Matthai 28
28
Zingsuv Thupakhaana
(Mar 16:1-10; Luk 24:1-12; Jhn 20:1-10)
1Sabbath khutaa a mawluo Zaapuv ning mawdiychie ta Mary Magdalin hne a hrangpa Mary ca thluo kha mang riypata ama vaa. 2Sungkha puv ta aling a siy te; Abyipa avuoming pakha ca vuoruo taata za cung te thluokhaakhuv kha hnyi te a cunglie aa tu. 3A hmingsuo ca thinghlaa haata cuote a caw ca cahue haata a ngu. 4Thluo a huotuv tie ca ama ciy tuv pa khata a siysa yite athiypa ama lu. 5Cuorasala avuoming ta canung tie kha, “Ciy kha ung, vieluo lie ama thiepa Zingsuv nama huvpa kha ica pachang yi. 6Ama ca hing lie hing aw vyi, a ripa haakhata a thupakhaa tli. A vaw ungla a laanapa hing mang tie ung. 7Cakhutaa a catli pata cakuo ungla ziytuv tie kha, ‘Thiyna taa pathu pakhaa pata cuo tli te ata hing nama hmie luo khatana Galilee luo a silu tli, capa lie cana nama va hmung aa, ta ungla va chang tie ung.’ Ica changpa yi hing maw khya ung,” a ta yi. 8Cacuonakaw a catlisa pata thluo taa kha kaa yite, ama thlaa a zangpuo amaa lawpuo pata, ziytuv tie chang riypata amaa ruo. 9Zingsuv ta tlangkhy a taw yite, “Niema'a lie diena aw mangsue,” a ta yi. A zuchiy yite a phyi kha a paw yite amaa bie. 10Zingsuv ta, “Ciy kha ung, cakuo ungla i uvnu tie kha Galilee luo si riypata va chang tie ung, capa lie cana ina hmung'a yi,” a ta.
Thluo Huotuv Tie Ripa
11Canung tie ama kaale nguoluo ning kha thluo a huotuvpa tie chekha ca khypuv chung luo kha vaa yite, hmang chiycuona bangkhuo kha tluobyilepa tie ama va chang. 12Tluobyilepa tie ca Judah uvthyi tie hne khata a hmya yite rieka tie kha nawthuv tuokaa a hluvsa pi riypata khue ama khuo. 13“Ziytuv tie ta zuo maa hmung chung a vaw yite na a riy kha ama vya paruv, nama ta aa. 14Hing bie hing muokiy byipa ta a thyi sue kie zaw ma, kiema ta a palung patluo'a pate ruvnaana namaa taw li riypata maca rikuo'a yi,” ama ta. 15Cacuonakawta tuokaa kha a la yite ama changpa haata ama tue. Capa bie ca Judah ming hrawlie ata ning tepa hingta ama ripa bie ta a cuo.
Ziytuv Tie Rechangna
(Mar 16:14-18; Luk 24:36-39; Jhn 20:19-23; Lu 1:6-8)
16Ziytuv hlyikha ca Zingsuv ta a ripa haakhata Galilee tluo luo kha ama si. 17Ama kha hmung yite amaa bie, cuorasala chekha ca ama palung a hring. 18Zingsuv ta a ngie vie yite, “Vuoruo hne alyi lie naw hnyina bangkhuo ca pi pata i cuo tli. 19Cacuonakawta si ungla mingphang bangkhuo kha naa ziytuv va pacuo sa ungla; A paa, Asaa hne Thlaapa Pathe ming ta tiynawna va pi tie ung; 20cakhutaata ica changpa bangkhuo ama ziy riypata va pacuv tie ung. Hingpa hing maw kha ung, chuozaa ta niema'a lie ica aw puo'a yi, cuo chuona te ta,” a ta yi.#28:20 Hluo vie caa-uv lieca a chuona lie hingna Amen ama pathla chiy.
Tällä hetkellä valittuna:
Matthai 28: LNT1
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
New Testament in Chin Lautu © Bible Society of Myanmar, 2015.