Mbandukulu 7
7
Nowa mu bwaatu
1Yaave waleele kuri Nowa ti : « Koto mu bwaatu, na kaanda dyaaku, bukuri ye kitsu wamonoko wasuunguma ha busu bwa me, mu kiseendu kimaki. 2Holo, mu mpisi kitsuumbu kya bibulu kyatsyeemeke, bibulu nsaamu byabalumi na nsaamu bya bakasi ; ngo holo mu bibulu byasumuka, mulumi mosi na mukasi mosi. 3Bwobumosi mu banoni ba yulu, holo banoni nsaamu babalumi, na nsaamu ba bakasi, mu kukebe mpisi kitsuumbu ha yulu butoto bwobunso. 4Kwakiri lumiingu lwalutsiina, tumi sa nyanokoso mvula ha butoto, mu biluumbu makuumi mana bya mwiini na makuumi mana bya butsuku. Me nyidziimbisa mpisi kimonoko, kinyiri nyayirika ha butoto. » 5Nowa wayirika momanso bunu bwamutumini Yaave.
Mbuukulu maampa yayinene
6Nowa waba na nkama saamunu dza mibvu ha yisiri mbuukulu maampa ha butoto. 7Nde wakoto na baala, na mukasi waandi, na bako baandi mu bwaatu, ha buukuri maampa. 8Bibulu byasumuka na byahele kusumuka, banoni na byobinso bikwelaandila ha butoto, 9byoolo byoolo byayisa kuri Nowa, kyamulumi na kyamukasi, mu kukoto mu bwaatu bunu bwaleeriri Nzaambi. 10Maampa mabuukula mu biluumbu nsaamu ha butoto.
11Mu mubvu wankama saamunu wa kidziingu kya Nowa, mu ngoondo yamoolo, mu kiluumbu kyakuumi na nsaamu, mu kiluumbu kikyo, lubila lwa manto ma maampa lwadzibuma na myeelu mya mayulu myadzibuma. 12Mvula yanoko ha butoto, mu biluumbu makuumi mana, mabwiisi na butsuku. 13Mu kiluumbu kikyo kya butswitswikii, Nowa, mukasi waandi, na baala baandi, Seme, Kame na Yafete, kintwaari na bakasi ba baala baandi bakoto mu bwaatu, 14na bibulu byobinso bya ku musitu bunu buri bitsuumbu byaaku, mpisi kibulu kyatwiilusu bunu buri bitsuumbu byaandi, bibulu byobinso bitembelaa ha butoto bunu buri bitsuumbu byaaku, banoni bobanso bunu buri bitsuumbu byaaku, mpisi kidumukaana na kiri na mapapu ; 15mu mpisi kyaba na muwuumunu, kyayisa kuri Nowa, byoolo byoolo, mu kukoto mu bwaatu. 16Kyamulumi na kyamukasi kya mpisi kitsuumbu, byobinso biri na muswiinyi byaba kweende mu kukoto, bunu bwaleeriri Nzaambi kuri Nowa. Na Yaave Nzaambi wakaanga bwaatu ha mambisa ma nde.
17Mbuukulu maampa yayisa mu biluumbu makuumi mana ha butoto. Maampa mafununa na mabuukula, manaanguna bwaatu ha yulu butoto. 18Maampa matoomboko, masa manyaamba malaka ha butoto, makukumuna bwaatu. 19Mve maampa yatoomboko nkati kwalaka ha butoto, madyaamisa milaandu myominso myadzaangama, miri ha butoto. 20Maampa matoomboko na maluta milaandu mu kuumi na mataanu ma mametere. 21Mpisi kya muswiinyi kiteembelaa ha butoto kyafwa : Banoni, bibulu byatwiilusu, bya ku musitu na byobinso bikweyende na baatu bobanso. 22Mpisi kyaba na muwuumunu wamwooyo mu mboombo yaandi, mpisi kyaba ha butoto kyafwa. 23Byobinso byaba ha nsi byafuukusu, kuholosono baatu, natee bibulu byatwiilusu, na bya ku musitu, natee banoni ba yulu byafuukusu. Wunu Nowa nde-kaka wasaala mwooyo na bobanso baba na nde mu bwaatu.
Nowa wapala mu bwaatu
24Maampa mafununa ha butoto kwalaka, mu nkama na, na biluumbu makuumi mataanu.
اکنون انتخاب شده:
Mbandukulu 7: ATBABC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique du Congo 2024