JHN 4
4
येशुड इंगा शोमरोनी आंडीद
1यप्पुड येशुनकी इदी यरका आय्या की परुशी मंदीक इल्ला तेल्चीनाद की वाड बाप्तिस्मा इच्चेतोन योहान काना जास्त शिष्यल बनायमती वारदी बाप्तिस्मा शेस्तुनाड. 2(येशुड स्वता बाप्तिस्मा शेयाकुंदु; तर वान शिष्यल शेयदुर) 3आप्पुड वाड इंगा वान शिष्यल यहुदीया प्रांत इडशी इंगा गालील प्रांतलोंग वापस फोईर. 4इंगा वानकी शोमरोन प्रांत लोन्केल फोवाबेक आय्या. 5मंग वाड शोमरोन प्रांतालोन सुखार फेर नगरलोंग वच्या. आदी याकोब मना कोडकु योसेफ इनकी इच्चीने शेन देगार उंड्या.#उत्पत्ती 33:19; 48:22; यहोशवा 24:32. 6आंदु याकोबदी बाय उंड्या. नडशी-नडशी थकाशीनोड येशुड इल्ले आ बाय देगार कुसन्या, आप्पुड तरी मद्यानी बारा वागीन्या.
7आंदुक वगा शोमरोनी आंडीद नेळ तिशेदेंक वच्या, येशुड दान आन्या, “नाक रवा तागेदेंक नेळ इ.” 8इंताटला वान शिष्यल उळ्योंग आन्नाम कोन्केन तिस्कुना फोयनीर. 9आप्पुड आ शोमरोनी आंडीद वान आन्या, “नु यहुदी उंडी ना लेका वगा शोमरोनी आंडीदान तागेदेंक नेळ आडगुतुनाव?” येनटीक की यहुदी शोमरोनी मंदी जताक यादुच संबंध फेटा कुंदुर. 10येशुड दानकी उत्तर इच्या, “परमेश्वरदी दान आंटे येम इंगा नाक नेळ ताप इल्ला निन्नु आनेतोड यवाड उंडाड, इदी निक तेल्चींटे तर नु वान आडगुतुंटी इंगा वाड निक जिवंत नेळ इस्तुन्या.” 11आदी आंडीद वान आन्या, “गुरुजी, नेळ तिशेदेंक नी देगार येमीच लेद इंगा बाय तर शेंगेम लोत उंडाद, मंग नी देगार जिवंत नेळ यंदुकेल वच्ची? 12नु मा आब्बाड याकोब काना महान तर लेव, यवाड माक इदी बाय इच्चीनाड, वाड स्वता, वान कोडकुल इंगा वान फसुल दिंटल्योन्केल नेळ तागीर.” 13येशुड दानकी उत्तर इच्या, “यवाड पण इ नेळ तागी वानकी वापस दुपाक आय्यी, 14पण निन इच्यान आय नेळ यवाड पण तागी वानकी यप्पुडुच दुपाक काक फोई. तर याय नेळ निन वानकी इच्यान आय वान लोना सार्वकालिक जीवन इचांग जिवंत नेळाद झरा आय्यी.” 15आंडीद वान आन्या, “गुरुजी, आय नेळ नाक इ दिनिचांग की नाक दुपाक कावाराद इंगा नेळ निंचेदेंक नाक इंदुक वच्चेद फनी फडाराद.”
16येशुड दान आन्या, “फो, नी मोगुन फिल्चकेन दा.” 17आ आंडीद आन्या, “नाक मोगुड लेड.” येशुड दान आन्या, “नु बरोबर माटलाडती की, ‘निक मोगुड लेड;’ 18येनटीक की निक आय्यीद मोगुड उंडीर इंगा इप्पुड नु यवान देगार निलस्तुनाव वाड नी मोगुड लेड, इदी नु खरेम माटलाडती.” 19आ आंडीद वान आन्या, “हे प्रभु, नु संदेष्टा उंडाव इदी इप्पुड नाक तेलच्या. 20तर नाक शप, इल्ला येनटीक उंडाद की मीर यहुदी मंदी इल्ला आंटार की यरुशलेम उपासनाद वक्काटे जागा उंडाद, मिम शोमरोनी मंदी तर इल्ला आंटाम आदी जागा इंदु गरीज्जीम पर्वत मिंदा उंडाद, यंदु मा पुर्वजलु उपासना शेशीनीर.” 21येशुड दान आन्या, “बिडा, ना मिंदा विश्वास फेट की इल्ला वेळ वस्तुनाद; मीर इ कोंडा मिंदा इंगा यरुशलेम शहरला आब्बानदी उपासना शेयाक फोयार, 22मीर शोमरोनी मंदी यवारदी उपासना शेस्तार, वान बद्दल मिक जास्त यरका लेद, पण माक यहुदी मंदीक वान बद्दल आंताच यरका उंडाद, येनटीक की यहुद्योर तीकेले तारण उंडाद. 23तरी खरेम उपासना शेशेतोर आत्माता इंगा खरेम पणता स्वर्गीय आब्बानदी उपासना शेशार इल्ला वेळ वस्तुनाद, लेकाते वच्चीनादुच; येनटीक की वानदी उपासना शेशेतोर इल्ले उंडाला, इल्ला आब्बानदी इच्छा उंडाद. 24परमेश्वर आत्मा उंडाड; आंका वान उपासकलु वानदी उपासना आत्माता इंगा खरेम पणता शेयाबेक.” 25आदी आंडीद वान आन्या, “नाक यरका उंडाद की, मसीहा (आंटे ख्रिस्त) वच्चेतोड उंडाड, वाड वच्ची आप्पुड वाड माक आन्नी माटलु शप्पी.” 26आप्पुड येशुड दान आन्या, “निन यवाड नी जताक माटलाडतुनान, निन वाडे उंडान.”
शिष्यल वापस वस्तार
27इंताटला वान शिष्यल आंदुक वच्चीर इंगा वाड वगा आंडीदान जताक माटलाडतुनाड इदी सुशी वारकी आश्चर्य वाटाशा, पण तरी पण यवारुच वान इल्ला आनालेद की, “निक येम बेक?” “लेकाते नु दान जताक येम माटलाडतुनाव?” 28आ आंडीद आप्पुड दानदी नेळाद कुंडा आंदे इडशी नगरलोंग फोया इंगा मंदीन आनेदेंक आंट्या, 29“दांडा, इंगा आ मनशीन सुडना यवाड नाक आदी आंताच शप्या याद निन शेशीनान. वाडे ख्रिस्त उंडी शकास्ताड येम?” 30आप्पुड मंदी नगर लोन्केल यल्ली वान तीकुड वच्चेदेंक आंटीर.
31इंताटला वान शिष्यल वान विनंती शेशी आनीर, “रब्बी येमाना तिनी तिस्को.” 32पण वाड वारनी आन्या, “मिक यरका लेद इल्लोनदी आन्नाम ना देगार तिनेदेंक उंडाद.” 33दिन मिंदकेल शिष्यल वगामेगारनी आनेदेंक आंटीर, “इनकी यवाराना तिनेदेंक यकोची इच्चीनार येम?” 34येशुड वारनी आन्या, “यवाड नन्नु आंपीनाड वान इच्छा लेका नडवाला इंगा वानदी फनी पुर्ण शेय्याला इद्दे नाद आन्नाम उंडाद. 35इंगा चार महिने वेळ उंडाद, मंग सोंगाशेद वेळ वच्ची, इल्ला मीर आंटार का लेद? सुडना, निन मिक शपतान, मी कंडलु फैनिक यत्ती शेनलु सुडना; आय्यी सोंगाशेदेंक पकाशी तैयार उंडाय. 36सोंगाशेतोड कुली तिस्कुंटाड इंगा सार्वकालिक जीवन इचांग फंटा जमा शेस्ताड; दिनिचांग की पेराशेतोड इंगा कोशेतोडबी वगातळा आनंद शेय्याला. 37‘वगाड पेरास्ताड इंगा इंगोगोड सोंगास्ताड’, इल्ला याद म्हण उंडाद आदी इ विषयला खरेम उंडाद.#मीखा 6:15. 38या दानिचांग मीर मेहनत शेय्यालेर आदी सोंगाशेदेंक निन मिमलान आंपीनान. इंगोगोर मेहनत शेशीर इंगा मीर वार मेहनत फळला भागीदार आयनार.”
शोमरोनी मंदीद विश्वास फेट्टेद
39“निन येम पण शेस्तीन आदी आंताच वाड नाक शप्या” इल्ला साक्ष इच्चीने आ आंडीदान माटा मिंदकेल आ नगरलोन शेंगेम शोमरोनी मंदी येशुन मिंदा विश्वास फेट्टीर. 40मंग यप्पुड शोमरोनी मंदी वान तीकुड वच्चीर, वार जताक वाड निलवाला आंका विनंती शेशीर; मंग वाड आंदु रोंड नाळ निलच्या. 41इंगा शेंगेम मंदी वान वचननी इनी वान मिंदा विश्वास फेट्टीर. 42इंगा वार आ आंडीदान आनीर, “इप्पुड नि माटा मिंदीनोटे मिम विश्वास फेटताम इल्ला लेद, येनटीक की मिम स्वता इनीनाम इंगा इड खरेमे दुन्यामनी ताराशेतोड उंडाड, इदी माक तेल्चीनाद.”
येशुड गालीलकी वापस वस्ताड
43मंग आ रोंड नाळा बाद, वाड आंदुकेल गालील प्रांतलोंग यल्ली फोया. 44येनटीक की येशुड स्वता साक्ष इच्या की, संदेष्ट्यानकी मना देशला मान शिक्काद. 45यप्पुड वाड गालील प्रांतलोंग वच्या, आप्पुड मंदी वानदी स्वागत शेशीर; येनटीक की वाड फंडगा आप्पुड यरुशलेम शहरला शेशीनेय आन्नी माटलु गालील प्रांतलोन मंदी सुशीनीर; येनटीक की फंडगा इचांग वार पण आंदुक फोयनीर.
46मंग वाड गालील प्रांतलोन काना नगरलोंग वापस वच्या. आंदु वाड नेळाद अंगुरदी रस शेशीन्या. आंदु वगा राजान कर्मचारी उंड्या, वान कोडकु कफर्णहुमला बिमार उंड्या. 47येशु यहुदीया प्रांतकेल गालील प्रांतलोंग वच्चीनाड इदी इनीगास वाड वान तीकुड फोया इंगा वाड वच्ची मना बिडान बागा शेय्याला इल्ला येशुनकी विनंती शेशा येनटीक की वाड सच्चदेंक टेकाशीन्या. 48दिन मिंदकेल येशुड वारनी आन्या, “यप्पुड नंताक मीर चमत्कारलु इंगा फनुल सुडार विश्वास फेट्टाके फोयार.” 49राजान कर्मचारी वान आन्या, “प्रभुजी, ना बिडा सय्या काना मुंची नु किंदीक वच्चेद कृपा शेय.” 50येशुड वान आन्या, “फो, नी कोडकु जित्ता उंडाड.” आप्पुड आ मनशी, येशुड आनीने माटा मिंदा विश्वास फेट्टी, वान दावाता यल्ली फोया. 51इंगा वाड किंदीक फोयेताप्पुड वान नोकरलु वानकी वच्ची शप्पीर की, “नी कोडकु जित्ता उंडाड.” 52आप्पुड वाड वारनी आडग्या की यप्पुड बागा आयेदेंक आंटीन्या इंगा वार वान आनीर, “निन्ना, मद्याना वगाट वागता वानदी जडमु यल्ली फोया.” 53या वेळला येशुड वारकी शप्पीन्या की, “नी कोडकु जित्ता उंडाड,” आद्दे वेळला इदी आय्या इल्ला आब्बानकी तेलच्या आप्पुड वाड इंगा वान इंटल्योन्टोर आंदार विश्वास फेट्टीर.
54येशुड यहुदीया प्रांतलेल गालील प्रांतलोंग वच्ची नेंका वाड याद इंगोगो चिन्ह शेशा आदी इदी उंडाद.
اکنون انتخاب شده:
JHN 4: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید