MAT 20
20
अंगुर बगीच्यालोन कुल्योरदी द्दष्टांत
1येशुड इंगा वगाट दाखला इच्ची शप्या, “दिनिचांग स्वर्गद राज्य इदी यादो शेन मालकुन लेका उंडाद. यवाड नस्कुलाने वान अंगुरला बगीच्या इचांग कुल्योरनी कुलीता येकेन वच्चेदेंक फोया. 2आ मनशी कुल्योरकी वगा नाड फनी इचांग वगा दीनार #20:2 वगा दीनार दीनार इदी यंडीता बनाशीनेद वगाट रोमन कलदार उंड्या. इदी शेल्ला फनी शेशेदेंक पुर्ण वगा नाडदी कुली उंड्या कुलीता आंदारकी वगा यंडीद कलदार इच्चेद कबुल शेशा इंगा वारनी अंगुरला बगीच्यालोंग फनी शेशेदेंक आंप्या. 3फद्दीना नऊ वागेताप्पुड आ मनशी संतालोंग फोया आप्पुड आंदु काही मंदी आल्ले नीला फडीनोर वानकी कमशीर. आ मंदीक येमीच फनी लेकुंड्या. 4मंग वाड वारनी आन्या, ‘मीर पण ना अंगुरला बगीच्यालोंग फोई फनी शेयना इंगा येम कुली उंडाद आदी निन मिक इच्यान.’ 5इंगा वार फनी शेशेदेंक बगीच्यालोंग फोईर, वाड वापस बारा वागता इंगा मुड वागता संताक फो इंगा आल्ले शेशा 6आय्यीद वागता आ मनशी वापस वगातुक संतालोंग फोया आप्पुड इंगा काही मंदी नीला फडीनोर वानकी कमशीर. वाड वारनी आडग्या, ‘मीर यादुच फनी शेयांदे फगुलाला इंदु येनटीक नीला फडी उंटार?’ 7आ मंदी उत्तर इच्चीर, ‘माक यवारुच फनी इयालेद.’ आ मनशी वारनी आन्या, ‘तर मंग मीर फोई ना अंगुर बगीच्याला फनी शेयना.’ 8फद्दु मुन्गीनेंका अंगुर बगीच्या मालकुड मुकादमनी आन्या, ‘कुल्योरनी फिलु इंगा वारकी वारदी कुली इचकाड, निन यवारनी आंदार काना आखरीक कुलीक यकोस्तीन वारकी पहिला कुली इ, पहिला फिल्चीने कुल्योरकी आंदार काना आखरीक कुली इ.’ 9या कुल्योर फद्दु मुनगेताप्पुड आय्यीद वागता फनी मिंदीक वच्चीनीर वार वारदी कुली तिस्कुना वच्चीर. आंदारकी वगा यंडीद कलदार कुली शिक्या. 10मंग यवारनी पहिला फनी मिंदा तिस्कुनेदेंक वच्चीन्या, वार वारदी कुली तिस्कुना वच्चीर. वारकी वाटायदु की, आंदार काना वारकी जास्त दुडलु शिक्की, पण वार आंदारकी यंडीद वगाटे कलदार शिक्या. 11वार आय तिस्कुनीर इंगा माल्कुन तीकुड तक्रार शेशेदेंक आंटीर. 12वार आनीर, ‘यवारनी आखरीक फनी मिंदा तिस्कुंटी वार फक्त वगा घंटाने फनी शेशीर. पण नु वारकी मा इंते कुली इस्ती. मिम तर फगुलाला यंडाला कष्ट शेस्तीम.’ 13पण बगीच्या मालकुड वार दिंटल्योन्टोन वगान आन्या, ‘गड्या निन नी जताक अन्याय शेयाक वच्चीनान. निन निक वगाट यंडीद कलदार कुली इच्यान दिन मिंदा मीर सहमत कालेद येम? 14येम नीद कुली उंडाद आदी तिस्को इंगा नडशेदेंक आंट, निक इच्चीनान आंते कुली नाक इ आखरी मनशीक इच्चेद उंडाद. 15निन ना दुडलाद वापर नाक बेक आल्ला शेशी शकायान येम? निन मंदी जताक बागा उंडान आंका नी कंडलाला सळसळ शेस्तान येम?’ 16इल्ले या मंदी आखरीक उंडार वार पहिला आय्यार इंगा पहिला उंडीनोर आखरीक आय्यार.”
येशुड वान मृत्यू बद्दल तिसरातुक आन्या
17येशुड यरुशलेम शहरकी फोयेताप्पुड वाड वान बारा शिष्यलान वगा तीकुड तिस्कुन्या इंगा वारनी आन्या, 18“सुडना, मनाम यरुशलेम शहर तीकुड फोयतुनाम. मनशी कोडकुन फट्टी मुख्य याजक मंदी इंगा नियमशास्त्र शिक्षकलु इर शेयता फट्टी इच्चेदेंक वच्ची. वार वानकी सच्चेद शिक्षा इच्यार. 19इंगा मजाक शेशेदेंक, देब्बाल मतेदेंक इंगा क्रुस मिंदा लटका मतेदेंक वान गैर यहुदी मंदी शेतल्या इच्यार. पण मुड नाळाक वाड वापस जिवंत आय्यी.”
वगा आम्माद दान बिळ्ळा इचांग विनंती
20याकोब इंगा योहान आम्मा दान कोडकुला जताक येशुन देगार वच्या आदी मोकाळलु टेकाशी वंगीगास वान येम तरी आडगेदेंक आंट्या. 21येशुड दान आडग्या, “निक येम बेक?” आदी आन्या, “ना वगा कोडकुन नी राज्यला नी तिने शेय तीकुड कुसनाला इंगा इंगोगोड रोड्डा शेय तीकुड कुसनाला इल्ला वचन इ.” 22पण येशुड दान आन्या, “नु येम आडगुतुनाव इदी निक तेल्वाद येम! याद प्याला निन तागेतोड उंडान आदी मिक तागा वच्ची येम?” वार आनीर, हुं, “तागा वच्ची!” 23येशुड वारनी आन्या, “मीर ना प्याला लोन्केल ताग्यार खरेम, पण ना तिने इंगा रोड्डा शेय तीकुड कुसनेद मान यवारकी इच्चेद इदी ठराय मतेतोड निन लेन, पण ना आब्बाड आदी मान यवारकी इच्चेद इदी ठराय मतनाड.” 24यप्पुड बाकी फदी शिष्यल इदी इनीर आप्पुड वार आ इद्दार तम्मुळ्ळा मिंदा नाराज आय्यीर.
सेवाद महत्व
25पण येशुड वारनी देगार फिल्ची आन्या, “गैर यहुदी मंदी राजालकी मंदी मिंदा मनाद अधिकार उंडाद इल्ला सुपेदेंक आवडास्ताद इंगा वार प्रमुख नेतालकी वारी अधिकारलु वारकी वाटाशी आल्ला वापराशेदेंक आवडास्ताद. 26पण मिद स्वभाव आल्ला लेवाराद. जर मी दिंटल्योन्केल यवारकी आना फेद्दावोड आय्येद उंटे तर वाड मी सेवक कावाला. 27इंगा यवारकी पहिला आय्येद उंडाद वाड दास कावाला. 28आंटे मीर मनशी कोडकु लेका कावाला. यल्ला वाड इंगोगोर तीकेल सेवा शेशी तिस्कुनेदेंक दालेद तर बाकीचे मंदीद सेवा शेशेदेंक इंगा शेंगेम मंदीन वार पापला लोन्केल इडपीयाला आंका वानदी जेम इच्चेदेंक वच्चीनाड.”
इद्दार गुड्ड्योरकी द्दष्टीदान
29यप्पुड येशुड इंगा वान शिष्यल यरीहो शहर लोन्केल यल्लेताप्पुड, फेद्दाद मंदीद गर्दी वान यंका वच्या. 30इंगा सुडना दावा बाजुक इद्दार गुड्ड्योर कुसनीनीर इंगा यप्पुड वार इनीर की, येशुड आंदुकेल फोयतुनाड, आप्पुड वार बेग्गे कीरली आनेदेंक आंटीर, “प्रभु, दाविद राजा कोडका. मा मिंदा दया शेय.” 31इदी इनी मंदी वारनी बेद्रीचीर इंगा वारकी तेप्पांग उंडेदेंक शप्पीर. पण वार इंगा बेग्गे कीरली आनीर, “प्रभु, दाविद राजा कोडका, मा मिंदा दया शेय.” 32मंग येशुड थांबाशा इंगा वारनी फिलच्या, वाड आडग्या, “निन मी इचांग येम शेयदुन इल्ला मिद इच्छा उंडाद?” 33आ गुड्ड्योर उत्तर इच्चीर, “प्रभु, माक कमसाला इल्ला माद इच्छा उंडाद.” 34येशुनकी वार मिंदा दया वच्या इंगा वाड वार कंडलान मुट्ट्या. आद्दे वेळला वारकी कमशेदेंक आंट्या इंगा वार वान यंका फोईर.
اکنون انتخاب شده:
MAT 20: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید