JHN 5
5
अडोतीस वर्षकेल रोगी उंडीने मनशीन बागा शेशेद
1दिन बाद यहुदी मंदीद वगा फंडगा उंड्या इंगा येशुड यरुशलेम शहरकी फैनीक फोया. 2यरुशलेम शहरला, मेंढऱ्याल कवाड देगार वगाट तळ्या उंड्या, दान इब्री भाषाला बेथसैदा आंटार, दान देगार आय्यीद पडव्याल उंडाय. 3दांटल्या बिमारोर, गुड्योर, कुंट्योर, लकवा आंटीने मंदीद फेद्दा समुदाय फडीनेद उंडु. 4येनटीक की स्वर्गदुतलु ठरायमतीने वेळला तळ्याला दिगी नेळ हालाय मतुदुर इंगा नेळ हालाशीनेंका यवाड पहिला दांटल्योंग फोई वानकी याद पण रोग उंटे तरी आदी बागा आयदु. 5आंदु अडोतीस यंडलानोट बिमार उंडीने वगा मनशी उंड्या. 6येशुड वान फडीनोड सुशा इंगा वानकी आल्ला फडी उंडी इप्पुड शेंगेम नाळ आयन्या इदी ओळखाशी येशुड वान आन्या, “नीक बागा आय्येद इच्छा उंडाम येम?” 7आ बिमार मनशी वानकी उत्तर इच्या, “हे प्रभु, नेळ हालाशीनेंका नन्नु तळ्याला इडशेतोड ना देगार यवाडुच लेड; इंगा निन फोई पोहचाशी नंताक इंगोगोड यवाडाना फोई ना काना पहिला नेळाला दिगताड.” 8येशुड वान आन्या, “लेय, नीद मंचाम यतकेन नडशेदेंक आंट.”
9लगेच आ मनशी बागा आय्या इंगा वानदी मंचाम यतकेन नडशेदेंक आंट्या.
आदी दिनमु शब्बाथ दिनमु उंड्या.
10दिन मिंदकेल यहुदी मंदी आ बागा आयने मनशीन आनीर, “इबद शब्बाथ दिनमु उंडाद, मंचाम येत्तेद नी इचांग बरोबर लेद.” 11वाड वारकी उत्तर इच्या, “यवाड नन्नु बागा शेशा वाडे नाक शप्या की, नीद मंचाम यतकेन नडशेदेंक आंट.” 12वार वान आडगीर, “नीद मंचाम यतकेन नडु, इल्ला निन्नु आनेतोड आ मनशी यवाड उंडाड?” 13पण वाड यवाड उंड्या इदी आ बागा आयने मनशीक यरका लेकुंड्या; येनटीक की आ जागाला मंदीद समुदाय उंड्या आंका येशुड निसटाशी यल्ली फोयन्या. 14दान बाद वाड येशुनकी परमेश्वर भवनला भेटाशा आप्पुड येशुड वान आन्या, “सुड, नु बागा आयनाव, इप्पुडनोट पाप शेय्याक, शेस्ती आंटे नीद पहिलाकना शेंगेम वाईट आय्यी.” 15आ मनशी फोई यहुदी मंदीक शप्या, “यवाड नन्नु बागा शेशा वाड येशुड उंडाड.” 16येशुड शब्बाथ दिनमुनाड इल्ला फनी शेयदु, दिन मिंदकेल यहुदी मंदी येशुन यंका आंटीर. 17येशुड वारकी उत्तर इच्या, “ना स्वर्गीय आब्बाड इबद नंताक फनी शेस्तुनाड इंगा निन पण फनी शेस्तुनान.” 18दिनिचांग यहुदी मंदी वान जेमता मतेशेदेंक जास्तने प्रयत्न शेशेदेंक आंटीर, येनटीक की वाड शब्बाथ दिनमु तेंप्या इंते लेद, पण परमेश्वरनी ना आब्बाड आनीगास वाड स्वतान परमेश्वर लेका शेशीन्या.
कोडकुद अधिकार
19दिन मिंदा येशुड वारकी उत्तर इच्या, “निन मिक खरे-खरेम शपतान, कोडकु आब्बान येम पण शेशेताप्पुड सुस्ताड दान शिवाय वानकी येमीच स्वता इच्छाता शेया दाद; येनटीक की आब्बाड येम पण शेस्ताड आदी कोडकु पण आल्ले शेस्ताड. 20येनटीक की आब्बाड कोडकु मिंदा प्रेम शेस्ताड इंगा वाड येम पण शेस्ताड आदी वानकी सुपीस्ताड इंगा मीर आश्चर्य शेयाला आंका वाड दिन काना फेद्दाय फनुल वानकी सुपीच्ची. 21येनटीक की आब्बाड यल्ला सच्चीनोरनी लेपी जिवंत शेस्ताड आल्ले कोडकु पण वानकी वाटाशी वारनी जिवंत शेस्ताड. 22आब्बाड यवारदीच न्याय शेय्याड, तर न्याय शेशेद आंता फनी वाड कोडकुक इच्चीनाड. 23दिनिचांग की यल्ला आब्बानदी आदर शेस्तार आल्ले कोडकुद पण आंदार आदर शेयाला. यवाड कोडकुद आदर शेय्याड वाड, यवाड नन्नु आंप्या, आ आब्बानदी पण आदर शेय्याड. 24निन मिक खरे-खरेम शपतान, यवाड नाय वचनलु इंटाड इंगा यवाड नन्नु आंप्या वान मिंदा विश्वास फेटताड वानकी सार्वकालिक जीवन शिक्कीनाद इंगा वान मिंदा न्यायदी वेळ दाक फोई; वाड साव लोन्केल जीवनलोंग प्रवेश शेशीनाड.
25 निन मिक खरे-खरेम शपतान की, सच्चीनोर मंदी परमेश्वर कोडकुद आवाज इन्यार इंगा यवार इन्यार वार जित्ता आय्यार, इल्ला वेळ वस्तुनाद, लेकाते इप्पुड वच्चीनादुच. 26येनटीक की यल्ला आब्बाड वान लोना जीवन फेटताड, आल्ले वाड कोडकुक पण वान लोना जिवन फेट्टेद अधिकार इच्या. 27इंगा वाड वानकी आंदारदी न्याय शेशेद अधिकार इच्चीनाड, येनटीक की वाड मनशी कोडकु उंडाड. 28दीनदी आश्चर्य शेयाकुंडा; येनटीक की आदी वेळ वस्तुनाद यप्पुड कबरला उंडीनोर आंदार वानदी आवाज इन्यार, 29इंगा यवाड शिंगार फनुल शेशीनार वार जीवन पुनरुत्थान इचांग इंगा यवार वाईट फनुल शेशीनार वार न्याय पुनरुत्थान इचांग बैटीक वच्यार.
येशुन बद्दल साक्ष
30 नाक स्वता येमीच शेशी शकायान, यल्ला निन इंटान आल्ले न्याय शेस्तान इंगा नाद न्याय बरोबर उंडाद येनटीक की निन नाद इच्छा लेद तर नन्नु आंपीनोन इच्छा लेका शेशेदेंक सुस्तान. 31नी जर स्वता बद्दल साक्ष इस्तीन तर नाद साक्ष खरेम लेद; 32पण ना बद्दल साक्ष इच्चेतोड इंगोगोड उंडाड; इंगा नाक यरका उंडाद की, वाड ना बद्दल जे साक्ष इस्ताड आदी खरेम उंडाद. 33मीर बाप्तिस्मा इच्चेतोन योहान तीकुड मी मंदीन आंपी आडगुतीर इंगा वाड सत्य बद्दल साक्ष इच्या. 34पण निन मनशीद साक्ष मान्य शेय्यान, तरी मिद तारण कावाला आंका निन इदी शपतान. 35योहान तर कालेतोड इंगा चमकाशेतोड दिवा उंड्या; इंगा काही काळ मिक वान यलगुला आनंद शेशेद शिंगार वाटाशा. 36पण ना देगार याद साक्ष उंडाद आदी योहान साक्षी काना फेद्दाद उंडाद, येनटीक की याय फनुल पुर्ण शेशेद आब्बाड नाक इच्चीनाड, आंटे याय फनुल निन शेस्तान आय्ये ना बद्दल साक्ष इस्ताय की, आब्बाड नन्नु आंपीनाड. 37इंगा या आब्बाड नन्नु आंपीनाड वाडे ना बद्दल साक्ष इच्चीनाड. मीर यप्पुडुच वानदी माटा इना लेद इंगा वानदी स्वरूप पण सुडालेद. 38इंगा वानदी वचन पण मी अंतकरणला लेद, येनटीक की यवाड वान आंप्या वान मिंदा मीर विश्वास फेट्टालेद? 39मीर पवित्र शास्त्र फुडकुतार, येनटीक की मीर इल्ला मानास्तार की, दानता माक सार्वकालिक जीवन शिकताद इंगा आद्दे पवित्र शास्त्र ना बद्दल साक्ष इस्ताद. 40तरी पण मीर सार्वकालिक जीवन शिक्काला आंका ना तीकुड वच्चेदेंक सुडार. 41नाक मन्सुला तीकेल आदर बेकालेद. 42पण निन मिमलान गुरतु फट्टीनान की, मी लोना परमेश्वर बद्दल प्रेम लेद. 43निन ना स्वर्गीय आब्बान फेरता वच्चीनान पण मीर नाद स्वीकार शेय्यार; इंगोगोड यवाडाना स्वता फेरता वस्ते तर मीर वानदी स्वीकार शेशार. 44मीर याद आदर वगामेगार तीकेल शेशी तिस्कुंटार इंगा यवाड वक्का परमेश्वर वान तीकेल मिक आदर बेकालेद, तर मीर यल्ला विश्वास फेट्टी शकास्तार? 45निन आब्बान मुंदार मी मिंदा आरोप येशान, इल्ला समजायाकुंडा. मीर यवान मिंदा विश्वास फेटतार वाड मोशेडे मी मिंदा आरोप येशी. 46येनटीक की मीर मोशेन मिंदा विश्वास फेट्टीन्टे तर ना मिंदा पण विश्वास फेटतुंटीर, येनटीक की वाडे ना बद्दल राशीनाड. 47पण मीर वाड राशीने माटला मिंदा विश्वास फेट्टार, तर ना वचनला मिंदा यल्ला विश्वास फेट्यार?”
اکنون انتخاب شده:
JHN 5: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید