མཛད༌པ། 1
1
ཡི་ཤུ་ཞིང་ཁམས་ག་ བསྣམས་པ༌ལ།
1དྲག་ཤོ་ཐི་ཡོ་ཕི་ལཱས་ ཇི་གི་འབྲི་ཁཱན་ གོ་མ་ག་དཔེ་ཆ་ནང་ཀ་ ཡི་ཤུ་གི་ ཕྱག་ལཱ་གནང་མེ་ གོ་ཙུག་ཏེན་གེ་ རོ་ཀི་ཡེ་ཁཱན་དང་མཛད་ཁཱན་ ཐམས་ཅན་ག་ཀོར་གེ་ ཇི་གི་འབྲི་བ་ཆོ༌ཝ། 2རོག་ཞིང་ཁམས་ག་ མ་བསྣམས་པ་སག་པུ་ རོ་ཀི་ཡེ་ཁཱན་དང་ མཛད་ཁཱན་ག་ཀོར་གེ་ ཇི་གི་འབྲི་བ་ཆོ༌ཝ། དག་པ་ཀབ་ཉི་ རོག་ཞིང་ཁམས་ག་ མ་བསྣམས་པེ་གོ་མ་ དམ་པའི་ཐུགས་ཉིད་ག་ དབང་ཚད་གི་ཨ་ཉི་ རོ་ཀི་སི་ཁཱན་ སྐུ་ཚབ་བ་ཀ་ བཀའ་གནང་མ༌ལ། 3རོག་གཤགས་ཉི་ ངམ་བི་ནང་ 40 ག་བར་ཀ་ རོ་ཀི་རོག་ཏེ་བ་ཀ་ ཤེབ་མང་པུ་ཐུར་ མཇལ་ཁ་གནང་ཉི་ རོག་གསོན་པོ་ཨ་ཉི་བཞུགས་པ་ཅ་དག་ཉི་ ཁུངས་ཀེ་བ༌ལ། རོ་ཀི་རོག་ཏེ་བ་ཀ་ མཇལ་ཁ་གནང་ཐཱན་ དཀོན་མཆོག་ག་རྒྱལ་སྲིད་ག་ཀོར་གེ་ གསུང་གྲོས་མཛད་པ༌ལ།
4ཉི་རོག་ རོག་ཏེ་བ་ཀབ་ཉི་ བཞུགས་པེ་གང་ཀ་ རོ་ཀི་ཨོ་ཐེན་གསུངས་ཉི་ བཀའ་གནང་མ་ལ་ ཨ་པ་གི་ དབུ་མནའ་བཞེས་ཁཱན་ མ་གནང་མ་སག་པུ་ ཡ་རུ་ཤ་ལེམ་ཐུབ་ཐ་ཉི་ ཨོ་ག་རང་མ་དི། ཨོ་ཉ་ཀོར་གེ་ ཇི་གི་ན་ཧ་ གོ་མ་གེ་རང་ ཡེག་པ་ཆོ༌ཝ། 5ཡུ་ཧན་ན་གི་ རི་གི་ཨ་ཉི་ ཁྲུས་གསོར་ཕིན་ཆོ༌ཝ། དག་པ་ཀབ་ཉི་ ནོང་ཉིག་ཙིང་སམ་ཕང་ག་ བར་ཀ་རང་ ན་ཧ་བ་ དམ་པའི་ཐུགས་ཉིད་གི་ཨ་ཉི་ ཁྲུས་གསོར་གནང་མེ་དག༌ཉི༎
ཡི་ཤུ་ཞིང་ཁམས་ག་ བསྣམས་པ༌ལ།
6སྐུ་ཚབ་བ་ ཡི་ཤུ་ཀབ་ཉི་རང་ བཞུགས་པེ་གང་ཀ་ རོག་ཏེ་བ་ཀི་ རོ་ཀ་ཞུ་ཝ་ལ་ གཙོ་བོ་ ཨོམ་ནཱན་གི་ ཨིས་རེལ་ག་རྒྱལ་སྲིད་ ལོག་ཉི་གནང་མེ་སྨོ་དག༌ཉི།
7ཡི་ཤུ་གི་ རོག་ཏེ་བ་ཀ་ གསུངས་མ་ལ་ དུས་ཙུན་དང་དབྱིན་ཚེས་ཤོ་ ཨ་པ་རོག་ཏེན་ག་ དབང་ཚད་གི་ཨ་ཉི་ ཀག་པ༌ཅ། ཉི་ཨོ་ཉ་བ་ ཧ་ལ་ཇུང་མེ་གི་ལ་སྨོ་ ན་ཤི་སེ་ལེ་མ་ཁེ༌ལ། 8དག་པ་ཀབ་ཉི་ དམ་པའི་ཐུགས་ཉིད་ ན་ཧ་ཐུང་ཀ་ བྱོན་མ་ཀབ་ཉི་ ན་ཤི་དབང་ཉོང༌པེ། ཉི་ན་ཧ་བ་ ཡ་རུ་ཤ་ལེམ་ག་དང་ ཡ་ཧུ་དི་ཡ་ ཐམས་ཅན་ག་ ཉི་ས་མ་རི་ཡ་དང་ འཛམ་གླིང་ཇུ་ཀ་སག་པུ་རང་ ཇ་ག་དེན་གེ་ འཛོམས་དཔང་རི་ལེ་དག༌ཉི།
9རོ་ཀི་ ཨོ་ཐེན་གསུངས་ཆུམ་དེན་གེ་ རོག་ཏེ་བ་ཀ་གུབ་ཀ་རང་ རོག་ཞིང་ཁམས་ག་བསྣམས་པ༌ལ། ཉི་རོག་མུག་པ་ནང་ཀ་ནུབ་ཉི་ རོག་ཏེ་བ་ཀི་ རོག་མཇལ་བེ་མར་བ༌ལ། 10རོག་ཏེ་བ་ ཡི་ཤུ་ག་བྱོན་མ་ག་ གོད་ཉི་རང་ཆོ་ལེ་གང་ཀ་ ནམ་བཟའ་བ་ལིང་མིན་ཨ་ཝ་ཡེ་ཁཱན་ སོ་ངོ་ཉིག་ཙིང་ རོག་ཏེ་བ་ཀ་ ར་ག་ཐིང་ཉི་ བཞུགས་པ་ཆོ་ཝ༌ལ། 11རོག་ཉིག་ཙིང་གི་ རོག་ཏེ་བ་ཀ་ གསུངས་མ་ལ་ ག་ལིལ་ག་སོ་ངོ་བ་ ན་ཧ་བ་ ཐ་ཧང་ཨ་ཉི་ཐིང་ཉི་ ངམ་ཐུང་ཀ་ གོད་ཉི་རང་ཆོན་ཅ་ཡ། ན་ཧ་པོང་ཀེ་ ཞིང་ཁམས་ག་ཏཱན་ བསྣམས་ཁཱན་ཡི་ཤུ་ ན་ཤི་ རོག་ཧང་ཏེན་ཨ་ཉི་ ཞིང་ཁམས་ག་བསྣམས་པ་ག་ ཐོང་མ་གི་ལ་སྨོ་ ཨུ་ཉུ་པུརུས་ཀིན་ཨ་ཉི་རང་ ལོག་ཉི་བྱོན་མེ་དག༌ཉི༎
སྐུ་ཚབ་སིང་མ་སི་ཝ༌ལ།
12ཉི་སྐུ་ཚབ་བ་ ཨོ་ལིབ་ཤིང་ཕུ་གེ་ ཡ་རུ་ཤ་ལེམ་ག་ཏཱན་ ལོག་ཉི་བྱོན་མ༌ལ། ཉི་ཨོ་ལིབ་ཤིང་ཕུ་གེ་ ཡ་རུ་ཤ་ལེམ་སག་པུ་ ཀི་ལོ་མི་ཊར་ ཐུར་ཕང་ག་རྩིས་ ཅ་གི་ཝ༌ལ།
