LUK 10
10
सत्तर शिष्यलाद फनी
1मंग प्रभुड इंगा सत्तर#10:1 सत्तर काही लिपीलाला बाहत्तर राशीनेद उंडाद शिष्यलान निवडाशी या-या उळाक वाड स्वता फोयेतोड उंड्या आंदुक इद्दा-इद्दारनी इल्ला वान मुंदारकी आंप्या. 2वाड वारनी आन्या, “फंटा शेंगेम उंडाद पण फनी शेशेतोर कमी उंडार, दिनिचांग परमेश्वरकी प्रार्थना शेयना की वाड फनी शेशेतोरनी आंपाला.” 3फोंडा; सुडना, लांडगालला यल्ला मेंढऱ्यालनी आंपाला आल्ले निन मिमलान आंपतुनान. 4थैली लेकाते झोळी लेकाते शप्पुल तिस्कुनाकुंडा इंगा दावाता यवारकीच दंडाम शेयाकुंडा.#मत्तय 10:9; 2 राजे 4:29. 5यप्पुड मीर यादाना इंटल्योंग फोयार आप्पुड आंदार काना पहिला इ इंटल्या शांती उंडाला, इल्ला आनना. 6जर आंदु यवाडाना शांतिप्रिय मनशी उंटे तर मिद शांती वान मिंदा निलची; पण आंदु लेकुंटे तर आदी मी देगार वापस वच्ची. 7मीर आद्दे इंटल्या निलची वार येम इच्यार आद्दे तिनना तागना; येनटीक की फनी शेशेतोनकी वानदी कुली शिक्काबेक; इल्लु इल्लुक तिरगाकुंडा. 8इंगा यादु पण उळ्योंग मीर फोयार इंगा मंदी जर मिद स्वागत शेशीर, तर वार येम पण मी मुंदार सदर्यार आदी तिनना, 9इंगा आंदाटला यवाराना बिमार उंटे वारनी बागा शेयना इंगा वारकी शपना की, परमेश्वर राज्य मी देगार वच्चीनाद. 10पण या उळ्योंग मीर फोयार, आंदुड मंदी जर मिद स्वागत शेयाक फोईर तर बैटीक दावा मिंदीक फोई इल्ला आनना की, 11मी उळ्योनदी धुम्मु मा काळाक आंटीनाद आदी पण मिम मी विरुद्ध झाडस्काडताम; तरी इदी तेल्चकोंडा की परमेश्वरदी राज्य देगार वच्चीनाद. 12निन मिक शपतान की, न्याय दिनमुनाड सदोम शहर काना पण आ नगरकी जास्त त्रास आय्यी. #उत्पत्ती 19:24-25.
13 “हे खोराजीन नगरला निलचेतोर मंदीलाला, मिक धिक्कार उंडाला, हे बेथसैदा नगरला निलचेतोर मंदीलाला मिक धिक्कार उंडाला, येनटीक की मी दिंटल्या याय पराक्रमी फनुल शेशेदेंक वच्या आय जर सोर इंगा सिदोन नगरला शेशेदेंक वच्चीन्टे तर वार लगेच पहिला गोणपाट येस्केन इंगा फयीक बुडदी तीक्केन पापलाकेल परमेश्वर तीकुड तिरगुतुनीर. 14दिनिचांग न्याय दिनमुनाड सोर इंगा सिदोन इ शहरला काना पण मिक जास्त त्रास आय्यी.#योएल 3:4-8; जखऱ्या 9:2-4. 15हे कफर्णहुम शहरलोन मंदीलाला, मीर येम स्वर्ग नंताक लोत आय्यार येम? मीर नरक नंताक किंदीक फोयार.#यशया 14:13,15.
16 यवाड शिष्यलाद इंटाड वाड नाद इंटाड इंगा यवाड शिष्यलान नाकारीस्ताड वाड नन्नु नाकारीस्ताड इंगा यवाड नन्नु नाकारीस्ताड वाड यवाड नन्नु आंपीनाड वान नाकारीस्ताड.”
17आ सत्तर शिष्यल आनंदता वापस वच्चीर इंगा आनीर “प्रभु, नी फेरता दैयाल पण मा अधिन आयताय!” 18आप्पुड वाड वारनी आन्या, “निन शैताननी स्वर्गलेल विजलेका फडेताप्पुड सुस्तीन!#प्रकटीकरण 12:7-9; यशया 14:12. 19सुडना, निन मिक फामलान इंगा विंचुलान तोक्केद इंगा शत्रुन आंता सामर्थ्य मिंदा, अधिकार इच्चीनान इंगा मिक येनटीताच येमीच नाश काक फोई.#स्तोत्रसंहिता 91:13. 20तरी दुष्टात्माल मी अधिन आयताय दिनदी आनंद मानायाकुंडा तर मिद फेर स्वर्गला राशीनेद उंडाद दिनदी आनंद मानायना.”
येशुड शेशीनेद उपकार मानसकाम
मत्तय 11:25-27
21आ क्षणला वाड पवित्र आत्माला आनंदीत आय्या इंगा आन्या, “हे यब्बा, स्वर्ग इंगा पृथ्वीटोड प्रभु निन नीद स्तुती शेस्तान, येनटीक की नु इ माटलु ज्ञानी इंगा बुद्धिमान मनशी तीकेल दाशी फेट्टी आय शिन्ना बिळ्ळाक प्रकट शेशीनाव. हुं, यब्बा येनटीक की नीक येम बरोबर वाटाशा आदी नु शेस्ती. 22ना आब्बाड आन्नी माटलु ना इचांग इच्चीन्या इंगा कोडकु यवाड उंडाड इदी आब्बान इडशी इंगा यवारकीच यरका लेद इंगा कोडकुन इडशी इंगा यवारकीच आब्बाड यवाड उंडाड इदी यरका लेद इंगा यवारकी आदी प्रकट शेशेद कोडकुद इच्छा उंडी वानके यरका उंडाद.”
