ZLI VIRZI 16
16
Abram miya Ismayel ti Agar
1Saray ngwas ngi Abram a yaŋ zuŋ ta. Amma naŋ da ti ngwas beke naŋ, i zuŋ Ezipte, a zilaka Agar. 2Saray a ɓa zil naŋ Abrama na: «Ani Bumbulvuŋ a giy le, i yi ta. A ra hin a vi ngwas beke ɗu na so, asinta i sa lum mangal mizile mbele naŋ kwani.» Abram a tiɓa mingiɓi ngi Saraya le. 3Saray a vula beke naŋ Agar, zuŋ Ezipte tuwa da Abram ɓa a gi di ngwasa. Naɓa Abram a gi le vi kuruˀ angi hirwuy ngi Kanaˀanaya si. 4Abram a gi ngwas ti Agara, Agara a gi hur. A dirba Agar mupura naŋ ti hur tuwa na, a zla a pura vu naŋ ɗongor avu madiɗa naŋ Saraya. 5Akẽh na, Saray a ɓa Abrama: «Mazikiy hana gar na, zayɓi naŋ, naŋ a hirnga ɗiki. Muvuluw beke ɗu da ka, i ya ngbaŋ, amma diga naŋ mupura naŋ ti hur na, a pura vu naŋ ɗongor avu ya madiɗa naŋ Saraya. Da mikaslsla ar wala ndra ati ka i waka na, anja Bumbulvuŋ a biga ndra di!» 6Abram a mbiɗa da Saraya: «I beke ɗiki, i ka miwaŋ. Gi di kaɓa ka mawuɗo.» Dar Saray a zla ga bonoy da Agara haɗi, hã Agar a kil sindik. 7Modro ngi Bumbulvuŋ a lumaŋ, naŋ gweˀ avu miviɗiviɗi ngi yam a wuzlaɓuh mikirɗak kirɗak, gweˀ avu bohol ngi ru nga Sur, 8dar a cufuɗaŋ: «Agar beke ngi Saray, ki so ti damaka? Ki ru nga maka?» Agar a mbiɗaŋ di: «I kil ti kil tivi madiɗa ɗu Saraya.» 9Modro ngi Bumbulvuŋ a ɓaŋ: «Mi ng'avi madiɗa ɗik a muŋ, hin hirnga a mbuŋ naŋ.» 10A ɓaŋ ma na: «I sa ga ɓa dideˀ ɗikey a yam haɗi, ko mbur masa slufa taŋ gu anta.» 11Ani ka ti hur, kisa yi mangal mizile, kisa caŋ slimiɗe Ismayel, asi Bumbulvuŋ a cine tuwuy ngi bonoy ɗike le. 12Mangal ɗik a sa tiri kaɓa zungu masirik ta. A sa kiɗ vu ati mizli gar, yo mizli gar a sa kiɗam vu ati naŋ. Naŋ a sa cifi baˀ pal naŋ avu sukum naŋhay gar. 13Agar a ca slimiɗ da Bumbulvuŋ miɓaŋ ɓi zleˀe tuwa, «Elroy, Buymisemuŋ mupur ɗu.» Asi a ɓi ti kwacay naŋ zleˀe na: «Ya mupur akaka na, i ka Buymisemuŋ mupur ɗu na gisiŋ kwa?» 14Vurˀe, vigiɗ ngi yam misi ar wala ngi Kades ati Beret na, a zilaka vigiɗ ngi yam ngi mbur misi ti siifa mapuriy. 15Agar a ya mangal mizile da Abrama. Cine naŋ Abrama a caŋ slimiɗe Ismayel. 16Ti Agar miya Ismayel na, naɓa Abrama naŋ ti vi kukur dangafaɗ nga merkeɗ.
انتخاب شده:
ZLI VIRZI 16: BEGDC
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bible en Langue Guiziga © L’Alliance Biblique du Cameroun, 2011.