Lk 4
4
Yesũ Aitatwa nĩ Satani
(Mat 4.1-11; Mk 1.12-13)
1Yesũ nĩwaumie Ũsĩnĩ wa Yolotani ausũĩtwe nĩ Veva Mũtheu, na Veva ũsu amũtongoesya amũtwaa weũnĩ. 2Kũu nĩwatatiwe nĩ Satani vandũ va mĩthenya mĩongo ĩna. Mĩthenyanĩ ĩsu yonthe nde kĩndũ waaya na kwoou ĩithela nĩweew'ĩte nzaa.
3Nĩvo ĩndĩ Satani wamwĩie atĩĩ, “Ethĩwa we wĩ Mwana wa Ngai, ĩaĩe ĩvia yĩĩ yĩtw'ĩke mũkate.”
4 #
Kũt 8.3
Ĩndĩ Yesũ amũsũngĩa amwĩa atĩĩ, “Maandĩko Matheu maĩtye, ‘Mũndũ ndatũaw'a thayũ nĩ lĩu w'oka.’ ”
5Nĩvo ĩndĩ Satani watwaie Yesũ vandũ vatũlu, na amwony'a kwa mĩtũkĩ vyũ mosumbĩ onthe ma nthĩ, 6na amwĩa atĩĩ, “Nĩngũũnenga ũkũmũ ĩũlũ wa mosumbĩ aa onthe vamwe na ndaĩa syamo. Nũndũ onthe nĩnĩmanengetwe na nĩndonya kũnenga ũla ngwenda. 7Kwoou ethĩwa nũũnthaitha, aa onthe meĩthĩwa me maku.”
8 #
Kũt 6.13
Yesũ amwĩa atĩĩ, “Maandĩko Matheu maĩtye, ‘Mũthaithae Mwĩai Ngai waku, na ũimũthũkũmaa we e weka!’ ”
9Satani nĩwasyokie amũtwaa Yelũsalemu, na amũũngamya Ĩkalũnĩ vandũnĩ vala vatũlu mũno, na amwĩa atĩĩ, “Ethĩwa we wĩ Mwana wa Ngai, ĩyĩkye kuma vaa ũkakinye nthĩ, 10#Sav 91.11 nũndũ Maandĩko Matheu maĩtye, ‘Ngai akeeaĩa alaĩka make makũsũvĩe, 11#Sav 91.12 na o ta ũu makaũkwatĩĩa na moko moo, nĩ kana o na maũũ maku maikaũmĩw'e nĩ mavia.’ ”
12 #
Kũt 6.16
Yesũ amũsũngĩa amwĩa atĩĩ, “Maandĩko Matheu maĩtye, ‘Ndũkamũtate Mwĩai Ngai waku.’ ”
13Satani amina kũmũtata Yesũ kwa nzĩa syonthe, nĩwambie kũmũtia kwa kavinda.
Yesũ Ayambĩĩa Ũthũkũmi wake Kalilii
(Mat 4.12-17; Mk 1.14-15)
14Yesũ ausũĩtwe nĩ vinya wa Veva Mũtheu, nĩwasyokie Kalilii na ũvoo ĩũlũ wake wanyaĩĩka kĩla vandũ kĩsionĩ kĩu. 15Nĩwamanyĩisye andũ nyũmbanĩ sya Ayuti sya kũthaithĩa na kũmbanĩa, na onthe mamũkumya mũno.
Yesũ Ailewa nĩ Andũ ma Nasaleti
(Mat 13.53-58; Mk 6.1-6)
16Nĩvo ĩndĩ Yesũ waendie Nasaleti vala weanĩe, na mũthenyanĩ wa Savato athi nyũmbanĩ ya Ayuti ya kũthaithĩa na kũmbanĩa, o ũndũ weekaa. Nĩwaũngamie asome, 17na anengwa ĩvuku ya mwathani Ĩsaia. Nĩwayĩvingũie, na asoma vala vaĩtye:
18 #
Ĩsa 61.1-2
“Veva wa Ngai e vamwe nakwa,
nũndũ nũnyuvĩte nĩete Ũvoo Mũseo kwa ala ngya.
Nũndũmĩte nĩtavye ala ove kana nĩathasye,
na ngĩtavya ilalinda kana nikwona nthĩ.
O ta ũu nũndũmĩte novosye ala avinyĩĩe,
19na kũtavany'a kana ĩvinda ya Ngai nĩ ĩviku,
ya kwonany'a ũseo wake kwa andũ make.”
20Yesũ nĩwakũnzie ĩvuku yĩu, atũngĩa mũthũkũmi ũla wamũnengete na ekala nthĩ. Andũ onthe ala maĩ nyũmbanĩ ĩsu ya Ayuti ya kũthaithĩa na kũmbanĩa nĩmamũketeeie, 21nake ambĩĩa kũmea atĩĩ, “Maandĩko asu mweew'a nĩmeanĩa ũmũnthĩ.”
22Andũ onthe nĩmendeeiw'e mũno nĩwe, na maseng'wa nĩ ndeto nzeo ila wamatavisye. Nĩmakũlanilye atĩĩ, “Ũũ we tyo mwana wa Yosevu?”
23Yesũ amea atĩĩ, “Vate nzika nĩnĩsĩ nĩmũũndavya nthimo ĩno, ‘Ndakĩtalĩ, ĩvosye we mwene!’ O na nĩmũkũmbĩa, ‘Ĩka vaa ndũanĩ yaku o navo maũndũ ala twĩw'ĩte ũneekie Kavelinaũmu.’ ” 24#Yoa 4.44 Nĩwaendeeie kũmea atĩĩ, “Nĩmũtavya w'o kana vai mwathani wĩtĩkĩlawa ndũanĩ ĩla yake. 25#1Asu 17.1 Ĩndĩ ĩthukĩĩsyei: Kwa w'o kwaĩ aka aingĩ ndiwa nthĩnĩ wa nthĩ ya Ĩsilaeli ĩvindanĩ ya mwathani Eliya, yĩla kwaleile kua vandũ va myaka ĩtatũ na nyusu. Kwaĩ yũa yingĩ nthĩ ĩsu yonthe, 26#1Asu 17.8-16 ĩndĩ Eliya ndaatũmwa kwa ndiwa ĩmwe ya isu. Atũmiwe kwa ndiwa ĩmwe yatwĩe Nzalevathi nthĩ ya Sitoni. 27#2Asu 5.1-14 O ta ũu, nthĩ ya Ĩsilaeli kwaĩ andũ aingĩ mawaĩte mangũ#4.27 mangũ: Ũũ nĩ ũwau mũthũku mũno. Mũndũ e naw'o, syaa sya moko na maũũ nitonya kũtilĩkanga na kuma, o na manyiũũ kwanangwa, na nzw'ĩĩ kũunyũka ĩvindanĩ ya mwathani Elisa, ĩndĩ vai ũmwe woo waavow'a akathea; Naamani kuma nthĩ ya Silia nowe wavoiw'e.”
28Andũ onthe ala maĩ nyũmbanĩ ĩsu ya Ayuti ya kũthaithĩa na kũmbanĩa, nĩmathatie mũno yĩla meewie ũu. 29Nĩmaũngamie mamumaalya Yesũ nza wa ndũa, mamũtwaa mũthya wa kĩĩma kĩla ndũa ĩsu yaakĩtwe, nĩ kana makamwĩkye ũvainĩ akavalũke. 30Ĩndĩ Yesũ avĩtĩla katĩ woo athi.
Yesũ Aivosya Mũndũ Walikĩtwe nĩ Ĩimũ
(Mk 1.21-28)
31Nĩvo ĩndĩ Yesũ watheeie athi Kavelinaũmu, nayo nĩ ndũa yĩ Kalilii na amanyĩsya andũ mũthenyanĩ wa Savato. 32#Mat 7.28-29 Onthe nĩmaseng'iw'e mũno nĩ momanyĩsyo make, nũndũ amanyĩasya na ũkũmũ. 33Nyũmbanĩ ĩsu ya Ayuti ya kũthaithĩa na kũmbanĩa, vaĩ mũndũ ũmwe walikĩtwe nĩ ĩimũ. Nĩwakayie na wasya mũnene ayasya atĩĩ, 34“Ii! We Yesũ kuma Nasaleti, wĩenda kyaũ vala tũĩ? Wooka vaa kũtwananga? Nĩnĩsĩ nue ũũ! Wĩ Ũla Mũtheu wumĩte kwa Ngai.”
35Ĩndĩ Yesũ eeaĩa ĩimũ yĩu ayĩa atĩĩ, “Vindya na ũyuma mũndũnĩ ũũ!” Ĩimũ yĩu nĩyakimanisye mũndũ ũsu na nthĩ vau mbee wa andũ na yauma vala ũĩ yĩtekũmũũmĩsya.
36Andũ onthe nĩmaseng'ie mũno na mambĩĩa ũkũlany'a atĩĩ, “Ndeto ii nĩ sya mũthemba mwaũ? Mũndũ ũũ eĩaĩa maimũ na ũkũmũ na vinya na mayuma!” 37Ũvoo wake nĩwambĩĩie kũnyaĩĩka kĩla vandũ kĩsionĩ kĩu.
Yesũ Aivosya Andũ Aingĩ
(Mat 8.14-17; Mk 1.29-34)
38Yesũ nĩwaumie nyũmbanĩ ĩsu ya Ayuti ya kũthaithĩa na kũmbanĩa athi mũsyĩ kwa Simioni. Inyia wa mũka wa Simioni aĩ mũwau ndetema ĩla nene na andũ mamwĩsũva Yesũ amũvosye. 39Yesũ nĩwaendie aũngama vakuvĩ nake na eeaĩa ndetema ĩsu nayo yavoa, na mũndũ mũka ũsu ookĩla o vau kwa vau na ambĩĩa kũmathokya.
40Vaa wĩoo syũa yathũa, andũ onthe ala maĩ na andũ mawaĩte mowau me kĩvathũkany'o nĩmamaetie vala ve Yesũ. Nĩwailĩĩile kĩla ũmwe moko amavosya onthe. 41Maimũ o namo nĩmaumie andũnĩ aingĩ maneenete na wasya mũnene mayasya atĩĩ, “We wĩ Mwana wa Ngai!”
Yesũ nĩwakanisye maimũ asu, na ndaametĩkĩlya maneene ũndũ, nũndũ nĩmeesĩ kana nĩwe Klĩsto.
Yesũ Aimanyĩsya Nyũmbanĩ sya Ayuti sya Kũthaithĩa na Kũmbanĩa
(Mk 1.35-39)
42Ũnĩ ũsu vaa kũitheatheana, Yesũ nĩwaumie kũu athi vandũ vate andũ. Andũ nĩmambĩĩie kũmũmantha, na yĩla mamwonie matata kũmũsiĩĩa ndakaume kũu kwoo. 43Ĩndĩ Yesũ amea atĩĩ, “No nginya nĩtavany'e Ũvoo Mũseo ĩũlũ wa Ũsumbĩ wa Ngai ndũanĩ ila ingĩ o nasyo, nũndũ natũmiwe kwa kĩtumi kĩu.”
44Kwoou nĩwaendeeie na kũtavany'a ũvoo ũsu nyũmbanĩ sya Ayuti sya kũthaithĩa na kũmbanĩa ila syĩ Yutia.
Trenutno odabrano:
Lk 4: KAMBA
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
BIBLE SOCIETY OF KENYA © 2011