संत.लुकास 8
8
पबितर आउराईतकु ईसु आला से-सेवा
1नोःआँ तयोम हुनी सहर-सहर तेकर डिही-डिही परचार याःते, हेतरअ परमेसर आला राईज रेनअः बेस खभाईर के सुनाव याःते दंड़ान केनाय। तेकर हुंकू बारह झन चेला हुनी लोः ताहिनाकु, 2#सं.मत्ती 27:55,56; सं.मर 15:40,41; सं.लुका 23:49हेतरअ हुंकू लोः आधा आउराईतकु होः ताहिनाकु जे गादुस आतमाकु तरअः हेतरअ जाईड़रा तरअः बेस लिनकु ताहिनाकु। हुंकू नुकू हेके मरियम जे मगदलिनी बेताई केनाकु, जेकर तरअः सात गोड़ मुवाँ आतमा उडुंग ताहिनाकु। 3तेकर हेरोद आली भंडारी खुजा आली आउराईत जोअना; हेतरअ सुसना, तेकर ढेर एटाअ आउराईतकु नुकू अपन धन-खुरजी तरअः ईसु तेकर चेलाकु के सेवाकु केनाकु।
बिहीन हेरोई आला गाम
(संत.मत्ती 13:1–9; संत.मरकुस 4:1–9)
4तेकर जे बेरा सहर-सहर रिनकु होड़ हुनी दुबाःड़े; मुरुक तुन्दरा जवार नेनाकु, दो हुनी गाम रे कंहड़ीओ कु केनाय।
5“मिहोंड़ बिहाईन हेरोई बिहीन हेरोः उडुंग नेनाय। हेरोः बेरा थोड़ेक होरा दौंड़ी नुर नेना, तेकर तिका सेरेःड केदाकु, हेतरअ सिरमा रिनकु, ओड़े होना के हलांग जोम केदाकु। 6थोड़ेक सेरेंग ओत रे नुर नेना, हेतरअ ओमोन नेना, बकिर हाल का भेटाव नेना लःअय रोहोड़ ना। 7थोड़ेक झुंड़ तलारे नुर नेना, हेतरअ झुंड़ गाती-गाती हरा केते तेपेःड केदाय। 8थोड़ेक बेस ओत रे नुर नेना; तेकर ओमोन केते साव गुना जो नेना।”
नोःआँ कंहड़ी केते, जेकर आ-आयुम लःअय, “लुतूर एदनाअ, हुंकू आयुम केपे,” मेन केते जोर से कंहड़ी लःअय।
गाम रेनअः माने
9हुनी आलकु चेलाकु ईसु के नोःआँ गाम रेनअः माने एतान हेके मेन केते कुली लियाकु, 10#जसा 6:9हुनी कंहड़ी लःअय, “आपे के परमेसर आला राईज रेनअः भेद रआ समझ एम लआ एदनाअ, बकिर एटाअकु के भेद के गाम रे उउदूः हुयाअः, जेकर से ची,
“हुंकू नेल केते होः आलकु नेल दाड़ी के,
हेतरअ आयुम केते होः आलकु समझाव कोओ।
बिहीन हेरोई आला गाम रेनअः माने
(संत.मत्ती 13:18–23; संत.मरकुस 4:13–20)
