na ng'odeko ngomi ndalahela kulutila vanu va muji gwa Sodoma.”
Vakudutsa vanu yo vakumulema Yesu
Matayo 11:20-24
13“Mukudutsa henye vanu va ku muji gwa Kolatsini! Na henye yo mungikala ku Betisayida! Kwasawuli mujiwene mitinuso myolofu, lechelelo ndajilo itso tsika tsive tsidisilwe ku miji ja Tilo na Sidoni vaka kusuka kuhulumilwa na kuleka ndongwa tsawo ntsibi. Vaka kulajila kuta valesile ndongwa tsawo ntsibi kwa kufwala magunila na kwibaka michifu. 14Lechelelo siku ya wuhigo yikuva mefu kwa vanu va Tilo na Sidoni kwikangatsa ng'odeko tsawo kulutila henye. 15Henye vanu va muji gwa Kapelinawumu, Mbe, mukudutswa mbaka kilanga kwa Mulungu? Ndaya, Mukwiswa mbaka ku inyi ya vanu yo vafweye.” 16Kaha Yesu akalongaje vadahitswa vake kuta, “Munu yo akuvahulika henye, akuva an'nyulika heni, na munu yo anguvalema henye akuva an'ndema heni. Munu yo an'ndema heni akuva amulemile mwene yo anumile.”
Kuwuya kwa vala sabini na vavili
17Vala sabini na vavili vakawuyaje kuno vana wusangalo. Vakalongaje, “Mutwa, nambe misoka jivahumile vanu hala ho tujing'anulye kwa wuwetso wako.” 18Yesu akavajibulaje, “Ngaliwene Lihoka fyo linkugwa kuhuma kilanga kota lwenje lwa liladu. 19Yesu akavalonjelaje vadahitswa vake kuta, ntsivapelye mamulaka ga kusigana ntsoka na dondi, na wuvetso weka wa Lihoka, na kuduhu chinu chochive chochikuvatetsa. 20Ihyo mulekaje kusangalala kwasawuli misoka jinguvahulika na kuhuma, lechelelo musangalalaje kwasawuli matawa genyu gandikwe mu chitabu cha wumi kilanga kwa Mulungu.”
Yesu ansangalala
Matayo 11:25-27; 13:16-17
21Luvala lulo Yesu hoakavaga amemile Muhe va Mulungu akasangalalaje na akalongaje, “Ntsingukulumba Dada, Mutwa va kilanga na Inyi, kwasawuli uvafihile ndongwa tsino vanu vanya ntselo na nyala, nave ukavagubulye vana vadodo. Enaa! Kwasawuli ihi fyo ukaganile heve. 22Dada vangu andisile mbetse kudita finu fyeka. Kuduhu munu yoyuve yo amutsele Mwana ila Dade, na kuduhu yo amutsele Dade ila Mwana, na yula yo Mwana an'gana kumugubulila.” 23Kahi Yesu akavapituchilaje vadahitswa vake na kuvalonjela, “Aditilwe wuwuya na Mulungu munu yula yo angutsiwona ndongwa tsino tso mungutsiwona! 24Ntsinguvalonjela, valolaji wolofu na vantsajila viwiniwaga kufiwona fila fyo mungufiwona, lechelelo sivafiwene, na kaha viwiniwaga kuhulika fila fyo munhulika henye, lechelelo sivafihuliche.”
Muhwano gwa munu va ku Samaliya munya wugano
25Hambele akimaje mudahitsi va madahitso ga Musa akaganaga amujele Yesu, akamuwutsaje, “Mudahitsi, nditaje chinu chachi ili ntsiwupate wumi wowugaya wudugo?” 26Yesu akamuputsaje,
“Hounsoma malajitso ga Musa un'tsela chinu chachi?” 27Yula mudahitsi va malajitso ga Musa akamulonjelaje, “Umugane Mutwa Mulungu vako kwa numbula yako yeka, na kwa muhe gwako gweka, na kwa ludali lwako lweka, na kwa nyala tsako tseka, kaha, ‘Umugane na munu yoalihabehi na heve kota fyo ungigana heve.’ ” 28Yesu akamulonjelaje, “Ujibwe finofu! Udite hihyo, nave ukwikala finofu kota hila fyo an'gana Mulungu.” 29Lechelelo yula mudahitsi va malajitso ga Musa akaganaje kwilajila kuta mwene ana ntselo, ihyo akamuwutsaje Yesu, “Munu va habehi na heni yo nani?”
30Yesu akamujibulaje, “Munu yumwe avaga anhuma ku Yelusalemu am'bita ku Yeliko, mung'asi akitang'anaje na vawumiyani, vakamuwopolaje myenda, na vakamutovaje na kumuleka baho kuno alihabehi na kufwa.” 31Mutawula nambiko yumwe akalutilaje mung'asi yiyila, ho avaga kumuwona akamutyegaje na kukola kulubali. 32Kaha munu yumwe mutantsi va mutawula nambiko ho avaga anlutila hono iho, ho avaga kumuwona akamutyegaje na kukola kulubali. 33Lechelelo munu yumwe va inyi ya Samaliya ho avaga mulujendo, akafikaje hono hala hoali munu yula, ho avaga kumuwona akamuwonelaje lusungu. 34Akafikaje hoali munu yula, akamuhofukaje fikong'o fyake na kumubaka difwayi na mafuta, kaha akamuwopaje fitambala mufikong'o, akamukwinitsaje mu ntsove yake, akabitaje nayo mbaka mu nyumba ya kuvasa vajentsi ili vamutuntse. 35Hamilawu iyage akatolaje fipande fivili fya madini ga galama ngomi, akamupelaje yula munya nyumba ya vajentsi na kumulonjela, “Wendelele kumutuntsa munu yuno chochive chochikulutila honguva kuwuya ngukuhomba.” 36Kahi Yesu akaputsaje, “Fyo unhotsa heve hagati ha vanu iwo vadatu, nani munu yo vahabehi na yula yoatofilwe na vanu vala vawumiyani?” 37Yula mudahitsi va malajitso ga Musa akalongaje, “Yula yoamuwon'ye lusungu yo munu va habehi.” Yesu akamulonjelaje, “Na heve nave ubite ukadite hihyo.”
Yesu anguvajendela Malita na Maliyamu
38Yesu na vadahitswa vake hovavaga mulujendo, vakinjilaje mu chijiji chimwe cho ikalaga mudala yoanchemwa Malita, nayo akamulibulitsaje mu nyumba yake. 39Malita avaga na mung'olotse yo anchemwa Maliyamu, uyo Maliyamu avaga ikalise ha magulu ga Yesu kuno angumuhulikitsa. 40Lechelelo Malita atindilikaga na finu fyolofu, ihyo Malita akabitaje hoali Yesu na kumulonjela, “Mutwa! Mbe, sinambe ulole mung'olotsangu fyo andechye katsi tseka ntsi yena? Mulonjele atse anangilitse.”
41Lechelelo Mutwa akamulonjelaje, “Malita, Malita, untindilika kwa finu fyolofu, 42cho chin'ganika chinu chimwe duve, na Maliyamu ahagwe chinu chinofu, na chinu icho kuduhu munu yo afuluche amusukule.”
اکنون انتخاب شده:
Lukasi 10: SBV
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Sagala Language @The Word for The World International and Sagala Language translation. All rights reserved.