Evangelijs pēc Jōņa 7
7
VII.
K. Jezus ceļā uz nūmetņu svātkim.
1Pēc tam Jezus staigōja pa Galileju; pa Judeu Jys nagribēja staigōt, jo jūdi tīkōja Jū nūnōvēt.
2Tam laikam tyvōjōs jūdu nūmetņu svātki. 3Jō brōli Jam saceja: Ej prūjom nu šenītes un dūdīs uz Judeu, ka Tovi mōcekli radzātu tūs dorbus, kurus Tu dori.#7:3 Brōli — radinīki. 4Nivīns tadei nūslāpumā nastrōdoj, jo grib byut pazeistams. Tai kai Tu taidas lītas dori, pasarōdi pasauļam atklōti. 5Pat Jō broli Jam naticēja.#7:5 Naticēja — šaubejōs par K. Jezus syutnīceibu. Daudzeji tadei dūmōja, ka apsūleitais Kristus byus pasauleigs vaļdinīks.
6Jezus tim atbiļdēja: Muns laiks vēļ navā atgōjis, bet dēļ jums laiks ir vysod.#7:6 Muns laiks — laiks, kad Maņ byus jōcīš un pasauļa pesteišonas dēļ jōmērst. 7Jyusu pasauļs navar īneist; bet Mani jys īneist, jo Es aizrōdu, ka jō dorbi ir ļauni. 8Ejte jyus uz tim svātkim; Es uz tim svātkim naīšu, jo muns laiks vēļ navā atgōjis.
9Šytū pasacejis, Jys pats palyka Galilejā.
10Kad Jō brōli iau beja uz svineibom aizgōjuši, tad ari Jys aizgōja, tikai na atklōti, bet itkai slapyn.
11Svātkūs jūdi Jō meklēja saceidami: Kur Jys ir? 12Ļaudīs daudz par Jū tyka pōrrunōts. Daži apgolvōja: Jys ir lobs; citi otkon saceja: Pavysam nē, — Jys maldynoj ļaudis. 13Tūmār atklōti nikas par Jū naīsadrūšynōja runōt, jo beidōs jūdu.
14Kad jau puse svātku beja pagōjuse, Jezus īgōja svētneicā un mōceja.#7:14 Nūmetņu svātkus jūdi svineja 14 dīnas. 15Jūdi breinōjōs saceidami: Kai Jys var zynōt Rokstus, jo navā mōcejīs.
16Jezus tim atbyldādams saceja: Muna mōceiba napaīt nu Manis poša, bet nu Tō, kas Mani syuteja. 17Kas Jō vaļu izpylda, tys pōrsalīcynōs, vai šitei mōceiba paīt nu Dīva, vai ari Es pats nu sevis runoju. 18Kas pats nu sevis runoj, tys meklej sova gūda; bet kas meklej gūda Tō, kas jū syuteja, tys ir patīseigs, un malu pi Jō navā. 19Vai tad Moizešs jums lykuma naīdeve? Bet nivīns nu jums lykuma napylda. Kōpēc jyus meklejat Mani nūnōvēt?#7:19 Jūdu tautas vacōkī beja nūlāmuši K. Jezus nūnōvēt. Te K. Jezus tautas vacōkūs lāmumu pasludynoj tautai. Bet tauta, nikō par tū nazynōdama, dūmoj, ka K. Jezus tū atteicynoj uz jū un tōpēc uzastōj pretim. 20Ļaužu pyuļs sauce: Tevi ļaunais gors ir apsēdis; kas gon Tevi grib nūnōvēt?
21Jezus atsasauce un jim saceja: Tikai vīnu lītu izdareju, bet jyus visi tam breinojitēs.#7:21 Jim — tautas vacōkajim. 22Moizešs jums īdeve apgraizeišonu, — na itkai tei byutu nu Moizeša, bet gon nu seņčim, — jyus tūmār sabata dīnā cylvāku apgraizat. 23Jo kas var sabatā pījimt apgraizeišonu un ar tū napōrkōp Moizeša lykuma, vai tad dreikstat uz Manis dusmōtīs, ka Es sabatā vysu cylvāku padareju vasalu? 24Natīsojit pēc ōrejō izskota, bet tīsojit pēc taisneibas!
25Tad daži Jeruzalemas īdzeivōtōji saceja: Vai tad šytys navā tik tys, kuru grib nūnōvēt? 26Bet raug, Jys runoj atklōti, un nikas nikō Jam nateic. Na jau eistyn prīkšnīki ir pōrsalīcynōjuši, ka Jys ir Kristus. 27Bet mes tadei zynom, nu kurīnes Jys ir; bet, kad Kristus pasarōdeis, nikas nazynōs, nu kurīnes Jys paīt. 28Tad Jezus, mōceidams svētneicā, saceja: Jyus Mani pazeistat un zinit, nu kurīnes Es asmu. Es pats nu sevis naatgōju, bet asmu Tō syuteits, kas ir taisneigs; jyus gon Jō napazeistat,#7:28 Lai gon jūdi soka pazeistam K. Jezus radinīkus, tūmār jī nazyna, nu kurīnes Jys paīt, jo napazeist Dīva Tāva, kurs Jū syuteja. 29bet Es Jū pazeistu, jo Es nu Jō paeju, un Jys Mani syuteja. 30Tī gribēja Jū apcītynōt, bet nivīns nalyka pi Jō rūkas, jo nabeja vēļ atgōjuse Jō stuņde.
31Daudz kas nu ļaudim Jam īticēja un saceja: Vai tad, kad atīs Kristus, vairōk dareis breinumu par tim, kurus Šytys padareja?
32Šytōs sarunas par Jū beja izdzērduši farizeji. Goreidznīku prīkšnīki un farizeji syuteja kolpus, lai Jū apcītynōtu.
33Jezus saceja: Es pi jums asmu tik mozu laiceņu, tad īšu uz Tū, kas Mani syuteja. 34Jyus Manis meklēsit, bes naatrassit; un kur Es asmu, tur jyus atīt navarit.#7:34 Manis meklēsit, — pēc Munas nōves jyus gribēsit, ka Pesteitōjs storp jums dzeivōtu. #7:34 Kur Es asmu — pi Dīva Tāva. 35Tad jūdi sovstarpeigi vaicōja: Kur tad Šytys aizīs, ka mes Jō navarēsim atrast? Vai tik Jys naīs tur, kur jūdi ir izbōrsteiti storp pogōnim, pogōnu mōceitu? 36Kū tys nūzeimoj, kū Jys soka: Jyus Manis meklēsit, bet naatrassit; un: Kur Es asmu, tur jyus atīt navarit?
K. Jezus apsūla Sv. Goru.
37Pādejā svātku lelajā dīnā Jezus tur stōvēja un sauce, saceidams: Kas slōpst, tys lai īt pi Manis un dzer. 38Kas Maņ tic, nu tō, kai Roksti soka, plyuss dzeiva yudiņa straume.#7:38 Nu tō sirds, dvēseles. Kas K. Jezum tic, tys na tikai sevi aplaimōs, bet ari citim ness svēteibu un laimi. 39Tū Jys saceja par Goru, kuru sajims tī, kas Jam tic. Pagaidom gon Svātais Gors vēļ nabeja (dūts), jo Jezus vēļ nabeja izslaveits.
40Daži nu ļaužu pulka, kas šytūs vōrdus dzērdēja, sauce: Eistyn Šytys ir Tys Pravīts. 41Citi saceja: Šytys ir Kristus. Daži otkon vaicōja: Vai tad Kristus nu Galilejas atīs? 42Vai tad Roksti nastōsta, ka Kristus atīs nu Davida ciļts, nu Betleema mīsta, nu kura ir Davids? 43Jō dēļ ļaudīs cēlēs nasaskaņas. 44Daži gribēja Jū jimt cīši, bet nikas pret Jū rūkas napacēle.
45Kolpi atsagrīze atpakaļ uz goreidznīku prīkšnīku un farizejim. Tī vaicōja: Kōpēc jyus Jō naatvedet? 46Kolpi atbiļdēja: Vēļ nikod cylvāks navā tai runōjis, kai šytys Cylvāks. 47Farizeji saceja: Vai tad ari jyus atļōvet sevi īvest moldūs? 48Vai tad vīns farizejs vai tautas vacōkais ir Jam īticējis? 49Bet tys nūlōdātais pyuļs, kas nu lykuma nikō nazyna.
50Bet vīns nu jūs pulka, Nikodems, kas agrōk beja (naktī) pi Jō atgōjis, atsasauce: 51Vai tad myusu lykums nūtīsoj kaidu cylvāku, īprīkš jō naizklausūt un napōrbaudūt jō dorbu? 52Tī jam atbiļdēja, saceidami: Vai tik ari tu naesi nu Galilejas? Pētej (Rokstus) un raugi, ka nu Galilejas nivīns pravīts napaīt. 53(Tad jī izstaigōja kotrs uz sovu sātu).
Tällä hetkellä valittuna:
Evangelijs pēc Jōņa 7: LGT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Aloizius Broks: Svātī roksti. Jezus Kristus Evangelijs und Apostolu Darbi 1933, Apostols vystules i apokalypsis 1937.
