Mark 13
13
1ကိုယ်တော်ယေရှုသည် ဗိမာန်တော်မှထွက်ခွာစဉ်တွင် တပည့်တော်များထဲမှတစ်ယောက်က “ကိုယ်တော်၊ လှပကြီးကျယ်သည့် ကျောက်တုံးများနှင့် ခမ်းနားထည်ဝါလှသော အဆောက်အဦးအား ကြည့်ပါလော့” ဟုလျှောက်လေသည်။ 2ထိုအခါ ကိုယ်တော်က “ဤကြီးကျယ်ခမ်းနားသည့် အဆောက်အဦးများကို ယခုသင်မြင်နေသော်လည်း ဤအရာတို့သည် ကျောက်တုံးတစ်တုံးတောင် မကျန်အောင် ဖြိုချဖျက်ဆီးခံရမည်ဖြစ်၏” ဟုမိန့်တော်မူ၏။ 3ထို့နောက် ကိုယ်တော်သည် ဗိမာန်တော်၏မျက်နှာချင်းဆိုင်အရပ်တွင် ရှိသော သံလွင်တောင်ပေါ်၌ ထိုင်နေစဉ် ပေတရု၊ ယာကုပ်၊ ယောဟန်နှင့် အန္ဒြေတို့သည် ကိုယ်တော့်ထံသို့ လာ၍ 4“ကိုယ်တော်၊ ဤအရာတွေသည် မည်သည့်အချိန်၌ ဖြစ်လာမည်နည်း။ ဤအရာတွေဖြစ်လာမည်ဆိုလျှင် မည့်သည့် နိမိတ်လက္ခဏာများအား ကျွန်ုပ်တို့ အရင်ဆုံးမြင်တွေ့ရမည်နည်း” ဟုမေးလျှောက်ကြလေသည်။ 5ကိုယ်တော်ယေရှုက “သင်တို့သည်လည်း လှည့်ဖြားမခံရစေဖို့ သတိထားကြလော့။ 6ငါ့အမည်နာမအားသုံး၍ အခွင့်အာဏာကို အယောင်ဆောင် အသုံးချ မည့်လူများ ပေါ်ထွက်လာလိမ့်မည်။ သူတို့ကိုယ်သူတို့ ‘ငါသည် ကယ်တင်ရှင် မေရှိယဖြစ်သည်’ ဟုပြောကြ၍ လူများစွာကို လိမ်လည်လှည့်ဖြားကြလိမ့်မည်။ 7စစ်ပွဲသံတွေနှင့်တခြားနေရာတွေ၌ စစ်ဖြစ်နေသည့်သတင်းများအား သင်တို့ကြားကြသည့်အခါ မကြောက်ကြနှင့်။ ဤအရာတွေသည် အမှန်တကယ် ပင် ဖြစ်ပျက်လာမှာဖြစ်သော်လည်း ဘုရားရှင်စီစဉ်တော်မူထားသည့် အဆုံးသတ် တော့မဟုတ်။ 8နိုင်ငံအချင်းချင်း၊ လူမျိုးအချင်းချင်း စစ်ပွဲတွေဖြစ်ပွားလိမ့်မည်။ ကမ္ဘာ့နေရာအနှံ့အပြားမှာ မြေငလျင်တွေ လှုပ်ခတ်၍ လူပေါင်းများစွာတို့သည် အစားအစာငတ်ပြတ်သေကြေလိမ့်မည်။ ဤကဲ့သို့အခြေအနေများသည် ကြီးမားသည့် ပြဿနာ၏ အစပိုင်းပင် ရှိပေဦးမည်။ 9သင်တို့ကိုယ်တိုင်သည်လည်း နိုးနိုးကြားကြားနေ၍ အမြဲတမ်းသတိရှိကြလော့။ လူအများသည် သင်တို့ကို ဖမ်းဆီးကာ သူတို့၏တရားလွှတ်တော်များသို့ ခေါ်ဆောင်သွားကြမည်ဖြစ်ပြီး