23इंगा शिष्यला तीकुड तिरगी वाड एकांतला वारनी आन्या, “मीर येम सुस्तार आय सुशेय कंडलु धन्य. 24निन मिक शपतान, शेंगेम राजाल इंगा संदेष्ट्याल मीर येम सुस्तार आदी सुशेद इच्छा शेशीर, पण वार आदी सुशी शकायालेद इंगा मीर येम इंटार आदी इनेद इच्छा शेशीर, पण वार आदी इनी शकायालेद.”
सार्वकालिक जीवन यल्ला प्राप्त शेशेद?
मत्तय 22:34-40; मार्क 12:28-34
25वगा नाड वगा नियमशास्त्र शिक्षक नीला फड्या, वानकी येशुनदी परीक्षा तिस्कुनेद उंड्या. वाड आन्या, “गुरुजी, सार्वकालिक जीवन प्राप्त शेशेदेंक निन येम शेयाबेक?” 26आप्पुड येशुड आन्या, “नियमशास्त्रला येम राशीनार? नु दांटल्या येम वाचास्ताव?” 27वाड आन्या, “नु नी परमेश्वर मिंदा पुर्ण अंतकरणता, पुर्ण आत्माता, पुर्ण शक्तीता प्रेम शेय.” इंगा यल्ला स्वता मिंदा प्रेम शेस्ताव आल्ले नी शेजाऱ्यान मिंदा प्रेम शेय.#मत्तय 22:37-40; अनुवाद 6:5; 10:12; यहोशवा 22:5. 28आप्पुड येशुड वान आन्या, “नु बरोबर उत्तर इस्ती, इद्दे शेय आंटे नु बतक्याव.”#लेवी 18:5. 29पण निन योग्य प्रश्न आडगीनान इदी इंगोगोरकी सुपेदेंक वाड येशुन आडग्या, “मंग ना शेजारी यवाड उंडाड?”
शिंगार शोमरोनी मनशीद दृष्टांत
30येशुड उत्तर इच्या, “वगा मनशी यरुशलेम शहरकेल यरीहोक फोयतुन्या इंगा वाड दोंगाल शेतल्या शिक्या. वार वानी बट्टाल तिशीगास वान मत्तीर इंगा आर्दाम सच्चीने हालतला इडशी फोईर. 31आप्पुड आद्दे वेळला वगा याजक आ दावाता फोयतुन्या, याजक वान सुशा पण वाड वान सुशी इंगोगो दावाता यल्ली फोया. 32आद्दे दावाता वगा लेवी आंदुक वच्या, वाड वान सुशा इंगा वाड पण इंगोगा दावाता यल्ली फोया. 33मंग वगा शोमरोनी मनशी आद्दे दावाता फोयेताप्पुड आ मनशी देगार वच्या इंगा आ मनशीन सुशी वानकी वान मिंदा दया वच्या. 34वाड वान देगार फोई वान जखमला मिंदा नुन्या इंगा अंगुरदी रस आंची कट्ट्या इंगा वाड वान गाडदी मिंदा कुसनामती आश्रमलोंग यकोच्या इंगा वानदी सेवा शेशा. 35इंगोगा नाड वाड रोंड यंडी कलदारलु तिशा इंगा आश्रम मालकुनकी इच्या इंगा आन्या इनदी शिंगार सेवा शेय, जर दिन काना जास्त निक येमाना खर्च आंटते, तर निन वापस वच्ची नेंका नीक इच्यान. 36दोंगाल शेतल्या या मनशी शिक्कीन्या वानकी वार मुगुर लोन्केल यवाड खरेम शेजारी उंड्या इल्ला नीक वाटास्ताद?”
मार्था इंगा मरीया
37आ नियमशास्त्र शिक्षक आन्या, “यवाड वान मिंदा दया शेशा वाड,” आप्पुड येशुड वान आन्या, “फो इंगा नु पण आल्ले शेय.”
38मंग येशुड इंगा वान शिष्यल फोयेताप्पुड, तर वाड वगा उळ्योंग फोया. आंदु मार्था फेरुद आंडीद वानदी स्वागत शेशी पाहुणचार शेशा. 39दानकी मरीया फेरुद शेल्याल उंड्या, आदी प्रभुन काळा देगार कुसन्या इंगा वाड येम माटलाडदु आदी इनेदेंक आंट्या. 40पण मार्थाद फनी जास्त उंड्या आंका परेशान आय फोया इंगा आदी येशुन देगार वच्ची वान आन्या, “प्रभु, ना शेल्याल आंता फनी ना मिंदा येस्काडनाद दीनदी निक काळजी लेद येम? नाक मदत शेशेदेंक आबडाक शप.” 41प्रभुड उत्तर इच्या, “मार्था, मार्था, नु शेंगेम माटला इचांग चिंता शेस्ताव. 42पण वक्काटे माटा आवश्यक उंडाद. आदी निन शपतान, मरीयाद दान इचांग शिंगार वाटा निवडाशीनाद. आदी दान तीकेल तिशी तिस्कुनेदेंक दाक फोई.”
اکنون انتخاب شده:
LUK 10: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید