Vilinga 4
4
Navasopesa Petulu naYowano
1Omu Petulu naYowano vapwile nakuhanjika kuli vatu, vapilishitu namukulwane wavaka-kulama Tembele navaSatuse
2vapihililile navo chikuma mwomwo vanangwilenga vatu nakwambulula ngwavo muli Yesu muli kusanguka chavafu.
3Kaha vavakwachile nakuvahaka mukamenga nomu kwachele, mwomwo halwola vavakwachile likumbi lyapwile linalauka lyehi.
4Oloze vaze vevwile mazu, vavavulu vafwelelele, hakulava malunga kaha, vahetele kafwe mumakombakaji atanu (5,000).
5Kaha omu kwachele, vaka-kuyula javaYuleya navakulwane navaka-kusoneka, vakungulukilile muYelusalema,
6na Anase, uze kapilishitu wakulitulaho, naKayafwase naYowano naAlekesande, navosena vaze vakutanga yakapilishitu wakulitulaho.
7Kaha omu vemikile vaPetulu naYowano mukachi kavo, vavehwojwele ngwavo, Echi munachilingi nangolo muka? Nyi mulijina lyeya?
8Haze vene Petulu, hakupwa wakuzala naShipilitu Wajila, avambile ngwenyi, Enu vaka-kuyula vatu, nayenu vakulwane,
9nge muli nakutwihwojola lelo hachuma chamwaza echi tunalingila ou mutu waluuta, ngwenu vanamuhindula mujila muka,
10tachikizenu muvosena, navaIsalele vosena ngwenu, mulijina lyaYesu Kulishitu wakuNazaleta, Uze mwapapalishile hakulusu, Uze Kalunga asangula muvafu, muli Ikiye mukiko munemanyina ou mutu walambwe kumeso enu.
11 Ou Yesu, Ikiye vene
Lilolwa lize mwalumbilishile enu vaka-kutunga Tembele,
Likiko linapu jino Mutwe wakukashisa mbango yazuvo.
12Kaha ulwilo kaweshi muli wekako, mwomwo mwishi yamelu kamweshi lijina lyeka vanahane vatu mangana vatulwile nalyoko, kuvanga lyaYesu kaha.
13Jino vakiko hakumona kumika chaPetulu naYowano, nakutachikiza nawa ngwavo ava vatu vakuzeneka kunanguka, vangana vene, valikomokelele — hakiko vatachikijilile ngwavo vapwanga naYesu hamwe.
14Kaha hakumona uze vahindwile nemana navo hamwe, kavamwene mwakulingulwilako.
15Jino omu vavalwezele valovoke muzango yavaYuleya#4:15 MuchiHelase ngwavo, KuSunendeline., vakiko vasalilemo nakulihwojola
16ngwavo, Natulinga muka naava vatu? Mwomwo vaka-Yelusalema vosena vanatachikiza ngwavo muli vakiko munasoloka vene chinjikizo chakulumbunuka, kaha katweshi kuhasa kuchihamikako.
17Oloze kuchina nachitanda muli vatu — tuvevwisenu woma ngwetu kanda vakahanjika cheka kuli mutu naumwe mulijina eliko.
18Kaha vavasanyikile nakuvakanda kuhanjika chipwe kunangula cheka mulijina lyaYesu.
19Oloze Petulu naYowano vavakumbulwile ngwavo, Shinganyekenu enu vavene, nge choloka kumeso aKalunga kwivwilila enu kuhambakana Kalunga.
20Mwomwo etu katweshi kuhasa kulitwamina kuvuluka evi tunamono nakwivwako.
21Kaha omu vavevwishile cheka woma hakuvatenukila, vavechele — kavamwene mwakuvazangamishilako, mwomwo wavaze vatu, mwomwo vosena vapwile nakwalisa Kalunga haupahu wenyi mwomwo wachuma kana chasolokele.
22Mwomwo chize chinjikizo chakuhindula valingile, vachilingile hali mutu apwile namyaka yakuhambakana makumi awana (40).
Vaka-kufwelela navalomba kumika
23Kaha omu vavechele, vayile kuli vakwavo vaka-kufwelela, nakuvalweza mwosena muze vavambile vaze vapilishitu vavalemu navakulwane.
24Jino vakiko hakuchivwa valombele Kalunga namuchima umwe nakwamba ngwavo, Ove Mwata wakulitulaho wátangile lilu namavu nakalungalwiji navyosena vize vyatwamamo,
25Ove wáhanjikilile mukanwa kangamba yove Ndavichi, kakuluka yetu, muli Shipilitu Wajila ngwove,
Mwomwo ika vaka-mafuchi vanazungumuka nautenu?
Kaha mwomwo ika vatu vanakwachila punga yayipi yakulishina tuhu?
26Vamyangana vahamavu vanamwimanyina,
Vaka-kuyula vanalikungulula
Nakole naMWATA nayOu Kulishitu#4:26 Mokomoko ngwenyi, NayOu wenyi awavisa. yenyi.
27Mwomwo mwamuchano vene, Helote naPondeu Pilatu navaka-mafuchi navaIsalele, valikungulwile munganda yino nakwimanyina Ngamba yove wajila nakole, Ou Yesu, wawavisa,
28mangana valinge mweshomwo wátongwele lyehi nalivoko lyove lyangolo napunga yove ngwove mukasoloke.
29Kaha jino, Ove MWATA, tala omu vali nakutwivwisa woma, tuhane uhashi etu vandungo jove, tutwalilileho nakumika mwosena, omu natwambulula mazu ove,
30oku unolola livoko lyove nakuhindula vatu, nakulinga vinjikizo navyakukomwesa mulijina lyaNgamba yove wajila Yesu.
31Kaha omu vakumishile kulomba, muze vakungulukilile mwandendele, kaha vosena vazalile naShipilitu Wajila, kaha vomikile nakwambulula mazu aKalunga.
Vaka-kufwelela vayoyelelenga muvuwa
32 Lize liyongomena lyavaze váfwelelele, lyapwile namuchima umwe nakujina#4:32 MuchiHelase ngwavo, mwono umwe kaha. chimwe kaha. Kaha kakwapwile naumwe avulukilenga chimwe chakuvikumba vyenyi ngwenyi chenyi kahako, oloze vayoyelelenga muvuwa.
33Kaha vaposetolo vambulwilenga unjiho wakuvuluka kusanguka chaMwata Yesu nangolo jajinene, kaha likoji lyaKalunga lyalinene lyakafwile vosena.
34Shikaho muli vakiko kamwapwile naumwe wakukalikizako, mwomwo vaze vapwile namavu najizuvo vavilanjishilenga, kaha vize vawanyine vavinehele
35kuli vaposetolo#4:35 MuchiHelase ngwavo, nakuvitumbika kumahinji avaposetolo., kaha valipangililengavyo mutu himutu kutesa nakukalikiza chenyi.
36Kaha Yosefwe, uze vavulukilenga vaposetolo ngwavo, Mbalanape (kulumbunuka ngwavo, Mwana-kuvendejeka), kaLevi wakuKupulusu,
37apwile namavu, kaha awalanjishile nakuneha jimbongo kuli vaposetolo#4:37 MuchiHelase ngwavo, nakujitumbika kumahinji avaposetolo.
Trenutno odabrano:
Vilinga 4: LUE
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of Zambia