ဓမ္မာရုံများတွင်လည်း သင်တို့ကို ရိုက်နှက်ကြလိမ့်မည်။ သင်တို့သည် ငါ၏တပည့်များဖြစ်သည့်အတွက်ကြောင့် ရှင်ဘုရင်နှင့် အာဏာပိုင်များရှေ့၌ တရားရင်ဆိုင်ကြရလိမ့်မည်။ သင်တို့သည် ငါ့အကြောင်းကို သူတို့ရှေ့၌ သက်သေခံထွက်ဆိုရလိမ့်မည်။ 10ထို့အပြင် အဆုံးသတ်အချိန်ကိုမရောက်ခင် ငါ့အကြောင်း မင်္ဂလာသတင်းကောင်းအား ကမ္ဘာပေါ်မှ လူမျိုးအပေါင်းတို့အား အသေအချာ ဟောပြောကြရမည်။ 11ဖမ်းဆီးခြင်းခံရသည့်အခါ မည်သို့ ရင်ဆိုင် ပြောဆိုကြရမည်ဆိုသည်ကို မစိုးရိမ်ကြနှင့်။ ထိုအချိန်၌ သင်တို့၏စိတ်နှလုံးနှင့် စကားပြောဆိုတာ မဟုတ်တော့ဘဲ ဉာဏ်အလင်းတော်က သင်တို့ကိုယ်စား စကားပြောဆိုလိမ့်မည်။ 12ထိုကာလမှာ ညီအစ်ကိုမောင်နှမတွေအချင်းချင်း သစ္စာ၊ မေတ္တာပျက်ကြ၍ အချင်းချင်း သေတွင်းပို့ကြလိမ့်မည်။ မိဘနှင့်သားသမီး ကြား၌လည်း မေတ္တာပျက်ပြား၍ အချင်းချင်းသတ်ဖြတ်ကြလိမ့်မည်။ 13လူတွေ က သင်တို့ကို ငါ့တပည့် နောက်လိုက်ဖြစ်၍ မုန်းတီးကြလိမ့်မည်။ သို့သော် ငါ့အပေါ် ယုံကြည်မှုခိုင်မာ၍ အဆုံးသတ်အချိန်သည့်တိုင်အောင် ဆက်လက် ယုံကြည်နေသောသူအား ဘုရားရှင်က ကယ်တင်တော်မူလိမ့်မည်။” 14“ထိုကာလ၌ စက်ဆုပ်ရွံရှာဖွယ်အရာသည် မရှိသင့်သောနေရာ၌ ရှိနေသည်ကို သင်တို့မြင်တွေ့ကြရသောအခါ ယုဒပြည်၌ ရှိနေသောသူအားလုံးတို့သည် မြင့်မားသောတောင်ကုန်းများထံသို့ အလျင်အမြန်ထွက်ပြေးကြလော့။ 15သင်သည် အိမ်ခေါင်မိုးပေါ်ရောက်နေလျှင် သင့်ပစ္စည်းတွေကို ယူရန် အိမ်ထဲသို့ပြန်မဝင်ကြနှင့်။ 16သင်သည် လယ်ကွင်းထဲ၌ ရောက်နေလျှင်လည်း အဝတ်အစားများယူရန် အိမ်ကိုမပြန်ကြနှင့်။ 17ထိုကာလသည် ကိုယ်ဝန်ဆောင်များနှင့် နို့စို့အရွယ် ကလေးငယ်များအား စောင့်ရှောက်နေရသောမိခင်များအတွက် အလွန်ဆိုးဝါးလှသည့်အချိန်ဖြစ်လိမ့်မည်။ သူတို့သည် ထွက်ပြေးရန်နှင့် သူတို့၏အသက်ကို ကယ်တင်နိုင်ဖို့ရန် အလွန်ပင်ခက်ခဲကြလိမ့်မည်။ 18ထိုသို့ဆိုးရွားလှသောအဖြစ်အပျက်များသည် ဆောင်းကာလ၌ မဖြစ်စေရန် ဆုတောင်းကြလော့။ 19အကြောင်းမူကား ဘုရားရှင်ဖန်ဆင်းတော်မူသည့် ကမ္ဘာဦးအစကတည်းကပင် ယခုတိုင်အောင် မဖြစ်စဖူး၊ နောင်တွင်လည်း ဖြစ်မည်မဟုတ်သည့် ဆင်းရဲဒုက္ခမျိုးသည် ထိုကာလ၌ ကျရောက်လိမ့်မည်။ 20ထိုဆင်းရဲဒုက္ခတွေကြုံတွေ့ရမည့် အချိန်ကာလကို ဘုရားရှင်က တိုတောင်းစေတော်မမူလျှင် မည်သူတစ်ဦး တစ်ယောက်မျှ အသက်ရှင်ကျန်ရစ်မည်မဟုတ်။ သို့သော် ဘုရားရှင်သည် သူရွေးကောက်တော်မူထားသည့်သူတို့အတွက် ထိုနေ့ရက်တို့ကို တိုတောင်းစေတော်မူလိမ့်မည်။ 21ထိုအချိန်ကာလ၌ တစ်စုံတစ်ယောက်သည် သင်တို့အား ‘ကြည့်လော့။ ဤအရပ်၌ကယ်တင်ရှင်မေရှိယရှိ၏၊’ ‘ကြည့်ကြလော့’ ဟုလိမ်ညာပြောဆိုကြလျှင် ထိုသူတို့အား လုံးဝမယုံကြည်ကြနှင့်။ 22အကြောင်းမူကား သူတို့ကိုယ်သူတို့ ကယ်တင်ရှင်မေရှိယဖြစ်၏၊ အရိယာ သူတော်စင်ဖြစ်၏ဆိုသောလူတို့သည် များစွာပေါ်ထွက်လာပြီး ထိုသူတို့သည် ဘုရားရှင်ရွေးကောက်တော်မူထားသည့်လူအများအား လိမ်လည်လှည့်ဖြားရန် အံ့ဖွယ်အမှုကိစ္စအမျိုးမျိုးကိုလည်း လုပ်ပြကြလိမ့်မည်။ 23အရာခပ်သိမ်းတို့ကို သင်တို့အား ငါကြိုတင်ပြောထားပြီဖြစ်သဖြင့် သင်တို့သည် သတိတရားကို လက်ကိုင်ထား၍ နေကြလော့။” 24“ထိုကဲ့သို့ ကြောက်မက်ဖွယ်ကောင်းသည့်အချိန်ကာလ ကျရောက်ပြီး သောအခါ နေသည် အလင်းရောင်ပျောက်ကွယ်၍ လသည်လည်း မှောင်မိုက်နေလိမ့်မည်။ 25ကောင်းကင်မှ ကြယ်တို့သည်လည်း ကြွေကျကာ ကောင်းကင်တန်ခိုးတို့သည်လည်းd တုန်လှုပ်ကြလိမ့်မည်။ 26ထို့နောက် ဘုရားရှင်စေလွှတ်တော်မူသည့် လူ့သားတော်သည် မိုးတိမ်တိုက်များဝန်းရံ၍ ကြီးမြတ်သောဘုန်းတန်ခိုးတော်နှင့် ဂုဏ်အသရေတော်ကိုဆောင်၍ ပေါ်ထွက်လာသည်ကို သင်တို့ တွေ့မြင်ရလိမ့်မည်။ 27လူ့သားတော်သည် နတ်ဒေဝါများအား စေလွှတ်၍ မိမိရွေးချယ်ထားသည့်သူများအား ကမ္ဘာမြေကြီးအစွန်းမှ မိုးကောင်းကင်အစွန်းအထိတိုင်အောင် အရပ်လေးမျက်နှာတို့မှ စုစည်းစေလိမ့်မည်။” 28“ဤ သဖန်းပင်မှ ပုံဥပမာကို သင်ယူကြလော့။ သဖန်းပင်၏ အကိုင်းအခက် တွေက သစ်ရွက်နုတွေ ထွက်လာသည့်အချိန်၌ နွေကာလနီးပြီဟု သင်တို့သိကြ၏။ 29ထိုကဲ့သို့ပင် ငါမိန့်ဆိုသည့်အကြောင်းအရာများ ဖြစ်လာသည်ကို မြင်ရသောအခါ လူ့သားတော် ပြန်လာမည့်အချိန် နီးကပ်လာပြီဆိုသည်ကို သင်တို့သိမှတ်ကြလော့။ 30သင်တို့အား ငါအမှန်ဆိုမည်ကား၊ ဤမျိုးဆက်လူများမကုန်ခင်၌ပင် ထိုအရာအားလုံးသည် ဖြစ်ပျက်ကြလိမ့်မည်။ 31ကောင်းကင်နှင့်ကမ္ဘာမြေကြီးသည် ထာဝရ မတည်မြဲသော်လည်း ငါ၏စကားများသည် အမြဲထာဝရ တည်နေမည် ဖြစ်၏။” 32“သို့သော်ထိုအရာများ ဖြစ်ပျက်လာမည့် နေ့ရက်အချိန်နာရီအား အဖ ဘုရားရှင်မှ တစ်ပါး မည်သူမျှမသိနိုင်။ ရွှေမြို့တော်၌ရှိသော နတ်ဒေဝါများအပြင် သားတော်ကိုယ်တိုင်ပင် မသိနိုင်။ 33ထိုကာလသည် မည်သည့်အချိန်ကျ ရောက်လာမည်ဆိုသည်ကို မသိနိုင်ကြသည့်အတွက် သင်တို့ သတိတရားနှင့် နိုးနိုးကြားကြားနေကြလော့။ 34ဥပမာအနေနှင့် ခရီးထွက်တော့မည့်သူ တစ်ယောက်သည် သူမထွက်ခွါမီ မိမိအိမ်မှအလုပ်သမားများနှင့် ခြံစောင့်အား သူတို့အသီးသီးလုပ်ဆောင်ရမည့်အရာများနှင့်တကွ သူပြန်လာမည့်အချိန်ကို သတိနှင့်စောင့်နေရန် မှာကြားခဲ့သည်နှင့်တူ၏။ 35အိမ်ရှင်သည် ညနေစောင်းချိန်၊ ညဦးယံအချိန် သို့မဟုတ် သန်းခေါင်ယံချိန်၊ မနက်မိုးသောက်ချိန်ဆို၍ မည်သည့်အချိန်၌ ပြန်ရောက်လာမည်နည်းဆိုတာ သင်တို့မသိနိုင်ကြသည့် အတွက် အမြဲသတိဝီရိယနှင့်စောင့်နေကြလော့။ 36ထိုသို့မဟုတ်လျှင် အိမ်ရှင်သည် ရုတ်တရက်ပြန်ရောက်လာသောအချိန်၌ သင်တို့ သတိဝီရိယ ကင်းမဲ့စွာ အိပ်ပျော်နေကြသည်ကို တွေ့လိမ့်မည်။ 37ထို့ကြောင့် သင်တို့နှင့်အတူ ဤကမ္ဘာပေါ်မှ လူခပ်သိမ်းတို့အား ငါမိန့်မှာသည်ကား၊ သတိဝီရိယနှင့် နိုးနိုးကြားကြားစောင့်နေကြလော့” ဟုမိန့်တော်မူ၏။
Tällä hetkellä valittuna:
Mark 13: TPV-RV
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.