संत.लुकास 14
14
फरीसी आला ओड़ाअ रे ईसु
1आउर मुसिङ सथाअ हिला फरीसीकु रे, मियांड अगुवा आला ओड़ाअ रे ईसु जोजोम सेन नेनाय; तेकर होनाःड़े होड़कु ईसु नोकान जहान जहानेआय ची, हुनी तेङ रे दोस लगाव सकाईया, हुंकू हुनी आला घाईत नाम रे ताही नेनाकु। 2तेकर ईसु दुबाःड़े मियांड होड़ ताहिनाय हुनी आला तीः जांगा रे दाअः पेरेगो रअः चलते मोअ थिना, 3तेकर ईसु “कनहुन मोताबिक सथाअ हिला जाहें मियांड बेमार तरअः बेबेस उचित एदनाअ ची कोवान?” मेन केते धरम पुथी सि-सिखावकु हेतरअ फरीसीकु के कुली लिकुआय।
4बकिर हुंकू काकु साड़ी नेना। तेकर ईसु हुनी होड़ के छुवाँव केते, होना बेमार तरअः चंगा लियाय, हेतरअ कुलगोःड लियाय। 5#सं.मत्ती 12:11तेकर हुनी बेता लिकुआय, “आपे रे जाहें आली चेंगा चाहे उरीःग इन्दरा रे उयुअ जुनोआय होले हुनी सथाअ हिला हेके मेन केते, हिमीन रेगी एरे उड़ूंगीया एतान?”
6हुंकू नोःआँ कंहड़ी रेनअः एतान होः काकु कंहड़ी रूवाड़ दाड़ी लआ।
नमरता तेकर गुतियाकु आला सेवा-सुसार
7ईसु, गुतिया हीःग उनकु के दुड़ुगोः लःअय मुख-मुख ठाँव आंबलाव नेल केते, हुंकू के नोःआँ गाम रे कंहड़ीओ लिकुआय। 8#बेव 25:6,7“जाहें आम के बिहा रे राअः मेआय रेदो आम जामा तरअः मड़ांग रेनअः ठाँव रे, आलुम दुड़ूः कोओ, इदुपड़ी हुनी आम तरअः जादे माईन होड़ के राअः ओका तदियाय? 9तब आम हेतरअ नेवता एमा तदबेनाय, हुनी हीःग केते ‘आम के नोःआँ ठाँव रे नुई होड़ के दुड़ूः चाई मे’ बेता केमेआय। तेकर आम के लाज केते जामा तरअः पछली रे दुड़ूः हुयाव कोआ। 10बकिर आम के राअः मेआकु, दो जामा तरअः पछली रेनअः ठाँव रे सेन केते दुड़ूगोःमे, जब हुनी आम के राअः तदमेआय हिजोअ आय हिमीन रे, आम के ‘ए गाती मड़ांग हीःग केते, दुड़ुगोः मे’ बेता मेआय, होले आम लोः दुड़ुगोः कु, मड़ांग रे आम आला बड़ाई कोआ। 11#सं.मत्ती 23:12; सं.लुका 18:14एता लःअय ची जे अपन के बड़े मनाआय हुनी छोटे बनाव कोआय, तेकर जे अपने के छोटे मनाआय हुनी बड़े बनाव कोआय।”
12तेकर हुनी आएंग के राअः ताही लियाय हुनी के कंहड़ीओ लियाय, “आम केलवा रेनअः चाहे आयुःब रेनअः जोजोम लःअय भोज बनाय रेदोम गाती ताम चाहे बोको ताम चाहे खुड़-खिरकी तानकु के चाहे कुटुमकु चाहे हिना सोत तानकु गीरहतकु के आलुम राअः किकु, कोवान दो हुंकू होः राअः बदलीओ केमेआकु हेतरअ आम के बदली भेटाव कोआ। 13बकिर आम नेवता घोटो बनायाम दो, रांगेःगकु, लुलहा कु, लंगड़ाकु हेतरअ कानाकु के राअः कुमे,
14“होले आम धनया कोआम, एता लःअय ची हुंकू बदला एरकु एमा रूवाड़ दाड़ी मेआ। बकिर धरमीकु जिवीःड-बिरिडोआकु हिमीन रे नोःआँ कामी रेनअः बानी परमेसर आम के एमा केमेआय।”
बड़े नेवता घोटो रेनअः गाम
(संत.मत्ती 22:1–10)
15ईसु लोः घोटो जोजोमकु रे मिहोंड़ नोःआँ बात के आयुम केते, “धनया एदानिया हुनी जे परमेसर आला राईज रे घोटो जोमेआय,” बेता लियाय!
16ईसु हुनी के बेता लियाय, “जाहें होड़ बड़े नेवता घोटो एमा लिकुआय हेतरअ ढेर होड़ के नेवताव लिकुआय। 17तेकर घोटो तेयार नेना, हिमीन रे हुनी, ‘हिजोःपे, जामा सपड़ाव लआ एदनाअ,’ बेता कुमे मेन केते बंधाउवा ताय के नेवताव लिनकु दुबाःड़े कुलगोःड लियाय! 18बकिर जामाकु माफी कोय दाकु, ‘सुरू रिनी ओतीईङ किरिङ तदा। हेतरअ होना के सेन केते नेनेल एदनाअ ईङ के माफी ईङ मे; निआँ ईङ गोहराअ तनिङ’ बेता लियाय। 19तेकर एटाअ, ‘ईङ पाँच हार उरीःग किरिङ ताद कुईंग तेकर नेल आआटकर तोराईङा ईङ के माफी ईङ मे; निआँ ईङ गोहराव देमेईङ’ बेता लियाय। 20आउर मिहोंड़ एटाअ, ‘ईङ बिहा तानिङ हिना लःअय, काईङ सेन दाड़ी ताना’ बेता लियाय। 21हुनी बंधाउवा हीःग केते मुंवार ताय के नोःआँ के उदूः लियाय। तेकर हुनी मुंवार खीस केते बंधाउवा ताय के, ‘सहर रेनअः बजार हेतरअ खुड़ रे सेनमे हेतरअ रांगेःगकु, लुलहा कु, लंगड़ाकु हेतरअ काना कु के नोआँड़े आगु कुमे’ मेन केते बेता लियाय। 22बंधाउवा ताय, ‘ए गोमके, आम आचु ताही लिङाम लकान तदिङ, रे होः ठाँव एदनाअ’ बेता लियाय। 23तेकर गोमके बंधाउवा के, ‘बजार तेकर डिही रेनअः आखरी जगुत सेनमे हेतरअ गोहराव केते, ओड़ाअ तिंग पेपेरेःग लःअय होड़ कुके राअः आगु कुमे। 24ईङ कंहड़ीओ दिपीईङ हुंकू नेवताव केते राअः लिनकु होड़ ओके होः ईङ आला नेवता घोटो के एरकु चखाया’ मेन केते बंधाउवा ताय के बेता लियाय!”
चेला पड़ीयोः रेनअः किमाईत
(संत.मत्ती 10:37–38)
25तुन्दरा होड़कु ईसु लोः सेनोः केनाकु दो ईसु पछली लुड़ीःग केते, कंहड़ीओ लिकुआय, 26#सं.मत्ती 10:37“जेतना होड़ ईङ दुबाःड़े हिजोआकु, आउर अपन एंगा-आपा, अपन आउराईत आउर चेंगा, तेकर बोको-बोयहा, तेकर अपन जीव के होओ ईङ तरअः जादे पेयारेआय रेदो हुनी ईङ आली चेला एरे पाड़ी सकाअ। 27#सं.मत्ती 10:38; 16:24; सं.मर 8:34; सं.लुका 9:23आउर जे होड़ ईङ लःअय गोजोः जगुत अपन बिपाईत रुपी कुरूस गोअ केते ईङ के काय ओतोङिया दो हुनी ईङ आली चेला एरेकु पड़ीयोआ। 28आपे रे ओके हेके जे गुम्मट बा-बनाव चहाआय, तेकर ईङ दुबाःड़े पुपुरा लःअय खाखरचा लःअय एदनाअ ची कनोआँ मेन केते, पहिल रे दुड़ूः केते काय हिसाबेआ एतान। 29कोवान दो, हुनी नेव ला केते काय बनाव दाड़ी रेदो; जामा नेनेल कु हुनी के लन्दाः उकियाकु। 30‘नुई होड़ बनाव एहेःब लःअय, बकिर काय बनाव तेयार दाड़ी लआ मेन केआकु।’ 31चाहे ओके नोकान राजा एदानिया, जे एटाअ राजा लोः लड़ाअ लःअय सेनाय दो हुनी पहिल रे दुड़ूः केते, जे बीस हजार पलटन आगु केते ईङ तेङ रे झमपाः लःअय दराईया, दो ईङ दस हजार पलटन ईदी केते, हुनी के हाहाराव दाड़ी कियीङ ची एरोआ मेन केते काय बिचारेआ एतान। 32सवांग कनोआँ दो हुनी लंका रे तहिनोआय, हिमीन रेगी हुनी कंहड़ी सोसोदोर कु के, मेमेल लःअय कु-कुली कुलगोःड किकुआय। 33निआँ लकान आपे रे जे अपन जामा जिनीस के काय बाई रेदो, हुनी ईङ, आली चेला ऐरे पाड़ी दाड़ी योआ।”
सीठा बुलूङ
(संत.मत्ती 5:13; संत.मरकुस 9:50)
34“बुलूङ बेस एदनाअ, बकिर बुलूङ रेनअः सिबील सीठा जुनोः रेदो, फिन से एतान रे सिबील केआकु। 35होना ना दो ओत लःअय; चाहे माँईद रेनअः काम रे हिजोआ, होना केदो होड़कु बाहरी ते गिड़ी गुलताआकु। जेकर आ-आयुम लःअय लुतूर एदनाअ, हुंकू आयुम केपे।”
اکنون انتخاب شده:
संत.लुकास 14: ASR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0