JHN 6
6
येशुड फेद्दा गर्दीक तिना मत्या
मत्तय 14:13-21; मार्क 6:30-44; लूक 9:10-17
1इ माटलु आयनेंका येशुड गालील सरोवर आतुक फोया दान तीबीर्या सरोवर पण आंटार. 2आप्पुड मंदीद फेद्दाद समुदाय वान यंका-यंका नडशा, येनटीक की बिमार मंदी मिंदा वाड याय चिन्हल शेयदु आय वार सुशीनीर 3आप्पुड येशुड कोंडा मिंदीक यक्की वान शिष्यला देगार कुसन्या. 4इंगा यहुदी मंदीद वल्हांडनदी फंडगा देगार उंड्या. 5आप्पुड येशुड वानी कंडलु फैनिक शेशी इंगा मंदीद गर्दी मना तीकुड वस्तुनाद इल्ला सुशी फिलिप्पनी आन्या, “मनाम इ मंदी इचांग तिनेदेंक रोट्याल यंदुकेल कोन्केन दावाला?” 6पण इदी तर वाड वानदी परीक्षा सुशेदेंक आन्या; येनटीक की वाड येम शेशेतोड उंड्या इदी वानकी यरका उंड्या. 7फिलिप्प वानकी उत्तर इच्या, “वार दिंटल्योन्टोर आंदार रव्वा-रव्वा जरी तिस्कुनीर तरी दोनशे यंडी कलदारलाय#6:7 दोनशे यंडी कलदारलाय रोंड नुर दिनमुलाद कुली रोट्याल सालाक फोई,” 8वान शिष्यला लोन्केल वगाड, शिमोन पेत्र तम्मुड अंद्रियाड वान आन्या, 9“इंदु वगा शिन्ना बिडा उंडाड. वान देगार जवुय आय्यीद रोट्याल इंगा रोंड मिल उंडाय; पण इंता मंदीक आय यल्ला साली?” 10येशुड आन्या, “मंदीन कुसना मतना.” आ जागाला शेंगेम गड्डी उंड्या, आप्पुड आंदु यवार पाच हजार मन्सुल उंडीर वार कुसनीर.#मत्तय 14:21. 11येशुड आय रोट्याल तिस्कुन्या इंगा धन्यवाद इच्ची यवार कुसनीनीर वारकी फंचकाड्या, आल्ले आ मिला लोन्केल यन्नी वारकी बेकुंड्या आन्नी इच्या. 12वार कडपु निंडा तिनीनेंका वाड वान शिष्यलाक शप्या, “मिल्गीने तुकडाल जमा शेयना, आंटे येमीच वाया फोवारोद.” 13मंग तिनेतोरकी पुर्ण आयनेंका वार जवुय आय्यीद रोट्याली मिल्गीने तुकडाल जमा शेशी बारा फुटकाल निंचीर.
14आप्पुड वाड शेशीनेद चिन्ह सुशी आ मंदी आनेदेंक आंटीर, “दुन्यामला यवाड संदेष्टा वच्चेतोड उंडाड वाड खरेम इडे उंडाड.”#मत्तय 21:11.
15मंग वार वच्ची नन्नु राजा बनाय मतदेंक बळजबरी फट्टेदेंक सुस्तुनार इदी ओळखाशी येशुड वापस कोंडा मिंदीक वक्काडे यल्ली फोया.
येशुड नेळा मिंदा नडस्ताड
16फद्दु मुनगीनेंका वान शिष्यल किंदीक सरोवर तीकुड फोईर; 17इंगा वगा नावला कुसनी सरोवर आतकुड कोनाक कफर्णहुम नगर तीकुड फोयेदेंक आंटीर. आप्पुड मोब्बु आयन्या इंगा येशुड वार तीकुड दालेकुंड्या. 18इंगा फेद्दा घाली इडन्या आंका सरोवरला लाटलु वस्तुन्या. 19आप्पुड यप्पुड वार वल्ही मत्का-मत्का आर किलोमीटर यल्ली फोईर, तर वार येशुन नेळा मिंदकेल नडस्का इंगा नाव देगार वच्चेताप्पुड सुशीर, इंगा वारकी येरपु आय्या. 20पण वाड वारनी आन्या, “निन उंडान, यरस्कुनाकुंडा,” 21मंग वान नावलोंग तिस्कुनेद वारदी इच्छा आय्या. आंताटला नाव आ कंटामकी फोई पोहचाशा यंदुक वारकी फोयेद उंड्या.
मंदी येशुन फुडकुतार
22इंगोगो नाड या मंदीद समुदाय सरोवर आतुक नीला फडीन्या वार सुशीर की, या शिन्ना नावला वान शिष्यल कुसनीनीर दान इडशी आंदु इंगोगोट यादुच नाव लेकुंड्या इंगा येशुड वान शिष्यला जताक आ नावला लेकुंड्या. पण फक्त वान शिष्यले फोयनीर. 23तरी प्रभुड धन्यवाद इच्चीनेंका वार यंदु रोट्याल तिनीनीर आंदुक तीबीर्याकेल इंगोगोय शिन्ना नावलु वच्चीन्या. 24आंदु येशुड लेकुंड्या इंगा वान शिष्यल पण लेकुंडीर इदी यप्पुड मंदी सुशीर आप्पुड वार पण नावलु तिस्कुनीर इंगा येशुन फुडकुका वार कफर्णहुम नगरकी वच्चीर.
येशुड जीवनदी रोट्या
25यप्पुड येशुड वारकी सरोवर आतुक भेटाशा आप्पुड वार वान आनीर, “रब्बी, नु इंदुक यप्पुड वस्ती?” 26येशुड वारकी उत्तर इच्ची आन्या, “निन मिक खरे-खरेम शपतान, मीर चिन्हल सुस्तीर आंका लेद, पण रोट्याल तिनी तृप्त आयतीर आंका नन्नु फुडकुतुनार. 27नाश आय्ये आन्नाम इचांग मेहनत शेयाकुंडा, पण सार्वकालिक जीवन इचांग, टिकाशे आन्नाम इचांग मेहनत शेयना. मनशी कोडकु आदी मिक इच्ची, येनटीक की वान मिंदा परमेश्वर आब्बाड शिक्का मतनाड.” 28आप्पुड वार वान आडगीर, “मिम परमेश्वरदी फनी शेशेदेंक येम शेशेद?” 29येशुड वारकी उत्तर इच्ची आन्या, “परमेश्वरदी फनी इद्दे उंडाद की यवाड वान आंपीनाड वान मिंदा मीर विश्वास फेट्टाला.” 30दिनिचांग वार वान आडगीर, इल्ला याय चिन्हल नु सुपीच्याव की आय सुशी मिम नी मिंदा विश्वास फेट्टाला? नु याय फनुल शेस्ताव? 31मा पुर्वजलु जंगलला मान्ना तिनीर; पवित्र शास्त्राला इल्ला राशीनेद उंडाद की, 'वाड वारकी स्वर्ग लोन्केल रोट्या तिनेदेंक इच्या.'#निर्गम 16:4; स्तोत्रसंहिता 78:24; 105:40. 32आप्पुड येशु वारनी आन्या, “निन मिक खरे-खरेम शपतान, मोशेड मिक स्वर्गलोनदी रोट्या इच्या इल्ला लेद, तर ना आब्बाड स्वर्ग लोन्केल वच्चेद खरेम रोट्या मिक इस्ताड. 33येनटीक की आदी स्वर्ग लोन्केल दिगताद इंगा दुन्यामकी जीवन इस्ताद आद्दे परमेश्वरदी रोट्या उंडाद.” 34आप्पुड वार वान आनीर, “प्रभु, इदी रोट्या माक नेहमी इ.”
35आप्पुड येशुड वारनी आन्या, “निने जीवनदी रोट्या उंडान. ना तीकुड यवाड वस्ताड वानकी यप्पुडुच आकाल काक फोई इंगा यवाड ना मिंदा विश्वास फेटताड वानकी यप्पुडुच दुपाक काक फोई. 36पण मीर नन्नु सुशीनार तरी विश्वास फेट्टार इल्ला निन मिक शपतान. 37आब्बाड येम पण नाक इस्ताड आदी आंता ना तीकुड वच्ची इंगा यवाड ना तीकुड वच्ची वान निन यप्पुडुच तीयाक फोयान. 38येनटीक की निन स्वर्ग लोन्केल वच्चीनान आदी ना इच्छा लेका शेशेदेंक लेद, पण यवाड नन्नु आंपीनाड वान इच्छा लेका शेशेदेंक वच्चीनान. 39इंगा यवाड नन्नु आंपीनाड वानदी इच्छा इद्दे उंडाद की, यवाड नाक आंताच इच्चीनाड दांटल्योन्केल निन येमीच गमाय मताराद, पण आखरी दिनुमनाड निन दान वापस लेपाला. 40ना आब्बानदी इच्छा इद्दे उंडाद की, यवाड वान कोडकुन सुशी वान मिंदा विश्वास फेटताड वानकी सार्वकालिक जीवन शिक्काला; वान निने आखरी दिनमुनाड लेप्यान.”
41 “निन स्वर्ग लोन्केल दिगीनेद रोट्या उंडान” वाड इल्ला आन्या आंका यहुदी मंदी वान बद्दल कुरकुर शेशेदेंक आंटीर. 42आप्पुड वार आनीर, “इड येशुड योसेफान कोडकु लेड येम? वान आब्बान इंगा आम्मान मिम गुरतु फटताम. तर इड यल्ला आनी शकास्ताड, निन स्वर्ग लोन्केल दिगीनान?” 43येशुड वारनी आन्या, “मीर वगामेगारला कुरकुर शेयाकुंडा. 44यवाड नन्नु आंपीनाड आ आब्बाड जग्गीन यवाडुच ना तीकुड वच्ची शकायार. वारनी आखरी दिनुमनाड निन लेप्यान. 45संदेष्ट्याल ग्रंथला राशीनेद उंडाद की,
‘वार आंदार परमेश्वर तीकेल नेरशीनोर इल्ला आय्यार’,
यवार आब्बान तीकेल इनी नेरशीनार वार ना तीकुड वस्तार.#यशया 54:13. 46यवाड परमेश्वर तीकेल उंडाड वाडे आब्बान शुशीनाड. वान इडशी यवारुच आब्बान सुडालेद. 47निन मिक खरे-खरेम शपतान, यवाड विश्वास फेटताड वानकी सार्वकालिक जीवन शिकताद. 48निने जीवनदी रोट्या उंडान. 49मी पुर्वजलु मरु भुमीला मान्ना तिनीर तरी पण वार सच्ची फोईर.
50 इदी आदी रोट्या उंडाद याद स्वर्ग लोन्केल दिगताद दिनिचांग की मंदी दांटल्योन्केल तिनाला इंगा सया राद. 51स्वर्ग लोन्केल दिगीनेद जित्ता रोट्या निने उंडान. इ रोट्या लोन्केल यवाड पण तिनी वाड सार्वकालिक जीवन जगाशी. याद रोट्या निन इच्यान आदी नाद फय उंडी आदी दुन्याम इचांग उंडाद.”
52आप्पुड यहुदी मंदी अधिकारील वगामेगारला जगडाम वाढायमती आनीर, “इड मनाक वानदी फय यल्ला तिनेदेंक इच्ची?” 53दिन मिंदकेल येशुड वारनी आन्या, “निन मिक खरे-खरेम शपतान, मीर मनशी कोडकुद फय तिनाक फोतीर इंगा वानदी रक्ताम तागाक फोतीर तर मी लोना जीवन लेद. 54यवाड नाद फय तिंटाड इंगा नाद रक्ताम तागताड वानकी सार्वकालिक जीवन शिक्कीनाद इंगा निने वारनी आखरी दिनुमनाड वापस लेप्यान. 55येनटीक की नाद फय खरेम आन्नाम उंडाद इंगा नाद रक्ताम खरेम नेळ उंडाय. 56यवाड नाद फय तिंटाड इंगा नाद रक्ताम तागताड वाड ना लोना निलस्ताड इंगा निन वान लोना निलस्तान. 57यल्ला जित्ता आब्बाड नन्नु आंपीनाड इंगा निन यल्ला आब्बान इचांग जित्ता उंडान, आल्ले यवाड नन्नु तिंटाड वाड पण ना इचांग जित्ता उंडी. 58याद रोट्या स्वर्ग लोन्केल दिगीनाद इद्दे उंडाद. मी पुर्वजलु रोट्या तिनीर तरी पण वार सच्ची फोईर. इदी आल्ला लेद. इदी रोट्या यवाड तिनी वाड सार्वकालिक जीवन जगाशी.”
59कफर्णहुम नगरला नेरपेताप्पुड वाड यहुदी सभास्थानला इ माटलु शप्या.
सार्वकालिक जीवनदी वचन
60वान शिष्यला लोन्केल शेंगेम मंदी इदी इनी आनीर, “इदी वचन शेंगेम कठीण उंडाद; इदी यवार इनी शकास्तार?” 61पण मना शिष्यल दिन बद्दल कुरकुर शेस्तुनार इदी मनला गुरतु फट्टी येशुड वारनी आन्या, “दिनिचांग मिक अडखळन आयतुनाद येम? 62मनशी कोडकुन वाड पहिला यंदु उंड्या आंदुक फैनिक फोयेताप्पुड सुशार तर? 63आत्मा जिवन इच्चेतोड उंडाड फय तीकेल येमीच फायदा लेद. निन मी जताक माटलाडतीन आय वचनलु आत्मा इंगा जीवन इल्ला उंडाय. 64तरी मी दिंटल्या शेंगेम मंदी इल्ला उंडार यवार विश्वास फेट्टार” येनटीक की येशुनकी पहिलाने यरका उंड्या की यवार विश्वास फेट्टार इंगा वान यवाड फट्टी इच्चेतोड उंडाड. 65इंगा वाड आन्या, “दिनिचांग निन मिमलान आंटीन की याड नंताक यवारकी आना आब्बान तीकेल इदी वरदान शिक्काद आड नंताक वाड ना तीकुड वच्ची शकायाड.”
66दिन मिंदकेल, वान शिष्यला लोन्केल शेंगेम मंदी यंकाक तिरगी फोईर इंगा वार वान यंका नडावाक फोईर. 67आप्पुड येशुड बारा शिष्यलान आडग्या, “मिद पण फोयेद इच्छा उंडाद येम?” 68आप्पुड शिमोन पेत्र वानकी उत्तर इच्या, “प्रभु, मिम यवार तीकुड फोदुम? सार्वकालिक जीवनी वचनलु तर नी देगारे उंडाय. 69इंगा मिम विश्वास फेट्टीनाम इंगा माक यरका उंडाद की, नु परमेश्वर पवित्र मनशी नु उंडाव.” 70येशुड वारकी उत्तर इच्या, “निन मिमलान बारा मंदीन निवडायालेद येम? पण मी दिंटल्योन्टोड वगाड शैतान वशला उंडाड.” 71इदी वाड शिमोन कोडकु यहूदा इस्कर्योत इन बद्दल आनीन्या; येनटीक की बारा मंदी लोन्केल वाडे वगाड वान फट्टी इच्चेतोड उंड्या.
اکنون انتخاب شده:
JHN 6: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید