लुका 23
23
रोमी राजपाल पिलातुस ठँव रे ईसु
(मती 7:1,2,11–14; मरकुस 15:1–5; जोहन 18:28–38)
1सभा रेनकु गोटे होड़ बिरीड् कनते ईसु रोमी राजपाल पिलातुस एडे इदी लिदियाकु, 2“आले नुई गोटे जाइत बहकाव जोटोः रोमी महाराजा कयसर तआ मलगुजारी अलो एमे तआ बा-बरजाव जोटोः अपन अप मसी राजा कथाय अयुम तदियाले, हुँकू नोंका कथा केते हुँनि रआ दोस लगाव लआकु।”
3पिलातुस हुँनि सोधव लअय, “चिताना अमः जहुदीकु रेनि राजा हके?”
ईसु हुँकूइ कथा रुवड़वा लआ, “अमः खुद ही कथायतेअम।”
4हेनते पिलातुस मुध पुरोहित जोटोः होड़कुइ कथावा लआ, “इञः नुई होड़ एडे चितान दोस हों कइञ ञमलआ।” 5बकिन जोटोः जोड़ केते कथा लआकु, “नुई गलील एतेन नोंडे हमिज् गोटा जहुदिया रे उपनीत कथा-कथाते होड़कुइ भरमावाँ।”
6नोआँ अयुम केते पिलातुस सोधाव लिड्कुअय, “चिताना नुई होड़ गलील रेनि हके?” 7जोटोः हुँनि हेरोदेस राइज रआ हाक पहटा रेनि हके नोआँ ठुवा केते हुँनि हेरोद एडेकु बिदा लिदिया, चितानतआचि हुँनि होना बेरा जेरुसलेम रे दोहोलेनय।
हेरोदेस ठँव रे ईसु
8हेरोद ईसु ञेल केते अगम खुस लेनय, चितानतआचि अगम रोज एतेन हुँनि ञेले तअय चहावओन दोहोना; चितानतआचि हुँनि रआ बारे अयुम दोहोलअय, जोटोः चिन ञेल तअय असरा रे दोहोना। 9हुँनि अगम ईसु सवाल इञोःवा लिदियय, बकिन ईसु चितानहों काय कथा रुवड़वा लिदिया। 10मुध पुरोहित जोटोः धरम पोथी ठुवाकु जबार जस ईसु तेङ रे दोस लगाव इञोःना। 11हिना एतेन हेरोद अनेज् सिपाहीकु तुली हुँनि मजाकवा लिदियाकु जोटोः हुँनि रआ बेमाइन केते महंगा गेंदराः होड़हड् केते हुँनि पिलातुस एडेकु रुवाड़ लिदिया। 12हिना हिला पिलातुस जोटोः हेरोद गति पड़ी यनाकिन; होना एतेन पहिल एक दोसरा रेनकिन बिरोधी दोहो लेनाकीन।
ईसु रआ गोजी डन्ड
(मती 27:15–26; मरकुस 15:6–15; जोहन 18:39—19:16)
13पिलातुस मुध पुरोहित जोटोः धरमी नेताकु हेनते होड़कु राअ् केते हुँकू कथावा लअय, 14“आपे नुई होड़ होड़कु बहकाव अवला हके मेनकेते इञः एडेपे अगु तदिया, जोटोः ञेलेपे इञः आपे रआ ठँव रे हुँनिञ परखाव लिदिया बकिन जे दुखमा रआ आपे हुँनि दोस यतियापे होना दुखमा रआ बारे इञः हुँनि एडे चितान दोस हों कइञ ञमलआ। 15न हेरोद ञम लअय चितानतआचि ईसु इञः एडे रुवाड़ लिदियय जोटोः ञेलेमी हुँनि गोजे लेका चितानहों काय काम तड्आ। 16हिनाते इञः हुँनि कोड़रा ते एर हुमाः केते बयेया।” 17#23:17 अती ते ओल लआ पहिल रआ बाही रे नोंका कोनाआँ पसका परब रे पिलातुस मियड् जेहेल लेनी जहुदीकु तआ बाय यति दोहोलेनय।
18हेनते गोटे जठा कोते घोल बिरीड् नाकु, “नुई गोजेमी जोटोः आले तआ बरअब्बा बयेमी!” 19बरअब्बा सहर रे सरकार रआ बिरोद जोटोः होड़ गो-गोज् रआ चलते जेहेल रे सीञ दोहोलिदियय।
20बकिन पिलातुस दो ईसु बयी रआ हिछा ते फिन होड़कुइ समझाव लआ। 21बकिन हुँकू हकाव केते कथा लआकु, “मुनि कुरुस रे रकाबी, कुरुस रे!”
22पिलातुस तीसरा खेप हुँकूइ कथावा लआ, “चितान तआ, हुँनि चितानय बुराइ तड्आ? जे इञः हुँनि रे गोजे लाइक चितान दुखमा हों कइञ ञमतड्आ। हिनाते हुँनि कोड़रा ते एर हुमाः केतेञ बय एंडाया।”
23बकिन हकाव-हकाव ते पीछा रे पड़ाव यनाकु चि हुँनि कुरुस रे रकाबी, जोटोः हुँकू रआ हा-हाकाव जिताव याना। 24तब पिलातुस हुँकू रआ कोय मोताबिक हुकुम एम लअय। 25जोटोः हुँनि होड़ जे सरकार रआ खिलाप रे बिरोद जोटोः होड़ गो-गोज् रे सब् दोहोनय चलते जेहेल रे अदेर दोहो लीदिया, जोटोः जेके हुँकू कोय यति दोहोनाकु बय लिदियाय; जोटोः ईसु हुँकू रआ हिछा मोताबिक करावे तआ सोपाव लिदियय।
ईसु रआ कुरुस रे रकाबी
(मती 27:32,44; मरकुस 15:21–32; जोहन 19:17–27)
26सिपाहीकु जब ईसु इदीयाती दोहोनाकु, दो हुँकू सिमोन ञुमुन जे कुरेन सहर रेनि दोहोना हुँनि डीही पड़ा एतेन वेजोःकु ञेल लिदीया जोटोः हुँनि सब् केते ईसु रआ तयोम-तयोम कुरुस एर गोअ लिदियाकु।
27अगम भारी होड़कु हुँनि रआ तयोम रेकु सेसेन यान दोहोना जोटोः हुँकू मे से ढेर लंञीकु हों दोहोलेनाकु जे हुँनि तआ खोभराव-खोभराव ते इयाम यते दोहोनाकु। 28ईसु हुँकू पड़ा घुमराव कोते कथालअय, “ओय जेरुसलेम रीनकु लंञीकु, इञः तआ अलोपे इयामे; बकिन अपन जोटोः अपन होपोनपे तिकु तआ इयामेपे। 29‘धन्य इदानियाँ हुँनि लंञी रआ गतार जे सेंगोज् कोनीयाँ जोटोः जे दुद काय पियाव लिदिया।’ 30#होसे 10:8; दि.बचन 6:16होना बेरा हुँकू होड़ पहार कथावआकु, ‘आले तेङ रे ञुरोःमी,’ जोटोः हुडिञ पहार आले ‘डबना लेमी।’ 31चितानतआचि हुँकू होड़ हरियार काट ककु बायेआ दो फिन रोहोड़ लेना सुधा चिताना एरोकु चिलका लेए?”
32हुँकू ईसु सुधा बरिया एटाः डकुकिन हों गोज् कीन तआकु अराव दोहोना। 33हुँकू जब बोहोः खरपोही ञुमुन ठाँव रेकु सोदोरना, होंडे ईसु जोटोः बनार डकु कीन हों कुरुस रे रकब् लिड्किनाकु, मियड् जोम होरे जोटोः मियड् कोंजरा होरे। 34#सिरिञ 22:18तब ईसु कथालअय, “ओय परम बबा नुकु माफ कुमी, चितानतआचि ककु ठुवावना चितानले चिलकायना।”
हेनते सिपाहीकु चिठी सजाव केते ईसु रआ गेंदराः हटिञ लआकु।
35 #
सिरिञ 22:7
होड़कु तींगु कोतेकु ञे-ञेलयान दोहोना, जहुदी नेताकु मजक केते कथायते दोहोनाकु, “नुई एटाःकु दो बंचाव लिड्कुअय; अगर नुई परमेसर पड़ा एतेन रींबड़ लिदी पाप एतेन ब-बंचावी मसी हके, दो अपन अप बंचावोः।”
36 #
सिरिञ 69:21
सिपाहीकु हों ठँव रे वेज् कोते जोजो अँगुर रास अगु केते ओवाय घनी लंदा केते कथायते दोहोनाकु, 37“अगर अमः जहुदीकु रेनि राजा हके दो अपन अप बंचावओमी।”
38पटी रे दोस ओल केते ईसु रआ तेङ रे हों दोहोलेना, “नुई जहुदीकु रेनि राजा हके।”
39जे डकु होंडे ठोकाव दोहो लिड्किना हुकिन मे से मिहोंड़ हुँनि निंदा केते कथावा लअय, “तना अमः मसी हके नी? दो अमः अपन अप जोटोः अलिङ बंचाव लिङमी।”
40होना एडे एटाः-ई डपोट केते कथालअय, “तना अमः परमेसर सुधा हों कम बोरोयोओ? अमः हों दो हेनेना डन्ड मी भोगाव याना जे नुई भोगाव यतेअय। 41जोटोः अलङ दो नेयय मोताबिक डन्ड ञम यतेअलंग, चितानतआचि अलंग रआ सही काम मोताबिक डन्ड ञम यतेअलंग बकिन नुई चितानहों काय गुनाह काम तड्आ।” 42हेनते हुँनि कथा लआ, “ओय ईसु जे बेरा अमः अपन राइज रे वेजोअम दो इञः पहमिञमी।”
43ईसु हुँनिए कथावा लआ, “इञः अमः एडे सनारी कथायतेअइञ चि तीहिञ ही अमः इञः सुधा सिरमा रेम सोदोरोओ।”
ईसु जीवि अड़ाः लअय
(मती 27:45–56; मरकुस 15:33–41; जोहन 19:28–30)
44 #
उठलु 26:31–33
लगभग तिकिनोन एतेन तीन बजे हमिज् सीञ बोंगा काय ञेलोः से गोटा देस ञोता एंडाना, 45जोटोः सीञ बोंगा रआ मरसाल इड़ीज् एंडाना, हेनते सेंड़ा बिनती ओड़ाः रआ परदा तला रे चीरा यना।
46 #
सिरिञ 31:5
जोटोः ईसु जोड़ते हकाव केते कथालअय, “ओय बबा इञः आतमा अमः रआ अती रेञ सोपाव यतेआ।” जोटोः नोंका कथा केते जीवि अड़ाः लअय। 47मी साव सिपाहीकु रेनि अगुवा जे होयाव दोहोना ञेल केते परमेसर रआय बड़ाइ लआ, जोटोः कथालअय, “सनारी नुई होड़ धरमी दोहोनय।” 48जोटोः नोआँ ञेल तआ अगम होड़कु जवार दोहोना, नोआँ घटना ञेल केते खुब इयाम केतेकु रुवाड़ याना। 49#लुका 8:2,3जोटोः हुँनि रीनकु गोटे चिनहा परचा जोटोः जे लंञी गलील एतेन ईसु सुधा वेज् दोहोनाकु संगीञ रे तींगु कोते नोआँ गोटा ञे-ञेलयन दोहोनाकु।
ईसु हार लीदियाकु
(मती 27:57–61; मरकुस 15:42–47; जोहन 19:38–42)
50होंडे अरमतिया सहर रेनि जोसेफ ञुमुन, जहुदी सेंड़ा सभा रेनि मियड् होड़ दोहोना जे बढ़ियाँ जोटोः धरमी होड़ दोहोना, 51जोटोः हुँनि जहुदी देस रेनि अरमतिया रे दोहोन अवला जोटोः परमेसर रआ राइज रआ असरा रे दोहोलेनय। 52हुँनि पिलातुस एडे सेन कोते ईसु रआ गोज् होड़ो कोय लअय। 53जोटोः कुरुस एतेन अड़गु कोते मलमल चदार ते डबना लिदियय जोटोः मियड् सेरेङ रे लोपाः लेका बनाव लआ मरघाट रे दोहोलिदियय, होंडे ओके हों ककु दोहो-दोहोलिड्कुआ। 54सुक रआ दिन दोहोना जोटोः जहुदीकु रआ रुड़ुयोः रआ दिन बुहड़ीयोः अवला दोहोना।
55गलील एतेन हुँनि सुधा वेज् दोहोलेनकु लंञीकु जोसेफ तयोम-तयोम सेन कोते होना मरघाट ञेल लआकु जोटोः ईसु रआ गोज् होड़ो चिलकाकु दोहो तड्आ होना हों ञेल लआकु। 56#उठलु 20:10; नियम 5:14हेनते हुँकू रुवाड़ कोते अछाएकेन सोहोंयोः अवला जीनिस जोटोः सोहों ओजागे अवला तेयार लआकु; जोटोः जहुदीकु रआ रुड़ुयोः दिन हुँकू नियम रआ हुकुम मोताबिक सथाव लेनाकु।
اکنون انتخاب شده:
लुका 23: BIX
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0