LUK 3
3
येशुन फनुलाद सुरुवात — 3:1—4:13
बाप्तिस्मा शेशेतोड योहान इंगा वानदी संदेश
मत्तय 3:1-6; मार्क 1:2-6; योहान 1:19-23
1इप्पुड तीबिया कैसर इन पंधरा यंडला राजकारणला, यप्पुड पंत पिलात यहुदीया प्रांतोड शासक उंड्या इंगा हेरोद चौथाई गालील प्रांतोड शासक उंडी इंगा वान फेद्दा तम्मुड फिलिप्प#3:1 फिलिप्पफिलिप्प हेरोद फेद्दा तम्मुड उंड्या वान इंगोगो आम्मा कोडकु इड चौथाई इतुरीया इंगा त्राखोनीती इ देशला शासक इंगा लुसनिय इड चौथाई अबिलेनकी शासक उंड्या. 2हन्नाड इंगा कैफाड इर मुख्य याजकलु उंडीर, आप्पुड मरु भुमीला परमेश्वरदी वचन जखऱ्यान कोडकु योहान तीकुड वच्या. 3वाड यार्देन वंका देगार आजुबाजुक उंडीने पुर्ण परिसरला पापला क्षमा इचांग पश्चात्ताप शेशी बाप्तिस्मा तिस्कुनाला इल्ला घोषणा शेस्का तिरग्या.
4यशया संदेष्ट्यान पुस्तकला राशीनेलेका इदी आय्या:
“मरु भुमीला घोषणा शेशेतोनदी वाणी आय्या आदी इल्ला,
‘प्रभुनदी दावा तैयार शेयना,
वानदी दावा सरळ शेयना.
5प्रत्येक दरी निंडी फोई,
इंगा प्रत्येक कोंडा इंगा टेकड्या सपाट आय्यी,
वर्रांग सरळ आय्यी,
इंगा खडबड दावाल सपाट आय्यी.
6इंगा आंता मनुष्य जाती परमेश्वरदी तारण सुशी.’”
7वान तीकेल बाप्तिस्मा तिस्कुना वच्चीने मंदीन योहान आन्या; “हे, जहरी फामला फिल्लालाला, वच्चे कोफामकेल फारेदेंक मिमलान यवार सावधान शेशीर? 8पश्चात्तापकी योग्य इल्ला फळ इंडा इंगा मी मनलाला इल्ला आनाकुंडा की, ‘अब्राहाम मा आब्बान लेका उंडाड.’ येनटीक की निन मिक शपतान की, अब्राहाम इचांग इ राळालेल बिळ्ळु पैदा शेशेदेंक परमेश्वर समर्थ उंडाड. 9इप्पुडे शट्टु बोड्याक गोडली फेट्टी उंडाद. दिनिचांग प्रत्येक शट्टु याद शिंगार फळ इयाद आदी कोशीगास आग्गीला येशेदेंक वच्ची.”
10यंकसार समुदायलोन मंदी वान आडगीर, “इप्पुड मिम येम शेशेद?” 11वाड उत्तर इच्या, “यवार देगार रोंड आंगुल उंडाय वार यवानकी लेव वानकी वगाट इंडा इंगा यवार देगार आन्नाम उंडाद वाड पण आल्ले शेय्याला.”
12काही जकातदारलु पण बाप्तिस्मा तिस्कुनेदेंक वच्चीनीर. वार आनीर, “गुरुजी, मिम येम शेयाला?” 13वाड वारनी आन्या, मिक येम नेमाशी इच्चीनेद उंडाद दान काना जास्त दुडलु तिस्कुनाकुंडा. 14इंगा शिपाईल पण वान आडगी आनीर, “इंगा मा बद्दल येम, मिम येम शेशेद?” वाड वारनी आन्या, “यवार तीकेल पण जबरदस्ती दुडलु तिस्कुनाकुंडा, यवार मिंदा खोटाद आरोप येयाकुंडा, मिक शिक्कीने पगारलाने समाधानी उंडना.”
15आप्पुड मंदी आनंदता दावा सुदुर प्रत्येक मनशी मना अंतकरणला इडे ख्रिस्त उंडी येम आंका विचार शेयदुर. 16वार आंदारकी योहान उत्तर इच्या, “निन मिद बाप्तिस्मा नेळाता शेस्तान, पण वगाड यवाड ना काना सामर्थ्यशाली उंडाड वाड वस्तुनाड इंगा निन वान गुलाम बनाशे इंगा वान शप्पुलाद दाराम इडशे लायक पण लेन#3:16 निन वान गुलाम बनाशे इंगा वान शप्पुलाद दाराम इडशे लायक पण लेन यवारदी आना शप्पु तिशेद/फेट्टेद इदी वगा गुलामदी नीच फनी समजायदुर , वाड मिद बाप्तिस्मा पवित्र आत्माता इंगा आग्गीता शेशी. 17वानी खडाल स्वच्छ शेशेदेंक इंगा गोदमाल वान कोठारीला जमा शेशेदेंक वानदी शाटा वान शेतल्या उंडाद, पण वाड फोट्टु आराक फोई इल्लोन आग्गीला कालचेस काडी.”
18योहान इंगा शेंगेम उत्तेजन इच्चे माटलाता वारकी बोध शेशी सुवार्ता शप्या. 19योहान चौथाई शासक हेरोद इन बेद्रीच्या येनटीक की वानदी वान फेद्दा तम्मुन वडती हेरोदीया दान जताक अनैतिक सबंध उंड्या, इंगा शेंगेम वाईट माटलु वाड शेशीन्या. 20इदी आंता शेशी पण वाड इंगा वगा दुष्कर्म शेशा आदी आंटे वाड योहाननी जेलला येशा.
येशुनदी बाप्तिस्मा
21आप्पुड इल्ला आय्या की, यप्पुड आंता मंदीद बाप्तिस्मा योहान शेयदु, आप्पुड येशुनदी पण बाप्तिस्मा आय्यी वाड प्रार्थना शेशेताप्पुड मोडाम उघडाशा. 22इंगा पवित्र आत्मा शरीर रुपता कबुतर लेका वान मिंदा दिग्या इंगा मोडामलेल इल्ला वाणी आय्या की, “नु ना प्रिय कोडकु उंडाव, निन नी बद्दल शेंगेम संतुष्ट उंडान.”
येशुनदी वंशावळ
23यप्पुड येशुड वान सेवाद सुरुवात शेशा आप्पुड वाड तरी मुप्पय यंडलावोड उंड्या. मंदी वान योसेफ कोडकु समजायदुर. योसेफ एलीन कोडकु उंड्या 24एली मत्ताथान, मत्ताथ लेवीन, लेवी मल्खीन, मल्खी यन्रयान, यन्रयाड योसेफ कोडकु उंड्या. 25योसेफ मत्तीथ्यान कोडकु उंड्या मत्तीथ्याड अमोस, अमोस नहुमान, नहुम हेस्लीन, हेस्ली नग्गयान, 26नग्गय महथान, महथ मत्तीथ्यान, मत्तीथ्य शिमयीन, शिमयीड योसेखान, योसेख योदान कोडकु उंड्या. 27योदा योहान कोडकु उंड्या. योहान रेशान, रेशा जरुब्बाबेल, जरुब्बाबेल शल्तीएलान, शल्तीएल नेरीन,#एज्रा 3:2; नहेम्या 12:1. 28नेरी मल्खीन, मल्खी अद्दीन, अद्दी कोसोमान, कोसोम एल्मदामान, एल्मदाम एरान. 29एर येशुन, येशु अलिएजर, अलिएजर योरीमान, योरीम मत्ताथान, मत्ताथ लेवीन कोडकु उंड्या. 30लेवी शिमोन कोडकु उंड्या. शिमोन यहूदान, यहूदा योसेफान, योसेफ योनामान, योनाम एल्याकीम, 31एल्याकीम मल्लयान, मल्लया मिन्नान, मिन्ना मत्ताथान, मत्ताथ नाथानान, नाथान दाविदान,#2 शमुवेल 5:14. 32दाविद इशायान, इशाय ओबेदान, ओबेद बवाजान, बवाज शलमोनान, शलमोन नहशोन कोडकु उंड्या.#रुथ 4:20-22. 33नहशोन अम्मीनादाब कोडकु उंड्या, अम्मीनादाब अदामीन, अदामीन अर्णयान, अर्णय हेस्रोनान, हेस्रोन पेरेसान, पेरेस यहूदान, 34यहूदा याकोबान, याकोब इसहाकान, इसहाक अब्राहामान, अब्राहाम तेरहान, तेरह नाहोरान,#उत्पत्ती 21:3; 25:26; 1 इतिहास 1:28-34. 35नाहोर सरुगान, सरुग रऊन, रऊ पेलेगान, पेलेग एबरान, एबर शेलहान कोडकु उंड्या. 36शेलह केनान कोडकु उंड्या. केनान अर्पक्षदान, अर्पक्षद शेमान, शेम नोहान, नोहा लामेखान, 37लामेख मथुशलहान, मथुशलह हनोखान, हनोख यारेदान, यारेद महललेलान महललेल केनानान, 38केनान अनोशान, अनोश शेथान, शेथ आदामान, आदाम परमेश्वर कोडकु उंड्या.#उत्पत्ती 4:25; 5:32; 1 इतिहास 1:1-4.
اکنون انتخاب شده:
LUK 3: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید