LUK 4
4
जंगलला येशुनदी परीक्षा
मत्तय 4:1-11; मार्क 1:12-13
1येशुड पवित्र आत्माता पुर्ण निंडी यार्देन वंकाकेल वापस वच्या. मंग पवित्र आत्मा वान मरु भुमीलोंग येकेन फोया. 2आंदु शैतान वानदी चाळीस दिनमुल परीक्षा तिस्कुन्या. आ दिनमुलाला येशुड येमीच तिनालेद इंगा उपाशी दिनमुल पुर्ण आयनेंका येशुनकी आकाल आय्या. 3आप्पुड शैतान वान आन्या, जर नु परमेश्वर कोडकु उंडाव तर इ रायकी रोट्या कावाला, इल्ला आज्ञा शेय. 4येशुड वानकी उत्तर इच्या, “पवित्र शास्त्रला इल्ला राशीनेद उंडाद की, मनशी फक्त रोट्याता जगाशी इल्ला लेद.”#अनुवाद 8:3. 5मंग शैतान वान उंच जागा मिंदीक येकेन फोया इंगा वानकी वगा क्षणला जगलोनी आन्नी राज्यल सुपीच्या. 6शैतान वान आन्या, “निन निक इ आन्नी राज्यलाद अधिकार इंगा वैभव इच्यान येनटीक की आय नाक इच्चेदेंक वच्चीनाय इंगा निन ना मर्जीता आय इच्ची शकास्तान. 7दिनिचांग जर नु नाय काळ मोकती इंगा नाद आराधना शेस्ती तर इदी आंता नीद आय्यी.”
8येशुड उत्तर इच्या, “पवित्र शास्त्रला इल्ला राशीनेद उंडाद. प्रभुड नी परमेश्वर इंदे आराधना शेय इंगा फक्त वानदे सेवा शेय.”#अनुवाद 6:13-14. 9यंकसार शैतान येशुन यरुशलेम शहरकी येकेन फोया इंगा परमेश्वर भवन टोक मिंदा वान नीला फडामत्या इंगा वाड वान आन्या, “जर नु परमेश्वर कोडकु उंडाव तर इंदुकेल किंदा उडी मत! 10पवित्र शास्त्रला इल्ला राशीनेद उंडाद की,
‘नीद रक्षा 'शेशेदेंक वाड वान स्वर्गदुतलाक नी बद्दल आज्ञा शेशी,
11इंगा नीद काल राय मिंदा आपटायाराद
आंका वार निन्नु मना शेतला मिंदा झेलास कुन्यार.’”#स्तोत्रसंहिता 91:11-12.
12येशुड उत्तर इच्या, “पवित्र शास्त्रला इल्ला पण राशीनेद उंडाद की; नी प्रभु परमेश्वर इनदी परीक्षा सुडाक.” #अनुवाद 6:6. 13दिनिचांग शैतान आन्नी प्रकारी परीक्षाल तिस्कुनेद आयनेंका योग्य वेळ वच्ची नंताक येशुन देगाटेल फोया.
येशुड इडे ताराशेतोड लेखक — 4:14—9:50
14मंग पवित्र आत्मा सामर्थ्यता येशुड गालील प्रांतकी वापस फोया इंगा वान बद्दल बातमी आन्नी जागालला पसराशा. 15वाड वार यहुदी सभास्थानला नेरप्या इंगा आंदार वानदी स्तुती शेशीर.
16मंग यंदु वाड शिन्नाप्पुडकेल फेद्दावोड आयन्या आ नासरेथकी वच्या इंगा शब्बाथ दिनमु यहुदी रितीलेका यहुदी सभास्थानलोंग फोई ग्रंथ वाचाशेदेंक नीला फड्या, 17इंगा यशया संदेष्ट्यानदी पुस्तक वानकी इच्चेदेंक वच्या. वाड आदी पुस्तक तेरशा इंगा याद भाग फुडकी तिशा, आंदु इल्ला राशीनेद उंड्या.
18 “प्रभुनदी आत्मा ना मिंदा वच्चीनाद,
येनटीक की, गरीबोरकी सुवार्ता शप्पेदेंक
वाड नाद अभिषेक शेशीनाड.
कैदी शेस्का येका फोयनोरकी स्वातंत्र्यद घोषणा शेशेदेंक,
इंगा गुड्ड्योरकी कंडलु वापस शिक्केदेंक,
यवार मिंदा जुलुम आयनाद वारदी सुटका शेशेदेंक #
यशया 58:6; 61:1-2.
19 इंगा प्रभुन कृपा वर्षद घोषणा शेशेदेंक वाड
नन्नु आंपीनाड.”
20मंग पुस्तक बंद शेशीगास यहुदी सभास्थानलोन सेवककी वापस इच्ची वाड किंदा कुसन्या. इंगा सभास्थान लोन्टोर आंता मंदी वान तीकुड सुशेदेंक आंटीर. 21वाड वार जताक माटलाडेदेंक सुरुवात शेशा की, “मीर इनीने इचांग इबद इदी शास्त्रलेख पुर्ण आयनाद.” 22आप्पुड आंता मंदी वान बद्दल साक्ष इच्चेदेंक आंटीर इंगा वान नोटल्योन्केल यल्लीने कृपा माटला बद्दल वार आश्चर्य चकीत आय्यीर इंगा वार वगामेगारनी आनीर, इड योसेफ कोडकुने लेड येम?#लूक 2:42; स्तोत्रसंहिता 45:2. 23येशुड वारनी आन्या, “नक्कीच, मीर नन्नु इल्ला पण आन्यार; हे वैद्या, नु स्वताने शिंगार शेय. कफर्णहुमला याय माटलु नु शेशीनेय मिम इंटीम आय माटलु इंदु नी उळ्या नासरेथला पण शेय.” मंग वाड मुंदारकी आन्या, 24“निन मिक खरेम शपतान, यादुच संदेष्टाक वान स्वता नगरला मान्यता शिक्काद. 25निन मिक खरेम शपतान, इस्राएलला एलीयान काळला शेंगेम विधवाल उंडीर, यप्पुड साडेतीन वर्ष नंताक मोडामलेल वाना फडालेद इंगा आंता प्रदेशला फेद्दाद दुष्काळ फडीन्या. #1 राजे 17:1; 18:1. 26तरी पण एलीयान इंगोगो यादुच विधवादान देगार आंपेदेंक दालेद. वान यहुदी लेने सिदोन प्रांतलोन सारफथ इंदुड विधवादान देगार आंपेदेंक वच्या. #1 राजे 17:7-19. 27अलीशा संदेष्टान वेळला इस्राएलला शेंगेम कुष्ठरोगील उंडीर पण वार दिंटल्योन्केल यवारुच शुद्ध कालेद. फक्त सुरिया इंदुड नामान कुष्ठरोगीन शुद्ध शेशेदेंक वच्चीन्या.” #2 राजे 5:1-14. 28इदी इनी यहुदी सभास्थानलोन आंता मंदीक कोफाम वच्या. 29वार मंदी लेशीर इंगा वार येशुन शहर बैटीक गेदमेशीर इंगा या कोंडा मिंदा वानदी उर उंड्या, दान कंटाम मिंदकेल वान दोब्बेस काडेदेंक आड नंताक येका फोईर. 30पण वाड वार दिंटल्योन्केल यल्ली वान दावाता फो.
दैयाम फट्टीनोन शिंगार शेशेद
मार्क 1:21-28
31मंग वाड गालील प्रांतलोन कफर्णहुम उरुक फोया. वाड शब्बाथ दिनमुनाड यहुदी सभास्थानला वारकी नेरपुतुन्या. 32वार वान शिक्षणता आश्चर्य चकीत आय्यीर, येनटीक की वानी माटलु अधिकारयुक्त उंड्या. 33आप्पुड सभास्थानला, अशुद्ध आत्मा आंटीने वगा मनशी उंड्या इंगा वाड बेग्गे कीरली आन्या, 34हे नासरेथकर येशु, नु मा नडमा येनटीक फडताव? नु माद नाश शेशेदेंक वच्चीनाव येम? नु यवाड उंडाव इदी नाक यरका उंडाद! परमेश्वरान पवित्र कोडकु! नुये उंडाव. 35येशुड दान धमकाय मती आन्या, “तेप्पांग उंड इंगा वान फय लोन्केल यल!” आप्पुड आदी अशुद्ध आत्मा आ मनशीन भुमी मिंदा किंदा केडप्या इंगा आ मनशीक येमीच शेय्यांदे आदी वान फय लोन्केल बैटीक यल्ली फो. 36आप्पुड आंदार आश्चर्य चकीत आय्यीर इंगा वगामेगारनी माटलाडेदेंक आंटीर, इदी या प्रकारदी शब्द उंड्या? अधिकारता इंगा सामर्थ्यता वाड अशुद्ध आत्मालकी पण आज्ञा इच्ची आटलान बैटीक तिस्ताड. 37इ प्रकारता वान बद्दल कीर्ती नालुंग तीकुड प्रदेशलाला पसराशा.
शिमोन आत्ता इंगा बाकीचे रोगी मंदी
मत्तय 8:14-15; मार्क 1:29-31
38आबद येशुड सभास्थानलेल यल्लीनेंका शिमोन इल्लुक फो. शिमोन आत्ता जडमुता बिमार उंड्या. दान बागा शेयाला आंका परिवारलोन मंदी येशुनकी विनंती शेशीर. 39येशुड दान देगार नीला फड्या इंगा वाड जडमुन बेद्रीच्या इंगा दान फय लोन्केल जडमु यल्ली फो. इंगा आदी लगेच लेशी वानदी सेवा शेशेदेंक आंट्या.
40फद्दु मुनगेताप्पुड, अलग-अलग बिमारीलता बिमार उंडीने आंता मंदीन वान देगार येकेन वच्चीर. वाड आंदार नत्ती मिंदा शेय फेट्टी वारनी बागा शेशा. 41यंता तरी मंदी फय लोन्केल अशुद्ध आत्माल बैटीक यल्या. आय अशुद्ध आत्माल कीरलुदु इंगा आनदु, नु परमेश्वर कोडकु उंडाव. पण वाड ख्रिस्त उंडाड इदी आटलाक यरका उंड्या आंका वाड आटलान बेद्रीच्या इंगा येमीच माटलाडा नियालेद.
42फद्दु फुट्टीन नग्रेम, वाड एकांत जागालोंग फो. पण मंदी वान फुडकुदुर. वाड यंदु उंड्या आंदुक वार लगेच वच्चीर इंगा वार लोन्केल वाड यल्ली फोवाराद आंका वार प्रयत्न शेशीर. 43पण वाड वारनी आन्या, “परमेश्वर राज्यद सुवार्ता नाक बाकी उळाला पण शप्पाबेक येनटीक की दिनिचांगे नन्नु आंपेदेंक वच्चीनेद उंडाद.”
44मंग वाड आंता यहुदीया प्रांतलोन सभास्थानलाला सुवार्ता शपकेन फोया.
اکنون انتخاب شده:
LUK 4: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید