संत.लुकास 15
15
आःड उनी भेंड़ा रेनअः गाम
(संत.मत्ती 18:12–14)
1 #
सं.लुका 5:29,30 जामा मालगुजारी ताइसलावकु तेकर पापीकु ईसु आला कंहड़ी आ-आयुम लःअय हुनी दुबाःड़े हिजोअ केनाकु, 2बकिर फरीसीकु हेतरअ धरम पुथी सि-सिखावकु, “नुई दो पापीकु लोः भेंट-घाटोआय हेतरअ हुंकू लोः जोम नुयाय मेन केते कुड़-कुड़ाअ तानाकु!” 3तेकर ईसु हुंकू के नोःआँ गाम उदूः लिकुआय,
4“आपे रे ओके आलकु मि साव भेंड़ा एदान कुआ?, तेकर हुंकू रे मियांड आःड जुनोः रेदोय, हुंकू निनानब्बे भेंड़ा के सुमसान टुंगरी रे बाई केते हुनी आःड उनी अनौरी भेटाअः जगुत काय दांड़ा बड़ाईया एतान? 5तेकर हुनी के नाम केते, मुरुक रिझते खांध ताय रे गोगीयाय, 6तेकर ओड़ाअ हीःग केते, गाती ताय तेकर अपन खुड़ रिनकु के राअः जुमाव केते, ‘ईङ लोः रिझोःपे। एता लःअय ची आःड उनी भेंड़ा तिंग के नाम आगु किदिंग बेता कुआय!’ 7ईङ आपे के सचे कंहड़ीओ दिपीईङ, निआँ लकान, सिरमा रे होः हुंकू निनानब्बे धरमीकु तरअः जेके मन फिराव रआ जरूरी कनोआँ बकिर मियांड पापी मन रूवाड़ेआय दो हुंकू तरअः जादे हुनी लःअय रिझ कोआकु।
आःड ओना रिचकी ढिबुवा रेनअः गाम
8“चाहे जाहें आउराईत दुबाःड़े चाँदी रेनअः दस गोड़ ठर्ड़रा ढिबुवा एदनाअ तेकर मियांड आःड जुनोआ होले? हुनी ढिबरी बराव केते काय नामेआ, तेकर ओड़ाअ के काय जोगेआ, आउर होना आनावरी का भेटाअः जगुत जुरजुट ते काय नाम बड़ाया एतान? 9तेकर होना के नाम केते, गाती ताय हेतरअ अपन खुड़ रिनकु के राअः जुमाव केते, ‘ईङ लोः रिझोःपे, ईङ होना आःड ओना चाँदी ढिबुवा के नाम किदिंग’ बेता कुआय! 10ईङ कंहड़ीओ दिपीईङ, निआँ लकान, मिहोंड़ मन रूवाड़ी पापी लःअय परमेसर आलकु सिरमादूत रीझोआकु।”
उड़ा-चली कोड़ा
11आउर गी ईसु कंहड़ी लःअय, “जाहें होड़ आलकिन बनहोंड़ बाबु ताय ताही नाकिन। 12हुंकिन रे छोटेई, ‘ए बाबा, जे धन-खुरजी एदनाअ होना रे ईङ आला हिसा के ईङ के एमाईङ मे’ बेता लियाय। हुनी आएंग आला धन-खुरजी के हाटिङोः लिकनाय। 13कटिःग दिन तयोम छोटे होपोन ताय जामा जिनीस जवार केते लंका एटाअ राईज सेनोः नाय, तेकर होंड़े भोग-बिलास रे, जामा धन-खुरजी के ओटांङ केदाय। 14जामा जिनीस के खरचा चबा केदाय, हिमीन रे होना राईज रे पुरा आकाल केदाय, हेतरअ हुनी लंगा-तंगअ नाय। 15हिना लःअय हुनी होना राईज रिनी मिहोंड़ होड़ दुबाःड़े कामी लःअय सेन नेनाय, तेकर हुनी अपन ओत रे सुकरी चराव कुलगोःड लियाय। 16तेकर हुनी सुकरी जोमे केनाकु हिना चोकअ के जोम केते लाहीःग बीयीङ सोंचाव केते, बकिर हुनी के ओके होः एतान होः काकु एमाई केना। 17तेकर हुनी के होस हीःग नेना हिमीन रे कंहड़ी तनाय, ‘बाबा तिंग ओड़ाअ रे ढेर ककामी कु के लाहीःग बियोः घोटो भेटाअः सेरे होः सारेःग जुनोआ, बकिर ईङ नोड़े रांगेःग ते गोजोः तानिङ! 18नहाअः दो ईङ बिरिःड केते बाबा तिंग दुबाःड़े सेनिङ, हेतरअ हुनी के बेतायींग ए बाबा, ईङ सिरमा रआ बिरुध आउर आम देखार रे पाप तदिङ। 19ईङ नहाअः दो आम आली होपोन कंहड़ीयोः लकान कनिङा; अपन मियांड ककामी कु लकान दोहोईङ मे बेतायींग’ मेन लःअय। 20तेकर हुनी बिरिःड केते आपाते दुबाःड़े तोराईया तेकर हुनी लंका रेगी ताहिनाय हिमीन रेगी आपाते हुनी के नेल केते सोग अदा लिया तेकर नीर सोदोर केते हांबु:ड लियाय हेतरअ चुमा लियाय। 21तेकर होपोन ते, ‘ए बाबा, ईङ सिरमा रआ बिरोध हेतरअ आम देखार रे पाप तदिङ। नहाअः दो ईङ आम आली होपोन कंहड़ीयोः लकान कनिङा’ बेता लियाय। 22बकिर आपाते बंधाउवा तायके कंहड़ीओ लिकुआय। ‘झट के जामा तरअः बढ़ियाँ से बढ़ियाँ गेन्दरअ नुई के सोलोंगोः ईपे तेकर तीः ताय रे मुदाम हेतरअ जांगा ताय रे खड़पा सोलोंगोः ईपे।’ 23तेकर मियांड मोटाव उनी बाछा के आगु केते पुजाईपे, तेकर आबु जोम केते रीझोः आबु! 24‘नुई बाबु तिंग गोएःग ताहिनाय फिन आउर जिवीःड रूवाड़ नाय, नुई आःड ताहिनाय नहाअः दो भेटाव नाय’ तेकर हुंकू जामा रीझोः तानाकु!
25“बकिर हुनी आली बड़े बाबु ताय ओत रे कामी सेन तहिनाय तेकर हुनी ओड़ाअ हेनाःड सोदोर नेनाय, दो सिसिरीङ ब-बजाव, आउर जाजतरा के आयुम लःअय। 26तेकर हुनी मिहोंड़ धाँगड़ के राअः केते, नोःआँ ‘एतानोः ताना’ मेन केते कुली लियाय। 27‘हुनी बोको ताम हीःग तनाय। तेकर बाबा ताम हुनी के बेस-बेस नाम तदियाय, हिना लःअय मियांड मोट बाछा के पुजाः ची तदकुआय बेता लियाय।’ 28हेतरअ दो, हुनी खीस नाय तेकर भीतरी काय बोल नाम केना; बकिर आपाते बाहरी उडुंग केते गोहराअ तनाय। 29तेकर हुनी आपा तेके कंहड़ी रूवाड़ोः लियाय, ‘नेलेमे, नुमिन बरीस तरअः आम लःअय बंधाउवा लकान कामी तानिङ, हेतरअ ओका हिला होः आम आला हुकूम के काईङ टलाव लआ सेरे होः। आम ईङ गाती तिंग लोः रीझोः! ईङ लःअय ओका हिला होः मियांड मेरोम छउना होः काम एमा लिङा? 30बकिर बाइसीकु लोः आम आला धन-खुरजी के उड़ाव चबा केदाय, हुनी बाबुतम हीःग नेनाय, हिमीन रे आम हुनी लःअय मोटाव उनी बाछा के पुजाः ची तदकुआम!’ 31आपाते हुनी के ‘ए बाबु, आम दो जामा बेरा ईङ लोः एदान मेआ, तेकर ईङ आला जामा जिनीस, आम आलागी हेके बेता लियाय। 32बकिर नहाअः रीझोः, हेतरअ खुसोअ चाही एता लःअय ची नुई बोको ताम आबु लःअय गोएःग उनी लकान ताहिनाय, हेतरअ जिवीःड नाय तेकर आःड ताहिनाय; हुनी फिन भेटाव नाय।’”
اکنون انتخاب شده:
संत.लुकास 15: ASR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0