LUK 2
2
येशुनदी जन्म
मत्तय 6:9-15
1आ दिनमुलाला रोमी सम्राट अगस्तद आज्ञा आय्या की, आन्नी प्रांतलालोन मंदीद जनगणना शेशेदेंक दावाला. 2इदी पहिला जनगणना उंड्या यप्पुड क्वीरीनिय इड सिरीया प्रांतोड राज्यपाल उंड्या. 3आंता मंदी जनगणना शेशेदेंक मनामना उरुक फोईर.
4इंगा योसेफ पण गालील प्रांतलोन नासरेथ उरलेल यहुदीया प्रांतलोन दाविदान बेथलहेम उरुक फोया येनटीक की वाड दाविदान गोनगोत लोन्टोड उंड्या. 5फेर राशी इच्चेदेंक, यवात दान जताक वानदी इड्याम आयन्या आ रंजलमनशी मरीयादान वाड जताक येकेन फोया. 6मंग इल्ला आय्या, वार आंदे उंडीनाप्पुड दानी दिनाल पुर्ण आय्यी, 7आदी दान पहिला बिडाक जन्म इच्या इंगा आदी वान बट्टाला गुंडाळीच्या इंगा कोट्टामला फेट्या येनटीक की धर्मशाळाला निलचेदेंक वारकी जागा शिक्का लेकुंड्या.
8आद्दे भागला, मेंढपाळलु मोब्बुलोन वेळला शेल्ला निलची वारदी कळप राखायदुर. 9अचानक, परमेश्वर दुत वार मुंदार प्रकट आय्या इंगा प्रभुन महिमाद तेज वार भोवती पसराशा इंगा वार शेंगेम यरस्कुनीर. 10स्वर्गदुत वारनी आन्या यरस्कुनाकुंडा; याद फेद्दाद आनंद आंता मंदीक आय्येद उंडाद दानदी सुर्वाता निन मिक शपतान. 11बेथलेहेम, दाविद नगरला इबद मी इचांग ताराशेतोड फुट्टीनाड! वाड प्रभुड ख्रिस्त उंडाड. 12मी इचांग इदी चिन्ह उंडी की, वाड बिडा बट्टाला गुंडाळीची कोट्टामला फंडा मतीनोड मिक कमशी.
13मंग येकायेकी मोडामलोन सैन्यद समुदाय स्वर्गदुत देगार वच्या इंगा स्वर्गदुतलु परमेश्वरदी स्तुती शेशीर इंगा आनीर,
14“मोडामला परमेश्वरदी स्तुती कावाला
इंगा पृथ्वी मिंदा या मन्सुला बद्दल
वाड संतुष्ट उंडाड वारकी शांती शिक्काला.”
15इंगा इल्ला आय्या की स्वर्गदुत वार देगाटेल स्वर्गलोंग फोया, आप्पुड मेंढपाळलु वगामेगारनी आनीर, नंडा, मनाम बेथलहेमकी फदाम इंगा याद माटा परमेश्वर मनाक शप्या आदी सुदाम. 16आप्पुड वार घाई-घाईला फोईर इंगा वारकी मरीयाद, योसेफ इंगा कोट्टामला फेट्टीने बिडा कमशा. 17आप्पुड मेंढपाळलु वारनी सुशीर इंगा आ बिडा बद्दल येम शप्पीनेद उंड्या आदी वार आंदारकी शप्पीर. 18आप्पुड इनेतोर आंदार आ मेंढपाळलु शप्पीने माटा मिंदकेल आश्चर्य चकीत आय्यीर. 19पण मरीयाद इ आन्नी माटला मिंदा मनन शेशी आय दान अंतकरणला फेट्या. 20यंकसार मेंढपाळलु वारकी शप्पेदेंक वच्चीन्या आल्ले इ आन्नी माटलु इनी इंगा सुशी परमेश्वरदी गैारव इंगा स्तुती शेस्केन वापस फोईर.
21यनमीद नाळाक आंटे सुंताद दिनमु वच्ची नेंका आ बिडाद फेर येशु फेट्टेदेंक वच्या. इदी फेर वाड कडपुला उंडा काना मुंची स्वर्गदुत फेट्टीन्या.#उत्पत्ती 17:12; लेवी 12:3.
परमेश्वर भवनला येशुनदी समर्पण
22मुंदारकी मोशेन नियमशास्त्र नुसार वानदी शुद्धीकरणदी दिनमु वच्ची नेंका वार वान फैनिक यरुशलेम शहरकी येकेन वच्चीर; आदी दिनिचांग की, आ बिडान प्रभुनकी समर्पण शेयाला.#लेवी 12:6. 23आंटे प्रत्येक पहिला फुट्टीने नर प्रभुन इचांग पवित्र आनेदेंक दावाला इल्ला जे प्रभुन नियमशास्त्रला राशीनेद उंडाद आल्ले शेयाला.#निर्गम 13:2,12. 24प्रभुन नियमशास्त्रला राशीनेलेका पारव्यालदी जोडी लेकाते कबुतरी रोंड फिल्लाल यज्ञ अर्पण शेयाला आंका वार वान आंदुक येकेन वच्चीर.#लेवी 12:8.
शिमोन इंगा वानी स्तोत्रल
25आप्पुड सुडना, यरुशलेमला शिमोन फेरोड यवाड तरी वगा मनशी उंड्या. वाड नितीमान इंगा भक्तीमान उंड्या. वाड इस्राएल सांत्वनदी दावा सुदु#2:25 इस्राएल सांत्वनदी दावा सुदु यरुशलेमदी सुटकारा आय्येद दावा सुदु इंगा पवित्र आत्मा वान मिंदा उंड्या. 26इंगा प्रभुन ख्रिस्तन सुशीन शिवाय निक साव दाक फोई इल्ला पवित्र आत्मा वानकी प्रकट शेशीन्या. 27इंगा वाड आत्माला उंडीनाप्पुड परमेश्वर भवनलोंग वच्या आप्पुड आम्मा आब्बाड येशु बिडान, नियमशास्त्र रितीलेका शेशेदेंक, वान लोनीक येकेन वच्चीर, 28आप्पुड शिमोन येशुन वान शेतल्या तिस्कुन्या इंगा वाड परमेश्वरकी धन्यवाद इच्या इंगा आन्या,
29“हे प्रभु, इप्पुड नु नी वचन लेका नी दासनी शांतीता फोनिस्तुनाव#2:29 शांतीता फोनिस्तुनाव शांतीता सच्ची फोयेद .
30येनटीक की ना कंडलु नीद तारण सुशीनाय,
31आदी नु आन्नी राष्ट्रला मंदी मुंदार तैयार शेशीनाव.
32आदी यहुदी लेनोरकी प्रगट आयेदेंक यलगु इंगा नी इस्राएल मंदीद वैभव इल्ला उंडाद.”
33वान बद्दल शप्पीने माटलाता वान आम्मा आब्बाड आश्चर्य चकीत आय्यीर. 34इंगा शिमोन वारकी आशिर्वाद इच्या इंगा वान आम्मा मरीयादान आन्या, सुड, इस्राएलला शेंगेम मंदीद फडेद इंगा लेशेद आय्येदेंक इंगा यवान विरुद्ध मंदी माटलाड्यार इल्ला वगा चिन्ह आय्येदेंक इन निवडाशेदेंक वच्चीनाद.
35दिनिचांग की, शेंगेम मंदी मनलोनी विचारलु उघड कावाला इंगा नीद स्वताद जेम पण तलवारता आरपार आय्यी.
संदेष्टी हन्ना
36आंदु हन्ना फेरुद वगा संदेष्टीद निलदु. आदी आशेर वंशलोन फनुएल कुतुर उंडी शेंगेम मुसलीद आयन्या. आदी फेंडली आयनेंका दान मोगुन जताक योड यंडलु निलच्या. 37आदी चैाऱ्याऐंशी यंडलाद विधवा उंड्या इंगा परमेश्वर भवन इडशी फोवांदे उपवास इंगा प्रार्थना शेशी आदी मोब्बुफगुल निरंतर सेवा शेस्तुन्या. 38आदी आप्पुडे देगार वच्ची परमेश्वरकी धन्यवाद इच्या. यवार यरुशलेम सुटकाराद यवार दावा सुदुर वार आंदारकी आदी वान बद्दल शप्या.
येशुनदी बालपण
39आप्पुड प्रभुन नियमशास्त्र लेका आंता पुर्ण शेशीनेंका, वार गालील प्रांतलोन नासरेथकी वार उरुक वापस फोईर. 40बिडा फेद्दावोड आयका फोया इंगा शक्तीला इंगा ज्ञानला वाढास्केन फोया इंगा परमेश्वरदी कृपा वान मिंदा उंड्या.
41दर याडाद वान आम्मा आब्बाड वल्हांडन फंडगा इचांग यरुशलेम शहरकी फोदुर.#निर्गम 12:24-27; अनुवाद 16:1-8. 42आप्पुड वाड बारा यंडलावोड उंड्या, वार फंडगा रितीलेका फैनिक यरुशलेम शहरकी फोईर. 43आप्पुड फंडगाय आन्नी दिनमुल आंदु निलचीनेंका वार इल्लुक वापस फोयेदेंक यल्लीर. पण बिडा येशुड यरुशलेमलाने यंकाक निलची फो, पण वान आम्मा आब्बानकी यरका लेकुंड्या. 44वाड जताक प्रवास शेशेतोर प्रवासी मंदी जताक उंडी इल्ला समजाशी वार वगा नाडदी#2:44 वगा नाडदी 15 ते 20 किलोमीटर दावा नडस्का फोईर यंकसार वार गोनगोतला इंगा मित्रलाला वान फुडकेदेंक सुरु शेशीर. 45आप्पुड वाड वारकी शिक्काक फो, आंका वार यरुशलेम शहरकी वापस वच्चीर इंगा आंदु वार वान फुडकेदेंक आंटीर. 46मंग इल्ला आय्या की, मुड नाळा बाद वार यरुशलेमकी वापस वच्चीर आप्पुड वाड वारकी परमेश्वर भवनला शिक्या, वाड शिक्षकलाला कुसनी वारदी इनदु इंगा वारनी प्रश्नल आडगुदु. 47यवार वानदी इनीर वार आंदार वान समजबुद्धीता इंगा उत्तरलाता चकीत आय्यीर. 48यप्पुड वार वान सुशीर आप्पुड वार आश्चर्य चकीत आय्यीर. वान आम्मा वान आन्या, “बिडा, नु मा जताक इल्ला येनटीक शेस्ती? मेब्बाड इंगा निन यंता चिंता शेशी निन्नु फुडकुकेन वस्तीम.” 49येशुड वारनी आन्या, “मीर नन्नु येनटीक फुडकुदुर? निन ना परमेश्वर आब्बान इंटल्या उंड्याला, इदी मिक यरका लेकुंड्या येम?” 50पण वाड याय माटलु वार जताक माटलाड्या आय वारकी तेल्वालेद. 51मंग वाड वार जताक नासरेथ नगरकी फोया इंगा वाड वार आज्ञाला निलच्या. वान आम्मा इ आन्नी माटलु दान अंतकरणला दाशी फेट्या.
52येशुड ज्ञानला इंगा शरीरला परमेश्वर इंगा मन्सुला कृपाला वाढास्केन फोया. #1 शमुवेल 2:26; नीतिसुत्र 3:4.
اکنون انتخاب شده:
LUK 2: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید