Yowaana 8
8
Omuhasi owadiirwa mubucheke
1Nae Yesu yachia hu Lugulu lw'Emiseituuni. 2Echuli mu mabwiibwi Yesu yaachia mu Nyuumba ya Nasaae; mani abaandu boosi nibeecha yi ali. Yesu yehala aasi mani n'achaaka ohubeekesa. 3Ao abaandiiki b'Amalako ka Musa neende Abafarisaayo nibaleeta omuhasi yi badiira n'ahola obucheke, nibamuta yi buli muundu anyala ohumubona. 4Bateeba Yesu bati, “Omweekesa, omuhasi wuno anyoolerwe n'ahola obucheke mani nibamudiira. 5#Lef 20:10; Amal 22:22-24. Mu malako, Musa yatulagira ow'engeri eyo ohuhubbwaanga amakina afwe. Naawe ewe oboolaho siina?” 6Esyo ba silomaloma nibateema Yesu, hu banyoole esifune sy'ohumuwaabira omusaango. Nae Yesu yaguunama aasi, mani n'achaaka ohwandiika hu loba neende olwala lwae. 7Nae nibemeeda ohumuteeba, Yesu yasiingira yeema mani n'ababoolera ati, “Leha oyo mweeng'we otaliho neende esyonoono syoosi ataangire ohumuhubba ekina.” 8Yesu haandi n'aguunama aasi, niyaandiika hu loba neende olwala lwae. 9Nae nibawulira batyo, bachaaka ohuwaao, sya mulala-mulala, ohuchaakira hu muhuluundu mweene. Yesu n'adoong'ao yeeng'ene neende omuhasi oyo owali niyeemere mu moni wae. 10Yesu yalingaala aakulu mani n'amuteeba ati, “Muhasiing'ene, bachiire yeena? Abulao omuundu yeesi ohuheengere omusaango?” 11Omuhasi oyo yaboola ati, “Omwaami, abulao.” Yesu mani n'aboola ati, “Syesi haba siinjia huhuheengera omusaango; waao nae otonoonaangaho haandi.” #8:11 Syesi haba siinjia huhuheengera omusaango; waao nae otonoonaangaho haandi: Ebyandiiko bihuluundu bihira ohuba ebihale bileha esituundu sino, 7:53—8:11; nae ebyandiiko bihuluundu biindi nabyo bimeederaho esituundu sino ano, oba luunyuma lwa 7:36 oba luunyuma lwa 21:25 oba luunyuma lwa Luka 21:38, neende ebyandiiko bitootobaanehoomo.
Yesu obulafu bw'esyaalo
12 #
Mat 5:14; Yow 9:5. Yesu haandi niyemeeda ohulomaloma nabo n'aboola ati, “Ese ndi obulafu bw'esyaalo; oyo yeesi owunoonda, haba saachia hukeenderaanga mu siirima, nae achia ohunyoola obulafu bw'obulamu.” 13#Yow 5:31. Abafarisaayo nibamuboolera bati, “Welomalomaho omweene; nae by'olomaloma haba si byadyeeri.” 14Yesu yakobolamo ati, “Kata ndahaba nindelomalomaho omweene, bi nomanoma byadyeeri, olwohuba manyire yi ndatula neende yi njia. Nae eng'we haba simumanyire yi ndula, kata neende yi njia. 15Eng'we muheenga omisaango koti abaandu, nae ese yibulao yi heengera omusaango. 16Nae mba niheenga omusaango, eheenga yaange yiba eyadyeeri, olwohuba haba simba syeeng'ene niheenga, nae mba neende oyo owaanduma. 17#Amal 19:15. Mu malako keeng'we, syandiikwa siti, obuloli bw'abaandu babiri buba obwadyeeri. 18Ese ndeelomalomaho, haandi Laata owaanduma yomiisa bi nomanoma.” 19Mani nibamuteeba bati, “Nae Lataao ali yeena?” Yesu yakobolamo ati, “Eng'we haba simumanyire neende Laata yesi simumumanyire daawe; muba nimuumanyire, Laata yesi mwahamumanyire.” 20Emboosi chino Yesu yachilomalomera mu Nyuumba ya Nasaae naali abuundu yibabihangamo ebiyaanwa; nae abulao omuundu owamudiira, olwohuba esiha syae syali nisisisiiri ohwoola.
