Lukasi 9
9
Yesu anguvatuma vala kumi na vavili
Matayo 10:5-15; Maliko 6:7-13
1Yesu akavachemaje hohamwe vatumi vala kumi na vavili, akavapelaje mamulaka na wuwetso wa kuhumya misoka jeka na kuponetsa matamwa. 2Kahi akavatumaje vabite vakavavikulile vanu ndongwa tsa Wuntsajila wa Mulungu na kuvaponetsa vatamwa. 3Akavalonjelaje, “Homukuva muli mulujendo mulekaje kutegula chochive, yive ng'weku, awu libeji, awu yive libumunda, awu magobole, na guve mwenda gwa kubadila. 4Kaye yoyive yomukulibulitswa mwikalaje baho mbaka ho mukuwuka ku muji ugo. 5Manyi vanu valeme kuvalibulitsa, muhumaje mu muji ugo, homukuva munhuma mukung'unaje lingundi kuvalajila kuta hetwe tulimuduhu kwa chochive chochikuvapata, ili viwukaje.” 6Duve vala kumi na vavili vakantsaje lujendo, vakakolelaje mufijiji kuno vanvikula Ndongwa Nofu tsa Mulungu na kuvaponetsa vatamwa chila hono.
Helode ankuva na muhwehwe
Matayo 14:1-12; Maliko 6:14-29
7Muntsajila Helode mutavala va Galilaya akahulikaje fila fyeka fyofihumye. Akavaje na mahotso molofu, kwasawuli kwavaga na vanu wovalongaga, Yohana mubatitsi atsilipuche. 8Lechelelo vamwe vatijilaga kuta Eliya atuhumye, na vamwe vakatijilaje kuta yumwe va valoli va katali va Mulungu akuva atsilipuche. 9Lechelelo Helode akalongaje hino, “Yohana ntsamukopwe kwa kumudumula mutwi. Lechelelo yuno yo nani yo ntsinhulika ndongwa tsake?” Akiwiniwaje kumuwona.
Yesu anguvalisa vanu Elufu tsihanu
Matayo 14:13-21; Maliko 6:30-44; Yohana 6:1-14
10Vala vatumi vavaga kuwuya, vakamulonjelaje Yesu finu fyeka fyovadisile. Yesu Akavategulaje na kubita nawo kwakifiha mbaka ku muji gwa Betisayida. 11Hala vanu wolofu vavaga kutsela koahele, vakamufwataje. Akavalibulitsaje na kulongana nawo Ndongwa tsa Wuntsajila wa Mulungu na akavaponetsaje veka wovaganaga kuponetswa matamwa gawo. 12Litsuva ho lyavaga linkwantsa kusota vala vatumi kumi na vavili vakabitaje kwa Yesu na kumulonjela, “Uvalaje vanu ili vabite kufijiji fya habehi na migunda, ili vakasache filyo na hono ha kuvasa, kwasawuli hano hotuli tuli ku mbuga.” 13Lechelelo Yesu akavajibulaje, “Muvapele henye filyo.” Nawo vakamulonjelaje, “Tunago mabumunda gahanu na somba tsivili duve. Awu tubite tukagule filyo fya kuvakwila vanu veka vano?” 14Vanu yo vavaga hono hala vavaga valume elufu tsihanu hino. Yesu akavalonjelaje vadahitswa vake, “Muvalonjele vanu vikale filundo filundo fya vanu hamusini hamusini.” 15Vadahitswa vakaditaje kota fyovalagitswe, vanu veka vakikalisaje. 16Kahi Yesu akategulaje mabumunda gahanu na somba tsivili, akagalamilaje kilanga na kumulumba Mulungu na kumutsumitsa na kugamegasa, akavapelaje vala vadahitswa vake nawo vakavapelaje vanu. 17Vanu veka vakalyaje na kiguta, nawo vatumi vakakong'asaje fila filyo fyofisije, vakamemyaje fitangula kumi na fivili.
Petulo angumutambula kuta Yesu yo Chilisito muhagulwa va Mulungu
Matayo 16:13-19; Maliko 8:27-29
18Siku yimwe Yesu avaga ansuka hono hawiyeka, na avavaga hamwe na vadahitswa vake nawo, Yesu akavaputsaje, “Mbe, vanu vanlonga kuta heni ntsili nani?” 19Vadahitswa vakamujibulaje, “Heve yo Yohana mubatitsaji, na vanji vanlonga kuta heve yo Eliya, na vamwe vanlonga kuta heve uliyumwe va valoli va Mulungu yo atsilipuche luhuma ko vafweye.” 20Yesu akavaputsaje, “Na henye nanye, munlonga kuta heni ntsi nani?” Petulo akamulonjelaje, “Heve yo Chilisito muhagulwa va Mulungu.”
Yesu anlonga hila fyo akukopolwa
Matayo 16:20-28; Maliko 8:30; 9:1
21Kaha Yesu akavafundaje valahogola kumulonjela munu yoyuve lulongwa ulo. 22Yesu akawilaje kuvalonjela, “Yin'ganika mwana va munu akodeche ndalahela na kukanwa na vavina va Chiyawudi na vavina va vatawula nambiko na vadahitsi va malajitso ga Musa. Nayo akuganika akopolwe, lechelelo siku ya kadatu akutsilipulwa.” 23Kahi akavalonjelaje vanu veka yo vavaga hono hala, “Munu yoyuve yo an'gana afwate heni an'ganika itsile mwene na afwate heni chila siku. 24Kwasawuli munu yo an'gana kuwukulusa wumi wake, akuwuyatsa, lechelelo munu yoyuve yo akuwuyatsa wumi wake kwasawuli ya heni, akuwukulusa. 25Mbe, munu akupata chinu chachi manyi apate ndongwa tseka tsa mu inyi, lechelelo hambele ananje wumi wake? 26Munu yoyuve yo akumbonela nyoni heni na madahitso gangu, nayo Mwana va Munu akumuwonela nyoni ho akutsa mu wumelemo wake na wumelemo wa Dade na wumelemo wa vatantsi vahagulwa va kilanga va Mulungu. 27Ntsinguvalonjela wukweli, kuna vamwe vimile baha sivakufwa mbaka vawuwone wuntsajila wa Mulungu.”
Yesu an'galuka kumiho
Matayo 17:1-8; Maliko 9:2-8
28Tsikavaje kulutila kota siku nane luhuma ho avaga kulonga ihyo, Yesu akavategulaje Petulo, na Yakobo na Yohana, akabitaje nawo kuchidunda kusala. 29Hoavaga ansuka, wuwoneko wake wa kumiho wukamelamaje tswee, na myenda jake jikamelemaje ndalahela. 30Luvala lulo vakavawonaje vanu vavili wovavaga Musa na Eliya, valonganaga nayo. 31Vanu iwo vawonekanaga na wumelemo, vavaga vanlongana na Yesu ndongwa tsa chifo chake chochikuhumila ku Yelusalemu. 32Petulo na vayage vavaga tulo sito, lechelelo hovakavaga kulamuka vakawuwonaje wumelemo wa Yesu na vala vanu vavili wovavaga vimile hamwe nayo. 33Vanu iwo Musa na Eliya hovavaga kuwuka, Petulo akamulonjelaje Yesu, “Mutwa, yika kuva finofu twikale hano, duve tutsenje fyuwo fidatu, chimwe cha heve, chimwe cha Musa na chimwe cha Eliya,” Lechelelo Petulo satselaga choanlonga. 34Petulo hoavaga anlonga ihyo, luvala lulo lifuluka likahumilaje na kuvagubikitsa, nawo vakawonaje muloto hala hovavaga kwinjila mwifuluka ilyo. 35Likahulikwaje litsi luhuma mwifuluka lila lyo lyalongaga, “Yuno yo mwanangu mwendi yo ntsimuhagwe, mumuhulikitse mwene.” 36Litsi ilyo lyavaga kulonga ihyo, vakamuwonaje Yesu asije aliyena. Vadahitswa vala vakaluvikaje lulongwa ulo munumbula tsawo, sivamulonje munu yoyuve lulongwa ulo lovaluwene.
Yesu angumuponetsa mukwamitsi munya lisoka
Matayo 17:14-18; Maliko 9:14-27
37Hamilawu iyage Yesu na vadahitswa vake hovavaga vankwika kuhuma kuchidunda, akitang'anaje na lilugu ikomi lya vanu. 38Munu yumwe ha lilugu lila lya vanu, akakolaje kutijila, “Mudahitsi, ntsingukugongola utse umulole mwanangu, mwene yo mwanangu va wiyeka. 39Kwasawuli lisoka limwinjilaga na kumudita ayove, na kaha limugwisaga chintsilisa, na kuno ahumaga lifulo kumulomo, ilyo lisoka limukodaga silimulekaga ndaya. 40Ntsivasusile vadahitswa vako valihetse ilyo lisoka vakalemwaje.” 41Yesu akavalonjelaje, “Henye chilelo chibi na chochigaya litumbilo! Ngikala na henye mbaka hanili iho ho mukunumbila?” Iho Yesu akamulonjelaje munu yula, “Mulete hano mwanago.” 42Hala mukwamitsi yula hoavaga am'bita kwa Yesu, lisoka lila likamugwisaje kwa chintsilisa. Lechelelo Yesu akaling'anulilaje, akamuponetsaje mukwamitsi yula, na kumupilula kwa dade. 43Vanu veka vakatinuswaje na wuvina wukomi wa Mulungu.
Yesu an'wila kulonga kuta akufwa
Matayo 17:22-23; Maliko 9:30-32
Vanu vala hovavaga vang'acha vali mumutinuso gwa ndongwa tsila tsadisile, Yesu akavalonjelaje vadahitswa vake, 44“munyulikitse finofu chonguvalonjela sambi. Mwana va Munu am'bita kuvikwa mu mawoko ga vanu.” 45Lechelelo vene vadahitswa sivatselaga chila cho alongaga Yesu. Lulongwa ulo lwavaga lwa lufiho ili valeche kulutsela, nawo vakogopaje kumuwutsa ndongwa tsa wulontsi ulo.
Nani yo akuva muvina
Matayo 18:1-5; Maliko 9:33-37
46Vadahitwa va Yesu vakatsaje kwisumwana vene kwa vene na kwiwutsa kuta nani yoakuva muvina hagati hetu. 47Lechelelo Yesu agatselaga mahotso gawo, nayo akamutolaje mwana na kumuvika habehi na mwene. 48Kaha akavalonjelaje, “Munu yoyuve yo akumwanuchila mwana kota yuno kwasawuli ya heni akuva antsanuche heni, na yoyuve yo antsanuche heni akuva amwanuche mwene yo anumile. Kwasawuli yula yo mudodo ndalahela hagati henyu, uyo yo muvina kulutila veka.”
Munu yo sinambe mutelane alihamwe na henye
Maliko 9:38-40
49Yohana akalongaje, “Mutwa, tumuwene munu anhetsa lisoka kwa litawa lyako, tukamulemetsaje kwasawuli mwene sialihamwe na hetwe.” 50Lechelelo Yesu akavalonjelaje, “Mulekaje kumulemetsa, kwasawuli munu yo sinambe mutelane alilubali lwenyu.”
Vanu va ku muji gwa Samaliya vanlema kumulibulitsa Yesu
51Chipindi cha Yesu kutegulwa kubita kilanga kwa Mulungu hochavaga chilihabehi, mwene akagwadilaje kubita ku Yelusalemu. 52Akavatumaje vanu vamulongole, nawo vakabitaje ku chijiji chimwe cha Samaliya, vamuvichile chang'ani chila chinu cho chin'ganika. 53Lechelelo vanyakaye va muji ugo vakalemaje kumulibulitsa kwasawuli vatselaga kuta am'bita ku Yelusalemu. 54Vadahitswa va Yesu, Yakobo na Yohana hovavaga kuwona ihyo, vakalongaje, “Mutwa, un'gana tusuche moto gwiche kuhuma kilanga ili guvalalitse?” 55Lechelelo Yesu akavapituchilaje vadahitswa vake na kuvang'anulila. 56Ihyo Yesu na vadahitswa vake vakabitaje ku chijiji chinji.
Hila fyo yin'ganika kuva mudahitswa va Yesu
Matayo 8:19-22
57Hovavaga valimulujendo, munu yumwe akamulonjelaje Yesu, “Ngukufwata kokuve koukubita.” 58Yesu akamulonjelaje, “Micheve jina malika, na fideje fina fifulila, lechelelo Mwana va Munu alihela hono ha kulambalika mutwi gwake.” 59Kahi Yesu akamulonjelaje munu yunji, “Ufwate heni.” Munu uyo akamulonjelaje Yesu, “Mutwa, undeche taha ngamutsiche dada vangu.” 60Yesu akamulonjelaje yula munu, “Valeche wovafweye vavatsiche vanu wovafweye, ila heve ubite ukawuvikule Wuntsajila wa Mulungu.” 61Munu yunji akamulonjelaje Yesu kuta, “Ngukufwata, lechelelo ntsinsuka undeche taha ngilaje kwa vanu va mukaye yangu.” 62Yesu akamulonjelaje, “Munu yoyuve yo anlima na kaha ampituka kumbele, uyo siakufwaya kuwuntsajila wa Mulungu.”
اکنون انتخاب شده:
Lukasi 9: SBV
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Sagala Language @The Word for The World International and Sagala Language translation. All rights reserved.