13ཉི་རོག་ཏེ་བ་ ཁྲོམ་ག་ཕེབས་ཏེན་གེ་ རོག་ཏེ་བ་བཞུགས་ཁཱན་ ཐོ་ཀ་ཕའི་ནང་ཀ་ནུ་ཕ༌ལ། ཉི་རོག་ཏེ་བ་ཤོ་ པ་ཏྲུས་ ཡུ་ཧན་ན་ ཡ་ཀུབ་ ཨན་དྲི་ཡཱས་ ཕི་ལིབ་ བར་ཐོ་ལོ་མའི་ མ་ཏི་ ཐོ་མ་ ཨལ་ཕ་ཡཱས་ག་ཟ་ ཡ་ཀུབ་ རང་ཏེན་ག་རྒྱལ་ཁབ་ཕང་ཁཱན་ སི་མོན་ ཉི་ཡ་ཀུབ་ག་ཟ་ ཡ་ཧུ་ད་ ཨོ་ཉ་བ་གི་ཝ༌ལ། 14ཉི་རོག་ཏེ་བ་ སྨོན་ལམ་ཞུ་ལེ་དེན་གེ་ ཆམ་ཆམ་རང་ དེབ་ཀ་ཛོ་མ༌ལ། ཉི་མེ་ཝག་ཙ་བ་དང་ ཡི་ཤུ་ག་ཡུམ་མ་རི་ཡམ་ ཉི་རོ་ཀ་བོ་ཉིང་བ་བུ་ རོག་ཏེ་བ་ཀབ་ཉི་ ཏབ་ཐུར་ཛོམ་ཅ་གི་ཝ༌ལ།
15ཨུ་ཉུ་གང་ཀ་ དད་པ་ཨ་ཁཱན་བ་ ཛོ་མ༌ལ། ཉི་རོག་ཏེ་བ་དོམ་གེ་ 120 ཕང་ག་ རྩིས་ཆོ་ཝ་གི་ཝ༌ལ། ཉི་པ་ཏྲུས་གི་ ག་ཐིང་ཐཱན་ གསུངས་མ་ལ་ 16ཡུང་ཟི་བ་ གསུང་རབ་ནང་ཀ་ ཡ་ཧུ་ད་ཁེ་པ་ ཡི་ཤུ་ཙུང་ཁཱན་བ་ རིག་ཁཱན་རི་ལེ་དག་ཉི་ དམ་པའི་ཐུགས་ཉིད་ག་ དབང་གི་ཨ་ཉི་ དཔོན་ད་ཝུད་ག་ ཞལ་གེ་གསུངས་ཁཱན་གསུང་ཁེ་པ་ དེན་ཐ་འགྲུབ་ཕེ་ཁེ་ཝ་ཆོ༌ཝ། 17ཡ་ཧུ་ད་བུ་ ཨ་ཧ་སྡེ་ཚན་ག་པོང་ཀེ་ ཐུར་གི་ཝ་ཆོ༌ཝ། ཉི་ཨ་ཧ་ཨོ་ཐ་ལའི་ཁ་ག་ རོ་ཀི་ཨ་ལེ་ཁེ་ཝ་ག་ ལའི་ཉོང་པ་ཆོ༌ཝ།
18རོ་ཀི་ལའི་ངན་པ་ ཨ་ཝ་ག་ངེ་ལོང་གི་ཨ་ཉི་ ཨུང་ཐུར་ངོ༌ཝ། ཉི་ཨོ་ཉ་ག་ རོ་ཀ་ཤ་རང་ དོང་ཏ་ཞུད་ཁེ་ཉི་ཤི༌ཝ། ཉི་རོ་ཀ་ཕོ་ལང་ཧོད་ཉི་ ཁི་ལེ་ཐམས་ཅན་རང་ ཕིས་ཀ་ཤོན་ཁེ༌ཝ། 19ཉི་ཡ་རུ་ཤ་ལེམ་ག་ཆོ་ཁཱན་ སོ་ངོ་ཐམས་ཅན་གི་ ཨོ་ཉ་ཀོར་གེ་ ན་ཐ་ཉི་ རོག་ཏེ་བ་ཀ་ལོ་གེ་ཨ་ཉི་ ཨོ་ཉ་ཨུང་ག་མིང་ ཨ་ཁེལ་ད་མ་ཨ་ཉི་ཐ༌ཝ། ཨོ་ཉ་ག་དེན་ཐ་ཤོ་ ཞི་ག་ཨུང་དག་པེ་གི་ཝ༌ལ།
20མགུར་མ་ག་ དཔེ་ཆ་ནང་ཀ་འབྲི་བ་ཅ་ ཨོ་ཐ་ཕའི་ཏོང་པུ་རིན་ཆེན་ ཉི་ཨོ་ཐ་ཕའི་ནང་ཀ་ ཨི་བི་རང་ མ་ཆོན་ཆེན་#1:20 མགུར་མ་ག་དཔེ་ཆ་ 69:25དག༌ཉི། ཉི་ཨོ་ཐེན་བུ་འབྲི་བ་ཅ་ རོ་ཀ་ལའི་ བཱརའ་གི་བུན་ཆེན་#1:20 མགུར་མ་ག་དཔེ་ཆ་ 109:8དག༌ཉི།
21-22ཨོ་ཉི་ཨ་དེན་གེ་ གཙོ་བོ་ཡི་ཤུ་གཤགས་པ་གེ་ གསོན་པོ་ཨ་ཉི་སྐུ་བཞེངས་པ་ཀོར་གེ་ འཛོམས་དཔང་ཨ་ལེ་དེན་གེ་ སོ་ངོ་ཐུར་ ཨ་ཧ་དྲེ་ཀ་ནུ་ཕེ་ཁེ༌ལེ། ཨོ་ཉ་སོ་ངོ་ཤོ་ ཡུ་ཧན་ན་གི་ ཁྲུས་གསོར་ག་ཀོར་གེ་ གསུང་བཤད་པ་གེ་ གོ་ཙུག་ཉི་ ཨ་ཧ་དྲེ་ཀེ་ ཡི་ཤུ་ཞིང་ཁམས་ག་ བསྣམས་པ་སག་པུ་རང་ ཉི་གཙོ་བོ་ཡི་ཤུ་ ཨའི་ཀབ་ཉི་ཏབ་ཐུར་ག་ བཞུགས་པེ་གང་ཀ་ ལེང་ཐེང་བྱོན་མ་ཀབ་ཉི་ དུས་ཏ་བུ་རང་ ཨ་ཧ་དྲེ་ཀ་ཆོ་ཁཱན་ཚཱས་པེ་དག༌ཉི།
23ཉི་རོག་ཏེ་བ་ཀི་ སོ་ངོ་ཉིག་ཙིང་ག་མིང་ཤོ་ཝ་ལ་ བར་ས་བཱས་དག་ཁཱན་ ཡོ་སེཕ་ (རོག་ཤོ་ ཡུས་ཏཱས་ཨ་ཉི་བུ་རཱན་ཆོ༌ཝ།) ཉི་ཨོམ་ཐུར་ག་མིང་ཤོ་ མ་ཏི་ཡཱས་གི་ཝ༌ལ། 24-25ཨོ་ཉ་གེ་ རོག་ཏེ་བ་ཀི་ སྨོན་ལམ་ཞུ་ཝ་ལ་ གཙོ་བོ་ སོ་ངོ་ཐམས་ཅན་ག་སེམས་ ཧང་ད་བུ་ཅ་གི་ལ་སྨོ་ ནཱན་གི་མཁྱེན༌ཅ། ཉི་ཨོམ་རོག་ རོག་ཏེན་ག་བཱརང་ཀ་དི་ཁཱན་ ཡ་ཧུ་ད་ག་ཚ་མང་ སྐུ་ཚབ་ཨ་ཉི་ ལའི་ཨ་ལེ་དེན་གེ་ ནཱན་གི་ རོག་ཉིག་ཙིང་གེ་ ཨི་བི་སི་ཝ་གི་ལ་སྨོ་ ཨ་ཧ་གེན་གནང་ཤོ་དག༌ཉི། 26ཨོ་ཉ་ཚི་ངེ་ རོག་ཏེ་བ་ཀི་ རོག་ཉིག་ཙིང་ག་མིང་ ཤུ་གུ་ག་འབྲི་ཉི་ཏྲོག་ཐཱན་ ཨི་བི་ཁེ་ན་སྨོ་ གོད་པ་ཀབ་ཉི་ མ་ཏི་ཡཱས་ཁེ་ཝ༌ལ། ཉི་ཨོ་ཉ་གེ་ག་ཏཱན་ བཱརའ་སྐུ་ཚབ་ སོང་ཐུར་ད་བུ་རང་ རོག་བུ་ སྐུ་ཚབ་ཨ་ཉི་ཆིན་མ༌ལ༎
Trenutno odabrano:
མཛད༌པ། 1: TNTB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Tshangla New Testament
© 2023, The Bible Society of India
all rights reserved