Haba simunyala ohwiicha yi njia
21Yesu haandi yababoolera ati, “Ese mbwao, mani muchia ohungoonya, nae mwahafwiire mu byonoono byeeng'we; eyo yi njia, eng'we simunyala ohwiichayo.” 22Abayudaaya mani nibaboola bati, “Achia ohweyiita omweene, sakira aboola ati, ‘Eyo yi njia, eng'we simunyala ohwiichayo’?” 23Yesu yababoolera ati, “Eng'we muli ab'aasi, nae ese ndi ow'aakulu; eng'we muli abohu syaalo huno, nae ese haba si ndi owohu syaalo huno. 24Sakira mbaboolera endi eng'we mwahafwiire mu byonoono byeeng'we, olwohuba mwahafwiire mu byonoono byeeng'we nimutafukiirira muti, ese Niise oyo Yi Ndi” #8:24 Yi Ndi: Oba bati, ‘Niise oyo mweene’, nilyo eliita li Ndagaano hale yeehoonyera nilyeekesa Nasaae. 25Bamuteeba bati, “Niiwe wiina?” Yesu yabakobolamo ati, “Nisyo esyo si mbeere nibaboolera ohutula muhuchaaka. 26Ndi neende ebiingi muno eby'ohubalomalomaho, neende ebiingi muno eby'ohuheengeraho omusaango; nae oyo owaanduma wadyeeri, syesi bi ndawulira ohutula yi ali nibyo bi mboolera esyaalo.” 27Haba sibamanya bati, Yesu yali ababoolera ebidiira hu Laata. 28Yesu mani n'ababoolera ati, “Nimwahabe nimumalire ohwaaniha Omwaana w'Omuundu, olwo nilwo lu mwahamanyire muti ese Niise oyo Yi Ndi, haandi muti, ese haba sihola esiindu syoosi hulw'obunyala bwaange omweene, nae nomanoma ebyo koti lu Laata yaanjekesa. 29Haandi oyo owaanduma ali naange; haba siyandehaanga syeeng'ene daawe, olwohuba buli ludaalo hola ebimusangaasa.” 30Yesu niyalomaloma emboosi echo, abaandu baangi mani nibamufukiiriramo.
Obwadyeeri buchia ohubaboolola
31Bulaanu, Yesu yaboolera Abayudaaya abamufukiiriremo ati, “Nimwemeeda ohwomiirira hu mboosi chaange, mwahabe abeeki baange badyeeri, 32mwahamanye obwadyeeri, mani obwadyeeri bwahababoolole mube abalehuule.” 33#Mat 3:9; Luk 3:8. Nabo nibamukobolamo bati, “Efwe huli abeechuhulu ba Abburahamu, haba sihubechaangaho ababoye b'omuundu yeesi. Lwasiina oboola oti, ‘Mwahabe abalehuule’?”
34Yesu yabakobolamo ati, “Mbaboolera obwadyeeri bweene endi, buli muundu yeesi owonoona, aba omuwaambe w'esyonoono. 35Nae omuwaambe haba s'adoong'aanga mu nyuumba endaalo choosi daawe; nae Omwaana niye odoong'aanga atyo endaalo choosi. 36Omwaana niyahabe ababoloole, mwahabecheenge abalehuule elalira. 37Manyire endi muli abeechuhulu ba Abburahamu; nae muli ohukiiya ohunjiita, olwohuba emboosi chaange haba sichiri neende obwiihalo mu myooyo kyeeng'we. 38Ese nomanoma si ndabona ewa Laata, mwesi muhola si mwabona ewa laata yeeng'we.”
39Nabo bamukobolamo bati, “Laata yeefwe niye Abburahamu.” Yesu yababoolera ati, “Muba nimuli abaana ba Abburahamu, mwahaholere koti Abburahamu lu yahola. 40Nae bulaanu eng'we mukiiya ohuunjita, ese omuundu obaboleere obwadyeeri bu ndawulira ohutula ewa Nasaae; sino Abburahamu haba si yasihola. 41Eng'we muhola ebyo bi laata yeeng'we yahola.” Nabo nibamuboolera bati, “Efwe haba sihwebulirwa mubucheke; huli neende Laata yeefwe mulala yeeng'ene, niye Nasaae.” 42Yesu yababoolera ati, “Nasaae aba naali Laata yeeng'we, syesi mwahaaheerere, olwohuba ndatula eyiri Nasaae mani ninjicha, haandi sindeecha hulwaange omweene, nae oyo niye owaanduma. 43Lwasiina haba simumanya si ndi ohuboola? Olwohuba haba simuli abetekefu ohuwulira emboosi yaange. 44Eng'we mutula ewa laata yeeng'we Sitaani, mani esichiiririrwa syeeng'we nisyo ohuhola bi laata yeeng'we adaha. Omweene oyo ohutulira elalira mu njaako mutemo niye, olwohuba abulamo obwadyeeri kata nabudiidi. Mani n'abacha, aba aloondakana koti lu ali, olwohuba mubacha niye haandi niye laatang'ene bubacha. 45Nae ese olwohuba nomanoma obwadyeeri, eng'we haba simuufukiirira. 46Wiina mweene hweeng'we onyala ohunyoolamo esyonoono syoosi? Ese nomanoma obwadyeeri, lwasiina eng'we haba simuufukiiriramo daawe? 47Oyo owa Nasaae, awulira emboosi cha Nasaae. Esifune sikera mwahaya ohuwulira emboosi cha Nasae, olwohuba eng'we haba simuli aba Nasaae.”
Yesu neende Abburahamu
48Abayudaaya nibamukobolamo bati, “Haba sihubeere abadyeeri nihuboola huti oli Omusamaria haandi oliho omusaambwa?” 49Yesu yakobolamo ati, “Ese haba sindiho omusaambwa daawe; nae njisa oluyaali mu Laata, nae eng'we haba simuunjisamo oluyaali daawe. 50Ese haba sindekonyera oluyaali daawe; yiluwo Oyo olukoonya, haandi niye ochia ohuba omukayi. 51Mbaboolera obwadyeeri bweene endi, buli olidiira emboosi chaange, haba siyahafwe endaalo choosi daawe.” 52Abayudaaya mani nibamuboolera bati, “Bulaanu humanyire mubwadyeeri bweene huti oliho omusaambwa. Abburahamu yafwa, koti lu banabbi bosi baafwa, nae ewe oboola oti, ‘Buli olidiira emboosi chaange, haba siyahafwe endaalo choosi.’ 53Ewe omuhunuufu ohiraho Abburahamu laata yeefwe owafwa? Abanabbi bosi baafwa! Ewe welaanga ohuba wiina?” 54Yesu yakobolamo ati, “Mba nindeeberesa oluyaali omweene, oluyaali lwaange haba silwahabeeremo obuhoonyi daawe. Nae Laata niye owuumberesa oluyaali, oyo yi muboola muti niye Nasaae weeng'we. 55Nae eng'we haba simumanyire. Nimboolere endi, haba simumanyire, mba ndi omubacha koti eng'we; nae ese mumanyire, haandi ndiira mboosi chae. 56Abburahamu laata yeeng'we yasangaalira ohubonaho oludaalo lwaange; yalubona mani yasangaala muno.” 57Ao Abayudaaya mani nibamuteeba bati, “Ewe osisiiri ohwoosa emyaaka amahumi kataanu, niiwe wabona Abburahamu?” 58Yesu yababoolera ati, “Mbaboolera obwadyeeri endi, Abburahamu n'ateebulwa, Ese niise Oyo Yi Ndi.” 59Abayudaaya mani nibabukula amakina ohumuhubba; nae Yesu n'abekisaho, mani n'atula erwaanyi w'Enyuumba ya Nasaae.
Trenutno odabrano:
Yowaana 8: SAMIA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
©Bible Society of Kenya, 2019
©Bible Society of Uganda, 2019