संत.लुकास 9
9
चेलाकु के कुलगोःड लिकुआय
(संत.मत्ती 10:5–15; संत.मरकुस 6:7–13)
1तेकर ईसु बारहों चेला ताय के राअः जुमाव केते जामा मुवाँ आतमाकु के जोजोला रेनअः हेतरअ बेमार उनकु के बेबेस लःअय हक तेकर सवांग एमा लिकुआय। 2तेकर हुनी परमेसर आला राईज रेनअः खभाईर प-परचार हेतरअ जाईड़रा उनकु के चचंगा लःअय चेलाकु के कुलगोःड लिकुआय, 3तेकर हुनी हुंकू के बेता लिकुआय, “होरा लःअय एतान होः आलपे ईदी के ना हापा, ना बाटुवा, ना लाःड, ना ढिबुवा-पाईसा आउर ना सोलोंग लआ तरअः एटाअ कुड़ताः 4जे ओड़ाअ रे सोवागत पेआकु, जब तक होना ठाँव तरअः कापे सेनोः जुनोः जगुत हिना ओड़ाअ रे ताहिनापे; 5#प्रे.कामी 13:51#सं.लुका 10:4–11जे ठाँव रेनकु आपे के काकु सोवागत पेआ रे दो, होनाःड़े आलपे तहिकोओ, तेकर हुंकू होड़ के रे साबुत लःअय डिही तरअः उड़ूंगोः बेरा, आपे आला तरवा रेनअः धुड़ी के कुटाअ तुपे।”
6तेकर बारहों चेला उडुंग केते बेस खभाईर सुनाव याःते, तेकर गोटे तानकु के चंगायाःते डिही-डिही दांड़ा-बड़ान केनाकु।
हेरोदेस आला आकबकाअ
(संत.मत्ती 14:1–12; संत.मरकुस 6:14–29)
7 #
सं.मत्ती 16:14; सं.मर 8:28; सं.लुका 9:19 गलील रिनी राजपाल हेरोद, ईसु कामी लआ जेतना के आयुम केते, हेतरअ हेरोद बनहोंड़ जोहन बतिस्मा एमोई गोएःग उनकु रे जिवीःड बिरिःड तनाय मेनोः केनाकु, लःअय घबराव नाय। 8तेकर मिहोंड़-बनहोंड़ इलियस आगमजानी देखार तनाय, तेकर एटाअकु पुरखा रिनकु बेस खभाईर एमोअ कु रे मिहोंड़ जिवीःड बिरिःड तनाय मेनोः केनाकु 9बकिर हेरोद कंहड़ी लःअय, “जोहन आला बोहोअ मांअ खांड़ाः ची थिलकुईङ; आउर नेदराम हुनी बारे नोकान बात आयुम दिंग नुई ओके हेके?” मेन केते हेरोदेस ईसु के नेनेल नाम तनाय।
ईसु ढेर होड़कु के खियाव लिकुआय
(संत.मत्ती 14:13–21; संत.मरकुस 6:30–44; संत.जोहन 6:1–14)
10प्रेरित रूवाड़ हीःग केते जे कामी ताही लअकु होना जामा के ईसु के उदूः लियाकु, तेकर हुंकू के हिगाड़ केते, बैतसैदा सहर ते ईदी लिकुआय। 11बकिर तुन्दरा होड़ नोःआँ बात के पाड़ी केते ओतोङ ईदी लियाकु। तेकर रिझ-रिझ हुंकू लोः भेंट नेनाय, हेतरअ परमेसर आला राईज रेनअः कंहड़ी उदूः लिकुआय। तेकर जे बेसोः नाम केनाकु के बेस लिकुआय।
12तेकर बोंगा हासुरोः केना, हिमीन रे बारहों चेला हीःग केते बेता लियाकु, “नुकू तुन्दरा होड़ के कुलगोःड कुमे हेनाःड तअः डिही हेतरअ टोला रे सेन केते ताहिनोआकु हेतरअ जोजोम लःअय नामेआकु, एता लःअय ची आबु नोआँड़े रिड़िगया ठाँव रे एदानबुआ।”
13हुनी हुंकू के, “आपे गी नुकू के जोजोम लःअय एमा कुपे” बेता लिकुआय।
हुंकू बेता लियाकु “आले नुकू जामा होड़ जोजोम लःअय सेन केते काले किरिङ आगुया होले एरे हुयाअः। आले दुबाःड़े दो पाँच गोड़ लाःड हेतरअ बरिया हाकु भाईर एदान किना।” 14होनाःड़े पाँच हजार लकान दो हेरेल एकला गी ताही नेनाकु।
तेकर हुनी हुंकू के, “पचास-पचास केते धाईर-धाईर दुड़ूः कुपे” मेन केते चेला ताय के बेता लिकुआय।
15हुंकू हेकानगी लअकु तेकर जामा के दुड़ूः किद कुआकु, 16तेकर हुनी होना पाँच गोड़ लाःड हेतरअ बरिया हाकु के ईदी लिकुआय। सिरमा ते नेल केते धन्यवाद एम लःअय, हेतरअ हुंकू के हाटिङेआकु लःअय, चेला ताय के केचाअ-केचाअ एमा ईदी लिकुआय। 17तेकर जामाकु जोम केते बी नेनाकु, हेतरअ चेला ताय सारेःग ओना केचाअ लाःड के बारह दाऊड़ा हलांग लअकु।
ईसु गी ख्रीस्त हेके जे बबनचवी हेके
(संत.मत्ती 16:13–20; संत.मरकुस 8:27–30)
18ईसु एकले बिनती केनाय, हिमीन रे चेला ताय होः हुनी दुबाःड़े हीःग नेनाकु। हिमीन रे “होड़कु ईङ बारे एतान मेन गेआकु ची ईङ ओके हेके?” मेन केते हुंकू के कुली लिकुआय।
19 #
सं.मत्ती 14:1,2; सं.मर 6:14,15; सं.लुका 9:7,8 हुंकू बेता लियाकु “जोहन बतिस्मा एमोई, हेतरअ जाहें-जाहें इलियस, आउर एटाअकु दो पुरखा रिनकु आगमजानीकु रे मिहोंड़ जिवीःड बिरिःड तनाय मेन गेआकु।”
20 #
सं.जोह 6:68,69 “बकिर आपे ईङ के ओके हेके मेन गेआपे?” मेन केते हुनी कुली लिकुआय।
पतरस कंहड़ी रूवाड़ोः लियाय, “आम परमेसर आली ख्रीस्त हेके जे परमेसर तरअः आबु के बाबनचव लःअय कुलगोःड लिनी हेके।”
आएंग गोजोः बारे ईसु उदूः लिकुआय
(संत.मत्ती 16:20–28; संत.मरकुस 8:31—9:1)
21नोःआँ बात के ओके केहोः आलपे उदूः किकु, मेन केते चेतावनी एमा केते हुकूम एमा लिकुआय।
22तेकर ईसु चेलाकु के कंहड़ी लःअय, “होड़ होपोन पुरा बिपाईत सहाव केआय हेतरअ अगुवाकु, महापुरोहितकु, तेकर धरम पुथी सि-सिखावकु हुनी के तुछ कियाकु। होना तयोम गोएःग कियाकु, हेतरअ पे रोज तयोम जिवीःड बिरिःड कोआय।”
23 #
सं.मत्ती 10:38; सं.लुका 14:27 हुनी जामाकु के नोकान कंहड़ीओ लिकुआय, “जेतना होड़ ईङ के ओ-ओतोंग नामापे, दो गोजोः जगुत रोज आएंग आला बिपाईत रुपी कुरूस उठाव केते, ओतोङिङ पे। 24#सं.मत्ती 10:39; सं.लुका 17:33; सं.जोह 12:25एता लःअय ची जे आएंग आला जीव बा-बंचाव नामाय, हुनी पहिल रे होना के आःड केआय, बकिर जे ईङ लःअय जीव तायके आडेआय, हुनी बंचाव केआय। 25जदि होड़ गोटा दुनिया के नामेआय तेकर आएंग अपन जीव के आडेआय आउर नासेआय, दो होड़ के एतान फयदा कोआ? 26जे ईङ के तेकर ईङ आला कंहड़ी रे लाजोआय, हुनी के होड़ होपोन होः जे बेरा आएंग हेतरअ आपाते आला तेकर पबितर सिरमादूतकु आला महिमा लोः हिजोआय दो हुंकू तरअः लाज कोआय। 27ईङ सथेगी कंहड़ीओ दिपीईङ, नोआँड़े तिंगु तानाकु जे परमेसर आला राईज के अनौरी नेले जगुत इरकु गोजोआ।”
ईसु आला भेस बदलावना
(संत.मत्ती 17:1–8; संत.मरकुस 9:2–8)
28नोःआँ कंहड़ी रेनअः मि हपता तयोम लकान, पतरस, जोहन हेतरअ याकुब के आएंग लोः ईदी केते बि-बिनती लःअय बुरु ते रकाःब नेनाय। 29तेकर हुनी बिनती केनाय, हिमीन रे हुनी आला मेःड मुहांड़ बदलाव ना, हेतरअ गेन्दरअ ताय पुँड़ी केते लवकाः ताना। 30हेतरअ नेलेपे बनहोंड़, मुसा तेकर इलियस हुनी लोः बाते केनाकिन। 31हुंकिन महिमा संहित देखार नेनाकिन हेतरअ जिरोसलेम रे ईसु गोजोः रेनअः पुरायोः रआ बारे कंहड़ी केनाकिन। 32पतरस हेतरअ गाती ताय निन्द रे भराव थिनाकु, जे बेरा बेस केन बिरिःड फारीयाव नेनाकु दो ईसु आला महिमा तेकर हुनी लोः हुंकिन बनहोंड़ के तिंगु ऊनकिन नेल लिकनाकु 33जाइसने हुंकिन हुनी दुबाःड़े तरअः सेनोः केनाकिन, हिमीन रे पतरस, “ए गोमके, आबु के निआँड़े तहीनोः बढ़ियाँआ, पेया तंबू बनाव चालेमे, आम लःअय मियांड, तेकर मुसा लःअय, हेतरअ मियांड इलियस लःअय” मेन केते ईसु के बेता लियाय। हुनी एतान कंहड़ी तनाय के काय पाड़ी केना।
34नोःआँ कंहड़ी केनाय गी, हिमीन रे मियांड रिम्बिल हीःग केते डबाव कुकेनाय; दो हुंकू बोरोः नाकु। 35#जसा 42:1; सं.मत्ती 3:17; 12:18; सं.मर 1:11; सं.लुका 3:22#2 पत 1:17,18तेकर “नुई ईङ आली होपोन, हेतरअ ईङ निबाड़ लिनी हेके नुई आला आयुमेपे!” मेन केते रिम्बिल तरअः जोड़ से साड़ी हीःग नेना।
36तेकर नोकान साड़ी चुकाव नेना, दो ईसु के एकले नाम लियाकु। तेकर हुंकू काकु साड़ी नेना हेतरअ जे नेल थिलआकु के होना हिला ओके केहोः एतान होः काकु उदूः लिकुआ।
ईसु मुवाँ आतमा सःब लिनी चेंगा के छोड़ाव लियाय
(संत.मत्ती 17:14–18; संत.मरकुस 9:14–27)
37दोसरा हिला ईसु तेकर हुनी आलकु पेया चेला बुरु तरअः अड़गु नेनाकु, दो मुरुक तुन्दरा होड़ ईसु लोः भेटोः हीःग नेनाकु। 38तुन्दरा होड़ तरअः मिहोंड़ गुल केते कंहड़ी लःअय, “ए गुरू! ईङ आम तरअः गोहरअ तानिङ, होपोन तिंग के किरपाई मे, हुनी मियांड ठुकाआय! 39तेकर नेलीमे मियांड मुवाँ आतमा हुनी के साबीयाय, हेतरअ हुनी अचाका छेराव बिरिडोआय, आउर मुवाँ आतमा हुनी के नोकान आईंठाईयाय, ची आहा ताय तरअः बोटोयाय; आउर पटकाव केते बड़ेत के आड़ागीयाय! 40हुनी के उड़ूंगीपे मेन केते चेला ताम तरअः गोहराव निनिंग, बकिर हुंकू काकु छोड़ाव दाड़ी लिया।”
41तेकर ईसु, “ए, अबिसवासीकु! हेतरअ भटकाव ओनकु होड़? उकिन हिला जगुत आपे लोः ताहिनोः ईङ तेकर सहाईङ? आउर आपा तेके, होपोन ताम के ईङ दुबाःड़े आगुय मे,” मेन केते बेता लियाय।
42हुनी चेंगा हिजोअ केनाय, हिमीन रेगी मुवाँ आतमा हुनी के जकड़ाव केते आँईठाव केते पटकाव लियाय। बकिर ईसु हुनी असुध आतमा के डपटाव लियाय, हेतरअ नांव छठिया कोड़ा के बेस केते, आपा तेके जिमा लियाय। 43तेकर जामा होड़ परमेसर आला बड़े समरथ तरअः छकित नाकु।
आएंग आला गोजोः बारे दोबारा कंहड़ी
(संत.मत्ती 17:22–23; संत.मरकुस 9:30,32)
तेकर जामाकु ईसु जे कामी केनाय होना के नेल केते छकित ताही नेनाकु, हिमीन रे ईसु चेला ताय के बेता लिकुआय।
44“नोःआँ कंहड़ी के आपे बेस केन लुतूर रे दोहो तापे, मनवा होपोन के दो होड़कु आला तीः रे सःब चिकियाकु।” 45बकिर नोःआँ कंहड़ी के काकु अरखाव नेना। तेकर हुंकू नोःआँ बात के काकु बुझाव नेना होना हुंकू तरअः उकु ताहिनेना। तेकर हुंकू नोःआँ कंहड़ी के ईसु तरअः कुकुली बोर केनाकु।
जामा तरअः बड़े ओके?
(संत.मत्ती 18:1–5; संत.मरकुस 9:33–37)
46 #
सं.लुका 22:24
मुसिङ नोकान नेना ची ईसु आलकु चेलाकु रे आबु मेसे ओके बड़ेआय मेन केते आकु-आकु रे झमेलअ ना। 47बकिर ईसु हुंकू आला मन रेनअः सोंच के पाड़ी केते, मियांड चेंगा के ईदी केते, आएंग दुबाःड़े तिंगु लियाय, 48#सं.मत्ती 10:40; सं.लुका 10:16; सं.जोह 13:20तेकर हुनी, “जे नुई छोटे चेंगा के ईङ आला नुमू रे गरहानिंङाय, हुनी ईङ के गरहानिंङाय; तेकर जे ईङ के गरहानिंङाय, हुनी ईङ के भेभेजावी परमेसर के होः गरहानिंङाय। हिना लःअय आपे जामाकु रे जे जामाकु तरअः छोटेआय हिनी बड़ेआय” बेता लिकुआय।
जे बिरोध रे कनियाँ हुनी आबु पखी आय
(संत.मरकुस 9:38–40)
49तेकर जोहन ईसु के, “ए गुरू, आले मिहोंड़ होड़ के आम आला नुमू रे मुवाँ आतमाकु के उ-ऊड़ूङ नेल लियाले, तेकर आले हुनी के बधराई केनाले एता लःअय ची हुनी आबु लोः काय गतियोः केना।” बेता लियाय।
50ईसु हुंकू के, “हुनी के आलपे बधराई,” “जे आपे आला बिरोध रे कनियाँ हुनी आपे पखा आय” बेता लिकुआय।
सामरी रिनकु होड़ ईसु के काकु गरहन लिया
51जब ईसु के सिरमा रकाबोः रेनअः दिन सोदोरोः बेरा, हुनी जिरोसलेम सेनोः लःअय मन ताय के केटेःग लःअय। 52हुनी आएंग तरअः मड़ांग खखाभाईर कु के कुलगोःड लिकुआय, हुंकू सेन केते हुनी लःअय सरा जामा लःअय समारिया रिनकु आला मियांड डिही रे सेन नेनाकु। 53बकिर हुनी समारिया तरअः जिरोसलेम सेनोः केनाय, हिना लःअय हुंकू काकु बोलोअ चिलिया। 54#2 राजा 1:9–16नोकान नेल केते हुनी आलकिन चेला याकुब हेतरअ जोहन, “ए परभु, आम चहाआम होले सिरमा तरअः सेंगेल नुर केते हुंकू के नसोअ लःअय आचुयालिङ एतान?” बेता लियाकिन।
55बकिर हुनी उलटाव केते डपटाव लिकनाय हेतरअ “#9:55 जे ईसु कंहड़ी तदाय होना मारी पुथी रे कनोआँ।आबेन एता लकान आतमा रेनबेन हेके सेके काबेन पड़ीआ होड़कु आला जीव के गोगोएःग लःअय कोवान बकिर बा-बंचाव लःअय मनवा होपोन हीःग तनाय,” बेता लिकनाय। 56तेकर हुंकू एटाअ डिही रे सेन नेनाकु।
ईसु आलकु चेलायोः रेनअः माने
(संत.मत्ती 8:19–22)
57तेकर हुंकू होरा रे सेनोः केनाकु, हिमीन रे मिहोंड़ ईसु के, “आम जाने सेनाम ताने ओतोङ मेईङ” बेता लियाय।
58तेकर ईसु, “हुंर्ड़राकु आला दो अपन लात, तेकर सिरमा रिनकु ओड़े आला होः आकु आला खोता ताहिनोआँ, बकिर मनवा होपोन लःअय दो ताहिनोअ लःअय अपन आला बोहोअ दोहो लःअय होः ठाँव कनोआँ” कंहड़ी रूवाड़ लःअय।
59तेकर हुनी, एटाअ होड़ के “ईङ के ओतोंङिङ मे” बेता लियाय।
तब हुनी होड़, “हे परभु, पहिल रे सेन चाईङमे ची अपन बाबा के गाड़अ तुयीङ।”
60बकिर ईसु, “गोएःग उनकु के अपन मुरदा तेपेःड चाकुपे। बकिर आम सेन केते परमेसर आला राईज रेनअः कथा उदूः गेमे” मेन केते हुनी के बेता लियाय।
61 #
1 राजा 19:20
आउर मियांड एटाअ होः, “ए परभु, ईङ आम के ओतोङ मिईङ, बकिर पहिल रे ओड़ाअ रिनकु तरअः सेन केते बिदाअ चाईङ केमे” बेता लियाय।
62ईसु, “जाहें होः सियोअ बेरा नहेल रआ चाईन्दला रे तीः दोहो केते पछली लुड़ीगेआय हुनी परमेसर आला राईज जुकूर कनियाँ” बेता लियाय।
اکنون انتخاب شده:
संत.लुकास 9: ASR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0