11“गाम रेनअः माने नोःआँ हेके बिहाईन परमेसर आला बचन हेके। 12होरा दौंड़ी उयुअ ओना बिहाईन हुंकू हेके; जे वचन आयुमेआकु, बकिर सैतान हीःग केते हुंकू आला मन तरअः वचन के हालांग ईदी गुल तआय, नोकान आलु हुयाव कोअ ची, हुंकू बिसवास केते उधार नामेकु। 13सेरेंग ओत रिनकु हुंकू हेके जे बेरा आयुमेआकु दो रिझते वचन के तेलायाकु, बकिर हुंकू आला मन रे वचन रअः जाईर का ताहिनोआँ चलते कटी दिरी लःअय बिसवासे आकु; तेकर परीकछा बेरा, बहकाव जुनोआकु। 14जे झुंड़ रे नुर नेना बिहीन हुंकू हेके, जे वचन के आयुमेआकु, बकिर मड़ांग सेन केते चिन्ता हेतरअ खरचा, तेकर जिनगी रेनअः रिझ-रंग रे दाअः जुनोआकु, तेकर मजगुतोअ जगुत काकु सोदोर दड़ीआ। 15बकिर बेस ओत रे नुर उना बिहीन हुंकू होड़ हेके जे वचन के आयुमेआकु, तेकर वचन के बेस आउर साफ मन रे आयुमेआकु तेकर मन रे थमभाव तआकु, आउर धीरज से जोअ आगुयाकु।
ढिबरी रेनअः गाम
(संत.मरकुस 4:21)
16 #
सं.मत्ती 5:15; सं.लुका 11:33 “जाहें ढिबरी बराव केते बसान रे काकु डबाया आउर ना खटिया लतार रे दोहो याकु। बकिर भीतरी बोलकु ईंजोत के नेलेकु मेन केते दिलखा रे दोहोयाकु। 17#सं.मत्ती 10:26; सं.लुका 12:2एता लःअय ची जामा ऊकु ओना दिसतार कोआ, आउर जे डबाव लआ एदनाअ होना होः मरसल रे ओटअ कोआ। 18#सं.मत्ती 25:29; सं.लुका 19:26हिना लःअय चौंचित ताहिन पे, ची आपे; एता लकान आयुमेआपे, एता लःअय ची जेकर दुबाःड़े एदनाअ हुनी के आउर एमा कियाकु, हेतरअ जेकर दुबाःड़े कनोआँ हुनी दुबाःड़े कटिको एदनाआ होना केहोः हुनी तरअः ईदी केआकु।”
ईसु आली आया तेकर बोको
(संत.मत्ती 12:46–50; संत.मरकुस 3:31–35)
19ईसु आली आया हेतरअ बोको ताय हुनी दुबाःड़े हीःग नेनाकु। बकिर तुन्दरा होड़ चलते हुनी लोः काकु भेटाव दाड़ी नेना। 20थोड़ेक होड़, “आम आली आया हेतरअ बोको ताम तिकु बाहरी रे तिंगु तानाकु आम लोः भेंटोः नाम तानाकु,” बेता लियाकु।
21तेकर ईसु “जे परमेसर आला बचन आयुमेआकु हेतरअ मनाआकु, हिंकु ईङ आलकु आया तेकर बोको हेके” कंहड़ी रूवाड़ोः लिकुआय।
ईसु गर्ड़रा के थथामभाव
(संत.मत्ती 8:23–27; संत.मरकुस 4:35–41)
22मुसिङ ईसु, तेकर चेला ताय डोंगा रे देःग नेनाकु तेकर दु आबु डाहा तरअः होना पखी सेनाबु बेता लिकुआय। तेकर चेलाकु डोंगा के राड़ा केते सोझाव नाकु। 23बकिर डोंगा चलाः केना हिमीन रे, हुनी निन्द नाय। डाहा रे गर्ड़रा बिरिःड ना, हेतरअ डोंगा रे दाअः बोलो पेरेगोः केना तेकर हुंकू डुबाअ लकानोः केनाकु 24हिमीन रे हुंकू हुनी दुबाःड़े सेन केते, बिरिःड लियाकु, तेकर “मलिक!, मलिक! आले डुबाव गोजोः तनाले बेता लियाकु!”
होले बिरिःड केते गर्ड़रा तेकर दाअः हालके गोः केना के डपटाव लःअय; हेतरअ होना जामा थामभाव ना, तेकर आसतीर ना। 25तेकर “आपे आला बिसवास ओकाःड़े ताहिना?” मेन केते हुंकू के बेता लिकुआय।
बकिर हुंकू ईसु तेकर हुनी आला सवांग तरअः बोरोः नाकु, हेतरअ छकित केते आकु-आकु, “नुई ओके हेके? जे गर्ड़रा हेतरअ दाअः केहोः आचुयाय, तेकर होना हुनी आला के मनाआ,” मेनोः तनाकु।
ईसु बाऊड़ाहा होड़ के छोड़ाव लियाय
(संत.मत्ती 8:28–34; संत.मरकुस 5:1–20)
26तेकर हुंकू डोंगा तरअः अड़गु केते गिरासेनियाँ राईज रे सोदोर नेनाकु, जे डाहा तरअः होना पखी गलील तरअः हेनाःड रे एदनाअ। 27जब ईसु ओत दौंड़ी रे अड़गु नेनाय, दो होना सहर रिनी मियांड बाऊड़ाहा होड़ हुनी लोः भेटाव नेनाय, जेकर रे मुवाँ आतमा ताही नेनाय। हुनी ढेर दिन तरअः झुला काय सोलोंगे केना तेकर ओड़ाअ रे काय ताहीनोः केना, बकिर मारघटा रे ताहिनोः केनाय। 28हुनी ईसु के नेल केते छेराव नेनाय, हेतरअ हुनी मड़ांग रे ऊयुअ केते, जोड़ से “ए परम परधान परमेसर, आली होपोन ईसु! ईङ के आम लोः एतान काम? ईङ आम लोः गोहरअ तानिङ, ईङ के दुख आलुम एमाईङ मेन लःअय!” 29एता लःअय ची हुनी असुध आतमा के हुनी होड़ तरअः ऊड़ुङोः लःअय आचुई केनाय। हुनी दो घड़ी-घड़ी हुनी होड़ के सबी केनाय, हिना लःअय हुनी के सिक्काड़ हेतरअ बिरी रे तोल ताई केनाकु, रे होः होना तोल लअः के टोटाअ गुल ताकेनाय, तेकर मुवाँ आतमा हुनी के बुरु रे ईदी केनाय।
30ईसु हुनी के, “आम आला एतान नुमू हेके?” मेन केते कुली लियाय। हुनी “पलटन” मेन लःअय। एता लःअय ची हुनी के ढेर मुवाँ आतमा सःब ताही लियाकु। 31“आले के अनथाह गहीड़ रे आलुम भेजाव केले,” मेन केते हुनी लोः गोहराव नेनाकु।
32होनाःड़े बुरु रे मुरुक बगरा मि गोहड़ा सुकरी चराअ केनाकु, हिना लःअय आले के हुंकू रे बोलोअ चिलेमे मेन केते हुनी लोः गोहराव नेनाकु, हुनी हुंकू के सेन ची लिकुआय। 33तेकर मुवाँ आतमा हुनी होड़ तरअः उडुंग केते सुकरी रे सेन बोलो नेनाकु। आउर हुंकू गोहड़ा ढेरंगा तरअः आगम जोड़ निरयाअते डाहा रे डेगाव नाकु आउर डुबाव गोएःग नाकु।
34नोकान हुयाव नेना के नेल केते चरवाहाकु नीर नाकु, हेतरअ सहर रे तेकर डिही रे सेन केते होना खभाईर के उदूः लअकु। 35तेकर होड़ जे हुयाव ताहीना के नेनेल उडुंग नेनाकु। तेकर ईसु दुबाःड़े हीःग केते, मुवाँ आतमा उडुंग ताहिनाकु हुनी होड़ के ईसु आला जांगा दुबाःड़े, गेन्दरअ सोलोंग ऊनी सिड़िग्या दुड़ूः ऊनी नेल केते; बोरोः नाकु। 36जे अपन मेःड तरअः नेनेल कु मुवाँ आतमा के सताव लिनी होड़, एता लकान छुटाव नेनाय के हुंकू के उदूः लिकुआकु। 37तेकर गिरासेनियाँ राईज हेनाःड तिनकु जामा होड़ आले दुबाःड़े तरअः सेनोः जुनोःमे मेन केते, ईसु लोः गोहराव नेनाकु। एता लःअय ची हुंकू मुरुक बोरो ताही नेनाकु। तेकर ईसु डोंगा रे रकाःब केते रूवाड़ोः तनाय। 38हिमीन रे जे होड़ तरअः मुवाँ आतमा उडुंग ताहिनाय, “हुनी ईङ के आम लोः ताहिः चाईङ मे,” मेन केते ईसु लोः गोहरअ तनाय।
बकिर ईसु हुनी के बिदा केते, 39“अपन ओड़ाअ रूवाड़ जुनोः मे तेकर परमेसर आम लःअय एतान लकान कामी लःअय होना के परचारेमे,” बेता लियाय।
हुनी सेन केते गोटा सहर रे, ईसु ईङ लःअय एतान बड़े-बड़े काम कामी लःअय होना जामा के उदूः लिकुआय।
याईर आली गोएःग माई तेकर मियांड बेमार उनी आउराईत
(संत.मत्ती 9:18–26; संत.मरकुस 5:21–43)
40जब ईसु गलील रूवाड़ नेनाय, हिमीन रे होड़कु हुनी लोः रिझ-रिझ भेटाव नेनाकु, एता लःअय ची जामाकु हुनी के नेल होराई केनाकु 41बिनती ओड़ाअ रिनी अगुवा याईर नुमू रिनी मियांड होड़ हिमने रे हीःग नेनाय; तेकर ईसु आला जांगा दुबा रे उयुअ केते, “ईङ आला ओड़ाअ दु,” मेन केते गोहरअ तनाय, 42हुनी आली मियांड ठुका माई ताय बारा बरीस रिनी ताहिनाय, तेकर हुनी गोजोः लकान ताहिनाय।
तेकर ईसु सेनोः केनाय हिमीन रे होड़ हुनी तेङ रे तुन्दरायोः केनाकु। 43तुन्दरा रे मियांड आउराईत आला बारा बरीस तरअः मयोम तुयोअ केना। हुनी आएंग आला जिवीडोः होना के बाईधकु के एमा चबा लिकुआय, रे होः ओके होः काकु बेस दाड़ी ताही लिया। 44हुनी पछली तरअः हीःग केते ईसु आला गेन्दरअ रअः आँचड़अ के छुवाँव लःअय, तेकर तुरते हुनी आला मयोम तुयोः केना होना अटकाव ना। 45ईसु, “ओके छुवाँव लिङाय?” मेन केते कुली लिकुआय।
जामाकु आबः उबूः बड़ान तानाकु, हिमीन रे पतरस, “ए मलिक, आम के दो तुन्दरा होड़ धाकियाव देमेआकु हेतरअ आम तेङ रे बंबड़ायोः तानाकु,” बेता लियाकु।
46बकिर जाहें ईङ के छुवाँव लिङाकु, “ईङ तरअः सवांग उडुंग ताना, ईङ अटकार लिईङ,” बेता लिकुआय। 47नोःआँ नेल केते ची ईङ काईङ उकुयोःतना, हुनी आउराईत एकला-योःते हीःग नेनाय, तेकर ईसु आला जांगा रे नुर केते एतान चलते छुवाँव लिमीईंग तेकर हिमने रे छुटाव नाय, के जामा होड़ मड़ांग रे उदूः लःअय। 48तेकर ईसु, “ए माई, बिसवास ताम रे छुटाव तनाम। जु सानती से सेनोः जुनोःमे,” बेता लियाय।
49हुनी कंहड़ी केनाय गी, ची हिमाने रे बिनती ओड़ाअ रिनी अगुवा आला ओड़ाअ तरअः जाहें मिहोंड़ हीःग केते, “माई ताम गोएःग नाय,” नहाअः दो “आम गुरू के दुख आलुम एमाई,” मेन लःअय।
50ईसु नोकान आयुम केते, याईर के “आलुम बोरोयोः; सिरीफ बिसवास एकला दोहोयमे, होले हुनी बंचाव कोआय,” बेता लियाय।
51हुनी ओड़ाअ हीःग केते, हुनी पतरस, जोहन याकुब हेतरअ कुड़ी आलकिन एंगा-आपा के बाई केते, ओके केहोः आएंग लोः भीतरी काय बोलोअ चिलकुआ। 52जामेकु हुनी कुड़ी लःअय हदियाव केते ईयामे केनाकु, बकिर हुनी, “आलपे ईयामे; हुनी काय गोएःग ताना बकिर निन्दोः तनाय!,” बेता लिकुआय।
53तेकर हुंकू नुई गोएःग नाय के पाड़ी केते, ईसु के ठठ्ठाः दियाकु। 54बकिर कुड़ी आला तीः सःब केते “ए माई बिरिःड मे,” मेन केते हकाव लियाय! 55तेकर हुनी आला जीव रूवाड़ नेना, हेतरअ तुरते बिरिःड दुड़ूः नाय। तेकर ईसु जोजोम लःअय जहान एमाईपे मेन केते आचु लिकुआय। 56हुनी आलकिन आया-बाबा छकित नेनाकिन, बकिर ईसु जे हुयाव नेना के ओके केहोः आलपे उदूः किकु मेन केते चेताव लिकनाय।
اکنون انتخاب شده:
संत.लुकास 8: ASR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0