Yowaana 7
7
Yesu neende bamwaanang'ina
1Ebyo nibyawa, Yesu yakeenda mu Galilaaya. Haba siyadaha ohukeenda mu Yudea, olwohuba Abayudaaya bali bakiiya amakesi k'ohumwiita. 2#Lef 23:34; Amal 16:13. Bulaanu, esidyaalo sy'Abayudaaya sy'Ebikaali syali aambi ohwoola. 3Bamwaanang'ina Yesu mani nibamuboolera bati, “Tula ano ochie mu Yudea, abeeki bao bosi banyale ohubona by'ohola. 4Olwohuba abulao omuundu ohola esiindu syoosi mu bweekisi n'adaha amanyihaane alafu. Ewe koti lu ohola ebiindu bino, leha esyaalo syoosi sihumanye.” 5Olwohuba kata bamwaanang'ina beene bosi haba sibamufukiiriramo. 6Yesu yababoolera ati, “Esiha syaange sisisiiri ohwoola, nae esiha syeeng'we buli ludaalo siluwo. 7Eng'we esyaalo sisinyala ohubasyuula, nae sisyuula, olwohuba mbabooleraanga endi ebiholwa byaabwe bibi. 8Eng'we abeene muchie hu sidyaalo esyo; ese haba siinjia huchia hu sidyaalo sino, olwohuba esiha syaange sisisiiri ohwoolera elalira.” 9Niyamala ohubaboola atyo, Yesu yadoong'a mu Galilaaya.
Yesu naali hu sidyaalo sy'Ebikaali
10Bamwaanang'ina nibamala ohuchia hu sidyaalo esyo, Yesu yesi mani n'achia, ataali alafu, nae mu bweekisi. 11Abayudaaya bali nibamukiiya hu sidyaalo nibaboola bati, “Omweene ali yeena bweene?” 12Mani waliwo ohumwemoonyaho huungi muno mu baandu. Nae abaandu baandi nibaboola bati, “Omuundu wuno mulai niye,” abaandi nabo nibaboola bati, “Haba, wuno ali ohukosya abaandu.” 13Nae olw'ohutya Abayudaaya, abulao omuundu yeesi owamulomalomaho alafu.
14Esidyaalo nisyali aambi ohwoola akatikaati, Yesu yeengira mu Nyuumba ya Nasaae, mani n'achaaka ohweekesa. 15Abayudaaya bawuka muno mani nibaboola bati, “Wuno anyala atye ohuba neende amakesi katyo, #7:15 ohuba neende amakesi katyo: Oba bati, ‘omusaacha wuno amanyire atye by'aboola.’ n'asisiiri ohuchaaho mu somero lyoosi daawe?” 16Yesu yabakobolamo ati, “Bi njekesa haba si byaange, nae by'oyo owaanduma; 17buli omuundu odaha ohuhola bi Nasaae adaha, achia ohumanya ati enjekesa yino yitula eyiri Nasaae oba ndi ohulomaloma hulw'obunyala bwaange omweene. 18Omuundu yeesi olomaloma hulw'obunyala bwae omweene, aba akoonya ohunyoola oluyaali lwae; nae oyo okoonya oluyaali lw'oyo owamutuma aba owadyeeri, haandi abulamo obubacha. 19Musa haba siyababeresa amalako daawe? Nae hweeng'we, abulao odiira amalako ako. Lwasiina mukiiya amakesi k'ohuunjita?” 20Abaandu abo bakobolamo bati, “Ewe oliho omusaambwa! Wiina okiiya amakesi k'ohuhwiita?” 21Yesu yabakobolamo ati, “Ndahola esy'maya silala, nae eng'we mweesi nimusiwuka. 22#Lef 12:3; Huc 17:10. Bulaanu Musa yabalagira ohuhebwa (kata ayahaba mbwe sino haba sisyataandira hu Musa, nae syataandira hu bakuuka yeefwe). Kata hu ludaalo lwa Sabbaato, muheba omuundu. 23#Yow 5:9. Omuundu nibamuheba hu ludaalo lwa Sabbaato, elako lya Musa mani lyahaya ohuhalakwa, bulaanu ese muunyoolerera olwohuba olw'ohuwonia omuundu hu ludaalo lwa Sabbaato, mani n'aba omulamu? 24Muleheenge ohuheenga omusaango ohweema hu biindu byoohumukulu biboneha, nae muheengeenge omusaango nimuloondakana neende obuluungifu bu mumanyire.”
Wuno niye Kristo?
25Sakira abaandu baandi ohutula Yerusalemu beteeba bati, “Wuno haba siniye yi bakiiya ohwiita? 26Nae nguno ali ano, alomalomera alafu, nae sibulao si bamuboolaho daawe! Sinyala ohuba siti ab'obunyala bahaba nibamayire obwadyeeri bweene bati wuno niye Kristo? 27Nae efwe humanyire yi wuno atula; nae Kristo niyaheeche, abulao omuundu yeesi olimanya yaatula.” 28Yesu yayaala niyeekesa mu Nyuumba ya Nasaae ati, “Ese muumanyire haandi yi ndula mumanyireyo? Nae ese haba sindeecha hulw'ohudaha hwaange omweene; oyo owaanduma mubwadyeeri aluwo, nae eng'we haba simumumanyire. 29Ese mumanyire, olwohuba ndula yi ali, haandi niye owaanduma.” 30Ao mani nibakiiya amakesi kohumudiira; nae abulao omuundu yeesi owamudiiraho, olwohuba esiha syae syali nisisisiiri ohwoola. 31Kata katyo, abaandu baangi bamufukiiriramo; bateeba bati, “Kristo niyaheeche, mubaasa muti yahahole obulolero buungi obuhira bu wuno aholere?”
Abasikaari batumwa ohudiira Yesu
32Abafarisaayo bawulira esidiiyiha esyo nisyemoonya hu Yesu. Mani abalaamisi bahuluundu neende Abafarisaayo nibatuma abasikaari ohuchia ohumudiira. 33Yesu mani n'aboola ati, “Njia ohuba naang'we esiha sidiidi, mani male njie eyiri oyo owaanduma. 34Muchia ohungoonya, nae haba simuchia humbona daawe; olwohuba yi ndi, eng'we simunyala hwoolayo daawe.” 35Abayudaaya mani nibaboolanira abeene-na-beene bati, “Wuno adaha ohuchia yeena bweene yi hutanyala hwoolayo? Adaha ohuchia eyiri abo abasalaanira mu syaalo sy'Abagiriki mani yeekese Abagiriki? 36Siina syeene si yekesa n'aboola ati, ‘Muchia ohungoonya, nae haba simuchia humbona daawe,’ haandi ati, ‘Yi ndi, eng'we simunyala hwoolayo daawe’?”
Esulo ch'amaachi k'obulamu
37 #
Lef 23:36. Hu ludaalo lw'esidyaalo lumaliirihayo, haandi oludaalo luhuluundu luhiramo, Yesu yasiingira yeema, mani n'alomalomera mu kono ly'aakulu n'aboola ati, “Oyo yeesi olumwa obuluwo, leha yeeche yi ndi ang'we. 38#Esek 47:1; Sak 14:8. Oyo yeesi owuufukiiriramo, koti #7:38 Oyo yeesi owuufukiiriramo: Oba bati, leha yeeche yi ndi, Oba, mani leha oyo owufukiiriramo ang'we. ebyandiiko byoolerefu lu biboola, ‘Emyaalo ky'amaachi k'obulamu kichia ohuhulukusa nikitula mu mwooyo kwae.’ ” 39Nae bulaanu Yesu yalomaloma sino, niyeekesa Mwooyo Mwoolerefu, yi abo boosi abamufukiiriramo bahanyoole; olwohuba ohwoola esiha esyo, Mwooyo Mwoolerefu yali asisiiri ohwiicha, olwohuba Yesu yali asisiiri ohubereswa oluyaali.
Abaandu bakabuhanamo
40Nae nibawulira emboosi chino, abaandu baandi baboola bati, “Wuno munabbi mweene.” 41Abaandi nibaboola bati, “Wuno Kristo niye.” Nae abaandi nabo nibaboola bati, “Kristo anyala ohutula mu Galilaaya? 42#2 Sam 7:12; Mik 5:2. Ebyandiiko byoolerefu sibiboola biti Kristo achia ohutula mulwiibulo lwa Daudi, haandi atule Bbetilehemu, esiko si Daudi yalimo?” 43Mani esidiiyiha sy'abaandu nisikabuhanamo hulwa Yesu. 44Mani abaandi mwaabo nibadaha ohudiira Yesu, nae abulao omuundu yeesi owamudiiraho.
Obutafukiirira bw'abahuluundu b'Abayudaaya
45Abasikaari mani nibakobolayo eyiri abalaamisi bahuluundu neende Abafarisaayo. Abo mani nibabateeba bati, “Lwasiina simumuleetere?” 46Abasikaari babakobolamo bati, “Abulao omuundu yeesi owalomalomaho bulai koti lu oyo alomaloma!” 47Abafarisaayo babakobolamo bati, “Eng'we mwesi mukoserwe? 48Aliwo omuundu yeesi mu bahuluundu beefwe oba mu Bafarisaayo owamufukiiriremo? 49Ohutusaho esidiiyiha sy'abaandu sino esitamanyire amalako, haandi esibwaabe.” 50#Yow 3:1,2. Nikodemu, oyo owachia eyiri Yesu hale, haandi mulala hu Bafarisaayo, mani n'ababoolera ati. 51“Amalako keefwe kafukiirira ohuheengera omuundu omusaango, n'asisiiri ohuwoseswa, neende ohumanya sy'aholere?” 52Mani nibakobolamo bati, “Hane wesi otula Galilaaya? Konyeresa mu byandiiko byoolerefu, mani ochia ohubona oti, Galilaaya, abulao omunabbi yeesi otulayo.”
53Mani buli muundu n'akobola engo wae.
Trenutno odabrano:
Yowaana 7: SAMIA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
©Bible Society of Kenya, 2019
©Bible Society of Uganda, 2019