Mbandukulu 8
8
1Tumi Nzaambi wabaambuka mwooyo mu Nowa na bibulu byobinso byaba na nde mu bwaatu. Nzaambi waheeke kiteembu ha yulu butoto na maampa madzuuna. 2Manto ma lubila na myeelu mya mayulu byakaangama, na mvula yakamuka. 3Maampa makuumba ha yulu butoto, makwe makwiisa na kiteesu kya maampa kyakuluka, mu makuumi mataanu ma biluumbu. 4Na mu ngoondo yansaamu, mu kiluumbu kyakuumi na nsaamu, bwaatu bwateleme ha yulu mulaandu wa Ararate. 5Maampa manamitina mu kuluta natee mu ngoondo yakuumi. Mu kiluumbu kyatete kya mu ngoondo yiyo, mankoto ma milaandu mamonokono.
6Ku manunu makuumi mana ma biluumbu, Nowa wadzibula heengu dikayirika mu bwaatu. 7Nde wapatula kinkwaaka ; kyo kyapala kyayende na kyabvutuka. Nde wakiinga natee kuri maampa makanini ha yulu butoto. 8Nde wapatula beembe mu nzala kuyaaba mbuti maampa makuluka. 9Ngo beembe dyahele kubaka kibeendu kya kusuusa kuulu na dyabvutuka kuri nde ku bwaatu, bukuri kwaba maampa ha yulu butoto bwobunso. Nde walaambula kooko, wadiholo na wabweese kudikotoso kuri nde munsa bwaatu. 10Nde wabweese kukiingila biluumbu nsaamu bikimi, tumi ha kabweese kusindika beembe ku mbasi. 11Beembe dyayisa mu ntaangu nsinsika, na lukaya lwa muti olibve lwamaampa mu kinkoto. Nowa wabakula ti maampa makulukiri ha yulu butoto. 12Nowa wabweese kukiingila biluumbu nsaamu bikimi, ha kasindika beembe, diri dyasii bweese kubvutuka kuri nde ko.
13Mu ngoondo yatete, mu kiluumbu kyatete kya mubvu wankama saamunu na mosi, maampa makana ha butoto. Nowa wayaala muluri bwaatu, na wamono ti nsi yakana. 14Mu ngoondo yamoolo, mu kiluumbu kyamakuumi moolo na nsaamu, butoto bwakanini.
15Nzaambi waleele kuri Nowa ti : 16« Pala mu bwaatu, ye, mukasi waaku, baala baaku na bakasi ba baala baaku. 17Mpisi kibulu kiri kintwaari na ye, kyayirimina mu muswiinyi, banoni, bibulu bi batwiilisaa, mpisi kitaatilaa ha yulu butoto, palisa byo, babutuna na bafunina ha yulu dya butoto. » 18Nowa wapala na baala baandi, mukasi waandi, na bakasi ba baala baandi. 19Mpisi kibulu kibahelaa kutwiilisa na ki batwiilisaa, mpisi nuni na mpisi kitaatilaa ha butoto, bunu buri kitsuumbu kya byo, byapala mu bwaatu.
20Nowa watuunga dziku mu ntoono Yaave, waholo mpisi kibulu kyatsyeemeke, mpisi noni yatsyeemeke, na wayoko bikabu ha yulu dziku. 21Yaave wawuumuna mfuku yayibwete, waleele munsa mutima waandi ti : « Me nyibweese kubulila nsi mpopi ko, mu ntoono muutu, bukuri bitsimi bya mutima muutu byabiiya kuholosono butuuti bwaandi. Me nyibweese kuseembe mpisi kiri mwooyo ko, mu kiteesu ki nyirikiri ki.
22“Mu ntaangu yoyinso yiba butoto,
mamboongo na ntolulu,
nzunuku na kyoosi,
ntaangu mvula na kisiwu,
butsuku na mwiini
ka bihoto ko. »
اکنون انتخاب شده:
Mbandukulu 8: ATBABC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique du Congo 2024